Kondjifa “omhepo younyuni”

“Fye inatu tambula omhepo younyuni, ndelenee Omhepo tuu ei yomuKalunga.” — 1 KOR. 2:12.

1, 2. (a) Omolwashike kwa li haku tulwa ouyandja meemina muBritania mefimbo lonale? (b) Ovakriste ova taalela oshiponga shilipi?

MOMUDO 1911, epangelo laBritania ola li la tota po omhango oyo ya li ya nuninwa okwaamena eemwenyo dovanailonga vomeemina domakalamanya. Momina keshe okwa li mu na okukala oudila vouyandja vavali. Omolwashike mbela? Omolwaashi ngeenge momina omwa holoka omundilo, ovaxupifi vovanhu ova li ve na okutwaalela ouyandja momina opo ve va londwele. Oudila ovo vanininini ohava leelekwa diva keemhepo doudiyo, ngaashi oyo hai ifanwa carbon monoxide. Ngeenge momhepo omwa kala mu na omhepo youdiyo, oudila ovo ohava kala tava monika va leela, nohave lidepula nokuli pedu. Omadidiliko oo opehovelo ohaa kala a fimanenena. Omhepo yo-Carbon monoxide kai na oluvala nokai na edimba lasha, ndele ohai dipaa ovanhu mokuningifa eesele dohonde ditilyana diha twale omhepo yohapi molutu. Ngeenge ovaxupifi vovanhu inava londwelwa shi na sha noshiponga koudila ovo, otava dulu okungabuka ndele tava fi nopehe na okushiiva kutya ova fudila mo omhepo youdiyo.

² Ovakriste navo ove li monghalo ya fa yovanailonga vomeemina meityo lopamhepo. Ngahelipi mbela? Eshi Jesus a li a pa ovahongwa vaye oshilonga shokuudifa onghundana iwa mounyuni aushe, okwa li e shii kutya ote va tumu meenghalo da nyika oshiponga, odo tadi pangelwa kuSatana noda nwefwa mo komhepo younyuni. (Mat. 10:16; 1 Joh. 5:19) Molwaashi Jesus okwa li te lipula neenghono shi na sha novahongwa vaye moufiku oo wa tetekela efyo laye, okwa li a ilikana kuXe a ti: “Ihandi indile u va kufe mo mounyuni ou, ndele u va amene kowii.” — Joh. 17:15.

3, 4. Jesus okwa li a yandja elondwelo lilipi kovahongwa vaye, nomolwashike elondwelo olo lihokwifa kufye?

³ Jesus okwa li a londwela ovashikuli vaye kombinga yoshiponga osho hashi etifwa kokuhakala oupafi pamhepo, eshi a li e va ladipika a ti: ‘Pashukeni mu mone eenghono okuya onhapo ei aishe tai ka ningwa, nokukala ofika koshipala shOmona wOmunhu.’ (Luk. 21:34-36) Ndele lao linene, Jesus okwa li yo a udaneka kutya Xe ote ke va pa omhepo iyapuki opo i va dimbulukife oinima noi va kwafele va kale oupafi nova kale va pama. (Joh. 14:26) Eendjovo daye odo oda fimanenena kufye kunena, molwaashi otu li pefimbo laxuuninwa longhalelo yoinima.

⁴ Ongahelipi kombinga yetu kunena? Mbela omhepo iyapuki oyo Jesus a li a udanekela ovahongwa vaye otai dulu ngoo oku tu kwafela? Ngeenge otai dulu oku tu kwafela, otu na okuninga po shike opo tu i pewe? Omhepo younyuni oshike, nohai longo ngahelipi? Ongahelipi hatu dulu okukondjifa nomupondo omhepo younyuni? — Lesha 1 Ovakorinto 2:12.

Owa hala okukala to wilikwa komhepo iyapuki ile okomhepo younyuni?

5, 6. Omhepo iyapuki ohai tu kwafele ngahelipi, notu na okuninga po shike opo tu i pewe?

