Mbela owa ya ngaa mevululuko lyaKalunga?
“Oohapu dhaKalunga odhi na omwenyo nodhi na oonkondo dhokulonga sha.”—HEB. 4:12.
1. Mevululuko lyaKalunga ohatu yi mo ngiini kunena, nomolwashike tashi vulika shi kale oshidhigu okuvulika?
MOSHITOPOLWA sha tetekele otwi ilongo mo kutya otatu vulu okuya mevululuko lyaJehova ngele ohatu vulika kuye nohatu longo pamwe nehangano lye. Ngele ohatu vulika kuye, oshi li euliko kutya otwa hala elalakano lye li gwanithwe. Ihe omathimbo gamwe ohashi kala oshidhigu okuvulika. Pashiholelwa, ngele otwa mono kutya Jehova okwa hala tu ethe po okuninga oshinima shontumba shoka tu hole, otashi vulika shi kale oshidhigu kutse okuvulika kuye nziya pethimbo mpoka. Ngele oshinima sha tya ngaaka oshe tu ningilwa, otwa pumbwa okukala twi “ilongekidha okuvulika.” (Jak. 3:17, NW) Moshitopolwa shika, otatu ka kundathana iinima yimwe mbyoka tayi ulike kutya otwi ilongekidha okuvulika ethimbo kehe.
2, 3. Ngele otwa hala okunyanyudha Jehova oshike tu na okutsikila okuninga?
2 Uuna wa lesha mOmbiimbeli kutya owa pumbwa okuninga omalunduluko monkalamwenyo yoye, mbela owi ilongekidha ngaa okuvulika? Dhiladhila kombinga yaashoka: Ombiimbeli oya popya kutya aantu mboka Jehova a hala okweeta mehangano lye oye li ‘omaliko giigwana ayihe.’ (Hag. 2:7) Shika osha hala okutya Kalunga oha hogolola aantu mboka ye na ondilo momeho ge, molwaashoka oye hole shoka shu uka. Odhoshili kutya oyendji yomutse otwa li hatu longo iilonga ya puka sho opo twa tameke okukonakona Ombiimbeli. Otwa li twa nyanyukwa okuninga omalunduluko omanene mokudhiladhila kwetu nomiilonga yetu, molwaashoka otu hole Kalunga nOmwana notwa hala oku mu nyanyudha. Otwa li twa pula Jehova megalikano e tu kwathele notwa li twa ningi wo ngaashi tatu vulu tu lundulule onkalo yetu mpoka sha pumbiwa. Konima, otwa ninginithwa e tatu kala twa hokiwa kuye.—Lesha Aakolossa 1:9, 10.
3 Ihe sigo ongashingeyi inatu gwanenena. Otwa pumbwa natango okuninga omalunduluko monkalamwenyo yetu nokulonga nuudhiginini tu longe shoka shu uka. Jehova oku uvaneka kutya ote ke tu kwathela, ngele otatu kambadhala okulonga shoka shu uka.
Otwa pumbwa okuninga omalunduluko monkalamwenyo yetu
4. Jehova oha longitha omikalo ndatu dhini e tu ulukile kutya otwa pumbwa okuninga omalunduluko?
4 Otu na okukala tu shi kutya openi tu na okuninga omalunduluko omanga inaatu ga ninga. Jehova ohe tu kwathele momikalo dha yoolokathana opo tu ninge omalunduluko ga tya ngaaka. Ota vulu okulongitha iipopiwa mbyoka hayi gandjwa pOshinyanga shUukwaniilwa nenge oshitopolwa shontumba miifo yetu e tu ulukile kutya opu na sha sha puka mokudhiladhila kwetu nenge miilonga yetu. Omathimbo gamwe ihatu kala tu wete ngele otwa pumbwa okuninga omalunduluko, nokuli nongele twa pulakene koshipopiwa nenge twa lesha iileshomwa yetu. Onkee ano, Jehova oha vulu okulongitha aamwatate naamwameme megongalo ye tu pukulule nohole. — Lesha Aagalati 6:1.
