Mbela aagundjuka oye na okuninginithwa?

CARLOS,a omusamane gumwe Omukriste gwokuFilipine okwa ti: “Onda nyanyukwa noonkondo sho omumwandjekadhona ngashingeyi a ninga omupiya gwaJehova nondi shi shi kutya naye okwa nyanyukwa wo.” Omusamane gumwe gwokuGreka okwa li a nyola a ti: “Ngame nomukulukadhi gwandje otwa nyanyukwa sho aanona yetu yatatu ya li ya ninginithwa ye li Oonzapo dhaJehova mepipi lyokamukondapweyu. Otaya humu komeho pambepo notaya longele Jehova ya nyanyukwa.”

Aavali Aakriste oye na etompelo lyokukala ya nyanyukwa lela ngele aanona yawo ya ninginithwa, ihe ethimbo limwe enyanyu ndika ohali landulwa keikwato pomutima. Omuvalakadhi gumwe okwa ti: “Onda li nda nyanyukwa noonkondo, ihe onda li wo nda tila noonkondo.” Omolwashike mbela a li e na omaiyuvo ngaka taga kondjithathana? “Onda li ndi uvite ko kutya ngashingeyi omumwandjemati oku na oshinakugwanithwa shokwiihokolola thiluthilu ye mwene kuJehova.”

Aagundjuka ayehe oye na okukala ye na elalakano lyokulongela Jehova ye li Oonzapo dhe dha ninginithwa. Ihe nonando ongaaka, aavali aatilikalunga otashi vulika yi ipule taya ti: ‘Ondi shi shi kutya omumwandje okwa ninga ehumokomeho ewanawa, ihe mbela ota vulu ngaa okukondjitha omathiminiko gokuya momilalo nokukala a yogoka koshipala shaJehova?’ Yamwe otashi vulika yi ipule taya ti: ‘Okanona kandje ngele oka adhika kemakelo lyokulalakanena omaliko otaka ka tsikila ngaa okulongela Jehova nenyanyu nonuudhiginini?’ Ihe nando ongaaka, omayele gopaMbiimbeli geni taga vulu okukwathela aavali ya mone ngele oyana oya gwana okuninginithwa?

Okukala omulongwa gwaJesus oshi li oshitegelelwa sha simanenena shokuninginithwa

Pehala lyokupopya kutya omuntu oku na okukala e na oomvula ngapi opo a ninginithwe, Oohapu dhaKalunga odha popi owala kutya omuntu oku na okukala e na uupambepo wu li ngiini opo a katuke onkatu ndjoka. Jesus okwa li a lombwele aalongwa ye ya ‘ninge aantu ayehe aalongwa ye noku ya ninginitha.’ (Mat. 28:19, yelekanitha NW.) Onkee ano, mboka ye li nale aalongwa yaKristus oyo ye na okuninginithwa.

Okukala omulongwa otashi ti shike? Embo Insight on the Scriptures otali yelitha tali ti: “Uutumbulilo mbuka ohawu longithwa unene okupopya shi na ko nasha naayehe mboka haya landula omalongo gaJesus thiluthilu, ihe haku gi itaala owala.” Mbela aagundjuka yoomvula oonshona otaya vulu ngaa okukala aalongwa yaKristus yashili? Omumwameme gumwe ngoka a kala omutumwa muAmerika lyokUumbugantu uule woomvula dhi vulithe 40, okwa nyola kombinga ye noyaamwayinakadhona yaali a ti: “Otwa li twa thika mepipi lyokutseya kutya otwa hala okulongela Jehova noku ka kala mOparadisa. Eiyapulo lyetu olya li lye tu kwathele tu kondjithe omamakelo ngoka haga adha aagundjuka. Ihatu ipe nando uusama molwaashoka twi iyapulila Jehova manga twa li aashona.”

Ongiini to vulu okutseya kutya omumwoye okwa ninga omulongwa gwaKristus? Ombiimbeli otayi ti: “Nokuli okamati otaki iholola miilonga yako, ngele omikalo dhako omiwanawa nodhu uka.” (Omayel. 20:11) Konakona iilonga yimwe mbyoka tayi ulike kutya omugundjuka ota ningi ‘okuhuma komeho kwe ku monike kwaayehe’ e li omulongwa.—1 Tim. 4:15.

