Matukeni mwa mana mo methigathano
“Natu matukeni twa mana mo methigathano ndyoka li li komeho getu.”—HEB. 12:1.
1, 2. Paulus okwa yelekanitha onkalamwenyo yOmukriste nashike?
OMUMVO kehe, momahala ogendji ohamu kala omathigathano gaamatuki yiinano iile. Aamatuki yamwe mboka haya kutha ombinga momathigathano ngoka oomboka haye shi enditha nawa shito, nelalakano lyawo olyo okusindana. Ihe aatondoki yalwe oyendji ohaya kala ye shi kutya itaya ka sindana. Kuyo, ohashi kala etumba ngele ya matuka sigo okethikilo.
2 Ombiimbeli otayi yelekanitha onkalamwenyo yOmukriste naantu mboka ye li methigathano. Omuyapostoli Paulus okwa li a popi oshinima shoka montumwafo ye yotango ndjoka a li a nyolele Aakriste yomuKorinto shonale. Okwa nyola a ti: “One omu shi shi kutya aantu mboka taa ningi shanamutango, ayehe otaa matuka, ihe gumwe awike ta mono ondjambi yesindano. Nane wo matukeni ngaangoka, mu yi mone.”—1 Kor. 9:24.
3. Paulus okwa li a hala okutya shike sho a ti kutya omumatuki owala gumwe ta ka mona ondjambi?
3 Mbela Paulus okwa li a hala okutya Omukriste owala gumwe ta ka mona ondjambi yomwenyo omanga ooyakwawo taya matuka osima? Hasho nando! Aamatuki mboka haya ningi omathigathano ohayi idheula nohaya ningi ngaashi taya vulu lela nelalakano lyoku ka sindana. Paulus naye okwa hala Aakriste ooyakwawo ya ninge sha faathana ngele tashi ya pondjambi yomwenyo gwaaluhe. Ngele taye shi ningi, otaya ka kala netegameno lyoku gu mona. Methigathano lyopaKriste ayehe mboka taya thiki pehulilo otaya ka sindana.
4. Oshike tu na okukaleka momadhiladhilo shi na ko nasha nethigathano ndyoka tu li mulyo?
4 Oohapu ndhoka otadhi ladhipike ayehe mboka ye li methigathano kunena lyoku ka mona omwenyo, ihe otadhi ningitha wo omuntu a dhiladhile. Omolwashike mbela? Omolwaashoka ondjambi ndjoka tatu ka mona kutya nduno omegulu nenge okombanda yevi mOparadisa itayi vulu okuyelekwa nasha. Odhoshili kutya ethigathano ohali kala ele, nohali lolodha, ohapu kala iiyimbi oyindji, omapiyaganeko nosho wo iiponga mondjila. (Mat. 7:13, 14) Shi nikitha oluhodhi, yamwe otaya matuka kashona, yo yamwe itaya matuka we, nayamwe oya hulila ondjilakati nokuli. Iiyimbi niiponga yini hayi kala methigathano lyoku ka mona omwenyo gwaaluhe? Ongiini to vulu oku yi henuka? Oshike to vulu okuninga wu ka thike opo wu sindane ondjambi?
Opo wu sindane owu na okumatuka wa mana mo
5. Paulus okwa li a yelitha shike kombinga yethigathanopo mAahebeli 12:1?
5 Paulus okwa li a nyolele Aakriste Aahebeli muJerusalem naJudea ontumwafo moka a popi natango kombinga yuudhano wethigathanopo lyokumatuka. (Lesha Aahebeli 12:1.) Montumwafo moka ina popya owala kutya omolwashike tu na okuya methigathanopo, ihe okwa popi wo shoka omuntu e na okuninga opo a sindane. Omanga inaatu ka taleni kiiyilongomwa momayele ga nwethwa mo ngoka Paulus a li a pe Aakriste Aahebeli, natu taleni shoka sha li she mu inyengitha a nyole ontumwafo nosho wo shoka a li a hala okuladhipikila aaleshi ye ya ninge.
