“Kaleni aasita yoshigunda shoka mwe shi pewa kuKalunga, mu shi tonatele”
“Kaleni aasita yoshigunda shoka mwe shi pewa kuKalunga, mu shi tonatele nehalo ewanawa, hakethiminiko.”—1 PET. 5:2.
1. Aakriste oya li ya taalelwa koonkalo dhini sho Petrus a nyola ontumwafo ye yotango?
OMUYAPOSTOLI Petrus okwa li a nyola ontumwafo ye yotango manga Nero inaa tameka okuhepeka Aakriste muRoma. Okwa li a hala okukoleka ooitaali ooyakwawo. Ondiaboli oya li hayi “kundukidha” Aakriste, ya hala yi ya ketsule po. Opo ye yi kondjithe nuulaadhi, oya li ye na okukala ya ‘kotoka’ nosho wo ‘yi ishonopeka kohi yoshikaha shoonkondo shaKalunga.’ (1 Pet. 5:6, 8) Oya li wo ya pumbwa okukala ya hangana. Kaya li ye na okukala taya ‘lumatathana notaye etelathana iiponga,’ molwaashoka shoka osha li tashi vulu oku ya ningitha ya “manathane po.”—Gal. 5:15.
2, 3. Olye tu na okukondjitha, noshike tatu ka konakona miitopolwa mbika ya pambathana?
2 Kunena, otwa taalela onkalo ya faathana. Ondiaboli otayi kongo oompito oku tu ketsula po. (Eh. 12:12) Monakuyiwa yi li popepi otaku ka kala “uudhigu uunene inaau kala ko nale okuza ketameko lyuuyuni.” (Mat. 24:21) Ngaashi naanaa Aakriste yomethelemumvo lyotango ya li ye na okwiikeelela kaaya kale ye na oontamanana mokati kawo, natse osho tu na okuninga. Opo tu shi ninge, omathimbo gamwe otwa pumbwa okukwathelwa kaakuluntugongalo.
3 Natu taleni nkene aakuluntugongalo taya vulu okuhwepopaleka olupandu lwawo lu na ko nasha nuuthembahenda wokulitha ‘oshigunda shoka ye shi pewa kuKalunga, ye shi tonatele.’ (1 Pet 5:2) Konima yaashoka, otatu ka konakona omukalo gu uka shi na ko nasha niilonga yokulitha. Moshitopolwa tashi landula, otatu ka konakona nkene egongalo tali vulu ‘okusimaneka mboka taa longo mokati koshigunda notaye shi wilike.’ (1 Tes. 5:12) Okukonakona iinima mbika otaku ke tu kwathela tu kondjithe nuulaadhi Omutondi gwetu omunene ngoka te tu kondjitha.—Ef. 6:12.
Kaleni aasita yoshigunda shaKalunga
4, 5. Aakuluntugongalo oye na okutala ko ngiini oshigunda? Shi thaneka.
4 Petrus okwa li a ladhipike aakuluntugongalo mboka ya li mokati kAakriste yomethelemumvo lyotango ya kale ye na etaloko lyopakalunga lyokutala ko oshigunda shoka yi inekelelwa. (Lesha 1 Petrus 5:1, 2.) Nonando okwa li a talika ko e li ongudhi yegongalo, Petrus ka li a popi nondhino naakuluntugongalo. Pehala lyaashono, okwa li e ya kumagidha ye li aakuluntugongalo ooyakwawo. (Gal. 2:9) Olutuwiliki kunena ohalu kumagidha aakuluntugongalo ya lalakanene okukala noshinakugwanithwa oshidhigu shokulitha oshigunda shoka ya pewa kuKalunga momukalo gwa fa ngoka Petrus a li e shi ningi.
