Taamba ombepo yaKalunga, ihe haandjoka yuuyuni

“Tse inatu pewa ombepo yuuyuni mbuka, ihe otwa pewa Ombepo ya zi kuKalunga, opo tu vule okutseya ashihe shoka Kalunga e shi tu pa.”—1 KOR. 2:12.

1, 2. (a) Omeityo lini Aakriste yashili ye li mekondjo? (b) Omapulo geni tatu ka kundathana?

AAKRISTE yashili oye li mekondjo. Omutondi gwetu omunankondo, omunamakoto noku na owino yokukondja. Ota longitha oshikondjitho kehe e na nuukeka opo a nwethe mo aantu oyendji. Ihe inatu pumbwa okukala tu uvite kaatu na oonkondo nenge kaatu na etegameno lyokupondola. (Jes. 41:10) Otu na egameno ndyoka tali vulu okukeelela eponokelo kehe.

² Ekondjo lyetu kali shi lyopanyama, ihe olyopambepo. Omutondi gwetu oSatana Ondiaboli, noshikondjitho oshinene shoka ha longitha osho “ombepo yuuyuni.” (1 Kor. 2:12) Ombepo yaKalunga oyo hayi tu gamene lelalela komaponokelo gaSatana. Opo tu hupe mekondjo ndika notu kale nekwatathano lyopothingo naKalunga, otwa pumbwa okupula ombepo ye nopo nduno tatu imike iiyimati yayo monkalamwneyo yetu. (Gal. 5:22, 23) Ihe ombepo yuuyuni oshike, nongiini ya nwetha mo aantu? Ongiini tatu vulu okumona kutya otwa nethwa mo kombepo yuuyuni? Oshike tatu vulu okwiilonga kuJesus kombinga yokupewa ombepo yaKalunga nokukondjitha ombepo yuuyuni?

Omolwashike ombepo yuuyuni yi li apuhe?

3. Ombepo yuuyuni oshike?

³ Ombepo yuuyuni mbuka oya za kuSatana ngoka e li “omupangeli guuyuni mbuka,” nota kondjitha ombepo ondjapuki yaKalunga. (Joh. 12:31; 14:30; 1 Joh. 5:19) Ombepo ndjoka oyo iikala mbyoka tayi pangele uuyuni ndjoka hayi ningitha aantu yi ihumbate momukalo moka hayi ihumbata. Oonkondo ndhika dhomwenyo, ohadhi wilike aantu ya kondjithe ehalo lyaKalunga nosho wo elalakano lye.

4, 5. Ongiini ombepo ndjoka Satana ta humitha komeho tayi ende tayi nwetha mo aantu apuhe?

⁴ Ongiini ombepo ndjoka Satana ta humitha komeho tayi ende tayi nwetha mo aantu apuhe? Tango, Satana okwa li a pukitha Eva moshikunino shaEden. Okwa li e mu itaalitha kutya ngele okwa kala a manguluka ko kuKalunga onkalamwenyo ye otayi ka kala yi li nawa. (Gen. 3:13) Kali tuu u ulike kutya omufundja! (Joh. 8:44) Opo nduno okupitila momukiintu okwa li a makele Adam a kale inaa vulika kuJehova. Aantu oya li ya landithwa po muulunde omolwehogololo lyaAdam, nokungawo oya li ya nwethwa mo kombepo yaSatana yokwaahavulika.—Lesha Aaefeso 2:1-3.

⁵ Satana okwa li wo a nwetha mo aayengeli oyendjiyendji mboka ya ka ninga oompwidhuli. (Eh. 12:3, 4) Okwaahe na uudhiginini muKalunga hoka okwa li ku ulikwa nale manga Eyelu lyaNoowa inaali ningwa. Aayengeli mboka oya li taya dhiladhila kutya otaya ka kala ye li nawa ngele oya thigi po omitumba dhawo megulu e taya landula omahalo gawo kombanda yevi. (Jud. 6) Kekwatho lyoompwidhuli ndhoka ngashingeyi kaadhi li we momalutu gadho gopantu, Satana ota “pukitha uuyuuni auhe.” (Eh. 12:9) Shi nikitha oluhodhi, aantu oyendji inaya tseya natango kutya opu na enwethomo lyoompwidhuli—2 Kor. 4:4.

Mbela ombepo yuuyuni oye ku nwetha mo?