6. Aakriste oya li taya thiminikwa ngiini kaawiliki yelongelokalunga?
6 Aakriste yomethelemumvo lyotango unene tuu mboka ya li muJerusalem naJudea, oya li ya taalela omamakelo nomaudhigu ogendji. Oya li taya thiminikwa unene kaawiliki yelongelokalunga lyOshijuda, mboka ya li ya nwetha mo aantu noonkondo. Aawiliki oyo tuu mboka opo owala ya adhika ya pangulitha Jesus Kristus kutya ota tsu ondumbo nepangelo noya li ye mu dhipagitha ongo omuyoni. Oya li ya tokola toko okutsikila nomapataneko gawo. Membo lyIilonga otamu hokololwa nkene ya li ya tilitha nokuponokela Aakriste, okutameka owala konima yoshiningwanima shOpentekoste 33 E.N. Shika osha li sha dhigupaleke lela onkalamwenyo yAakriste aadhiginini.—Iil. 4:1-3; 5:17, 18; 6:8-12; 7:59; 8:1, 3.
7. Aakriste mboka Paulus a nyolele oya li pethimbo edhigu lini?
7 Aakriste mboka oya li ko wo pethimbo sho onkalelo yiinima yOshijuda yi li pokuhula po. Jesus okwa li e ya lombwele kutya ehanagulo otali ka adha Aajuda mboka kaaye shi aadhiginini. Okwa li wo a lombwele aalanduli ye kombinga yiiningwanima mbyoka tayi ka ningwa omanga ehulilo inaali thika, nokwa li e ya pe omalombwelo gokondandalunde gaashoka ye na okuninga ngele oya hala oku ka hupa. (Lesha Lukas 21:20-22.) Oya li taya ka ninga po shike? Jesus okwa londodha a ti: “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopayuni, opo esiku ndyoka lyaaye mú adhe ombadhilila.”—Luk. 21:34.
8. Oshike sha li sha ningitha Aakriste yamwe ya kale taya matuka kashona nenge itaaya matuka we?
8 Ethimbo ndyoka Paulus a nyolele Aahebeli ontumwafo ndjoka opwa adhika pwa pita nale konyala omimvo 30 sho Jesus a gandja elondodho ndyoka. Mbela omukaakena gwethimbo ndyoka lya pita po ogwa li gwa gumu ngiini Aakriste mboka? Yamwe oya li yi igandja komathiminiko nosho wo komapiyaganeko gonkalamwenyo ya kehe esiku e taya shuna monima, noinaya ninga we ehumokomeho lyopambepo ndyoka lya li tali ke ya nkondopaleka. (Heb. 5:11-14) Yalwe oya li yu uvite kutya onkalamwenyo otayi ka kala tayi ende nawa ngele oya kala taya ningi shoka tashi ningwa kAajuda oyendji mboka ye ya dhingilila. Aajuda yamwe mboka kaya li ye etha po Kalunga thiluthilu, oya li natango haya landula iinima yimwe yomOmpango ye. Aakriste yamwe oya li taya thiminikwa nenge taya mbandamekwa koohandimwe megongalo mboka ya li ya kakatela kOmpango yaMoses nokomithigululwakalo. Paulus okwa li a popi shike shoka sha li tashi ka kwathela aamwahe Aakriste ya kale ya tonata pambepo, noya matuke ya mana mo methigathanopo?
9, 10. (a) Eladhipiko lini Paulus a gandja tali adhika lwopehulilo lyontopolwa omulongo yAahebeli? (b) Omolwashike Paulus a li a nyola iilonga yuudhiginini yoonzapo ndhoka dha li ko nale?
9 Jehova okwa li a nwetha mo Paulus a nyolele Aakriste Aahebeli ontumwafo ndjoka tayi koleke eitaalo lyawo. Montopolwa ontimulongo yontumwafo ye, Paulus okwa popya kutya Ompango oya li owala “efano lya dhimeya lyiinima iiwanawa tayi keya” noya li tayi ulike sha yela ongushu yekuliloyambo lyaKristus. Pehulilo lyontopolwa ndjoka Paulus okwa kumagidha aaleshi ye ta ti: “Omu na okwiidhidhimika, opo mu gwanithe po ehalo lyaKalunga ne mu pewe shoka e shi uvaneka. Oshoka enyolo otali ti: ‘Oku na okathimbo okafupi kowala, ngoka e na okuya, ote ya ihe, ye ita kala ko. ’”—Heb. 10:1, 36, 37.