Shoka tashi ulike kutya omumwoye oku li omulongwa gwaKristus

Mbela omumwoye oha vulika ngaa kungoye? (Kol. 3:20) Mbela oha longo ngaa iilonga yomegumbo mbyoka ho mu pe? Ombiimbeli oya popya kombinga yaJesus sho a li e na oomvula 12 ya ti: ‘Okwa kala ha vulika kaavali ye.’ (Luk. 2:51) Odhoshili kutya kapu na okanona taka ka vulika thiluthilu kaavali yako kunena. Ihe Aakriste yashili oye na ‘okulandula ondjila ndjoka Jesus a li e yi ende.’ Onkee ano, aagundjuka mboka ye na ehalo lyokuninginithwa oye na okukala ye shiwike kutya ohaya vulika kaavali yawo.—1 Pet. 2:21.

Konakona omapulo ngaka taga landula: Mbela omumwoye oha ‘kongo ngaa tango Uukwaniilwa’ mokukutha ombinga pakuudha muukalele? (Mat. 6:33, yelekanitha KB.) Mbela oku na ngaa ehalo lyokukutha ombinga mokuuvithila yalwe onkundana ombwanawa nenge ongoye ho mu thiminike a ye muukalele nokupopya naantu miilonga yegumbo negumbo? Mbela oku na ko ngaa nasha noshinakugwanithwa she e li omuuvithi inaa ninginithwa? Mbela oku na ngaa ehalo lyokuninga omaishunoko kwaamboka a mona momapya ye na ohokwe? Mbela aanasikola ooyakwawo naalongi oye shi shi ngaa kutya ye Onzapo yaJehova?

Mbela okwa simaneka ngaa okuya kokugongala? (Eps. 122:1) Mbela oha nyanyukilwa ngaa okugandja omatyokosha pEkonakono lyOshungolangelo nopEkonakonombiimbeli lyEgongalo? Oha kutha ngaa ombinga nuulaadhi mOsikola yUukalele woPauteokratika?—Heb. 10:24, 25.

Mbela omumwoye oha kambadhala ngaa a kale a yogoka pamikalo mokuyanda eendathano ewinayi kosikola napalwe pwi ili? (Omayel. 13:20) Mbela oku hole oomusika, oomuvi, oopolohalama dhoko-TV dhini, omaudhano goovidio geni noha longitha ngiini o-Internet? Mbela oohapu dhe niilonga ye ohayi ulike ngaa kutya oku na ehalo lyokuvulika komithikampango dhOmbiimbeli?

Mbela omumwoye Ombiimbeli oku yi shi nawa shi thike peni? Mbela oha vulu okupopya niitya ye mwene shoka i ilonga pElongelokalunga lyuukwanegumbo? Mbela oha vulu ngaa okuyelitha oshili yOmbiimbeli yopetameko? (Omayel. 2:6-9) Mbela oku na ngaa ohokwe yokulesha Ombiimbeli nokukonakona iileshomwa yomupiya omudhiginini nomunandunge? (Mat. 24:45) Mbela oha pula ngaa omapulo kombinga yomalongo gOmbiimbeli nomanyolo gayo?

Omapulo ngoka otaga vulu oku ku kwathela wu mone ngele okwa huma komeho pambepo. Ngele we ga konakona, oto vulu ihe okuthika pehulithodhiladhilo kutya omiinima yini e na okuninga omalunduluko manga inaa ninginithwa. Ihe ngele onkalamwenyo ye otayi ulike kutya oku li omulongwa nokwi iyapulila Kalunga, oto vulu wu mu ethe a ninginithwe.

Aagundjuka otaya vulu okuhambelela Jehova

Aapiya yaKalunga oyendji oya li yu ulike uudhiginini wawo pethimbo lyokamukondapweyu nenge manga ya li inaaya thika mepipi ndyoka. Dhiladhila kombinga yaJosef, Samuel, Josia naJesus. (Gen. 37:2; 39:1-3; 1 Sam. 1:24-28; 2:18-20; 2 Ondjal. 34:1-3; Luk. 2:42-49) Oyanakadhona yaFilippus yane, mboka ya li haya hunganeke, oye na okukala ya li ya dheulwa nawa manga ya li aashona.—Iil. 21:8, 9.