6. Omomukalo guni tatu vulu okunwethwa mo kombepo yuuyuni?

⁶ Aantu oyendji kaye shi nkene Satana ha nwetha mo aantu, ihe Aakriste yashili oya kala nokulongwa kOmbiimbeli nkene he shi ningi. (2 Kor. 2:11) Muushili wo wene, ombepo yuuyuni itayi vulu oku tu nwetha mo kakele owala ngele twe etha yi shi ninge. Natu konakoneni omapulo gane ngoka tage ke tu kwathela tu mone ngele otwa nwethwa mo kombepo yaKalunga nenge okombepo yuuyuni.

7. Omomukalo gumwe guni Satana ha kambadhala oku tu topola ko kuJehova?

⁷ Okuhogolola kwandje omainyanyudho otaku ulike shike kombinga yandje? (Lesha Jakob 3:14-18.) Satana ota kambadhala oku tu topola ko kuKalunga moku tu makela tu kale tu hole elongithonkondo. Ondiaboli oyi shi shi kutya Jehova oku tonde kehe gumwe ngoka e hole elongithonkondo. (Eps. 11:5) Onkee ano, Satana oha kambadhala okulongitha iileshomwa, oomuvi, oomusika nosho wo omaudhano gopaelektronika, mbyoka oyo yimwe yomiinima mbyoka hayi hwahwamekele aadhani omilalo nosho wo elongithonkondo opo e tu nwethe mo tu kale twe yi hokwa. Satana ke na ko nasha ngele oshitopolwa shomutima gwetu shimwe oshi hole shoka oshiwinayi nonando otu hole ngaa shoka oshiwawanawa.—Eps. 97:10.

8, 9. Omapulo geni ge na ko nasha nomainyanyudho tu na okwiipula?

⁸ Mepingathano naashoka, ombepo yaKalunga ohayi inyengitha mboka haye yi pewa ya kale aayogoki, aanambili naanahenda. Otu na okwiipula ngeyi: ‘Mbela omainyanyudho ngoka handi kutha ombinga mugo ohaga ningitha ndje ndi kale ndi na omaukwatya omawanawa?’ Uunongo wopombanda kawu na ‘uufudhime.’ Mboka ya nwethwa mo kombepo yaKalunga ihayu uvithile aantu ooyakwawo kombinga yuuyogoki nombili nopo nduno taya kala nokwiinyanyudha nokutala meholamo elongithonkondo noluhondelo momagumbo gawo.

⁹ Jehova okwa tegelela tu mu longele oye awike. Ihe Satana okwa li a tegelela owala Jesus e mu galikane lumwe opo e mu pe omaukwaniilwa agehe. (Luk. 4:7, 8) Otashi vulika twi ipule ngeyi: ‘Mbela omainyanyudho ngoka nda hogolola otage shi ningi tashi wapa ndi longele Kalunga oye awike? Mbela ehogololo lyandje olye shi ninga oshidhigu noonkondo nenge olye shi ninga oshipu kungame okukondjitha ombepo yuuyuni? Mbela ondi na okuninga omalunduluko gontumba ngele tandi hogolola omainyanyudho monakuyiwa?’

10, 11. (a) Shi na ko nasha niinima yopamaliko, ombepo yuuyuni ohayi humitha komeho iikala yini? (b) Oohapu dhaKalunga dha nwethwa mo ohadhi tu ladhipike tu kale tu na iikala ya tya ngiini?

¹⁰ Ondi na iikala ya tya ngiini shi na ko nasha niinima yopamaliko? (Lesha Lukas 18:24-30.) Ombepo yuuyuni otayi humitha komeho “uuhalu wopantu okuhola mbyoka aantu taye yi tala” moku ya ladhipikila okahalu nokuhola omaliko. (1 Joh. 2:16) Oya kokeka maantu oyendji ehalo lyokukala ya hala okuninga aayamba. (1 Tim. 6:9, 10) Otayi ke tu itaalitha kutya okukala niinima oyindjiyindji yopamaliko otaku ke tu etela egameno tali kalelele. (Omayel. 18:11) Ihe ngele otwa kala tu hole iimaliwa komeho yokuhola Kalunga, Satana ota ka sindana. Otu na okwiipula ngeyi: ‘Mbela onkalamwenyo yandje oyu ukithwa unene kiinima yopamaliko nokomainyanyudho?’