5 Omuyapostoli okwa li a nyola kutya aakuluntugongalo oye na okukala ‘aasita yoshigunda shoka ya pewa kuKalunga ye shi tonatele.’ Osha li sha simanenena ya tseye kutya oshigunda oshaJehova naJesus Kristus. Oya li ye na oku ki ihokolola koshipala shaKalunga shi na ko nasha nankene ya kala taya tonatele oonzi dhaKalunga. Natu tye ando kuume koye kopothingo okwe ku pula wu tonatele aanona ye manga a za po. Mbela ito ke ya sila oshimpwiyu nawa noku ya palutha? Ngele kamwe oke ehama, mbela ito ka shilipaleka ka mone ekwatho lyopaunamiti ndyoka ka pumbwa? Sha faathana, aakuluntugongalo oye na ‘okulitha egongalo lyaKalunga ndyoka e li ilikolele neso lyOmwana.’ (Iil. 20:28) Ohaya kaleke momadhiladhilo kutya onzi kehe oya landwa nombinzi yi na ondilo yaJesus Kristus. Molwaashoka aakuluntugongalo oye na oshinakugwanithwa shokutonatela oshigunda, ohaye shi litha, ohaye shi gamene nohaye shi sile oshimpwiyu.
6. Aasita yonale oya li ye na oshinakugwanithwa shashike?
6 Dhiladhila kiinakugwanithwa mbyoka aasita yo yeneyene ya li haya kala ye na pethimbo lyOmbiimbeli. Oya li ye na okupya omutenya nokusa uutalala uusiku opo ya tonatele oshigunda. (Gen. 31:40) Oya li nokuli haya tula oomwenyo dhawo moshiponga omolwoonzi. Sho David a li omusita omugundjuka, okwa li a gamene oshigunda kiilikama, ngaashi onkoshi nemwanka. David okwa li a popi shi na ko nasha niilikama mbyoka a ti kutya onkoshi nemwanka okwa li e yi ‘kwata momunino e te yi dhipaga.’ (1 Sam. 17:34, 35) Kali tuu ependa! Konyala ina lika po tuu kiilikama mbyoka! Ihe nonando ongaawo, okwa li a ningi ashihe shoka ta vulu opo a hupithe oonzi.
7. Ongiini aakuluntugongalo taya vulu okuyakula onzi mokana kaSatana pathaneko?
7 Kunena, aakuluntugongalo oya pumbwa okutonatela oonzi kaadhi ponokelwe kOndiaboli ndjoka hayi ponoka ngaashi onkoshi. Shika otashi vulu okukala sha kwatela mo iilonga yuulaadhi yokuyakula onzi mokana kOndiaboli pathaneko. Mokukwata oshilikama momunino pathaneko, aakuluntugongalo otaya vulu okuhupitha onzi. Otaya vulu okupopya naamwatate inaaya pyokoka mboka taya makwelwa koomwigo dhaSatana. (Lesha Judas 22, 23.) Dhoshili, aakuluntugongalo shika ihaya vulu oku shi ninga kaapu na ekwatho lyaJehova. Ohayu ungaunga nohenda nonzi ndjoka ye ehamekwa, ohaye yi manga nohaye yi panga moku yi gwayeka omagadhi gOohapu dhaKalunga.
8. Aakuluntugongalo ohaya wilike oshigunda shi uke peni, nohaye shi ningi ngiini?
8 Omusita ye mwenemwene okwa li ha wilike wo oshigunda moku shi fala kuunapelo wu li nawa nokomeya. Sha faathana, aakuluntugongalo ohaya wilike oonzi dhi uke kegongalo, taye dhi ladhipike dhi kale hadhi yi kokugongala aluhe opo dhi vule okupaluthwa nawa nokumona “iikulya pethimbo lyayo.” (Mat. 24:45) Aakuluntugongalo otashi vulika ya pumbwa okulongitha ethimbo lya gwedhwa po okukwathela mboka taye ehama pambepo ya taambe ko iipalutha yomOohapu dhaKalunga. Onzi ndjoka ya falwafalwa otashi vulika yi kale tayi kambadhala okugalukila moshigunda. Pehala lyokutilitha omumwahe, aakuluntugongalo oye na oku mu yelithila nohenda omakotampango gopamanyolo noku mu ulukila nkene ta vulu oku ga tula miilonga monkalamwenyo ye.
9, 10. Ongiini aakuluntugongalo ye na okusila oshimpwiyu mboka taye ehama pambepo?
9 Uuna to ehama, mbela okondohotola yi li ngiini ho hogolola okuya? Mbela okwaangoka ha longitha ethimbo eshona okupulakena kungoye e te ku nyolele mbalambala omiti opo a kale a manguluka okumona omuvu ta landula ko? Nenge oto ka ya kwaangoka te ku pulakene nethimbo, te ku yelithile shoka tashi vulika sha puka nangoye e te ku pe uuyelele paufupi wepango ndyoka ta vulu oku ku pa?
