Mbela aanona oye na okwiilonga kombinga yaKalunga?

“Otu na omalongelokalunga ngoka tage tu ningitha owala tu kale tu tondathane, ihe itage tu ningitha tu kale tu holathane.”—JONATHAN SWIFT, OMUNYOLI OMWIINGILISA.

SWIFT okwa li a popi omadhiladhilo ngoka methelemimvo eti-18, ihe kunena oyendji otaya tsu kumwe naye. Dhoshili, yamwe oyi itaala kutya aavali kaye na uuthemba wokulonga oyana kombinga yaKalunga. Otaya dhiladhila kutya aanona mboka ya putudhwa momaukwanegumbo omalongelikalunga kaye na sho ye shi.

Ngoye oto ti ngiini? Epopyo lini lyomwaangoka taga landula li li pandunge?

● Aavali kaye na okweethiwa ya longe oyana kombinga yaKalunga.

● Aavali oye na okutegelela sigo oyana ya koko opo ya kundathane nawa nayo iinima yi na ko nasha nelongelokalunga.

● Nonando aanona aashona, aavali oye na oku ya longa shoka yo yi itaala kombinga yaKalunga. Ihe sho aanona taye ende taya koko, aavali oye na oku ya ladhipika ya kale haya tompathana nayalwe kombinga yeitaalo lyawo.

● Aanona oye na okutaamba ko eitaalo lyaavali yawo nokaapu na okwiipula kutya oli li mondjila nenge olya puka.

Mbela omalongelokalunga ohage etele aanona oshiponga?

Kapu na omuvali e na ko nasha nokanona ke ta kala a hala oku ke etela oshiponga. Ihe mbela uushili otawu ambidhidha ngaa omapopyo gaamboka hayi indike aanona yi ilonge kombinga yaKalunga? Oomvula omilongo dha piti, aakonakoni yiinima oya kala nokukonakona yi itula mo shi na ko nasha nankene eitaalo lyopalongelokalunga lyaavali hali gumu aanona yawo. Aakonakoni mboka oya li ya thiki pehulithodhiladhilo lini?

Aakonakoni yiinima oya mona kutya elongelokalunga otali vulu okukala li na oshizemo oshiwanawa kehumokomeho lyaanona pehala lyokukala li na enwethomo ewinayi kuyo. Olopota yomo 2008 ya nyolwa moshifo shedhina Social Science Researcha oya ti: “Omalongelokalunga oga kala nokuulika kutya otaga vulu okutunga ekwatathano pokati kaavali noyana.” Olopota ndjika oya popi wo ya ti: “Omalongelokalunga niinima yopambepo oyi li oshitopolwa sha simana monkalamwenyo yaanona oyendji noya simanenena mekwatathano lyawo nuukwanegumbo.” Ndhindhilika nkene shoka sha faathana naashoka sha li sha popiwa kuJesus Kristus a ti: “Aanelago oomboka [ye shi ompumbwe yawo yopambepo, NW].”—Mateus 5:3.

Ongiini kombinga yedhiladhilo kutya aanona oye na okukoka manga opo ya longwe nawa kombinga yaKalunga noyelongelokalunga? Etaloko ndyoka itali tsu kumwe nuushili mbuka: Omadhiladhilo gokanona oga fa oshimbamba kaashi na sha sha tegelela okutulwa sha. Dhoshili, aavali oye na okuhogolola ngele oye na okulonga aanona yawo omithikampango dhopamikalo kegumbo nenge oye na okweetha yi ilonge shoka hayu uvu kuyalwe.

Oshiholekwa oshini?

Ondjokonona otayi ulike kutya elongelokalunga otali vulu okunwetha mo aantu ya kale ye na okatongo. Ano ongiini aavali taya vulu okuyanda iizemo mbyoka ya hokololwa kuJonathan Swift? Ongiini taya vulu okulonga oyana eitaalo ndyoka tali ya kwathele ya kale ye hole yalwe?

Oshiholekwa otashi monika mokuyamukula omapulo ngaka gatatu: (1) Oshike aanona ye na okwiilonga? (2) Oolye ye na oku ya longa? (3) Omikalo ndhini dhokulonga aanona hadhi shi pondola?

[Enyolo lyopevi]