Onzapo yimwe muGreka oya ti: “Onda li nda ninginithwa sho nda li ndi na oomvula 12. Ihandi ipe nando uusama omolwetokolo lyandje ndyoka. Ngashingeyi opwa pita oomvula 24 okuza sho nda ninginithwa, nonda kala miilonga yethimbo lyu udha oomvula 23. Ohole yandje yokuhola Jehova oya li ya kwathele ndje aluhe ndi taalele omaupyakadhi gomuugundjuka. Sho nda li ndi na oomvula 12, kanda li ndi na ontseyo yopamanyolo ndjoka ndi na ngashingeyi. Ihe onda li ndi shi shi kutya ondi hole Jehova nonda li nda hala ndi mu longele sigo aluhe. Onda nyanyukwa sho a kwathela ndje ndi tsikile noku mu longela.”

Kutya nduno owu li omugundjuka nenge omukokele, omuntu ngoka hu ulike kutya oku li omulongwa gwashili oku na okuninginithwa. Omuyapostoli Paulus okwa nyola a ti: “Ngoka i itaala nomwenyo gwe aguhe, ota ningi omuyuuki koshipala shaKalunga, naangoka ta hempulula nokana ke, ota hupithwa.” (Rom. 10:10) Uuna omugundjuka ngoka e li omulongwa gwaKristus a katuka onkatu ya simana yokuninginithwa, ye naavali ye oya ninga oshinima sha simanenena. Ino etha nando osha shi ku imbe nenge shi imbe omumwoye kaa mone enyanyu lya dhenga mbanda ndyoka lye mu tegelela.

[Enyolo lyopevi]

[Oshimpungu pepandja 5]

Etaloko li li nawa li na ko nasha nokuninginithwa

Aavali yamwe oya tala ko eninginitho lyoyana li li onkatu ombwanawa noyi na iilanduliko, sha faathana naanaa nokwiimonena ombaapila yokuhinga. Ihe mbela eninginitho niilonga iiyapuki otayi vulu ngaa okuningitha omuntu a kale a tila kutya ita ka pondola monakuyiwa? Ombiimbeli otayi ti aawe. Omayeletumbulo 10:22 otaga ti: “Eyambeko lyOmuwa otali yambapaleke, nuupyakadhi wiilonga itau gwedhele ko sha.” Omuyapostoli Paulus okwa li a nyolele omugundjuka Timoteus a ti: “Uukriste owo shili eliko enene, ihe ongele wa gwana naashoka u shi na.”—1 Tim. 6:6.

Odhoshili kutya okulongela Jehova kaku shi oshinima oshipu. Jeremia okwa li a taalelwa kuudhigu owundji miilonga ye sho a li omupolofeti gwaKalunga. Ihe nonando ongaaka, okwa li a nyola kombinga yokulongela kwe Kalunga kashili a ti: ‘Omuwa omunankondoawike, oohapu dhoye dhu udhitha omwenyo gwandje enyanyu nelago.’ (Jer.15:16) Jeremia okwa li e shi shi kutya okulongela Kalunga oko haku mu etele enyanyu. Uuyuni waSatana owu li onzo yuupyakadhi. Aavali oye na okukwathela oyana ya mone kutya pokati kokulongela Kalunga nokulandula uuyuni waSatana opu na eyooloko.—Jer. 1:19.

[Oshimpungu/Ethano pepandja 6]

Mbela omumwandje oku na okukaleka eninginitho?

Omathimbo gamwe aavali ohaya tokola okukaleka eninginitho lyoyana nonando oya gwana okuninginithwa. Ohashi vulika ye shi ninge molwomatompelo geni?