¹¹ Mepingathano naashoka, Oohapu dhaKalunga dha nwethwa mo kombepo ye ondjapuki ohadhi tu ladhipike tu kale tu na etaloko lyiimaliwa li li pandjele notu longe nuudhiginini opo tu gwanithe po oompumbwe dhetu nodhomaukwanegumbo getu. (1 Tim. 5:8) Ombepo yaKalunga ohayi kwathele mboka haye yi pewa opo ya holele uukwatya waJehova wokugandja. Aantu ya tya ngaaka oya tseyika ye li aagandji, ihe haataambi owala. Oya lenga noonkondo aantu komeho giinima nohaya kala ya nyanyukwa okutopola nayalwe shoka ye na uuna taya vulu oku shi ninga. (Omayel. 3:27, 28) Ihaya pititha komeho nando okulalakanena iimaliwa komeho yokulongela Kalunga.

12, 13. Mepingathano nombepo yuuyuni, ongiini ombepo yaKalunga tayi vulu oku tu nwetha mo omolwuuwanawa wetu?

¹² Uukwatya wandje otawu ulike kutya onda nwethwa mo kombepo yini? (Lesha Aakolossa 3:8-10, 13.) Ombepo yuuyuni ohayi humitha komeho iilonga yonyama. (Gal. 5:19-21) Otatu ka mona kutya otwa nwethwa mo kombepo yini unene tuu ngele iinima itayi tu endele nawa, ihe hangele tayi tu endele nawa, pashiholelwa, ngele omumwatate nenge omumwameme te tu ipwililikile, e tu yemateka nenge nokuli a yona kutse. Kakele kaashono, otashi vulika shi kale shi iwetikile kutya momagumbo getu otwa nwethwa mo kombepo yini. Otashi vulika twa pumbwa okwiikonakona. Ipula to ti: ‘Mbela uukwatya wandje owa kala ngaa wa fa waKristus muule woomwedhi hamano dha piti, nenge onda tameka okupopya nokwiihumbata nayi ngaashi nda li nale?’

¹³ Ombepo yaKalunga otayi vulu oku tu kwathela ‘twi ihule omuntu omukulu pamwe nomikalo dhe’ notu zale “omuntu omupe.” Shoka otashi ke tu kwathela tu kale aanahole naanambili. Otatu ka kala tu na egamo lyokudhiminathana po, nokuli nongele tashi monika sha fa shi li mondjila okunyenyeta. Nokuli ngele twa ningwa nayi, otatu ka henuka iinima ngaashi “uululu auhe, ondjahi, nonkone, omakudhilo nenge omatukano.” Pehala lyaashono, otatu ka ninga oonkambadhala tu kale tu na ‘olukeno.’ — Ef. 4:31, 32.

14. Aantu oyendji muuyuni oya tala ko ngiini Oohapu dhaKalunga?

¹⁴ Mbela onda simaneka ngaa omithikampango dhopamikalo ndhoka dha popiwa mOmbiimbeli nondi dhi hole? (Lesha Omayeletumbulo 3:5, 6.) Ombepo yuuyuni ohayi ningitha omuntu kaa kale metsokumwe nOohapu dhaKalunga. Mboka ya nwethwa mo kombepo ndjoka ohayi ipwililikile omakotampango gamwe gOmbiimbeli ngoka itaaga ambidhidha oonkatu dhawo, nohaya hogolola okulandula omithigululwakalo nosho wo omaufilosofi gaantu. (2 Tim. 4:3, 4) Yamwe inaya simaneka Oohapu dhaKalunga adhihe. Aantu ya tya ngaaka oya limbililwa ngele Ombiimbeli oya simana ngaa noyi shi okwiinekelwa, noyi itala ko ye li aanandunge. Oya hekula omithikampango dhayo dha yogoka dhi na ko nasha neyonondjokana, uushenge nosho wo ehengathano. Ohaya longo aantu kutya ‘uuwanawa owo uuwinayi nuuwinayi owo uuwanawa.’ (Jes. 5:20) Mbela otwa nwethwa mo kombepo ndjoka? Mbela uuna twa taalelwa kuupyakadhi ohatu kala twi inekela uunongo waantu, mwa kwatelwa omadhiladhilo getu yene? Nenge ohatu kambadhala okulandula omayele gOmbiimbeli?