10 Sha faathana, aakuluntugongalo otaya vulu okupulakena komuntu ngoka te ehama pambepo nokukwathela okupanga iilalo ye, kungawo, otaye “mu gwayeke omagadhi medhina lyOmuwa” pathaneko. (Lesha Jakob 5:14, 15.) Ngaashi omugwayo gwokuGilead, Oohapu dhaKalunga otadhi vulu okwaaludha omuntu. (Jer. 8:22; Hes. 34:16) Uuna omakotampango gOmbiimbeli taga longithwa, otaga vulu okukwathela omutengatengi a kale ishewe e na ondjele mokulongela kwe Jehova. Eeno, aakuluntugongalo ohaya kwathele noonkondo uuna yu uva uupyakadhi mboka onzi yi na nokugalikana pamwe nayo.
Nehalo ewanawa, hakethiminiko
11. Oshike hashi inyengitha aakuluntugongalo ya lithe oshigunda shaKalunga nehalo ewanawa?
11 Petrus okwa li natango a dhimbulukitha aakuluntugongalo nkene ye na okulitha oshigunda naashoka kaaye na okuninga. Oye na okulitha oshigunda shaKalunga ‘nehalo ewanawa, hakethiminiko.’ Oshike hashi yi inyengitha ya yakule aamwahe nehalo ewanawa? Oshike sha li shi inyengitha Petrus a lithe nokupalutha oonzi dhaJesus? Oshinima sha simanenena shoka sha li she mu inyengitha osha li ohole yokuhola Omuwa. (Joh. 21:15-17) Molwohole, aakuluntugongalo ihayi ‘ikalele we yo yene, ihe ohaya kalele nguka a si molwawo nokwa yumudhwa molwawo.’ (2 Kor. 5:14, 15) Ohole ndjoka tayi endele pamwe nohole yawo yokuhola Kalunga nosho wo aamwahe, ohayi yi inyengitha ya yakule oshigunda, taya longitha iiniwe yawo nohashi ya pula wo ya ninge oonkambadhala dha mana mo. (Mat. 22:37-39) Ohayi igandja nehalo ewanawa, ihe hanokungungutula.
12. Omuyapostoli Paulus okwa li a longo shi thike peni?
12 Aakuluntugongalo oye na okulonga shi thike peni? Oye na okuholela omuyapostoli Paulus mokusila oshimpwiyu onzi nokuli naanaa ngaashi a li a holele Jesus. (1 Kor. 11:1) Mokukala e nine olukeno aamwahe Aatessalonika, Paulus nooyakwawo oya li ya nyanyukilwa noonkondo oku ya nwetha mo ‘hanonkundana ombwanawa owala ya za kuKalunga, ihe oya hupula wo oomwenyo dhawo omolwawo.’ (Yelekanitha NW.) Sho ya li taye shi ningi, oya kala mokati kawo nombili, “ngaashi meme ta sile oshimwiyu oyana.” (1 Tes. 2:7, 8) Paulus okwa li e uvite ko nkene omuvali ha kala u uvite shi na ko nasha noyana. Okwa li ta vulu okuninga kehe shimwe omolwawo, mwa kwatelwa okupenduka mokati kuusiku e ya yamuthe.
13. Aakuluntugongalo oye na okukala ye na ondjele mushike?
13 Aakuluntugongalo oye na okusa oshimpwiyu ya kale ye na ondjele mokuungaunga niinakugwanithwa yokulitha noyokusila oshimpwiyu omaukwanegumbo gawo yene. (1 Tim. 5:8) Ethimbo ndyoka aakuluntugongalo haya longitha megongalo oli na ondilo noya li taya vulu oku li longitha mokukala nomaukwanegumbo gawo. Omukalo gumwe gu na ko nasha nokukala nondjele miinakugwanithwa mbika iyali ogwo okuhiya yalwe kElongelokalunga lyUukwanegumbo lyokongulohi. Oomvula dha piti, Masanao, omukuluntugongalo muJapani, okwa li a hiya mboka inaaya hokana nenge inaaya hokanwa nosho wo omaukwanegumbo moka mu na aanona kaaye na oohe yopambepo kekonakono lyuukwanegumbo wawo. Konima yethimbo, yamwe mboka a li a kwathele oya li ya ningi aakuluntugongalo noya li ya landula oshiholelwa she oshiwanawa.
