‘Simanekeni mboka taya longo nuudhiginini mokati keni’
‘Simanekeni mboka taya longo nuudhiginini mokati keni. Omuwa Kalunga oye e ya hogolola, ye mú wilike noye mu pukulule.’—1 TES. 5:12.
1, 2. (a) Megongalo lyomuTessalonika omwa li mu na onkalo yini sho Paulus a li e ya nyolele ontumwafo yotango? (b) Paulus okwa li a ladhipike Aatessalonika ya ninge shike?
DHILADHILA ando wu li oshilyo shegongalo lyaTessalonika lyomethelemumvo lyotango, limwe lyomomagongalo ngoka ga li ga totwa tango muEuropa. Omuyapostoli Paulus okwa li a kala moka ethimbo lya gwana ta tungu pambepo aamwahe. Otashi vulika a li a langeke po aalumentu ya pyokoka pambepo opo ya kwatele komeho, ngaashi naanaa sha li hashi ningwa momagongalo galwe. (Iil. 14:23) Ihe konima sho egongalo lya totwa, Aajuda oya li yu unganeke ongundu yaahangakeni opo ya tidhe mo Paulus naSilas moshilando. Aakriste mboka ya li ya thigala moka otashi vulika ya li yu uvite owike, tashi vulika nokuli ya li ye na uumbanda.
2 Konima sho Paulus a zi muTessalonika okwa li ti ipula negongalo ndyoka lya li inaali koka natango pambepo. Okwa li ta kambadhala a galuke, ihe ‘Satana okwe mu keelele’ kaa galuke. Onkee ano, okwa li a tumu ko Timoteus e ke li ladhipike. (1 Tes. 2:18; 3:2) Sho Timoteus a li e eta onkundana ombwanawa, Paulus okwa li i inyengithwa a nyolele Aatessalonika ontumwafo. Kakele kiinima yilwe, Paulus okwa li a e ya ladhipike ya ‘simaneke mboka taya longo mokati kawo.’—Lesha 1 Aatessalonika 5:12, 13.
3. Aakriste yomuTessalonika oya li ye na omatompelo geni gokugandja eitulomo lyi ikalekelwa kaakuluntugongalo?
3 Aamwatate mboka ya li taya longo mokati kAakriste Aatessalonika kaya li ya pyokoka ngaashi Paulus nosho wo aayendi pamwe naye nokaya li ye na ontseyo ngaashi aakuluntugongalo yomuJerusalem. Kakele kaashono, egongalo olya li lya adhika owala lya kala po uule woomwedhi dhontumba. Natango, mboka ya li megongalo oya li ye na omatompelo gokukala ye na olupandu lwaakuluntugongalo mboka ya li taya “longo” nuudhiginini megongalo notaya ‘pukulula’ aamwahe. Dhoshili, oya li ye na omatompelo omawanawa ‘gokusimaneka aakuluntugongalo nokukala ye ya hole omolwoshilonga shoka taye shi longo.’ Eindilo ndika olya li lya landulwa komayele gaPaulus ya ‘kale ye na ombili mokati kawo.’ Ando omo wa li muTessalonika, mbela ando owu ulike ngaa olupandu lwomuule lwiilonga mbyoka aakuluntugongalo haya longo? Owa tala ko ngiini “aantu ye li omagano” mboka Kalunga a langeka po megongalo lyeni okupitila muKristus?—Ef. 4:8, NW.
Aakuluntugongalo ‘ohaya longo’ nuudhiginini
4, 5. Omolwashike aakuluntugongalo yopethimbo lyaPaulus ya li ye na okulonga nuudhiginini megongalo, nomolwashike osho shi li wo ngaaka nokunena?
4 Konima sho aakuluntugongalo yomuTessalonika ya li ya tumu Paulus naSilas kuBerea, aakuluntugongalo mboka oya li taya “longo” ngiini nuudhigini? Nopwaahe na omalimbililo, mokuholela Paulus oya li ya longo egongalo taya longitha Omanyolo. Otashi vulika wi ipule kutya ‘mbela Aakriste yomuTessalonika oya li ye na olupandu lwOohapu dhaKalunga?’ Kakele kaashono, Ombiimbeli oya ti kutya Aaberea oya li ye na ‘ehalo ewanawa lyokutaamba ye vule mbeyaka yomuTessalonika, nesiku kehe oya kala nokukonakona Omanyolo.’ (Iil. 17:11) Efaathanitho olya li tali ningwa shi na ko nasha nAajuda Aatessalonika yo yene, ihe hanAakriste. Mboka ya li ya ningi ooitaali oya ‘taamba oohapu dhaKalunga, hangaashi oohapu dhomuntu, ihe odhaKalunga.’ (1 Tes. 2:13) Osha yela kutya aakuluntugongalo oya li ya longo nuudhiginini opo ya paluthe pambepo aantu mboka.