⁵ Ovakriste vomefelemudo lotete havo ashike va li va pewa omhepo iyapuki, ndele nokunena ohatu dulu okupewa omhepo iyapuki. Omhepo iyapuki yaKalunga otai dulu oku tu kwafela tu longe osho sha yuka noku tu pameka tu mu longele. (Rom. 12:11; Fil. 4:13) Otai dulu yo okukulika omaukwatya mawa mufye, ngaashi ohole, olune nosho yo ouwa, oo e li oshitukulwa ‘shoshiimati shomhepo.’ (Gal. 5:22, yelekanifa NW.) Ashike Jehova Kalunga iha kondjifile omhepo yaye iyapuki movanhu ovo inave i hala.

⁶ Onghee hano, oshi li pandunge okulipula kutya: ‘Ondi na okuninga po shike opo ndi dule okupewa omhepo iyapuki?’ Ombibeli otai ulike kutya ope na oinima ihapu oyo hatu dulu okuninga. Onghatu ya fimana noi li paunafangwa oyo okupula Kalunga e tu pe omhepo yaye. (Lesha Lukas 11:13.) Onghatu imwe vali tai longo oyo hatu dulu okukatuka oyo okukonakona Eendjovo daKalunga da nwefwa mo komhepo nokutula moilonga omayele ado. (2 Tim. 3:16) Ndele hakeshe umwe oo ha lesha ashike Ombibeli ngahenya ha pewa omhepo yaKalunga. Ngeenge Omukriste washili ta konakona Eendjovo daKalunga da nwefwa mo, ota ka kala ha tale ko oinima ngaashi Jehova he i tale ko. Osha fimanenena yo okudimina kutya Jehova okwa nangeka po Jesus e li omukalelipo waYe, nonokutya Jehova oha yandje omhepo yaye okupitila muye. (Kol. 2:6) Onghee hano, otwa hala okuhopaenena oshihopaenenwa shaJesus nosho yo okudulika komahongo aye. (1 Pet. 2:21) Apa ngoo pe fike okuhopaenena kwetu Kristus, opo ngoo ta pa ka kala pe fike okupewa kwetu omhepo iyapuki.

7. Omhepo younyuni ohai nwefa mo ngahelipi ovanhu?

⁷ Mepingafano nomhepo iyapuki, omhepo younyuni ohai nwefa mo ovanhu va kale ve na oikala ya fa yaSatana. (Lesha Ovaefeso 2:1-3.) Omhepo younyuni ohai longo meenghedi di lili noku lili. Ngaashi tu shi wete kunena mounyuni, omhepo oyo ohai xwaxwameke ovanhu va tukululile omifikamhango daKalunga oshibofa. Ohai xwaxwameke “okahalu kombelela nokahalu komesho noifulalala yokukalamwenyo.” (1 Joh. 2:16) Ohai imike oilonga yombelela, ngaashi oluhaelo, okulongela oikalunga, oundudu, ondubo, ehandu nosho yo oukolwe. (Gal. 5:19-21) Ohai xumifa yo komesho omapopyo oushunimonima oo haa nyateke osho shiyapuki. (2 Tim. 2:14-18) Nopehe na omalimbililo, ngeenge omunhu okwa efa a nwefwe mo komhepo younyuni, ota ka kala e na oikala ya fa yaSatana filufilu.

8. Atusheni otu na okuninga etokolo lilipi?

⁸ Ngeenge omunhu iha wilikwa komhepo iyapuki, ota nwefwa mo komhepo younyuni. Keshe umwe pauhandimwe oku na okutokola kutya okwa hala okukala ta wilikwa komhepo iyapuki ile okomhepo younyuni. Ovo va nwefwa mo komhepo younyuni kunena otava dulu okweefa po enwefemo layo ndele tava efa va kale tava wilikwa komhepo iyapuki. Mepingafano naasho, ovo va kala tava wilikwa komhepo iyapuki oule wefimbo oshi na oupu va nwefwe mo komhepo younyuni. (Fil. 3:18, 19) Natu ka konakoneni shi na sha nanghee hatu dulu okukondjifa omhepo younyuni.

Natu nongele omadidiliko oo tae tu londwele komesho yefimbo

9-11. Omadidiliko amwe elipi oo hae tu londwele komesho yefimbo kutya otashi dulika twa nwefwa mo komhepo younyuni?