Yandeni elalakano tali sitha ohoni lyokukonga eliko, kaleni aasita yoshigunda tamu longo nehalo tali zi momwenyo
14, 15. Omolwashike aakuluntugongalo ye na okukotokela ‘elalakano lyokukonga eliko tali sitha ohoni,’ nongiini taya vulu okuholela Paulus moshinima shika?
14 Petrus okwa li wo a ladhipike aakuluntugongalo kaaya lithe oshigunda “nelalakano tali sitha ohoni lyokukonga eliko, ihe onehalo tali zi momwenyo.” Iilonga yaakuluntugongalo ohayi pula ethimbo olindji, ihe nonando ongaaka, ihaya kala ya tegelela okupewa oshimaliwa. Petrus okwa li a mono kutya osha pumbiwa okulondodha aakuluntugongalo ooyakwawo kombinga yoshiponga shokulitha oshigunda “nelalakano tali sitha ohoni lyokukonga eliko.” Oshiponga shoka oshi iwetikile monkalamwenyo yuuzeko moka mu na aawiliki yomalongelokalunga ‘gaBabiloni oshinene’ omanga aantu oyendji ye li moluhepo. (Eh. 18:2, 3) Aakuluntugongalo kunena oye na etompelo ewanawa okukala ya kotokela iikala kehe yi na ko nasha naashoka.
15 Paulus okwa tulila po aakuluntugongalo Aakriste oshiholelwa oshiwanawa. Nonando okwa li omuyapostoli nokwa li ta vulu ‘okweetela uupyakadhi’ Aakriste yokuTessalonika, ina ‘taamba nando okulya iikwatha yasha, inee yi futila.’ Pehala lyaashono, okwa li a “longo nokwiihepeka uusiku nomutenya.” (2 Tes. 3:8) Aakuluntugongalo oyendji yokunena mwa kwatelwa aatonateli aaendi, ohaya tula po oshiholelwa oshiwanawa mwaashika. Nonando ohaya taamba eyakulo lyaayenda ndyoka haya pewa kooitaali ooyakwawo, ihaye ‘etele nando ogumwe uupyakadhi washa.’—1 Tes. 2:9.
16. Otashi ti shike okulitha oshigunda “nehalo tali zi momwenyo”?
16 Aakuluntugongalo oye na okukala haya litha oshigunda “nehalo tali zi momwenyo.” Ehalo lyawo ndyoka oli na okukala li iwetikile miikala yawo yokwiiyamba mokukwathela oshigunda. Ihe shika itashi ti kutya oye na oku shi thiminika shi longele Jehova nenge ye shi ladhipike shi mu longele nombepo yethigathanepo. (Gal. 5:26, NW) Aakuluntugongalo oye na okukala yu uvite ko kutya onzi kehe oyi ikalekelwa. Oye na okukala ye na ehalo ewanawa okukwathela aamwahe ya longele Jehova ya nyanyukwa.
Inamu pangela oshigunda, ihe kaleni oshiholelwa
17, 18. (a) Omolwashike aayapostoli omathimbo gamwe ya li ye na uupyakadhi wokuuva ko elongo lyaJesus li na ko nasha neifupipiko? (b) Otashi vulika natse tu kwatwe kegamo lini?
17 Ngaashi twe shi kundathana nale, aakuluntugongalo oye na okudhimbulukwa kutya oshigunda shoka taya litha oshaKalunga, kashi shi shawo. Oye na okukala ya kotoka ‘kaaya pangele mboka ye ya pewa kuKalunga.’ (Lesha 1 Petrus 5:3.) Omathimbo gamwe, aayapostoli yaJesus oya li taya lalakanene iinakugwanithwa ye na einyengotompelo lya puka. Ngaashi mboka ya li taya pangele iigwana, aayapostoli oya li ya hala okukala ye na ondondo ya simana.—Lesha Markus 10:42-45.