5 Kunena, ongundu yomupiya omudhiginini nomunandunge otayi pe oshigunda shaKalunga “iikulya pethimbo lyayo.” (Mat. 24:45) Aakuluntugongalo ohaya longo nuudhiginini mokupalutha aamwahe pambepo mewiliko lyomupiya ngoka. Mboka ye li momagongalo otashi vulika ya kale ye na iileshomwa oyindji ya kankamena kOmbiimbeli, nomomalaka galwe omu na iilongithomwa ngaashi o-Watch Tower Publications Index no-Watchtower Library muungalo wokokompiuta hawu ithanwa CD-ROM. Opo ya gwanithe po oompumbwe dhegongalo dhopambepo, aakuluntugongalo ohaya longitha ethimbo lyawo olindji mokwiilongekidha iitopolwa yawo yi na ko nasha nokugongala opo ye yi gandje naanaa momukalo tagu longo. Mbela owu na ngaa esiku wa dhiladhilile kombinga yethimbo ndyoka hali longithwa kaakuluntugongalo mokwiilongekidha iitopolwa mbyoka haya gandja pokugongala nosho wo piigondji iishona niinene?
6, 7. (a) Oshiholelwa shini Paulus a li a tulile po aakuluntugongalo yomuTessalonika? (b) Omolwashike tashi vulu okukala eshongo kaakuluntugongalo kunena ya holele Paulus?
6 Aakuluntugongalo yomuTessalonika oya li ya dhimbulukwa oshiholelwa oshiwanawa shaPaulus shoka a li a tula po mokulitha oshigunda. Ka li owala ha ningi omatalelopo guusita molwaashoka shi li oshinakugwanithwa she. Ngaashi sha kundathanwa moshitopolwa sha tetekele, Paulus okwa ‘kala nombili, ngaashi omuvalakadhi ta sile oshimpwiyu oyana.’ (Lesha 1 Aatessalonika 2:7, 8.) Okwa li nokuli e na ehalo ‘lyokuhupula omwenyo gwe.’ Uuna aakuluntugongalo taya litha oshigunda oya li ye na oku shi litha ngaashi ye.
7 Aakuluntugongalo Aakriste kunena oye na okuholela Paulus mokukala ye hole oshigunda. Oonzi dhimwe otashi vulika dhi kale kaadhi na ohenda nokaadhi shi oompu okukaliwa nadho paunshitwe. Nonando ongawo, aakuluntugongalo oye na okukambadhala okukala hayu uvu ko omaupyakadhi gadho ‘nokumona uuwanawa’ mudho. (Omayel. 16:20, KB) Dhoshili, omolwokwaahagwanena, otashi vulika shi kale oshidhigu komukuluntugongalo a kale e na etaloko ewanawa lyi na ko nasha noshilyo kehe shegongalo. Nonando ongawo, sho ta kambadhala ngaashi ta vulu a longele aantu ayehe uuwanawa, mbela ke na okupandulwa uuna ta ningi oonkambadhala a kale omusita omwaanawa e li mewiliko lyaKristus?
8, 9. Omomikalo dhimwe dhini aakuluntugongalo yokunena ‘haya tonatele oomwenyo dhetu’?
8 Atuheni otu na omatompelo ‘gokuvulika’ kaakuluntugongalo. Ngaashi Paulus a nyola, ‘ohaya tonatele oomwenyo dhetu.’ (Heb. 13:17) Uutumbulilo mboka otawu tu dhimbulukitha omusita ye mwenemwene ngoka ihaa kotha omolwokugamena uusita we. Sha faathana, aakuluntugongalo kunena otashi vulika ya ninge omaiyambo kaaya kothe omolwokugwanitha po oompumbwe dhaamboka kaaye na uukolele, ye na uupyakadhi wopamadhiladhilo nenge wopambepo. Pashiholelwa, aamwatate mboka ye li iilyo yOokomitiye dhOkukwatathana nIipangelo ohaya pendulwa moomposi opo ya ka kwathele mboka ya pumbwa ekwatho lyopaunamiti. Ihe nonando ongawo, ihatu kala tuu twa pandula iilonga yawo mbyoka uuna tu li moonkalo dha tya ngaaka!