Ondi na uumbanda kutya okanona kandje ngele oka ninginithwa, konima yethimbo otashi vulika ka yone eyono lya kwata miiti e taka kondwa. Mbela kashi li pandunge okuzimina kutya omugundjuka ngoka ha kaleke eninginitho ote ki ihokolola ye mwene kuKalunga kombinga yeihumbato lye? Salomo okwa li a popi oohapu ndhika u ukilila aagundjuka a ti: ‘Kala u shi shi kutya Kalunga ote ke ku etela iilonga yoye mepangulo.’ (Omuuv. 11:9) Ihe omuyapostoli Paulus okwa li a lombwele omapipi agehe a ti: “Kehe gumwe gwomutse ote ki ihokolola koshipala shaKalunga polwe mwene.”—Rom. 14:12.

Aalongelikalunga mboka ya ninginithwa naamboka inaaya ningininthwa oye na oshinakugwanithwa shokwiihokolola kuKalunga. Ino dhimbwa kutya Jehova oha gamene aapiya ye ‘mokwaahe ya ethela memakelo li vule oonkondo dhawo.’ (1 Kor. 10:13) Shampa owala taya kala ya ‘kotoka’ notaya kondjitha omamakelo, otaya ka vula okukala yi inekela kutya Kalunga ote ke ya ambidhidha. (1 Pet. 5:6-9) Omuvalakadhi gumwe Omukriste okwa nyola a ti: “Aanona mboka ya ninginithwa oye na omatompelo ogendji gokukala kokule niinima iiwinayi yomuuyuni. Omumwandjemati ngoka a li a ninginithwa manga e na oomvula 15, oku uvite kutya eninginitho oli li egameno. Okwa ti: ‘Omuntu iho dhiladhila okuninga shoka shi li ompinge nomithikampango dhaJehova.’ Eninginitho ohali nkondopaleke omuntu a kale aluhe a hala okulonga uuyuuki.

Ngele owa dheula aamwoye moku ya lombwela nomoku ya tulila po oshiholelwa shokuvulika kuJehova, oto ka kala wu na einekelo kutya otaya ka tsikila okuninga ngaaka ngele ya ninginithwa. Omayeletumbulo 20: 7 otaga ti: “Nakutila Kalunga ota ningi omuyuuki, oyana oyo aanelago konakuyiwa.”

Onda hala okumona omumwandje ta gwanitha po omalalakano gontumba tango. Aagundjuka oye na okukala ye shi okulonga opo konima yethimbo ya vule okwiikwathela yo yene. Ihe osha nika oshiponga ngele owe ya ladhipike ya lalakanene elongo lyopombanda nokukala ye na egameno lyopashimaliwa pehala lyokugandja eitulomo kelongelokalunga lyashili. Jesus okwa popi kombinga ‘yoombuto’ nenge yoohapu dhUukwaniilwa ndhoka ihaadhi koko, a ti: “Ndhoka dha kunwa moongwena, oye ngoka ta pulakene oohapu, ihe oshimpwiyu shuuyuni mbuka nefundjaleko lyuuyamba otayi thininike oohapu, noita imike iiyimati.” (Mat. 13:22) Okulalakanena iinima yuuyuni pehala lyiinima yopambepo otaku vulu okuningitha omugundjuka kaa kale e na ehalo lyokulongela Kalunga.

Omukuluntugongalo gumwe a pyokoka okwa li a popi kombinga yaagundjuka mboka ya gwana okuninginithwa, ihe aavali yawo ihaye shi zimine a ti: “Okukeelela omugundjuka a ninginithwe ohashi yono po uupambepo we nohashi mu ningitha a kale a teka omukumo.” Omutonateli omweendi gumwe okwa li wo a nyola a ti: “Omugundjuka oha tameke u uvite inaa gamenwa pambepo nenge e wete kee na ongushu. Otashi vulika a lalakanene iinima mbyoka yi li muuyuni opo a kale u uvite e shi enditha nawa.”

[Ethano]

Mbela elongo lyokoUniveesiti olyo li na okuya tango?

[Ethano pepandja 3]

Omugundjuka ota vulu okuulika kutya oku li omulongwa gwaKristus

[Omathano pepandja 3]

Okwiilongekidhila okugongala nokukutha ombinga muko

[Ethano pepandja 4]

Okuvulika kaavali

[Ethano pepandja 4]

Okukutha ombinga muukalele

[Ethano pepandja 4]

Okugalikana paumwene