Mbela owe etha ngaa Jehova a kale oshipewa shoye?

“Tangotango kongeni [uukwaniilwa waKalunga, KB] nuuyuuki we, nena mbika ayihe otamu yi gwedhelwa ko.”—MAT. 6:33.

1, 2. (a) ‘Israeli yaKalunga’ ngoka a popiwa mAagalati 6:16 otu ulike koolye? (b) “Omazimo gaIsraeli omulongo nagaali” ngoka taga popiwa muMateus 19:28 otaga ulike koolye?

OSHIKE hashi ya momadhiladhilo goye uuna wa lesha edhina Israeli mOmbiimbeli? Mbela oho dhiladhila kuJakob omwanamati gwaIsak, ngoka a li a lukululwa e ta ningi Israeli? Nenge oho dhiladhila koluvalo lwe ndoka lwa li oshigwana shaIsraeli shonale? Ongiini kombinga yaIsraeli shopambepo? Uuna Israeli tashi popiwa meityo lyopathaneko, olundji otashi ulike ‘kuIsraeli yaKalunga,’ sha thikama po maantu 144 000 mboka ya gwayekwa nombepo ondjapuki ya ninge aakwaniilwa naasaaseri megulu. (Gal. 6:16, KB; Eh. 7:4; 21:12) Ihe natu taleni nkene omazimo gaIsraeli 12 taga popiwa momukalo gwi ikalekelwa muMateus 19:28.

² Jesus okwa ti: “Muuyuni mboka uupe Omuna gwOmuntu sho ta ka kuutumba koshipangelapundi shesimano lye, nane wo mboka mwa landula ndje, otamu ka kuutumba kiipangelapundi omulongo niiyali, mu pangule omazimo gaIsraeli omulongo nagaali.” Movelise ndjika “omazimo gaIsraeli omulongo nagaali,” aantu mboka taya ka pangulwa kaalongwa yaJesus aagwayekwa, yo aantu mboka oyo wo taya ka kala nomwenyo gwaaluhe mOparadisa kombanda yevi. Otaya ka mona uuwanawa sho taya ka pangelwa kaasaaseri 144 000.

3, 4. Aagwayekwa aadhiginini oya tula po oshiholelwa oshiwanawa shini?

³ Kunena aagwayekwa oya tala ko oshilonga shawo shi li uuthembahenda, ngaashi owala aasaaseri nAalevi yonale. (Num. 18:20) Aagwayekwa inaya tegelela ya pewe oshitopolwa nenge ehala kombanda yevi li ninge lyawo. Pehala lyaashono, oye na etegameno lyoku ka kala aakwaniilwa naasaaseri megulu pamwe naJesus Kristus. Ngaashi sha popiwa mEhololo 4:10, 11 kombinga yoondondo dhawo megulu, otaya ka tsikila okulongela Jehova ye li aakwaniilwa naasaaseri.—Hes. 44:28.

⁴ Sho ye li kombanda yevi, onkalamwenyo yawo otayi ulike kutya Jehova oye oshipewa shawo. Uuthembahenda wawo wokulongela Kalunga owu li oshinima sha simanenena kuyo. Oye na eitaalo tali longo mekuliloyambo lyaKristus nohaya tsikile oku mu landula, nokungawo otaya ningi ‘okuhogololwa kwawo kuKalunga ku kale aluhe kwa mena omidhi muyo.’ (2 Pet. 1:10) Oonkalo dhawo nokuvula kwawo okwa yoolokathana. Ihe ihayi ipopile kutya otaya vulu owala okulonga ethimbo eshona miilonga yaKalunga omolwomangambeko ngoka ye na. Mepingathano naashono, oya lenga iilonga yaKalunga nohaye yi longo ngaashi taya vulu. Oya tulila po mboka ye na etegameno lyoku ka kala moparadisa kombanda yevi oshiholelwa oshiwanawa.