18 Kunena, aamwatate mboka taya “lalakanene uukuluntugongalo,” otaya ningi nawa ngele tayi ipula kutya omolwashike ya hala okuninga aakuluntugongalo. (1 Tim. 3:1, NW) Mboka ye li aakuluntugongalo ngashingeyi oye na okwiikonakona paushili ngele oye na ehalo lyokukala ye na oonkondopangelo nenge okukala ya simana ngaashi yamwe yomaayapostoli ya li ya ningi. Ngele aayapostoli oya li ye na uupyakadhi moshinima shika, nena aakuluntugongalo otaya vulu okukala yu uvite ko kutya oya pumbwa okulonga nuudhiginini opo ya yande iikala kehe yuuyuni yokunyanyukilwa okukala taya pangele yalwe.
19. Aakuluntugongalo oye na okudhimbulukwa shike uuna taya gamene oshigunda?
19 Dhoshili, opu na omathimbo gamwe ngoka aakuluntugongalo ya pumbwa okukala ya kola, ngaashi uuna taya gamene oshigunda ‘komambungu haga lyana.’ (Iil. 20:28-30) Paulus okwa li a lombwele Titus a ‘longithe oonkondo adhihe ndhoka e dhi na mokutsa omukumo nomokupukulula mboka taye mu pulakene.’ (Tit. 2:15) Ihe nonando ongaaka, nokuli nuuna sha kwatela mo iinima yopampangu, aakuluntugongalo ohaya kambadhala okuungaunga nesimaneko naamboka ya kwatelwa mo. Oyu uvite ko kutya pehala lyokuungaunga nayo nonyanya, okutompathana nayo nombili olundji ohaku longo noonkondo mokwaadha omitima dhawo noku yi inyengitha ya landule ondjila yu uka.
20. Ongiini aakuluntugongalo taya vulu okuholela Jesus mokutula po oshiholelwa oshiwanawa?
20 Oshiholelwa oshiwanawa shaKristus ohashi inyengitha aakuluntugongalo ya kale ye hole oshigunda. (Joh. 13:12-15) Omitima dhetu ohadhi inyengithwa uuna tatu lesha nkene Kristus a li a longo aalongwa ye okuuvitha nokuninga aantu aalongwa. Oshiholelwa she sheifupipiko osha li sha gumu omitima dhaalongwa ye, noshe yi inyengitha ya kale ye na ‘eifupipiko nokukala itaaya dhiladhila kutya oyo aawanawa ye vule yalwe.’ (Fil. 2:3) Sha faathana, kunena aakuluntugongalo ohayi inyengithwa ya landule oshiholelwa shaJesus, noya hala wo okukala “ye shi okuholelwa kegongalo.”
21. Aakuluntugongalo oya tegelela omalaleko nuuyamba geni?
21 Petrus sho a li ta kumagidha aakuluntugongalo, pehulilo okwa popi shoka yu uvanekelwa oku ka pewa monakuyiwa. (Lesha 1 Petrus 5:4.) Aakuluntugongalo aagwayekwa otaya “ka pewa oshishani sheadhimo itaali kana” pamwe naKristus megulu. Aasita ‘yoonzi dhilwe’ mboka taya litha oshigunda ye li kohi yewiliko lyaKristus, otaya ka kala ye na uuthembahenda wokulitha oshigunda shaKalunga kombanda yevi kohi yepangelo ‘lyOmusita omukuluntu.’ (Joh. 10:16) Moshitopolwa tashi landula otatu ka kundathaneni omikalo moka iilyo yegongalo tayi vulu okuyambidhidha mboka ya langekwa po ya kwatele komeho.
Omapulo geendululo
• Omolwashike sha li shu uka kuPetrus a kumagidhe aakuluntugongalo ooyakwawo ya lithe oshigunda shaKalunga shoka shi li mesiloshimpwiyu lyawo?
• Aakuluntugongalo oye na okulitha ngiini mboka taye ehama pambepo?
• Oshike hashi inyengitha aakuluntugongalo ya lithe oshigunda shaKalunga shoka shi li mesiloshimpwiyu lyawo?
[Ethano pepandja 21]
Ngaashi aasita yomethimbo lyonale, kunena aakuluntugongalo oye na okugamena “oonzi” ndhoka dhi li mesiloshimpwiyu lyawo