Oolye ye na okulonga aanona kombinga yaKalunga?
“Omulongwa ke vule ndishi omulongi gwe. Ihe omulongwa kehe ngoka a pwa okulongwa, oku thike pomulongi gwe.”—LUKAS 6:40.
AAVALI yamwe ohaya kala yu uvite inaaya gwana okulonga aanona yawo kombinga yaKalunga. Otashi vulika haya dhiladhila kutya kaye na elongo lya gwana nenge kaye shi oshindji kombinga yelongelokalunga opo ya kale aalongi aanekeka. Oshizemo, otashi vulika ya kale ye na egamo lyokweethela aapambele nenge aawiliki yomalongelokalunga oshinakugwanithwa shika sha simanenena.
Ihe oolye lela ya gwana okulonga aanona ooshili dhopalongelokalunga nosho wo omithikampango dhopamikalo? Tala shoka Ombiimbeli tayi ti moshinima shika nokuyelekanitha omapopyo ngoka naashoka aakonakoni yiinima ya mono.
Oshinakugwanithwa shootate oshashike?
Shoka Ombiimbeli tayi longo: “[Oohe, KB], inamu hinda aana yeni noku ya geyitha, ihe ya putudheni ne mu ya kumagidhe paukriste.”—Aaefeso 6:4.
Shoka aakonakoni yiinima ya mono: Oohe otaya mono ngiini uuwanawa ngele oya kala ye na eitaalo lyopalongelokalunga lya kola? Oshitopolwa Fathers’ Religious Involvement and Early Childhood Behavior, shoka sha li sha nyanyangidhwa mo 2009, osha ti: “Okukutha ombinga melongelokalunga lyontumba otaku vulu okukwathela aasamane ya kale ootate ye li nawa. Elongelokalunga ohali kwathele aantu pankalathano nohali ya kwathele wo nomalongo gi ili nogi ili nosho wo nomisindalandu dhi na ko nasha nankene ye na okwiihumbata monkalamwenyo.”
Ombiimbeli otayi tsu unene omuthindo esimano lyoshinakugwanithwa shatate shokuputudha nokulonga aanona. (Omayeletumbulo 4:1; Aakolossa 3:21; Aahebeli 12:9) Ihe mbela omayele ngoka otago opalele ngaa kunena? Mo 2009 Ouniveesiti yaFlorida oya li ya nyanyangidha oshinyolwa shoka tashi popi kombinga yenwethwomo ndyoka ootate haya nwetha mo nalyo oyana. Aakonakoni yiinima oya mona kutya aanona mboka ya li ya putudhwa koohe manga ya li aashona oyo unene haya kala ye na olukeno na yamwe noyi isimaneka. Aanona yaamati oyo unene hayi ihumbata nawa naakadhona oyo unene haya talika ko ye na oondunge. Dhoshili, omayele gOmbiimbeli otaga longo natango.
Oshinakugwanithwa shameme omuvali osha simana ngiini?
Shoka Ombiimbeli tayi longo: “Ino ekelahi omapukululo ganyoko.”—Omayeletumbulo 1:8.
Shoka aakonakoni yiinima ya mono: Mo 2006 o-Handbook of Child Psychology oya ti kutya oomeme aavali ohaya longitha ethimbo olindji ye vulithe pootate okupopya noyana, nonkalo ndjoka oya faathana miilongo oyindji. Molwaashoka oye na ekwatathano li thike mpoka, oohapu dhameme omuvali, iilonga ye nosho wo iikala ye oyi na enwethomo enene keputuko lyokanona.
Ngele aavali taya longele kumwe mokulonga aanona yawo oshili kombinga yaKalunga, konyala otaye ya pe omagano ge na ongushu ge li gaali. Omagano gotango, aanona otaya mono ompito yokukala ye na uukuume naHe yawo gwomegulu, uukuume mboka tawu vulu oku ye etela uuwanawa monkalamwenyo yawo ayihe. Omagano omatiyali, aanona ohayi ilongo okupitila miiholelwa nkene omusamene nomukulukadhi ye na okulongela kumwe opo ya adhe omalalakano ga simana. (Aakolossa 3:18-20) Nonando aanona yalwe otashi vulika haya kwathele aavali yawo, aavali oyo ye na oshinakugwanithwa shokulonga aanona yawo kombinga yaKalunga nosho wo kombinga yankene a hala uukwanegumbo wu kale tawu longo.
Ihe ongiini aavali ye na okulonga aanona yawo? Omikalo dhini tashi vulika dhi pondole?