Hedha popepi naKalunga

‘Omuwa, owa tseya ndje’

“OMUTENGE omunenenene ngoka to vulu okukala wu na ogwo okukala wu shi kutya kapu na ngoka e na ko nasha nangoye nenge u uvite ko omaiyuvo goye.”a Mbela nangoye owa li ethimbo limwe wu uvite ngaaka? Mbela opwa li ethimbo limwe wu uvite kutya kapu na ngoka e na ko nasha nangoye nenge u uvite ko onkalo yoye nenge nokuli kutya owu uvite ngiini? Ngele osho shi li ngawo, oto vulu okuhekelekwa koohapu ndhika tadhi ti: Mboka haye mu longele, Jehova oku na ko nasha nayo unene noku shi ashihe shoka tashi ya ningilwa monkalamwenyo yawo yakehe esiku. Oohapu dhaDavid ndhoka dhi li mEpisalomi 139 otadhi koleke uushili mbuka.

Molwaashoka David okwa li i inekela muJehova, okwa popi a ti: “OMUWA, ongoye to konakona ndje nowa tseya ndje.” (Ovelise  1) David okwa longitha ethaneko ewanawa movelise ndjoka. Oshityalonga shOshihebeli shoka sha tolokwa mpaka “konakona” otashi vulu okutya okufula oshiyela shontumba (Job 28:3), okukonakona oshilongo (Aatokolihapu 18:2), nenge okukonakona uuyelele wu na ko nasha niinima yopampangu (Deuteronomium 13:14). Eeno, Jehova oku tu shi nawanawa onga a konakona oshitopolwa kehe shonkalamwenyo yetu. David ote tu longo kutya Kalunga oku na ko nasha naapiya ye pauhandimwe. Ohe ya konakona noku ya tseya pauhandimwe.

David okwa li a popi oohapu ndhika kombinga yankene Kalunga a li e mu konakona nawa a ti: “Owa tseya ndje, uuna nda kuutumba nongele nda thikama; omadhiladhilo gandje agehe oto ga tseya, manga inaaga holoka.” (Ovelise 2) Paulelalela, Jehova oku li “kokule,” molwaashoka oha kala megulu. Ihe nonando ongawo, oku tu shi uuna twa kuutumba, tashi vulika pehulilo lyesiku moka twa li twi ipyakidhila, nongele tatu penduka ongula tatu yi kiilonga yetu yesiku kehe. Oku shi wo omadhiladhilo, omahalo nosho wo omalalakano getu. Mbela David okwa li e wete e li moshiponga sho Jehova a li te mu konakona nawanawa? Aawe, mepingathano naashoka, David okwa li a nyanyukwa sho ta konakonwa nawanawa. (Ovelise 23, 24) Omolwashike a li a nyanyukwa?

David okwa li e shi kutya Jehova oha konakona aalongeli Ye nehalo ewanawa. David okwa li u ulike einyengotompelo ndyoka sho a ti: “Ou wete ndje, ngele tandi yi kiilonga nenge te vululukwa; ashihe shoka te ningi, ou shi wete.” (Ovelise 3) Esiku kehe Jehova oha mono ‘ashihe shoka hatu ningi,’ sha hala okutya, omapuko getu niilonga yetu iiwanawa. Mbela oha gandja eitulomo komapuko getu nenge kiilonga yetu iiwanawa? Uutumbulilo wOshihebeli mboka wa tolokwa ‘wete’ otawu vulu okutya “okuthitha” nenge “okuyela” ngaashi owala omunepya ha yele iilya opo olungu lu ze mo. Uutumbulilo “okwa tseya” otawu toloka oshitya shOshihebeli shoka tashi vulu okutya “okulenga.” Uuna Jehova ta konakona iinima mbyoka aalongeli ye haya popi nokuninga esiku kehe, oha kala a hokwa uuwanawa mboka haya ningi. Omolwashike mbela? Omolwoonkambadhala ndhoka haya ningi opo ye mu nyanyudhe.

Episalomi 139 otali tu longo kutya Jehova oku na ko nasha unene naalongeli ye. Ohe ya konakona nawa nohe ya tonatele sho yi ipyakidhila nomaipyakidhilo gawo gakwalukehe. Oku shi uupyakadhi mboka haya tsakaneke noku shi uuwehame wawo wopamadhiladhilo nowokomutima mboka tashi vulika we etithwa kuupyakadhi mboka. Mbela shoka itashi ku inyengitha wu longele Kalunga ngoka e na ko nasha? Ngele osho, kala wu na uushili kutya Jehova ‘ita dhimbwa iilonga yoye nohole yoye mokusimanekitha edhina lye.’—Aahebeli 6:10.

[Enyolo lyopevi]