5. Ohatu inyenge ngiini omathimbo gamwe uuna tatu pukululwa, nomolwashike aakuluntugongalo Aakriste ye na okutsikila oku tu pukulula?
5 Ngele omuntu omukwetu inaa gwanenena te tu pukulula, otashi vulika shi kale oshidhigu okutaamba ko epukululo ndyoka, nonando omathimbo gamwe otashi vulika a popye nombili. Jehova okwa gandja elombwelo kaakuluntugongalo ya “pukulule” iilyo yegongalo, “ihe naye shi ninge nonge.” (Gal. 6:1) Ngele otatu pulakene sho taye tu kwathele nena otatu ka kala ‘omaliko,’ nenge tu na ongushu momeho gaJehova. Uuna tatu galikana ohatu lombwele Jehova kutya inatu gwanenena nosho wo kutya ohatu ningi omapuko ogendji. Ihe ngele omukuluntugongalo e tu lombwele kutya otwa ninga sha sha puka, omathimbo gamwe ohatu geye. Ohatu tameke okwiipopila nenge tu tye kutya epuko lyetu inali kwata miiti. Ohashi vulika tu tye ngoka te tu pukulula oku tu yele nenge tu tye ina popya natse momukalo gwohenda. (2 Aak. 5:11) Ohatu kala twa geya noonkondo ngele aakuluntugongalo ye tu lombwele tu ninge omalunduluko miinima mbyoka inaatu hala okuuva. Pashiholelwa, otashi vulika ye tu lombwele kutya oshilyo shuukwanegumbo wetu osha ya mepuko lyontumba nenge ye tu lombwele kutya omizalo dhetu kadhi li nawa. Otashi vulika ye tu lombwele kutya natu kale twa yogoka palutu nenge ye tu pukulule shi na ko nasha nomainyanyudho getu. Ngele otwa geye, otashi vulika tu popye iinima mbyoka twa li kaatu na okupopya. Shika ohashi vulu oku tu yemateka nohashi vulu okugeyitha omumwatate ngoka te tu pukulula. Ihe konima ngele twa fululuka ohatu ki ipa oombedhi e tatu taamba ko epukululo.
6. Oohapu dhaKalunga ohadhi holola ngiini “puuyelele omahalo nomadhiladhilo gomomitima dhaantu”?
6 Aahebeli 4:12, mboka ye li enyolo lyoshipalanyolo shoshitopolwa shika otaya ti kutya oohapu dhaKalunga ‘odhi na oonkondo dhokulonga sha.’ Shika osha hala okutya otadhi vulu okukwathela aantu ya lundulule oonkalamwenyo dhawo. Ombiimbeli oye tu kwathela tu lundulule iikala yetu yonale manga inaatu ninginithwa. Otayi tu kwathele tu lundulule iikala yetu okuza pokuninginithwa kwetu. Paulus okwa nyolele Aakriste Aahebeli kutya Oohapu dhaKalunga “otadhi tete e tadhi adha sigo okomwenyo nombepo” nosho wo kutya “otadhi holola puuyelele omahalo nomadhiladhilo gomomitima dhaantu.” (Heb. 4:12) Oshitya ‘omwenyo’ otashi ulike kiikala yetu yokombanda mbyoka aantu haya mono. Oshitya ‘ombepo’ otashi ulike kuukwatya wetu womeni mboka aantu itaaya vulu okumona. Paulus okwa li a hala okutya uuna tu uvite ko shoka Kalunga te tu lombwele okupitila mOmbiimbeli shi na ko nasha naashoka a hala tu ninge, iikala yetu otayi ka ulika kutya otwa tya ngiini momitima. Mbela otu li aaniihelele? (Lesha Mateus 23:27, 28.) Dhiladhila kutya ando oto ka ninga po shike ngele owi iyadha moonkalo ndhoka tatu ka kundathana.
