Omolwashike oshikunino shaEden tashi ti sha kungoye?

OSHINIMA shimwe oshikumithi noonkondo shoka aalongwantu oyendji ya popya kombinga yehokololo lyaEden osho kutya oshikunino shoka itashi popiwa mOmbiimbeli ayihe. Pashiholelwa, Omupolofesoli gwOmakonakono gElongelokalunga Paul Morris okwa nyola a ti: “Kapu na uuyelele wu ukilila kombinga yoshikunino shaEden.” Nonando yakwawo yalwe mboka hayi iti kutya aalongwantu oya taamba ko epopyo ndyoka, okutompathana kwe itaku tsu kumwe nuunzapo mboka wu li po.

Ombiimbeli oya popya lwiikando oyindji kombinga yoshikunino shaEden, Adam, Eva nosho wo eyoka.a Nonando aalongwantu yamwe yomuyo oya thika pehulithodhiladhilo lya puka shi na ko nasha nehokololo lyoshikunino shaEden, aawiliki yomalongelokalunga nosho wo aapataneki yOmbiimbeli oyo unene ye na okupewa uusama moshinima shoka. Ngiini mbela?

Opo omuntu a vule okuuva ko Ombiimbeli ayihe osha simana u uve ko shoka sha li sha ningwa muEden. Pashiholelwa, Oohapu dhaKalunga odha nyolwa nelalakano dhi tu kwathele tu mone omayamukulo komapulo ga simanenena ngoka aantu hayi ipula. Ombiimbeli otayi yamukula lwiikando niikando omapulo ngoka ge na ko nasha niiningwanima mbyoka ya li ya ningwa moshikunino shaEden. Tala kiiholelwa yimwe.

● Omolwashike hatu kulupa nohatu si? Adam naEva oya li ye na okukala nomwenyo sigo aluhe ando oya kalele mepangelo lyaJehova. Oya li owala taya ka sa ngele ye mu tukulile oshipotha. (Genesis 2:16, 17; 3:19) Oya li ya kanitha egwaneneno noluvalo lwawo olwa li lwa thigulula uulunde nokwaaha gwanenena. Osho molwaashoka Ombiimbeli tayi yelitha tayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano, eso olya taandele maantu ayehe, oshoka ayehe oya yono.”—Aaroma 5:12.

● Omolwashike Kalunga e etha pu kale uukolokoshi? Moshikunino shaEden, Satana oku ula Kalunga omufundja ngoka ha tindile iishitwa ye iinima iiwanawa. (Genesis 3:3-5) Kungawo, okwa tula uuthemba waJehova wokupangela momalimbililo. Adam naEva oya li ya hogolola okulandula Satana, onkee ano, nayo oya li ye ekelehi uunamapangelo waJehova, nokungawo oku ulike kutya omuntu ota vulu okutokola kuye mwene shoka oshiwanawa naashoka oshiwinayi. Omolwuuyuuki we nuunongo we wa gwanenena, Jehova okwa li e shi kutya opu na owala omukalo gumwe aguke gwokukandula po ompata ndjoka momukalo omwaanawa, sha hala okutya, okweetha pu pite ethimbo, opo a pe aantu ompito yi ipangele yo yene ngaashi ye shi hogolola. Uukolokoshi owu li po molwaashoka Satana a nwetha mo aantu nowa holola kashona nakashona uushili wolela kutya: Aantu itaya vulu okwiipangela yo yene ya manguluka ko kuKalunga.—Jeremia 10:23.

● Elalakano lyaKalunga li na ko nasha nevi olini? Moshikunino shaEden, Jehova okwa li a popi kutya oshike tashi ka kaleka oshikunino tashi monika nawa. Okwa li a lombwele Adam naEva yu udhithe evi noluvalo lwawo yo ye li ‘tule mepangelo lyawo,’ opo alihe li kale ewanawa lya fa oshikunino shoka. (Genesis 1:28) Onkee ano, Kalunga okwa lalakanena evi li kale oparadisa mu na oluvalo lwaAdam naEva lwa gwanenena nolwa hangana. Oshindji shoka shi li mOmbiimbeli oshi na ko nasha naashoka Kalunga ta longitha opo a gwanithe po elalakano lye lyopetameko.