⁹ Ovalongi vomeemina domakalamanya vokoBritania ovo va tumbulwa metetekelo ova li hava longifa ouyandja opo ve va londwele komesho yefimbo shi na sha nongeenge ope na omhepo youdiyo momudingonoko. Ngeenge ovalongi vomomina va li va mona okadila taka wile pedu, okwa li hashi va londwele kutya ova pumbwa okukatuka eenghatu meendelelo opo va xupe. Omadidiliko amwe elipi hae tu londwele komesho yefimbo kutya otwa nwefwa mo komhepo younyuni meityo lopamhepo?

¹⁰ Eshi twa li opo twe lihongo oshili oyo i li mEendjovo daKalunga nokuliyapulila Kalunga, otashi dulika twa li hatu lesha Ombibeli nouladi. Otashi dulika twa li hatu ilikana luhapu notwa xwama. Otwa li yo hatu kala twa hafela okuya kokwoongala keshe, hatu ku tale ko ku li odjo yetalaleko lopamhepo, ngaashi ofifiya yomeva komunhu a fya enota. Oinima oyo oya li ye tu kwafela tu efe po omhepo younyuni.

¹¹ Mbela ohatu kendabala ngoo natango okulesha Ombibeli efiku keshe? (Eps. 1:2) Mbela ohatu ilikana ngoo luhapu notashi di komutima? Mbela otu hole ngoo okwoongala, sha hala okutya, hatu i kokwoongala akushe oshivike keshe? (Eps. 84:11) Ile pamwe otwa efa po okuninga imwe yomoinima oyo pandjikilile? Otashi dulika shili tu na oinakuwanifwa ihapu oyo tai tu pula tu longife efimbo lihapu nosho yo eenghono detu, notashi dulu okukala shidjuu okuninga oinima yopamhepo pandjikilile. Ngeenge ihatu ningi vali imwe yomoinima oyo pandjikilile, mbela osheshi pamwe twa nwefwa mo komhepo younyuni? Mbela ohatu ningi eenghendabala da mana mo paife opo tu kale vali tu na onghedindjikilile yokuninga oinima yopamhepo ngaashi nale?

‘Inamu lolokifwa’

12. Jesus okwa li a lombwela ovahongwa vaye va ‘pashukile’ shike, nomolwashike?

¹² Oshike vali hatu dulu okuninga opo tu kondjife omhepo younyuni? Eshi Jesus a li a kumaida ovahongwa vaye va kale ‘va pashuka,’ okwa li ashike a hangwa opo e va londwele shi na sha noiponga imwe yokondadalunde. Okwa ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa, efiku olo li he mu vakele ngaashi omwiyo.” — Luk. 21:34.

13, 14. Osha wapala okulipula omapulo elipi shi na sha nokulya nokunwa?

¹³ Diladila shi na sha nelondwelo olo Jesus a li a yandja kovahongwa vaye. Mbela Jesus okwa li a tya ovanhu inava hafela okulya nokunwa? Hasho nandenande! Okwa li e shii eendjovo daSalomo odo tadi ti: “Onde shi mona nokutya, [ovana vovanhu] ve he nelao limwe, okuhafa ashike nokulonga osho shiwa mokukalamwenyo kwavo. Navali: oshali shaKalunga omunhu ngenge ta li ndee ta nu ndee ta shambukwa kouwa moshilonga shaye ashishe shidjuu.” (Omuud. 3:12, 13) Ndele nande ongaho, Jesus okwa li e shii kutya omhepo younyuni ohai xumifa komesho okuhenelipangelo mokulya nokunwa.

¹⁴ Ongahelipi hatu dulu okushilipaleka kutya inatu fudila mo oudiyo womhepo younyuni u na sha noiponga yokulya ile okunwa sha pitilila? Ohatu dulu okulipula kutya: ‘Ohandi linyenge ngahelipi ngeenge nda lesha omayele e na sha noufukedi mOmbibeli ile moishangomwa yetu? Mbela ondi na eamo lokutala ko ekumaido olo la fa itali longo ile la pitilila unene, tashi dulika handi lipopile ile handi liyukipalifa omolweenghatu dange?a Ohandi tale ko ngahelipi omayele e na sha noikunwa yoalkoholi, nongeenge ohandi nu, ohandi nu ngoo pandjele nokuhenuka filufilu ‘oukolwe’? Mbela ohandi kala nda dina omayele a tya ngaho, handi diladila kutya itaa longo lela kwaame? Ngeenge vamwe ova pe nge omayele kombinga yokunwa kwange, mbela ohandi lipopile ile ohandi va handukile? Mbela ohandi ladipike vamwe va kale va dina omayele Ombibeli a tya ngaho?’ Oikala yomunhu oyo hai ulike kutya okwa nwefwa mo komhepo younyuni ile hasho. — Yelekanifa Ovaroma 13:11-14.