Tsikila okuhuma komeho mehangano lyaJehova
7, 8. (a) Omolwashike Aakriste Aahebeli yamwe ya li ya hala okutsikila okuvulika kiinima yimwe yOmpango yaMoses? (b) Omolwashike tatu tile kutya oya li taya ningi oshinima shoka shi li ompinge nelalakano lyaJehova?
7 Oyendji yomutse otu shi nawa oohapu ndhika dhi li mOmayeletumbulo 4:18 tadhi ti: “Ondjila yaayuuki oya fa uuyelele weluwa tali tende, mboka tawu yele sigo kwa shi.” Shoka osha hala okutya sho ethimbo tali endele ko otatu uvu ko nawa shoka Jehova a hala tu ninge notatu hwepopala mokulonga shoka tashi mu nyanyudha.
8 Moshitopolwa sha tetekele otwi ilonga mo kutya konima yeso lyaJesus, Aakriste oyendji Aahebeli oya li ya hala natango okuvulika kOmpango yaMoses. (Iil. 21:20) Paulus okwa li e shi yelitha kutya Aakriste inaya pumbwa okuvulika kOmpango yaMoses, ihe yamwe kaya li ya taamba ko shoka Jehova a hala ya ninge. (Kol. 2:13-15) Otashi vulika ya li taya dhiladhila kutya ngele oya kala taya vulika kiinima yimwe yOmpango, nena itaya ka hepekwa kwaamboka ye li meitaalo lyOshijuda. Ihe Paulus okwa li a lombwele Aakriste Aahebeli mboka sha yela kutya ngele oya tsikile okulonga shoka shi li ompinge nelalakano lyaKalunga, itaya ka ya mevululuko lyaKalunga.a (Heb. 4:1, 2, 6; lesha Aahebeli 4:11.) Opo Jehova a kale e ya hokwa oya li ye na okuzimina kutya okwa hala aantu ye mu longele momukalo gwi ili.
9. Ohatu kala tu uvite ngiini uuna omupiya omudhiginini nomunandunge ta yelitha ovelise yOmbiimbeli momukalo omupe?
9 Kunena, omupiya omudhiginini nomunandunge ohe tu kwathele tu uve ko omalongo gOmbiimbeli momukalo ngoka twa li inaatu dhiladhila. Otu na okutaamba ko omalunduluko ngoka nenyanyu. Otaga ulike kutya Jehova ota longitha omupiya ngoka e tu longe oshili. Ethimbo limwe Olutuwiliki ndoka lu lile po omupiya omudhiginini nomunandunge ohalu talulula omukalo moka tu uvite ko ooshili dhontumba. Ngele aamwatate mboka oya tokola kutya oya pumbwa okuninga omalunduluko, ihaya kala ya tila okuyelitha nawa omalongo ngoka ye wete kutya oyu uvite ko nawa ngashingeyi. Ohaya kala ye shi kutya yamwe otaye ke ya popila muuwinayi omolwomalunduluko ngoka, ihe shoka hasho sha simanenena kuyo. Shoka sha simanenena kuyo osho okulonga metsokumwe nelalakano lyaKalunga. Oho kala wu uvite ngiini uuna omupiya omudhiginini nomunandunge ta yelitha ovelise yOmbiimbeli momukalo omupe?—Lesha Lukas 5:39.
10, 11. Aakonakoni yOmbiimbeli yamwe oya li ya ningi shike sho ya lombwelwa yu uvithe momikalo omipe, notatu ilongo shike moshinima shika?
