‘Matukeni mu yi mone’

“Matukeni ngaangoka, mu yi mone.”—1 KOR. 9:24.

1, 2. (a) Paulus okwa li a longitha shike okuladhipika Aakriste Aahebeli? (b) Aapiya yaJehova otaya kumagidhwa ya ninge shike?

MONTUMWAFO ndjoka Omuyapostoli Paulus a li a nyolele Aahebeli okwa longitha ethaneko li na oonkondo opo a ladhipike Aakriste ooyakwawo. Okwe ya dhimbulukitha kutya hayo ayeke ye li methigathano ndyoka lyoku ka mona omwenyo. Oya li ya dhingililwa ‘koshikogo oshinene shoonzapo’ ndhoka dha li dhe shi pondola methigathano. Aakriste Aahebeli oya li taya ka matuka ya mana mo methigathano noitaya ka hulila ondjilakati, uuna taya dhimbulukwa iilonga yuudhiginini noonkambadhala dhaamatuki mboka ye ya tetekele.

² Moshitopolwa sha tetekele otwi ilongo mo kombinga yonkalamwenyo yaantu yontumba ‘yomoshikogo shoonzapo.’ Ayehe oya li ye na eitaalo lya kola ndyoka lye ya kwathele ya kale aadhiginini kuKalunga, sigo opehulilo lyonkalamwenyo yawo. Otatu vulu okwiilonga sha mwaashoka ya li ya pondola. Ngaashi sha popiwa moshitopolwa shoka, Paulus okwa li a kumagidha aapiya ooyakwawo natse twa kwatelwa mo a ti: “Tu etheni kehe shoka sha hala oku tu kata, nuulunde otau tu idhingile. Natu matukeni twa mana mo methigathano ndyoka li li komeho getu.”—Heb. 12:1.

3. Paulus okwa li a hala okutya shike sho a longitha ethaneko lyaamatuki Aagreka yonale?

³ Embo Backgrounds of Early Christianity otali popi kombinga yiiningwanima ya simana yomathigathano gonale tali ti kutya “Aagreka oya li hayi idheula nohaya kutha ombinga momathigathano inaaya zala sha.”a Komukalo ngono, aamatuki ohaya kala ya manguluka kukehe shimwe shoka tashi vulu oku ya imba nenge oku ya kata kaaya matuke ya mana mo. Okumatuka omuntu e li owala otashi monika sha fa kaashi li nawa, ihe yo oya li ye shi ningi nelalakano limwe alike lyokusindana ondjambi. Sho Paulus a popi oshinima shika, okwa li owala a hala okutya osha simanenena opo aamatuki ye ekelehi kehe shimwe shoka tashi ya imbi okumatuka ya mana mo. Omayele ngaka oga li taga longo kAakriste yonale, nokutse kunena. Omitenge nomaupyakadhi geni tashi vulika ge tu imbe tu sindane ondjambi methigathano lyoku ka mona omwenyo gwaaluhe?

“Tu etheni kehe shoka sha hala oku tu kata”

4. Aantu yopethimbo lyaNoowa oya li yi ipyakidhila unene nashike?

⁴ Paulus okwe tu pa omayele ‘tu ethe kehe shoka sha hala oku tu kata.’ Shoka osha kwatela mo kehe shoka tashi vulika shi tu imbe tu gandje eitulomo lya gwana nokuninga oonkambadhala dha mana mo methigathanopo ndyoka tu li. Iinima yini tayi vulu oku tu imba? Jesus okwe tu kwathela tu dhimbulule iinima mbyoka sho a popi kombinga yethimbo lyaNoowa, gumwe gwomwaamboka ya popiwa kuPaulus. Jesus okwa ti: “Ngaashi sha li pomasiku gaNoowa, osho tuu wo tashi ka kala pomasiku gOmuna gwOmuntu.” (Luk. 17:26) Jesus ka li ta popi kombinga yehanagulo enene ndyoka tali ya, ihe okwa li ta popi shi na ko nasha nonkalamwenyo yaantu. (Lesha Mateus 24:37-39.) Aantu oyendji pethimbo lyaNoowa kaya li ye na ko nasha naKalunga, yo kaya li ya hala oku mu nyanyudha. Oshike sha li she ya imbi? Kasha li shimwe shi ili, shaahe shi okulya nokunwa nosho wo okuhokana, iinima mbyoka hayi ningwa uuna tu li monkalamwenyo. Uupyakadhi owa li kutya “yo inaye shi tseya” ngaashi Jesus a li a popi.