9 Aakuluntugongalo mboka ye li mOokomitiye dhOkutunga dhOmoshitopolwa nomookomitiye dhokugandja omakwatho ohaya longo nuudhiginini opo ya kwathele aamwahe. Inatu pumbwa tuu oku ya ambidhidha tashi zi komutima! Dhiladhila shi na ko nasha nomakwatho ngoka ga li ga gandjwa konima yoshikungulu oshinene shombepo hashi ithanwa Nargis shoka sha li sha dhenge oshitopolwa shaMyanmar mo 2008. Ongundu yaamwatate mboka haya gandja omakwatho oya li ya taakana moshitopolwa shoka sha li sha dhengwa noonkondo koshikungulu, moka mwa li mwa napakana omidhimba, opo ya ye koshitopolwa shedhina Irrawaddy Delta ya ka kwathele aamwatate yokEgongalo lyaBothingone. Sho aamwatate yomoshitopolwa moka ya mono kutya ongundu yotango yokugandja omakwatho ndjoka ya thiki kuyo omwa li mu na omutonatelishikandjo gwawo gwonale, oyi igidha taya ti: “Tala! Omutonatelishikandjo gwetu ngoka! Jehova okwe tu hupitha!” Mbela oho kala ngaa wu na olupandu lwiilonga mbyoka aakuluntugongalo haya longo nuudhiginini omutenya nuusiku? Aakuluntugongalo yamwe oya langekwa po ya longe ye li ookomitiye dhi ikalekelwa opo yu ungaunge niipotha ya kwata miiti yopampangu. Aakuluntugongalo mbaka ihayi itadhele shoka ya longa, ihe nonando ongawo, mboka ya ningilwa uuwanawa ohaya kala ya nyanyukwa.—Mat. 6:2-4.
10. Iilonga yini hayi longwa kaakuluntugongalo mbyoka kaayi shiwike naanaa?
10 Aakuluntugongalo oyendji kunena ohaya kala wo ye na iilonga yokulonga noombapila. Pashiholelwa, omuunganeki gwolutu lwaakuluntugongalo oha longekidha elandulathano lyokugongala kwokoshiwike. Amushanga gwegongalo oha yalula oowili dhokomwedhi nodhokomvula dhiilonga yomomapya. Omutonateli gwosikola oha ningi elandulathano lyosikola ta dhiladhila muule. Kehe momwedhi omutitatu egongalo ohali ningi omayalulo giimaliwa. Aakuluntugongalo ohaya lesha oontumwafo okuza koshitayimbelewa e taya tula miilonga omayele ngoka hage ya kwathele ya kale ya “hangana kumwe muukumwe womeitaalo.” (Ef. 4:3, 13) Okupitila moonkambadhala dhaakuluntugongalo dhokulonga nuudhiginini dha tya ngaaka, ‘kehe shimwe ohashi ningwa palandulathano nopamukalo omwaanawa.’—1 Kor. 14:40.
Aakuluntugongalo ‘otaya longo mokati keni’
11, 12. Oolye haya longo mokati kegongalo, nokuninga ngaaka okwa kwatela mo shike?
11 Paulus okwa li a popi kombinga yaakuluntugongalo aadhiginini yokuTessalonika ye li “taa longo mokati” kegongalo. (1 Tes. 5:12) Okwa li ta popi kombinga yaakuluntugongalo oyo tuu mboka kutya otaya “longo” nuudhiginini. Ka li ta popi ‘omutonateli’ gumwe, ihe okwa li ta popi kombinga yaakuluntugongalo ayehe megongalo. Kunena, aakuluntugongalo oyendji ohaya longo megongalo nohaya kwatele komeho okugongala. Elunduluko ndyoka opo lya ningwa lyokulongitha uutumbulilo “omuunganeki gwolutu lwaakuluntugongalo” otali tu kwathele tu kale twa tala ko aakuluntugongalo ayehe ye li olutu lwa hangana.
12 ‘Okulonga mokati’ kegongalo okwa kwatela mo oshindji kaashi shi owala okulonga aantu. Uutumbulilo “okukala nawa” mboka wa longithwa muTimoteus gwotango 3:4 otawu gandja eityo lya faathana. Paulus okwa ti kutya omukuluntugongalo oku na okukala “omulumentu e shi okukala nawa naanegumbo lye noku shi okuputudha oyana, ya kale ye na evuliko nesimaneko.” Mpaka uutumbulilo “okukala nawa” osha yela kutya inawu kwatela mo owala okulonga oyana, ihe owa kwatela mo wo okukwatela komeho muukwanegumbo ‘nokuputudha oyana ya kale ye na evuliko nesimaneko.’ Eeno, aakuluntugongalo ohaya kwatele komeho megongalo opo ayehe ya vulike kuJehova.—1 Tim. 3:5.