10 Paulus okwa yelitha nawa kutya okukala neitaalo lyashili muKalunga oshike montopolwa 11 yAahebeli. Okwa popi wo iiholelwa yaalumentu naakiintu yeitaalo mboka ya li ko nale. Mbela osha li ngaa sha pumbiwa a popye kombinga yoshinima shono? Eeno. Omuyapostoli okwa li a mono kutya aalongelikalunga ooyakwawo oya li ya pumbwa okutseya kutya ooitaali oya pumbwa uulaadhi nokumatuka ya mana mo. Oshiholelwa sha dhenga mbanda shoka aapiya aadhiginini yaJehova yonale ya tula po, osha li tashi ka koleka eitaalo lyAakriste Aahebeli ya vule okuungaunga nomamakelo nosho wo nomaudhigu ngoka ya taalela. Konima sho a tumbula iilonga yooitaali aadhiginini mboka ya li ko nale, Paulus okwa li a popi a ti: “Ano sho tu na [oshikogo oshinene shoonzapo she tu dhingilila, NW], nena natse wo tu etheni kehe shoka sha hala oku tu kata, nuulunde otau tu idhingile. Natu matukeni twa mana mo methigathano ndyoka li li komeho getu.”—Heb. 12:1.
‘Oshikogo shoonzapo’
11. Okudhiladhila ‘koshikogo oshinene shoonzapo’ otashi vulu oku tu guma ngiini?
11 ‘Oshikogo oshinene shoonzapo’ kasha li owala aatali nenge aayambidhidhi mboka ye ya owala okutala ethigathano nenge ya tale aamatuki mboka ye hole nenge osipana ndjoka tayi sindana. Pehala lyaashono, oya li ya fa aamatuki ye li methigathano. Oya matuka methigathano sigo okethikilo. Nonando oya sa nale, otaya vulu okukala ya talika ko ye li aatondoki mboka taya vulu okutsa omukumo aamatuki aape methigathano. Dhiladhila owala nkene omumatuki ta ka kala u uvite uuna e shi kutya okwa dhingililwa nenge opu na aatondoki mboka ye shi pondola ye li aatali. Mbela itaya ka ninga ngaashi taya vulu nenge yi idhipagele po nokuli? Oonzapo ndhoka dhonale otadhi vulu oku shi koleka kutya ethigathanopo ndyoka lyopathaneko otali vulu okusindanwa, ihe otashi pula oonkambadhala dha mana mo. Kungeyi, ngele otatu kaleke momadhiladhilo oshiholelwa ‘shoshikogo shoonzapo,’ sha hala okutya, Aakriste Aahebeli yomethelemumvo lyotango otashi vulu oku tu tsa omukumo opo tu ‘matuke twa mana mo methigathano’ ngaashi tatu vulu kunena.
12. Oshike tatu vulu okwiilonga meitaalo lyaantu aadhiginini mboka ya li ko nale?
12 Aapiya aadhiginini oyendji yomwaamboka Paulus a tumbula oya li moonkalo dha fa dhetu. Pashiholelwa, Noowa okwa li ko pethimbo ndyoka sho Jehova a hanagula po uuyuni nEyelu. Tse otu li pethimbo lyehulilo lyuuyuni mbuka ndyoka li li popepi. Abraham naSara oya li ya lombwelwa ya thige po oshilongo shawo opo ya ka humithe komeho elongelokalunga lyashili noya kale ya tegelela Jehova a gwanithe euvaneko lye. Jehova ote tu pula wo tu mu longele, pehala lyokuhumitha komeho uuwanawa wetu yene. Ngele otatu shi ningi, ota ka kala e tu hokwa note ke tu laleka nuuyamba. Moses okwa li e ende olweendo olule mombuga yiiponga oyindji u uka kEvi lyEuvaneko. Otu li muuyuni wa kolokosha notwa tegelela uuyuni uupe mboka wu uvanekwa. Osha simana tu konakone shoka ooitaali mboka aadhiginini ya pita musho, mpoka ye shi enditha nawa naampoka inaaye shi enditha nawa, omaukwatya gawo omawanawa nosho wo omaunkundi gawo.—Rom. 15:4; 1 Kor. 10:11.