15. Pehala lyokwiinekela uunongo wetu yene, oshike tu na okuninga?

¹⁵ Ombepo yaKalunga ohayi tu ningitha tu kale twa simaneka Ombiimbeli. Otwa tala ko oohapu dhaKalunga ngaashi omupisalomi e dhi tala ko dhi li olamba yokoompadhi dhe nonyeka mondjila ye. (Eps. 119:105) Pehala lyokukala twi inekela uunongo wetu, otu na okukala twi inekela lelalela Oohapu dhaKalunga opo dhi tu kwathele tu mone shoka shu uka naashoka sha puka. Ihatu ilongo owala okusimaneka Ombiimbeli, ihe otu hole wo ompango yaKalunga.—Eps. 119:97.

Ilonga sha moshiholelwa shaJesus

16. Oshike sha kwatelwa mokukala ‘nomadhiladhilo gaKristus’?

¹⁶ Opo tu mone ombepo yaKalunga, otu na okukala tu na “omadhiladhilo gaKristus.” (1 Kor. 2:16) Okukala twa ‘landula oshiholelwa shaJesus Kristus’ otaku tu pula tu kale tu shi omukalo moka ha dhiladhila noha katuka nopo nduno tatu landula oshiholelwa she. (Rom. 15:5; 1 Pet. 2:21) Natu taleni omikalo dhimwe moka tatu vulu oku shi ninga.

17, 18. (a) Oshike tatu ilongo kuJesus kombinga yegalikano? (b) Omolwashike tu na okukala ‘nokwiindila’?

¹⁷ Galikana wu pewe ombepo ondjapuki. Jesus manga inaa hepekwa, okwa li a galikana Kalunga e mu pe ombepo ye ondjapuki opo yi mu kwathele. (Luk. 22:40, 41) Natse otwa pumbwa okupula Kalunga e tu pe ombepo ye ondjapuki. Jehova ohe yi gandja nehalo ewanawa nohe yi pe ayehe mboka taye yi pula ye na eitaalo. (Luk. 11:13) Jesus okwa ti: “Indileni, e tamu pewa; kongeni, e tamu mono; konkoleni, e tamu egululwa. Oshoka kehe ngoka ti indile, ota pewa; naangoka ta kongo, ota mono; naangoka ta konkola; ote egululwa.”—Mat. 7:7, 8.

¹⁸ Ngele to kongo ombepo yaJehova nosho wo ekwatho, ino endelela unene okweetha oku yi pula. Otashi vulika tu kale twa pumbwa okukala hatu galikana aluhe nohatu longitha ethimbo lya gwana. Omathimbo gamwe, Jehova ohe etha aagalikani ye yu ulike kutya otayi ipula shi thike peni nosho wo kutya eitaalo lyawo olya kola shi thike peni manga inaa yamukula omagalikano gawo.a

19. Oshike Jesus a li ha ningi aluhe, nomolwashike tu na oku mu holela?

¹⁹ Vulika thiluthilu kuJehova. Jesus okwa li ha longo aluhe iinima mbyoka tayi nyanyudha He. Oshikando shimwe, iikala ye yokuungaunga nonkalo oya li ya yooloka ko kwaashoka He a li a hala. Ihe nonando ongaaka, okwa li a lombwele He neinekelo a ti: “Tate, ngele oto shi pitika, oshitenga shika nashi pitilile ndje po. Ihe hamolwehalo lyandje, ihe olyoye li gwanithwe.” (Luk. 22:42) Ipula to ti: ‘Mbela ohandi vulika ngaa kuKalunga nokuli nuuna oku shi ninga kaaku shi okupu?’ Okuvulika kuKalunga oku li oshinima sha simanenena monkalamwenyo. Jehova oye tu na lela okuvulika kuye e li Omushiti gwetu, Onzo nOmukaleki po gwomwenyo. (Eps. 95:6, 7) Kapu na shoka tashi vulu okupingena po okuvulika kuye. Itatu vulu okukala twa hokiwa kuKalunga ngele ihatu vulika kuye.