10 Natu taleni koshiholelwa shilwe shi na ko nasha naashoka sha ningilwe omimvo omathele dha pita. Aakonakoni yOmbiimbeli yamwe mboka ya li haya gandja iipopiwa yomontaneho iiwanawa oya li haya dhiladhila kutya ogwo omukalo gwa dhenga mbanda gwokuuvitha. Oya li ye hole okupopya komeho yongundu yaantu. Yamwe oya li haya kala ya nyanyukwa ngele taya tangwa omolwiipopiwa yawo. Ihe konima, oshigwana shaKalunga osha li shu uvu ko kutya okwa hala shi ninge oshindji, kaashi shi owala okugandja iipopiwa yomontaneho. Okwa hala ya kale tayu uvitha egumbo negumbo nosho wo momikalo dhilwe. Yamwe yomwaamboka haya gandja iipopiwa iiwanawa kaya li ya hala oku shi ninga. Yamwe oya li taya dhiladhila kutya aapopi mboka oye hole Jehova nohaya vulika kuye, ihe shoka ya ningi oshu ulike kutya nani hasho. Otu shi shi kutya Jehova ka li a hokwa iikala yawo. Konima oya thigi po ehangano lye.—Mat. 10:1-6; Iil. 5:42; 20:20.
11 Osha li wo oshidhigu kaakonakoni yOmbiimbeli yamwe okuuvitha egumbo negumbo, unene tuu petameko. Ihe oya li ya vulika noya kala aadhiginini kehahangano lyaJehova. Mokweendela ko kwethimbo, osha kala oshipu kuyo okuuvitha egumbo negumbo. Jehova okwe ya laleke nuuyamba. Oho inyenge ngiini ngele omupiya omudhiginini nomunandunge e ku lombwele wu uvithe momukalo ngoka ino yelekela nando onale? Mbela oho vulika ngaa ngele owu wete omukalo ngoka tagu monika gwa fa omudhigu noonkondo?
Uuna gumwe ngoka tu hole a thigi po Ehangano lyaJehova
12, 13. (a) Omolwashike Jehova e tu lombwela tu ‘umbe mo omuyoni’ mokati ketu? (b) Oshike tashi vulu okukala unene oshidhigu kaavali Aakriste?
12 Otu shi kutya opo Jehova a kale e tu hokwa, otu na okuvulika koshipango shoka tashi ti otu na okukala twa yogoka miinima ayihe. (Lesha Titus 2:14.) Ihe ohapu holoka oonkalo ndhoka hadhi shi ningi oshidhigu tu vulike. Pashiholelwa, natu tye nduno aaihokani mboka aadhiginini oye na owala omwanamati gumwe, ihe konima okwa thigi po oshili. Okwa hokwa “einyanyudho lyopakathimbo lyuulunde,” pehala lyokukala e hole Jehova nosho wo aavali ye. Omolwonkatu ye ita vulu we okukala megongalo. Onkee ano, okwa kondwa mo.—Heb. 11:25.
13 Aavali oya li ya gwililwa po noonkondo. Oye shi kutya Ombiimbeli otayi ti kutya ‘[inamu] kwatathana nomuntu ngoka ti iningi a fa omukriste, nonando oye omuhondeli, omunalwiho, omusimaneki gwiimenka, omusheki, onkolwi nomuyugi. Nokuli inamu lya pamwe nomuntu a tya ngaaka.’ Otayi ti wo: “Umbii mo omuyoni mokati keni.” (1 Kor. 5:11, 13) Yo oye shi nawa kutya oshitya ‘omuntu’ osha kwatela mo oshilyo shuuukwanegumbo shoka ihaashi kala megumbo limwe nayo. Ihe molwaashoka oye hole omwana otashi vulika ya tompathane taya ti: “Otwa pumbwa okupopya naye ngaashi twa hala. Itatu vulu oku mu kwathela a galukile kuJehova ngele itatu popi naye.”b
14, 15. Aavali oye na okudhimbulukwa shike uuna ya hala okukala taya popi nomwana a kondwa?
14 Otu uvite nayi sho aavali mboka ye li monkalo ndjoka yi nikitha oluhodhi. Omwana oku na ehogololo a lundulule iikala ye. Ihe okwa hogolola okuninga shoka sha puka, pehala lyokukala megongalo pamwe naavali ye. Aavali oya hala okukwathela omwana, kakele kaashono itaya vulu oku mu tokolela shoka e na okuninga. Ngashingeyi otu wete kutya omolwashike she ya ehameka noonkondo.