Natu henukeni okuwililwa po koisho

15. Jesus okwa li a londwela shike kombinga yeamo lovanhu?

¹⁵ Onghatu imwe vali ya fimanenena omo hatu dulu okukondjifa omhepo younyuni oi na sha nanghee hatu ungaunga noisho. Jesus okwa li e shii kutya ovanhu inava wanenena ohava kala ve na eamo lokukala noisho i na sha noinima yongaho. Okwa li a lombwela ovahongwa vaye pahole a ti: “Efeni okukala noshisho.” (Mat. 6:25, NW) Oshi shii okuudiwa ko eshi tu na oshisho noinima oyo ya fimana, ngaashi okuhafifa Kalunga, okuwanifa po oinakuwanifwa yetu yopaKriste nosho yo okufila oshisho omaukwaneumbo etu. (1 Kor. 7:32-34) Mbela oshike hatu dulu okulihonga melondwelo laJesus?

16. Omhepo younyuni oya nwefa mo ngahelipi ovanhu vahapu?

¹⁶ Omhepo younyuni, oyo hai xumifa komesho oifulalala yokukalamwenyo, oya nwefa mo ovanhu vahapu noisho ya pitilila. Ounyuni owa hala tu itavele kutya oimaliwa oi li eameno nonokutya ongushu yomunhu ohai ufwa kongushu nokouhapu woiniwe oyo e na, ndele hakomaukwatya aye opamhepo. Ovo va pukifwa komitotolombo odo ohave lidipaele po opo va likole omaliko, nohava kala alushe ve na oisho i na sha nokulimonena oinima oyo ipe elela, inene noyoshinanena elela. (Omayel. 18:11) Etaleko la puka la tya ngaho li na sha noinima yopamaliko ohali etele ovanhu oisho oyo hai imbi omunhu a ninge exumokomesho lopamhepo. — Lesha Mateus 13:18, 22.

17. Ongahelipi hatu dulu okuhenuka okuwililwa po koisho?

¹⁷ Ohatu dulu okuhenuka okuwililwa po koisho ngeenge otwa dulika koshipango shaJesus osho tashi ti: “Kongeni tete ouhamba waKalunga nouyuki waye.” Jesus okwe tu shilipaleka kutya ngeenge otwa dulika keendjovo odo, ohatu ka wedelwa ko oinima oyo twa pumbwa shili. (Mat. 6:33) Ongahelipi hatu dulu okuulika kutya otwa itavela eudaneko olo? Onghedi imwe omo hatu dulu okukonga tete ouyuki waKalunga, oyo okukala hatu dulika komafinamhango aKalunga e na sha naasho sha yuka moinima i na sha noimaliwa. Pashihopaenenwa, ohatu henuka okupopya oipupulu ngeenge hatu yadeke eefoloma di na sha nokufuta oifendela ile okupopya oipupulu moinima i na sha neengeshefa detu. Ohatu ningi keshe osho hatu dulu opo tu fute oifutomwa yetu ile eendjo odo tu na, sha hala kutya, ohatu efa ‘oheeno yetu i kale heeno.’ (Mat. 5:37; Eps. 37:21) Okukala ovanashili itaku punapaleke omunhu, ndele otaku ningifa omunhu a kale a hokiwa kuKalunga, e na eliudo la koshoka notashi ka ninipika neenghono oisho yaye.