Oshike sha li she ya kwathele ya pondole?
13. Noowa okwa li a taalele omashongo geni, noshike sha li she mu kwathele a vule oku ga sinda?
13 Oshike sha li sha kwathele aapiya yaJehova ya matuke ya mana mo noya pondole methigathanopo? Tala shoka Paulus a nyola shi na ko nasha naNoowa. (Lesha Aahebeli 11:7.) Noowa ka li a “mona” nando onale “eyelu kombanda yevi, [ndyoka lya li tali ka] yonagula po omufudho aguhe.” (Gen. 6:17) Olya li oshinima shoka inaashi ningwa nale, noinashi monika nando onale. Ihe nonando ongaaka, Noowa ka li e wete itaashi wapa nenge a limbililwa ngele Eyelu otali ya ngaa. Omolwashike mbela? Omolwaashoka okwa li e na eitaalo kutya kehe shoka Jehova u uvaneka ote shi ningi. Noowa ka li e wete a pulwa a ninge oshinima oshidhigu unene. Pehala lyaashono, ‘okwa ningi ngaashi a lombwelwa.’ (Gen. 6:22) Dhiladhila owala kwaashihe shoka Noowa a li e na okuninga opo a tunge onguluwato, a gongele iinamwenyo, a pungule iikulya yaantu noyiinamwenyo monguluwato, a londodhe aantu kombinga yEyelu ndyoka lya li tali ke ya nokukaleka uukwanegumbo we wa kola pambepo. Kasha li oshilonga oshipu okuninga, ihe ‘okwe shi ningi.’ Noowa okwa li e na eitaalo nokwa li a longo a mana mo iilonga mbyoka a pewa, okwa li a hupithwa pamwe nuukwanegumbo we naJehova okwe ya laleke nuuyamba.
14. Omamakelo geni Abraham naSara ya li yi idhidhimikile, notatu ilongo mo shike?
14 Abraham naSara oyo ya landula ko momusholondondo ngoka gwa popiwa kuPaulus kombinga ‘yoshikogo oshinene shoonzapo she tu dhingilila.’ Oya li ya tembudhwa moshilongo shawo Ur moka ya li ye na onkalamwenyo ombwanawa nokaya li ye shi kutya onkalamwenyo yawo otayi ka kala ngiini. Oye li oshiholelwa sheitaalo ihaali tengauka noshevuliko pomathimbo guudhigu. Oshe eleka sho Abraham ti ithanwa “he yopambepo yaayehe mboka yi itaala,” omolwomaiyambo ngoka a li e na ehalo okuninga omolwelongelokalunga lyashili. (Rom. 4:11) Paulus okwa li owala a popi iitsa ya simana molwaashoka aaleshi ye oya li nale ye shi oshindji kombinga yonkalamwenyo yaAbraham. Paulus okwa popi kombinga yawo a ti: “Ootatekulu mbaka ayehe [mwa kwatelwa Abraham nuukwanegumbo we] oya sile meitaalo. Oyo inaa mona iinima ayihe mbyoka Kalunga e yi ya uvanekela, ihe oye yi talele kokule noye yi [nyanyukilwa]. Oya dhimbulula kutya oyo oondjendi naakwiilongo [mevi ndika, NW].” (Heb. 11:13) Osha yela kutya eitaalo lyawo muKalunga nosho wo ekwatathano lyawo naye olya li lye ya kwathele ya matuke methigathano ya mana mo.