5. Ongiini Aakriste ayehe taya vulu okukaleka Jehova oshipewa shawo, nomolwashike tashi vulu okukala eshongo?

⁵ Kutya nduno otu na etegameno lyoku ka kala megulu nenge okombanda yevi otu na ‘okwiidhimbwa tse yene e tatu itsike omuti gwomahepeko gwetu nokulandula Kristus.’ (Mat. 16:24, yelekanitha NW.) Aantu omamiliyona mboka ye na etegameno lyoku ka kala nomwenyo mOparadisa kombanda yevi otaya longele Kalunga, nokungawo otaya landula Kristus. Ngele oye shi kutya otaya vulu okulonga oshindji miilonga yaKalunga, ohaya ningi ngaashi taya vulu. Oyendji oyi inyengithwa ya ninge onkalamwenyo yawo yi kale paunathangwa noya ninga aakokolindjila. Yalwe ohaye shi pondola okukokola ondjila oomwedhi dhontumba omumvo kehe. Ihe yalwe mboka itaaya vulu okukokola ondjila ohaya longo nuudhiginini muukalele. Aantu mboka oye na iikala ya fa yaMaria ngoka a li a tile komutse gwaJesus omugwayo gwa nika nawa. Jesus okwa ti: ‘Oye okwa longele ndje oshilonga oshiwanawa. Oye okwa ningi shoka shi thike poonkondo dhe.’ (Mark. 14:6-8) Kashi shi oshipu okuninga ngaashi tatu vulu molwaashoka otu li muuyuni tawu pangelwa kuSatana. Ihe ohatu ningi oonkambadhala twa mana mo nokukala twi inekela muJehova. Natu kundathaneni omikalo ne dhokondandalunde nkene tatu vulu oku shi ninga.

Kongeni tango Uukwaniilwa waKalunga

6. (a) Aantu oyendji ohaya ulike ngiini kutya oshitopolwa shawo oshi li owala monkalamwenyo ndjika? (b) Omolwashike shi li nawa tu kale niikala ya fa yaDavid?

⁶ Jesus okwa li a longo aalanduli ye ya konge tango Uukwaniilwa nuuyuuki waKalunga. ‘Aantu yuuyuni mbuka, oye na oshitopolwa [nenge oshipewa] shawo shi li mokukalamwenyo huka,’ (KB) kungeyi ohaya kala taya lalakanene omahalo gawo gopaumwene. (Lesha Episalomi 17:1, 13-15.) Oyendji kaye na ko nasha nOmushiti notaya lalakanene onkalamwenyo yuuzeko, okukala ye na uukwanegumbo, nokulonga opo ya thige po omaliko ngoka taga ka thigululwa. Oshipewa shawo oshi li owala monkalamwenyo ndjika. Ihe David okwa li a hala okukala e na “edhina ewanawa” koshipala shaJehova, nokonima yethimbo omwana okwa li a ladhipike aantu ayehe osho ya ninge. (Omuuv. 7:1, NW, enyolo lyopevi.) Ngaashi owala Asaf, David okwa li e shi mono kutya okupanga uukuume naKalunga oku vule kokule okupititha komeho iinima yopaumwene monkalamwenyo. Okwa li a nyanyukilwa okweenda pamwe naKalunga. Pethimbo lyetu, Aakriste oyendji oya pititha komeho iinima yopambepo, pehala lyokukala ya simaneka iilonga yawo yokwiikongela omboloto.

7. Omumwatate gumwe okwa li a mono omalaleko nuuyamba geni sho a pititha komeho Uukwaniilwa?

⁷ Natu taleni koshiholelwa shaJean-Claude, ngoka ha kala mOrepublika yaAfrika lyoPokati. Oku li omukuluntugongalo a hokana, noku na oyana yatatu. Iilonga moshilongo shoka oya pumba, naantu oyendji ohaya ningi ngaashi taya vulu opo ye yi kaleke po. Esiku limwe omuhona gwawo okwa li e mu lombwele a tameke okukala ha longo oshiwike ashihe uusiku, okuza po 6:30 yokomatango. Jean-Claude okwa li a lombwele omuhona gwawo kutya kakele owala kokusila uukwanegumbo we oshimpwiyu palutu, okwa pumbwa wo oku wu sila oshimpwiyu pambepo. Okwa ti wo kutya oku na oshinakugwanithwa shokukwathela egongalo. Omuhona okwa li i inyenge ngiini? Okwa ti: “Ngele ngoye ogumwe gwomaanelago mboka ye na iilonga, nena dhimbwa ayihe, mwa kwatelwa omukadhoye, aamwoye nosho wo omaupyakadhi goye. Onkalamwenyo yoye ayihe owu na oku yi gandjela iilonga, ihe hasha shilwe. Hogolola ngele: oto landula eitaalo lyoye nenge iilonga.” Andola owa li ongoye, ando owa ningi po shike? Jean-Claude okwa li a tokola kutya ngele okwa kanitha iilonga, Kalunga ote ke mu sila oshimpwiyu. Okwa li e shi kutya ota ka kala ta longo oshindji miilonga yaJehova Kalunga, nonokutya ote ke mu kwathela a sile oshimpwiyu oompumbwe dhuukwanegumbo we. Onkee ano, okwa yi kokugongala kwa landula ko kwomokati koshiwike. Ihe konima yaashoka okwi ilongekidha a ye kiilonga, kee na uushili ngele ota ka kala ngaa miilonga. Opo e li po okwa dhengelwa ongodhi. Okwa lombwelwa kutya omuhona ngoka okwa tidhwa, nomumwatate nguka ina tidhwa mo we miilonga.