18. Jesus okwe tu tulila po oshihopaenenwa shiwa shilipi, nouwa ulipi hatu ka mona moku mu hopaenena?

¹⁸ Okukonga tete Ouhamba okwa kwatela mo okupitifa komesho oinima oyo ya fimana. Natu tale koshihopaenenwa shaJesus. Omafimbo amwe, okwa li ha djala oshikutu shondilo. (Joh. 19:23) Okwa li yo ha hafele okulya nokunwa omaviinyu pamwe nookaume kaye. (Mat. 11:18, 19) Ndele nande ongaho, oiniwe nosho yo omalihafifo oya li ashike ngaashi omongwa kuye, ndele hayo ya li oinima ya fimanenena. Oikulya yaJesus oya li okulonga ehalo laJehova. (Joh. 4:34-36) Onghalamwenyo yetu otai ka kala lela i na eityo ngeenge otwa hopaenene oshihopaenenwa shaJesus. Ohatu ka hafela okukwafela ovanhu ovo va fininikwa va mone ehekeleko okudja mOmishangwa. Ohatu ka kala tu holike keongalo notali ke tu kwafela, nohatu ka hafifa yo omutima waJehova. Ngeenge otwa pitifa komesho oinima oyo ya fimana, itatu ka ninga ovapika voiniwe nomalihafifo. Ponhele yaasho, oinima oyo otai ka kala ovapiya vetu, sha hala okutya, oilongifo oyo tai tu kwafele tu longele Jehova. Ngeenge otwa kala twe lipyakidila alushe moilonga oyo tai yambidida Ouhamba waKalunga, itatu ka nwefwa mo noupu komhepo younyuni.

Twikila ‘okudiladila pamhepo’

19-21. Ongahelipi hatu dulu okutwikila ‘okudiladila pamhepo,’ nomolwashike tu na okuninga ngaho?

¹⁹ Omadiladilo oo haa nwefa mo oilonga yomunhu. Oinima oyo ya talika ko kovanhu vahapu i li oilonga yokuhenakonasha luhapu ohai etifwa kokudiladila pambelela. Onghee hano, omuyapostoli Paulus okwe tu dimbulukifa kutya otwa pumbwa okulungamena osho hatu diladila. Okwa ti: “Ava ve li pambelela otava diladila eshi shopambelela, ndelenee ava ve li paMhepo otava diladila eshi shOmhepo.” — Rom. 8:5.

²⁰ Ongahelipi hatu dulu okuhenuka okudiladila kwetu, oko haku nwefa mo eenghatu detu, kuha nwefwe mo komhepo younyuni? Otu na okuninga eenghendabala da mana mo opo tu amene omadiladilo etu aha nwefwe mo komitotolombo dounyuni. Pashihopaenenwa, ngeenge hatu hoolola omalihafifo, ohatu henuka okunyateka omadiladilo etu mokuhatala eeprograma odo tadi xwaxwameke oluhaelo ile elongifo leenghono. Otu shii kutya omhepo iyapuki yaKalunga itai ka kala pamwe nafye ngeenge omadiladilo etu inaa koshoka. (Eps. 11:5; 2 Kor. 6:15-18) Kakele kaasho, ohatu efa omhepo yaKalunga i nwefe mo omadiladilo etu okupitila mokulesha Ombibeli, mokwiilikana, mokudilonga nosho yo mokukala pokwoongala pandjikilile. Ohatu longo yo mewiliko lomhepo ngeenge hatu kufa ombinga pandjikilile moilonga yokuudifa yopaKriste.

²¹ Otu na okukondjifa filufilu omhepo younyuni nosho yo omahalo opambelela oo hai xumifa komesho. Okuninga ngaho, otaku tu etele ouwa muhapu, ngaashi Paulus a ti: “Omadiladilo ombelela oo efyo, ndele omadiladilo Omhepo omwenyo nombili.” — Rom. 8:6.

[Eshangelo lopedu]

Oto dimbuluka?

• Otu na okuninga po shike opo tu pewe omhepo iyapuki?

• Omeenghedi dilipi omhepo younyuni tai dulu oku tu nwefa mo?

• Ongahelipi hatu dulu okukondjifa omhepo younyuni?

[Efano pepandja 25]

Kala ho ilikana u pewe omhepo iyapuki, fimbo ino ya koilonga ile kofikola

[Omafano pepandja 26]

Otu na okukaleka omadiladilo etu a koshoka, okuninga oinima yopangeshefa pauyuki nosho yo okukala tu na eenghedindjikilile di li pandjele