13. Omolwashike tashi vulika shi kuthe ethimbo ele opo aakuluntugongalo ya thike pehulithodhiladhilo pokugongala kwawo?
13 Opo aakuluntugongalo ya lithe nawa oshigunda, ohaya kundathana nkene taya vulu okuungaunga noompumbwe dhaakwanegongalo. Odhoshili kutya otashi vulika ando shi kale shi li nawa ngele omukuluntugongalo gumwe oye awike ha ningi omatokolo agehe, ihe nonando ongawo, olutu lwaakuluntugongalo lwokunena olu na okulandula oshiholelwa sholutuwiliki lwomethelemumvo lyotango, mokukundathana lwa mangulukilathana, talu kongo ewiliko mOmanyolo. Elalakano lyawo olyo okutula miilonga omakotampango gOmbiimbeli shi na ko nasha noompumbwe dhegongalo. Shika ohashi longo lela uuna omukuluntugongalo kehe hi ilongekidhile nawa okugongala, ta tala kutya Omanyolo otaga ti ngiini nosho wo ewiliko lyongundu yomupiya omudhiginini nomunandunge. Eeno, shika ohashi kutha ethimbo. Uuna pwa holoka okwaahauvathana, ngaashi kwa li kwa holoka po sho olutuwiliki lwomethelemumvo lyotango lwa li lwa kundathana shi na ko nasha nokupita etanda, otashi vulika pu kale pwa pumbwa ethimbo lya gwedhwa po nosho wo okukonga uuyelele opo ya vule okuthika pehulithodhiladhilo lya kankamena kOmanyolo.—Iil. 15:2, 6, 7, 12-14, 28.
14. Mbela owu na olupandu sho olutu lwaakuluntugongalo halu longele kumwe lwa hangana? Omolwashike wu uvite ngaaka?
14 Oshike tashi vulu okuningwa po ngele omukuluntugongalo gumwe okwa kondjitha oshinima shi ningwe momukalo ngoka a hala nenge ta humitha komeho omadhiladhilo ge mwene? Nenge ongiini ngele gumwe, ngaashi Diotrefes gwomethelemumvo lyotango a kokeke iikala yokwaahauvathana? (3 Joh. 9, 10) Dhoshili, egongalo alihe otali ka gumwa koshinima shoka. Ngele Satana okwa li a kambadhala okuyemateka egongalo lyomethelemumvo lyotango, osha yela kutya okwa hala wo okuyona po ombili yegongalo kunena. Otashi vulika a longithe iikala yopantu yokwiihola mwene, ngaashi okulalakanena ondondo yopombanda. Kungawo, aakuluntugongalo oya pumbwa okukokeka eifupipiko nokulongela kumwe ye li olutu lwa hangana. Inatu pandula tuu sho aakuluntugongalo aaifupipiki haya longele kumwe ye li olutu.
Aakuluntugongalo ‘otaye mu pukulula’
15. Oshike hashi inyengitha aakuluntugongalo ya pukulule aamwatate naamwameme?
15 Paulus okwa li a popi oshinagukwanithwa shimwe sha kwata miiti nosha simana shoka aakuluntugongalo, ye na okugwanitha po shi na ko nasha nokupukulula oshigunda. MOmanyolo gopaKriste gOshigreka, Paulus oye owala a longitha oshitya shOshigreka shoka sha tolokwa ‘pukulula.’ Otashi vulu okuulika komayele ga kwata miiti, ihe itashi ulike kokukala nuutondwe. (Iil. 20:31; 2 Tes. 3:15) Pashiholelwa, Paulus okwa li a nyolele Aakorinto a ti: “Moku mú nyolela ngeyi itandi shi ningi ando nda hala oku mú sitha ohoni, ihe otandi shi ningi, ndi mú longe oondunge ongaamwandje aaholike.” (1 Kor. 4:14) Ohole oyo ya li ye mu inyengitha a gandje epukululo ndyoka.
16. Aakuluntugongalo otaya ningi nawa ngele taya kaleke shike momadhiladhilo uuna taya pukulula yalwe?
16 Aakuluntugongalo oye na okukaleka momadhiladhilo esimano lyomukalo ngoka haya pukulula nago aamwahe. Oye na okukambadhala okuholela Paulus mokukala ye na ohenda, ohole nomoku ya kwathela. (Lesha 1 Aatessalonika 1 2:11, 12.) Dhoshili, aakuluntugongalo oye na ‘okudhiginina ohapu opo ya tse yalwe omukumo, ya kale melongo lyashili.’—Tit. 1:5-9.