15 Mbela aavali mboka otaya ka ninga po shike? Mbela otaya ka vulika ngaa koshipango shaJehova shoka sha yela? Odhoshili kutya otashi vulika pu holoke oonkalo dhimwe ndhoka dha pumba lela mpoka tashi vulika ya pumbwa okupopya nomwanamati omolwiinima ya pamba uukwanegumbo. Ihe mbela oye na ngaa okukala yu uvite kutya oye na okupopya nomwana ngaashi ya hala? Ngele taya ningi etokolo moshinima shika, oye na okukaleka momadhiladhilo shoka Jehova a hala ya ninge. Oye na okudhimbulukwa kutya Jehova okwa hala oshigwana she shi kale sha yogoka. Osho molwaashoka a gandja elombwelo kutya “umbii mo omuyoni” megongalo. Okwa hala wo okukwathela omuyoni a lundulule iikala ye nokugalukile kegongalo. Ongiini aavali Aakriste taya vulu okuulika kutya otaya longo metsokumwe nehalo lyaJehova moonkalo dha tya ngaaka?
16, 17. Oshike tatu ilongo moshiholelwa shaAaron?
16 Aaron omumwayina gwaMoses okwa li muupyakadhi omolwoshinima shoka sha ningwa koyanamati yaali. Oyanamati Nadab naAbihu oya li ya ningi omafikiloyambo momukalo ngoka Jehova inaa hokwa. Jehova okwa li a tumu omulilo okuza megulu e tagu ya dhipaga. Dhiladhila owala nkene Aaron a li u uvite. Aaron ka li we ta vulu okupopya noyana molwaashoka oya sa. Ihe opwa li oshinima shilwe shoka sha li sha dhigupaleke onkalo ye nosho wo yuukwanegumbo we. Moses okwa li e mu lombwele noyanamati yalwe kutya Jehova ina hala ya kale ya nika oluhodhi omolwoshinima shoka. Moses okwa ti: “Inamu shindalaleka omafufu geni nenge mu tuule oonguwo dheni, mu holole okulila kweni. Ngele tamu shi ningi, otamu si, OMUWA nota geele egongalo alihe.” (Lev. 10:1-6) Oshiilongomwa mpoka otu shi iwetele. Otu na okukala tu hole Jehova shi vulithe iilyo yomaukwanegumbo getu mbyoka kaayi shi iidhiginini kuye.
17 Kunena, Jehova iha dhipaga aantu mboka ihaaya vulika kuye. Ohe ya ulukile ohole noku ya pa ompito ye ethe po iilonga yawo iiwinayi. Ihe mbela Jehova oha kala u uvite ngiini ngele aavali tayi ipwililikile oshipango she nokukala taya popi noyana mboka ya kondwa molwaashoka ye wete kutya oye na omatompelo goku shi ninga?
18, 19. Omalaleko nuuyamba geni uukwanegumbo tawu vulu okumona ngele owa tsikile okuvulika kuJehova?
18 Aantu oyendji ohaya popi kutya oya galukila kegongalo molwaashoka ookuume kawo nosho wo iilyo yuukwanegumbo wayo oya kala aadhiginini kuJehova noinaya kala haya popi nayo. Pashiholelwa, omukadhona gumwe okwa lombwele aakuluntugongalo kutya omukalo moka omumwayinamati a li u ungaunga naye ogwo gwa li gwe mu ningitha a lundulule onkalamwenyo ye. Omumati ngoka okwa li omudhiginini noha vulika kuJehova sho omumwayinakadhona a kondwa. Shika osha kwathele omukadhona ngoka a galukile kegongalo.
19 Oshike twa pumbwa okuninga? Otwa pumbwa okuvulika kuJehova miinima ayihe. Molwaashoka inatu gwanenena, shika otashi ka kala oshidhigu omathimbo gamwe. Ihe otu na okukala twi itaala thiluthilu kutya Jehova ohe tu lombwele tu ninge shoka tashi tu etele aluhe uuwanawa.