● Omolwashike Jesus Kristus a li e ya kombanda yevi? Uunashipotha moshikunino shaEden owa ningitha Adam naEva ya pewe egeelo lyeso pamwe noluvalo lwawo aluhe, ihe Kalunga okwa li e lu pe nohole etegameno. Okwa li a tumu Omwana kombanda yevi opo a gandje shoka Ombiimbeli tayi ithana ekulilo. (Mateus 20:28) Shoka osha hala okutya shike? Osha hala okutya Jesus ngoka a li ‘Adam gwahugunina’ okwa galula shoka Adam a li a kanitha. Jesus okwa kala omuntu a gwanenena mokuvulika kuJehova. Okwa li a gandja omwenyo gwe gu li eyambo nenge iikulila, e shi ningi tashi wapa opo aantu ayehe ya dhiminwe po oondjo dhawo noya ka mone omwenyo ngoka Adam naEva ya li ya nyanyukilwa manga inaaya longa uulunde. (1 Aakorinto 15:22, 45; Johannes 3:16) Kungawo, Jesus okwa li a shilipaleke kutya elalakano lyaJehova lyokuninga evi ndika li kale lya fa oshikunino shaEden otali ka gwanithwa.b

Elalakano lyaKalunga kali shi oshininima inaashi yela nokali shi wo oshinima ihaashi monika. Olyo oshinima shoshili. Ngaashi owala oshikunino shaEden sha li ehala lyolela kombanda yevi huka, mu na iinamwenyo yolela nosho wo aantu yolela, ano, euvaneko lyaKalunga li na ko nasha nonakuyiwa olyolela notali ka gwanithwa. Mbela omo to ka kala? Oshindji oshi ikolelela kungoye mwene. Kalunga okwa halela aantu onakuyiwa ndjoka ombwanawa, nokuli naamboka onkalamwenyo yawo kaaya li pamithikampango dhe.—1 Timoteus 2:3, 4.

Sho Jesus a li pokusa, okwa li a popi nomulumentu ngoka onkalamwenyo ye ya li ye mu etele iilanduliko iiwinayi. Omulumentu okwa li omulongi gwiikulumuna nokwa li e shi kutya okwi ilongela okudhipagwa. Ihe okwa pula Jesus e mu hekeleke noku mu pe etegameno. Jesus okwe mu yamukula ngiini? Okwa ti: “Oto ka kala pamwe nangame moparadisa.” (Lukas 23:43) Ngele Jesus okwa hala okumona omuntu ngoka a li omulongi gwiikulumuna mehala moka, sha hala okutya, a yumudhwa nokwa lalekwa nuuyamba nompito yokukala nomwenyo gwaaluhe moparadisa ya fa oshikunino shaEden, mbela ine ku halela omalaleko nuuyamba ga faathana? Okwe ge ku halela nosho wo He okwe ge ku halela. Ngele owa hala okukala nonakuyiwa ya tya ngaaka, ninga ashihe shoka to vulu wu ilonge kombinga yaKalunga ngoka a tota po oshikunino shaEden.

[Omanyolo gopevi]

[Oshimpungu/Omathano pepandja 10]

EHUNGANEKO NDYOKA LYA MANGELA KUMWE OMADHILADHILO MOMBIIMBELI

“Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyula omutse gwoye, ongoye noto mu tsu moshithi shompadhi ye.”—Genesis 3:15.

Ndyoka olyo ehunganeko lyotango Kalunga a li a hunganeke moshikunino shaEden. Iinima mbika ine otayi thaneke shike: omukiintu, oluvalo lwe, eyoka, noluvalo lwalyo? Omomukalo guni pokati keyoka noluvalo pu na “etondathano”?

EYOKA

Satana Ondiaboli.—Ehololo 12:9.

OMUKIINTU

Ehangano lyaJehova lyiishitwa yomegulu. (Aagalati 4:26, 27) Jesaja okwa li a popi kombinga ‘yomukiintu,’ a hunganeke kutya ota ka vala oshigwana shopambepo shomonakuyiwa.—Jesaja 54:1, NW; 66:8.

OLUVALO LWEYOKA

Mboka ya hogolola okulonga ehalo lyaSatana.—Johannes 8:44.

OLUVALO LWOMUKIINTU

Jesus Kristus oye omuvalwa gwotango ngoka a za moshitopolwa shehangano lyaJehova shomegulu. ‘Moluvalo’ omwa kwatelwa wo aamwahe yaKristus yopambepo mboka taya ka pangela pamwe naye megulu. Aakriste aagwayekwa mboka oya thikama po ‘maantu yaKalunga’ mboka ye li Israeli shopambepo.—Aagalati 3:16, 29; 6:16; Genesis 22:18.

OSHILALO MOSHITHI SHOMPADHI

Mesiasa okwa li a tsuwa e ehama ihe oshilalo shoka inashi kalelela. Satana okwa li e shi pondola okudhipagitha Jesus sho a li kombanda yevi. Jesus okwa li a yumudhwa.

OSHILALO MOMUTSE

Satana ota ka nyanyagulwa po thiluthilu. Jesus ote ku mu hanagula po thiluthilu. Nokuli manga inaa ninga shoka, Jesus ota ka kutha po iilanduliko ayihe mbyoka Satana a li e eta po moshikunino shaEden.—1 Johannes 3:8; Ehololo 20:10.

Opo wu mone paufupi enenedhiladhilo lyOmbiimbeli, tala okabroshure Ombiimbeli oyi na etumwalaka lini? ka nyanyangidhwa kOonzapo dhaJehova.

[Ethano pepandja 11]

Adam naEva oya li ya mono iilanduliko iiwinayi yuulunde wawo