8, 9. Ongiini tatu vulu okuholela aasaaseri nAalevi mokukala tu na Jehova oshipewa shetu?

⁸ Yamwe mboka ya li monkalo ya fa ndjoka otashi vulika ya li tayi ipula taya ti: ‘Mbela otandi ka sila ngiini oshimpwiyu uukwanegumbo wandje?’ (1 Tim. 5:8) Kutya nduno owa li wi iyadha memakelo lya fa ndyoka nenge hasho, otashi vulika we shi mona kutya kapu na sha shoka tashi ke ku yemateka nando ngele Kalunga oye oshipewa shoye, nowa lenga uuthembahenda woku mu longela. Sho Jesus a li a lombwele aalongwa ye ya konge tangotango uukwaniilwa waKalunga, okwe ya shilipaleke a ti: “Mbika ayihe” ngaashi iikulya, iikunwa nenge iizalomwa “otamu yi gwedhelwa ko.”—Mat. 6:33.

⁹ Dhiladhila owala kAalevi mboka ya li kaaye na oshitopolwa shevi shoka shi li uuthiga wawo. Molwaashoka oya li ya lenga unene elongelokalunga lya yogoka, ohaya kala yi inekela muJehova ngele tashi ya piipumbiwa yawo molwaashoka okwa li e ya lombwele a ti: “Ongame mwene oshipewa shoye.” (Num. 18:20) Nonando ihatu longo motempeli yo yene ngaashi aasaaseri nAalevi ya li ya ningi, otatu vulu oku ya holela mokukala neinekelo kutya Jehova ote ke tu sila oshimpwiyu. Sho ehulilo tali hedha popepi, otu na okukala twi inekela kutya Jehova ote ke tu sila oshimpwiyu shi vulithe nale.—Eh. 13:17.

Kongeni tango uuyuuki waKalunga

10, 11. Yamwe oya li ya tula einekelo lyawo ngiini muJehova ngele tashi ya piilonga yawo yokwiikongela omboloto? Gandja oshiholelwa.

¹⁰ Jesus okwa ladhipike wo aalongwa ye a ti: ‘Tangotango kongeni uuyuuki waKalunga.’ (Mat. 6:33) Shika osha hala okutya oye na okupititha komeho omithikampango dhaJehova dhaashoka shu uka naashoka sha puka. (Lesha Jesaja 55:8, 9.) Otashi vulika to dhimbulukwa kutya aantu oyendji oya li nale haya kunu omakaya noku ga landitha, haya dheula yalwe ya ye kiita nenge haya longo iikondjitho noku yi landitha. Ihe konima sho ya tseya oshili, oyendji yomuyo oya lundulula iilonga yawo e taya ninginithwa.—Jes. 2:4; 2 Kor. 7:1; Gal. 5:14.

¹¹ Andrew oku li oshiholelwa shimwe. Sho i ilongo kombinga yaJehova pamwe nomukadhi, oya tokola ye mu longele. Andrew okwa li e hole iilonga ye tagu pu mo, ihe nonando ongaaka okwe yi etha po. Omolwashike mbela? Omolwaashoka ehangano ndyoka a li ha longele oli na ombinga miita, nokwa li a tokola toko a pitithe komeho uuyuuki waKalunga. Sho e etha po iilonga mbyoka, okwa li e na oyana yaali, noka li e na onzo yilwe hayi mu etele po sha, niimaliwa mbyoka a li e na otayi vulu owala oku ya hupitha oomwedhi oonshona. Pataloko lyopantu otashi vulika a li ta monika a fa kee na ‘uuthiga’ washa. Okwa ka konga iilonga nokwa li i inekela thiluthilu muJehova. Andrew nuukwanegumbo we oya mona uushili kutya eke lyaJehova kali shi efupi. (Jes. 59:1) Ye nomukadhi oya li ya vulu okuya muukokolindjila, molwaashoka onkalamwenyo yawo oyi li paunathangwa. Andrew okwa ti: “Omathimbo gamwe otwa kala tatu ipula unene niimaliwa, nehala mpoka tatu ka kala, nuukolele nosho wo nuukulupe. Ihe Jehova okwa kala kombinga yetu. . . . Nopwaahe na omalimbililo, otatu vulu okutya okulongela Jehova oku na ondjambi, noku li uulenga uunenenene mboka omuntu ta vulu okukala e na.”a—Omuuv. 12:13.