17, 18. Oshike wu na okukaleka momadhiladhilo ngele owa pukululwa komukuluntugongalo?
17 Dhoshili, aakuluntugongalo inaya gwanenena notashi vulika ya popye iinima mbyoka tashi vulika ye ki ipe uusama. (1 Aak. 8:46; Jak. 3:8) Aakuluntugongalo oye shi shi wo kutya uuna aamwatate naamwameme taya pewa omayele olundji ihashi kala ‘enyanyu, ihe oluhodhi.’ (Heb. 12:11) Onkee ano, manga omukuluntugongalo inaa ka pukulula omuntu gwontumba, oha tedhatedha tango muule kombinga yaashoka pamwe negalikano opo nduno ta katuka onkatu ya tya ngaaka. Ngele owa pukululwa, mbela oho kala wu na olupandu sho aakuluntugongalo ye na ko nasha nangoye?
18 Natu tye ando owu na uupyakadhi wuukolele mboka itoo vulu okuyelitha paunamiti. Opo nduno ndohotola okwe ku lombwele kutya uupyakadhi wu na owashike, ihe osha li oshidhigu kungoye oku shi taamba ko. Mbela oto ka kala wa geyela ndohotola? Aawe! Nokuli nando oku popye kutya oto tandwa, oto ka zimina etando ndyoka wi itaala kutya otali ke ku etela uuwanawa. Omukalo ngoka e ku lombwele uuyelele waashoka otashi vulika gu kale gwe ku guma, ihe mbela shoka osho tashi ke ku ningitha wu ninge etokolo? Osha yela kutya hasho. Sha faathana, ino etha omukalo moka wa pukululwa gu ku ningithe kuu pulakene kwaamboka Jehova naJesus tashi vulika ya longithe moku ku tseyithila nkene to vulu okwiikwathela nenge okwiigamena pambepo.
Kala wu na olupandu lwaakuluntugongalo mboka Jehova e tu pa
19, 20. Ongiini to vulu okuulika olupandu lwoye ‘lwaantu ye li omagano’?
19 Oto ka ninga po shike ngele owa pewa omagano ngoka ongoye ga nuninwa? Mbela oto ku ulika ngaa olupandu moku ga longitha? Jehova okwe ku pa “aantu ye li omagano” okupitila muJesus Kristus. Omukalo gumwe to vulu okuulika olupandu lwomagano ngaka ogwo okupulakena nawa kiipopiwa mbyoka hayi gandjwa kaakuluntugongalo nomokukambadhala okutula miilonga shoka haya popi. Oto vulu wo okuulika olupandu lwoye mokugandja omatyokosha taga ti sha pokugongala. Kala ho ambidhidha iilonga mbyoka aakuluntugongalo haya kutha ombinga moku yi wilika, ngaashi okuya miilonga yomomapya. Ngele owa mona uuwanawa momayele ngoka wa pewa komukuluntugongalo gwontumba, omolwashike itoo mu lombwele kutya owa mona mo uuwanawa? Kakele kaashono, omolwashike itoo ulike olupandu lwoye omolwomaukwanegumbo gaakuluntugongalo? Dhimbulukwa kutya opo omukuluntugongalo a longe nuudhiginini megongalo, uukwanegumbo we ohawu yamba po ethimbo ndyoka a li e na okukala nawo.
20 Eeno, otu na omatompelo lela gokuulika olupandu lwetu kaakuluntugongalo, mboka haya longo nuudhiginini mokati ketu noku tu pukulula. “Aantu ye li omagano” mbaka oye li shili esiloshimpwiyu lyopahole lya za kuJehova.
Oto dhimbulukwa?
• Aakriste yomuTessalonika oya li ye na omatompelo geni gokukala ye na olupandu lwaamboka taya kwatele komeho mokati kawo?
• Ongiini aakuluntugongalo megongalo lyeni haya longo nuudhiginini omolwoye?
• Ongiini ho mono uuwanawa maakuluntugongalo mboka haya longo mokati keni?
• Ngele owa pukululwa komukuluntugongalo, owu na okukaleka shike momadhiladhilo?
[Ethano pepandja 27]
Mbela owu na ngaa olupandu lwomikalo odhindji ndhoka aakuluntugongalo haya longitha mokulitha egongalo?