15. Oshike sha li shi inyengitha Moses a thige po onkalamwenyo yuuzeko?
15 Moses oku li oshiholelwa shilwe shaapiya yaJehova mboka ya kwatelwa ‘moshikogo shoonzapo.’ Okwa li a thigi po omauyamba agehe nonkalamwenyo yuuzeko e ta “hogolola po okuhepekwa pamwe naantu yaKalunga.” Oshike sha li she mu inyengitha e shi ninge? Paulus okwa yamukula a ti: “Okwa li e wete ondjambi ndjoka te ke yi pewa konakuyiwa. . . . Okwa li e na omukumo ongaangoka a mono Kalunga nando iha monika.” (Lesha Aahebeli 11:24-27.) Moses ka li a piyaganekwa ‘kuutoye wuulunde wokathimbo kowala.’ Kalunga okwa li gwolela kuMoses nokwa li e shi kutya shoka u uvaneka otashi ka gwanithwa naashoka oshe mu kwathele a kale omulaadhi nokumatuke a mana mo. Okwa li a longo nuudhiginini mokukwatela komeho Aaisraeli sho taya zi muEgipiti yu uka kEvi lyEuvaneko.
16. Omolwashike Moses kaa li a geya sho inaa pitikilwa a ye mEvi lyEuvaneko?
16 Ngaashi naanaa Abraham, Moses naye ina mona omahunganeko gaKalunga taga gwanithwa. Sho Aaisraeli ye li pokuya mEvi lyEuvaneko, Moses okwa li a lombwelwa taku ti: “Evi lyo lyene oto li tala, ihe ito yi mo mulyo, evi ndyoka tandi li pe Aaisraeli.” Shika osha ningwa molwaashoka ye naAaron oya li ya geyithwa kuunashipotha woshigwana e ta ya katuka momukalo ngoka tagu ulike kutya inayi ‘inekela Kalunga montaneho yAaisraeli, sho ya li pomeya gaMerib.’ (Deut. 32:51, 52) Mbela Moses okwa li a geya nenge u uvite nayi? Aawe. Okwa li a yambeke oshigwana e ta hulitha noohapu ndhika tadhi ti: “Israeli, ngoye omunelago ngiini! Kape na ngoka e ku fa. Ongoye oshigwana sha hupithwa kOMUWA. OMUWA oye mwene oshikandekitho negongamwele lyoye.”—Deut. 33:29.
Iiyilongomwa kutse
17, 18. (a) Sho tu li methigathanopo lyetu lyoku ka mona omwenyo gwaaluhe, oshike tatu vulu okwiilonga ‘koshikogo shoonzapo’? (b) Oshike tashi ka kundathanwa moshitopolwa tashi landula?
17 Sho twa konakona onkalamwenyo yayamwe ‘yomoshikogo oshinene shoonzapo she tu dhingilila,’ osha yela kutya opo tu matuke sigo okethikilo, otu na okukala twi itaala thiluthilu muKalunga nomomauvaneko ge. (Heb. 11:6) Eitaalo kali na okukala oshinima shoka tu na pakathimbo, ihe otu na okukala nalyo onkalamwenyo yetu ayihe. Otu shi shi kutya Kalunga okwe tu uvanekela onkalamwenyo ombwanawa yi li komeho. Otatu vulu okumona ‘ngoka ihaa monika,’ nokungeyi otatu ka matuka methigathano twa mana mo.—2 Kor. 5:7.
18 Kashi shi oshipu okumatuka methigathanopo lyopaKriste. Kakele kaashono, otatu vulu okuthika pehulilo. Moshitopolwa tashi landula otatu ka kundathana kutya otu na ekwatho lini lya gwedhwa po.
Oto vulu okuyelitha?
• Omolwashike Paulus a li a nyola kombinga yoonzapo oondhiginini ndhoka dha li ko nale?
• Ongiini oshiholelwa ‘shoshikogo oshinene shoonzapo she tu dhingilila,’ tashi vulu oku tu kwathela tu matuke twa mana mo?
• Owi ilonga mo shike mokukonakona kombinga yoonzapo oondhiginini ngaashi Noowa, Abraham, Sara, naMoses?
[Ethano pepandja 19]
Abraham naSara oya li ye na ehalo lyokuthiga po onkalamwenyo ombwanawa moshilando shaUr