12. Uukwatya wuni twa pumbwa opo tu pitithe komeho uuyuuki waKalunga? Tumbula iiholelwa yomoshitopolwa sheni.

¹² Jesus okwa lombwele aalongwa ye a ti: “Andola mu na eitaalo li thike pomuma [yosinapi], ando otamu vulu okulombwela ondundu ndjika: ‘Itumba po mpaka, u hedhe nkwiyaka!’ Ando tayi itumbu po; nokaku na shoka tashi mu nyenge.” (Mat. 17:20) Mbela oto ka pititha ngaa komeho uuyuuki waKalunga ngele owu shi kutya otashi ke ku etela uupyakadhi? Ngele ku na uushili kutya oto vulu oku shi ninga, pula yalwe megongalo. Iimoniwa yawo nkene Jehova e ya kwathela otayi ka koleka lela eitaalo lyoye.

Kaleni mu na olupandu lwomasiloshimpwiyu gaJehova gopambepo

13. Uuna tatu longo iilonga yaJehova nuudhiginini, otu na okukala twa tegelela shike ngele tashi ya pomasiloshimpwiyu gopambepo?

¹³ Ngele owa lenga uuthembahenda wokulongela Jehova, oto vulu okukala nuushili kutya ote ke ku sila oshimpwiyu palutu nopambepo, ngaashi owala a li e shi ningile Aalevi. Dhiladhila shi na ko nasha naDavid. Nonando okwa li a holama mekololo okwa li e na uushili kutya Jehova ote ke mu kwathela. Otatu vulu okukala twi inekela muJehova, nokuli nonando otu li moothina moka itaatu vulu okuza. Dhimbulukwa kutya sho Asaf e ya “muuyapuki waKalunga,” opo owala a vulu okumona kutya oshike tashi mu etele uupyakadhi. (Eps. 73:17, KB) Natse otu na okukala twi inekela muJehova ngoka he tu pe oondya dhopambepo. Kungawo, otatu ulike olupandu sho tu na uuthembahenda wokulongela Kalunga kutya nduno oonkalo dhetu odha tya ngiini. Jehova oye na kale oshipewa shetu.

14, 15. Otu na okwiinyenga ngiini ngele opu na uuyelele uupe kombinga yomanyolo gontumba, nomolwashike?

¹⁴ Oho inyenge ngiini ngele Jehova Kalunga, ngoka e li Onzo yuuyelele wopambepo a yelitha ‘iinima ye yomuule’ mbyoka yi li mOmbiimbeli? (1 Kor. 2:10-13) Otu na oshiholelwa sha dhenga mbanda nkene omuyapostoli Petrus a li i inyenge sho Jesus a lombwele aapulakeni ye a ti: “Ngele itamu li onyama yOmuna gwOmuntu ne itamu nu ombinzi ye, itamu kala mu na omwenyo meni lyeni.” Aalongwa oyendji oya li taya dhiladhila kutya Jesus ota popi onyama nombinzi ye yo yeneyene. Oya ti: “Elongo ndika ekukutu unene, olye ta vulu oku li pulakena?” Oyo “oya shuna monima.” Ihe Petrus okwa ti: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe.”—Joh. 6:53, 60, 66, 68.

¹⁵ Petrus ka li u uvite ko thiluthilu shoka Jesus a li a hala okutya sho a popi kombinga yokulya onyama Ye nokunwa ombinzi Ye. Ihe omuyapostoli okwa li i inekela kutya Jehova ote ke mu pa uuyelele wopambepo. Uuna pu na uuyelele uupe wopambepo moshinima shontumba, mbela oho kambadhala ngaa okuuva ko kutya omolwashike pwa ningwa elunduluko? (Omayel. 4:18) Aaberea yomethelemimvo lyotango “oya kala ya hokwa okupulakena oohapu dhaKalunga, nesiku kehe oya kala nokukonakona Omanyolo.” (Iil. 17:11) Ngele owe ya holele, oto ka kala wa lenga noonkondo iilonga yoye yokulongela Jehova, noku mu kaleka oshipewa shoye.