20. Onkalamwenyo yaJesus oya li yi ikolelela kushike, nongiini tatu vulu oku mu holela?

²⁰ Tseya Ombiimbeli nawa. Sho Jesus a li ta kondjitha omaponokelo gaSatana ge na ko nasha neitaalo lye, okwa li a totha mOmanyolo. (Luk. 4:1-13) Sho a li ta popi naapataneki yopalongelokalunga, okwa li a wilikwa kOohapu dhaKalunga. (Mat. 15:3-6) Onkalamwenyo ye ayihe oya li yi ikolelela kokutseya nokugwanitha ompango yaKalunga. (Mat. 5:17) Natse otwa hala okutsikila nokupalutha omadhiladhilo getu nOohapu dhaKalunga ndhoka tadhi koleke eitaalo lyetu. (Fil. 4:8, 9) Okumona ethimbo lyekonakono lyopaumwene nolyuukwanegumbo otashi vulika shi kale eshongo kuyamwe yomutse. Ihe pehala lyokukala twa tegelela tu mone ethimbo, otashi vulika twa pumbwa okukonga ethimbo.—Ef. 5:15-17.

21. Elongekidho lini tatu vulu okulongitha li tu kwathele tu tseye nawa Oohapu dhaKalunga notu dhi tule miilonga?

²¹ “Omupiya omudhiginini nomunandunge” okwe tu kwathela tu kale tu na ethimbo lyekonakono lyopaumwene nolyuukwanegumbo mokulongekidha po Ekonakono lyUukwanegumbo lyokongulohi oshiwike kehe. (Mat. 24:45, KB) Mbela elongekidho ndika oho li longitha ngaa noondunge? Opo e ku kwathele wu kale wu na omadhiladhilo ga fa gaKristus, mbela ito vulu okukala ho kwatele aluhe mekonakono lyoye iipalanyolo mbyoka wa hogolola kombinga yaashoka Jesus a li a longo aantu? Oto vulu okulongitha o-Watch Tower Publications Index okumona uuyelele wu na ko nasha noonkundathana kombinga yoshipalanyolo shoka to konakona. Pashiholelwa, okuza mo 2008 sigo 2010 moshifo shOshiingilisa shoka hashi gandjwa muukalele, omu na iitopolwa 12 yi na oshipalanyolo: “What We Learn From Jesus (Shoka tatu ilongo kuJesus).” Otamu vulu okulongitha iitopolwa mbika pekonakono lyeni. Okutameka mo 2006, mo-Awake! omwa kala hamu kala oshitopolwa: “How Would You Answer? (Oto yamukula ngiini?)” Omapulo ngaka oga nuninwa oku ku kwathela wu tamunune mo ontseyo yoye yokutseya Oohapu dhaKalunga. Omolwashike mEkonakono lyUukwanegumbo weni itoo kwatele mo iitopolwa mbika omathimbo nomathimbo?

Otatu vulu okusinda uuyuni

22, 23. Otu na okuninga shike opo tu sinde uuyuni?

²² Opo tu wilikwe kombepo ondjapuki yaKalunga, otu na okukondjitha ombepo yuuyuni. Kashi shi oshipu okukondjitha ombepo ndjoka. Otaku vulu okukala ekondjo edhigu. (Jud. 3) Ihe otatu vulu okusindana. Jesus okwa li a lombwele aalanduli ye a ti: “Uuyuni otawu ke mú hepeka. Ihe inamu tila, ngame onda sinda uuyuni!”—Joh. 16:33.

²³ Otatu vulu okusinda uuyuni ngaashi ye ngele otwa kondjitha ombepo yawo nokuninga ashihe shoka tatu vulu opo tu pewe ombepo yaKalunga. Dhoshili, “Kalunga ngele oku li kombinga yetu, olye ta tsu ondumbo natse?” (Rom. 8:31) Ngele otwa pewa ombepo yaKalunga nokulandula ewiliko lyayo ngaashi sha popiwa mOmbiimbeli, otatu ka kala twa gwanenwa, tu na ombili, enyanyu notu na uushili kutya otatu ka mona omwenyo gwaaluhe muuyuni uupe mboka wu li popepi.

[Enyolo lyopevi]

Oto dhimbulukwa?

• Omolwashike ombepo yuuyuni yi li apuhe?

• Omapulo gane geni tu na okwiipula?

• Iinima itatu yini tu na okwiilonga kuJesus kombinga yokupewa ombepo yaKalunga?

[Ethano pepandja 10]

Ongiini aayengeli yamwe ya li ya ningi oompwidhuli?

[Ethano pepandja 12]

Satana oha longitha ombepo yuuyuni e ya pangele, ihe otau vulu okukala twa manguluka ko komanwethomo ge