“Oohapu dhaKalunga odhi na omwenyo”
20. Omomikalo mbali dhini tatu vulu okuuva ko Aahebeli 4:12? (Tala enyolo lyopevi.)
20 Sho Paulus a li a nyola kutya “oohapu dhaKalunga odhi na omwenyo” ka li ta popi kombinga yOmbiimbeli.c Oovelise dhilwe montopolwa ndjoka otadhi ulike kutya okwa li ta popi kombinga yomauvaneko gaKalunga. Paulus okwa li ta popi kutya omauvaneko gaKalunga ohaga gwanithwa aluhe. Jehova okwa li a popi kombinga yoohapu dhe a ti: “Itadhi galukile kungame owala inaadhi gwanitha ehalo lyandje.” Okwa gwedha ko a ti: “Otadhi tsakanitha elalakano ndyoka nde dhi li tumine.” (Jes. 55:11) Onkee ano, natu idhidhimikeni ngele otu wete Kalunga itaa gwanitha omauvaneko ge pethimbo mpoka twe ga tegelela. Otatu vulu okukala nuushili kutya Jehova ota longo opo a gwanithe po elalakano lye.—Joh. 5:17.
21. Ongiini Aahebeli 4:12 taya vulu okukwathela aakokele ya tsikile nokulongela Jehova?
21 Iilyo oyindji ‘yongundu onene’ oya longela Jehova uule woomvula odhindji. (Eh. 7:9, KB) Kaya li ya tegelela ya kulupe uuyuni uupe wombili inaawu ya. Ihe natango otaya ningi ngaashi taya vulu miilonga yaJehova. (Eps. 92:14) Oye shi shi kutya “oohapu dhaKalunga odhi na omwenyo” nosho wo kutya omauvaneko gaKalunga otaga ka gwanithwa. (Heb. 4:12) Oye shi shi kutya ota longo opo a gwanithe po elalakano lye li na ko nasha nevi nosho wo naantu. Molwaashoka Kalunga okwa lenga elalakano lye, ohashi mu nyanyudha ngele natse otwe li tala ko lya simanenena. Mesiku ndika etiheyali lyevululuko kapu na sha shoka tashi ka imba Jehova kaa gwanithe elalakano lye. Oku shi shi wo kutya oshigwana she shi li ongundu otashi ka tsikila okulongela kumwe nelalakano lye. Ongiini shi na ko nasha nangoye? Mbela owa ya ngaa mevululuko lyaKalunga?
[Omanyolo gopevi]
a Aawiliki oyendji yeitaalo lyOshijuda oya li ya kambadhala okuvulika kokanima kehe komOmpango yaMoses. Ihe sho Jesus e ya kombanda yevi, kaya li ya hala okwiitala kutya oye Mesiasa. Oya li ye li ompinge nelalakano lyaKalunga.
b Tala embo ‘Ikalekeni mohole yaKalunga,’ epandja 207-209.
c Kunena, Kalunga oha popi natse okupitila mOmbiimbeli ndjoka yi na oonkondo dhokulundulula onkalamwenyo yakehe gumwe. Onkee ano, shoka tatu lesha mAahebeli 4:12 kombinga yOmbiimbeli oshi li wo shoshili.
Oto dhimbulukwa?
• Otwa pumbwa okuninga shike opo tu ye mevululuko lyaKalunga kunena?
• Ohatu ulike ngiini kutya otwa hala okunyanyudha Kalunga, uuna tu uvite ko shoka te tu lombwele okupitila mOmbiimbeli shi na ko nasha naashoka a hala tu ninge?
• Omoonkalo dhini hashi vulu okukala oshidhigu tu vulike kuJehova, ihe omolwashike sha simanenena tu vulike kuye?
• Omomikalo mbali dhini tatu vulu okuuva ko Aahebeli 4:12?
[Ethano pepandja 31]
Aavali ohaya kala ya gwililwa po noonkondo!