Hokaneni owala mOmuwa

16. Ongiini Kalunga ta vulu okukala oshipewa shetu shi na ko nasha noshipango shoka shi li mAakorinto yotango 7:39?

¹⁶ Ombinga onkwawo ishewe yokukalamwenyo moka Aakriste ya pumbwa okukaleka momadhiladhilo omalalakano gaKalunga oyo okutula miilonga omayele gOmbiimbeli ya hokane “owala mOmuwa.” (1 Kor. 7:39, NW) Aakriste oyendji inaya ya mondjokana molwaashoka oya hala okuvulika komayele gaKalunga ngoka. Kalunga oha sile oshimpwiyu aantu mboka. David okwa li a ningi shike sho a li u uvite e li muuwike nopwa fa kaapu na ngoka te mu kwatha? Okwa ti: “Otandi holola omayemato gandje koshipala [shaKalunga]; otandi mu faalele uudhigu wandje. Onda kanitha omukumo.” (Eps. 142:1-3) Otashi vulika nomupolofeti Jeremia ngoka a li a longele Kalunga nuudhiginini uule woomvula omilongo inaa hokana a li u uvite ngaaka. Oto vulu okukonakona oshiholelwa she montopolwa 8 yembo God’s Word for Us Through Jeremiah.

17. Ongiini omumwameme gumwe ngoka inaa hokanwa hi idhidhimikile uuwike omathimbo gamwe?

¹⁷ Omumwameme gumwe mIilongo ya Hangana okwa ti: “Kali shi elalakano lyandje okukala inee hokanwa. Onda manguluka okuhokanwa ngele onda mono ngoka to opalele. Meme ngoka kee shi omwiitaali okwa kala ha kambadhala a tompe ndje ndi itaale kehe ngoka te ya kungame. Onda li nde mu pula ngele okwa hala okukala e na ondjo ngele ondjokana yandje oya ka kala inaayi enda nawa. Mokweendela ko kwethimbo okwa li a mono kutya ondi na iilonga iiwanawa, handi isile oshimpwiyu nonda nyanyukwa. Ina kala we ha thiminike ndje.” Omumwameme nguka omathimbo gamwe oha kala u uvite uuwike. Okwa ti: “Ohandi kambadhala ndi kale ndi inekela muJehova. Ihe etha ndje nando.” Oshike sha li she mu kwathele a kale i inekela muJehova? Okwa ti: “Egalikano ohali kwathele ndje ndi mone kutya Kalunga omuntu gwolela nonokutya aluhe oku li pamwe nangame. Omunamapangelo agehe ota pulakene, omolwashike nduno kaandi na okukala ndi uvite nda simanekwa nondi na enyanyu?” Molwaashoka okwa li e na einekelo kutya “okugandja oku na elago ku vule okutaamba,” okwa ti: “Ohandi kambadhala okukwathela yalwe, noihandi kala nda tegelela sha kuyo. Uuna tandi dhiladhila kutya ‘oshike tandi vulu okuninga opo ndi kwathele omuntu nguka,’ ohandi kala nda nyanyukwa.” (Iil. 20:35) Eeno, omumwameme nguka okwa ninga Jehova oshipewa she, nota nyanyukilwa uuthembahenda woku mu longela.

18. Omeityo lini Jehova ta vulu oku ku ninga oshipewa she?

¹⁸ Kutya nduno owi iyadha monkalo ya tya ngiini, oto vulu okuninga Kalunga oshipewa shoye. Sho to shi ningi, oto ka kala mokati kaantu ye mboka ya nyanyukwa. (2 Kor. 6:16, 17) Shoka otashi vulu oku ku ningitha wu kale oshitendelwa nenge oshipewa shaJehova, ngaashi owala aalongeli ye yalwe yonale. (Lesha Deuteronomium 32:9, 10.) Ngaashi owala oshigwana shaIsraeli sha li sha ningi oshipewa shaKalunga mokati kiigwana yilwe, ota vulu okukala e ku tala ko wu li oshipewa she note ke ku sila oshimpwiyu pahole.—Eps. 17:8.

[Enyolo lyopevi]

Oto yamukula ngiini?

Ongiini to vulu okuninga Jehova oshipewa shoye

• mokukonga tango Uukwaniilwa we nuuyuuki we?

• mokuulika olupandu lwiikulya yopambepo?

• mokuvulika koshipango she shokuhokana owala mOmuwa?

[Oohapu dha simana pepandja 13]

Jehova oha ningi oshipewa shetu uuna twa pititha komeho iilonga ye

[Ethano pepandja 15]

Oshiholelwa shaJeremia otashi tu ladhipike