5. Oshike tashi vulu oku tu kwathela tu thike pethikilo methigathanopo?

⁵ Ngaashi owala Noowa nuukwanegumbo we, natse otu na iilonga oyindji mbyoka tu na okulonga kehe siku. Otu na okulonga opo tu mone iimaliwa, tu isile oshimpwiyu tse yene nosho wo uukwanegumbo wetu. Oku shi ninga otaku pula ethimbo lyetu olindji, oonkondo niiniwe yetu. Otashi vulika tu kale tatu ipula unene niipumbiwa yonkalamwenyo, unene tuu sho uuhupilo tawu ende tawu shongola. Tu li Aakriste yi iyapulila Jehova, otu na wo iinakugwanithwa ya simana yoPauteokratika. Ohatu kutha ombinga muukalele, ohatu ilongekidhile okugongala kehe nohatu ningi oonkambadhala opo tu kale twa kola pambepo okupitila mekonakono lyopaumwene nosho wo mEsiku lyElongelokalunga lyUukwanegumbo. Nonando Noowa okwa li e na okuninga oshindji mokulongela Kalunga, okwa ‘ningi ngaashi a lombwelwa.’ (Gen. 6:22) Osha yela kutya ngele twa hala tu kale methigathanopo lyopaKriste sigo opethikilo otu na okupupaleka omitenge ndhoka twa humbata, nokatu na okwiitsika omitenge ndhoka inaadhi pumbiwa.

6, 7. Omayele gaJesus geni tu na okukaleka momadhiladhilo?

⁶ Paulus okwa li a hala okutya shike sho a ti kutya tu etheni “kehe shoka sha hala oku tu kata”? Osha yela kutya ka li a hala kutya otu na okukala ihaatu longo sha thiluthilu, molwaashoka iinakugwanithwa yimwe oya simana. Moshinima shika otu na okukaleka oohapu dhaJesus momadhiladhilo ndhoka tadhi ti: “Inamu kala mu na oshimpwiyu mu tye: ‘Otatu li shike?’ nenge: ‘Otatu nu shike?’ nenge: ‘Otatu zala shike?’ Ayihe mbika otayi lalakanenwa kaapagani. Oshoka Ho yeni yomegulu oku shi shi kutya omwa pumbwa mbika ayihe.” (Mat. 6:31, 32) Oohapu dhaJesus otadhi ulike kutya niinima mbyoka twa pumbwa nokuli esiku nesiku ngaashi iikulya nosho wo iizalomwa otayi vulu okukala omutenge nenge endangalati ngele oyo ya kala ya simanenena monkalamwenyo yetu.

⁷ Konakona nawa oohapu dhaJesus ndhoka tadhi ti: “Ho yeni yomegulu oku shi shi kutya omwa pumbwa mbika ayihe.” Oohapu ndhika odha hala okutya Tate yetu gwomegulu, Jehova, ote ke tu sila oshimpwiyu miinima mbyoka. Uushili owo kutya okukala niinima “mbika ayihe” inashi hala okutya otatu ka kala tu na kehe shimwe shoka twa hala. Ihe nonando ongaaka, otatu lombwelwa taku ti kutya inatu kala tu na oshimpwiyu ‘naayihe mbyoka tayi lalakanenwa kaapagani.’ Omolwashike mbela? Konima Jesus okwa lombwele aapulakeni ye a ti: “Ikotokeleni ne yene! Inamu etha, omadhiladhilo geni ga luudhikwe kiituthi nokuunkolwi nokiimpwiyu yopayuni, opo esiku ndyoka lyaaye mú adhe ombadhilila. Oshoka otali ya ongomwigo.”—Luk. 21:34, 35.

8. Omolwashike ngashingeyi olyo ethimbo lyokweetha “kehe shoka sha hala oku tu kata”?

⁸ Ethikilo oli li popepipepi. Ohenda onene shili ngele otwi ikongele omitenge inaadhi pumbiwa ndhoka tadhi vulu oku tu kata sho ehulilo li li popepi lela. Omuyapostoli Paulus okwa gandja lela omayele ge li pandunge sho a ti: “Uukriste owo shili eliko enene, ihe ongele wa gwana naashoka u shi na.” (1 Tim. 6:6) Ngele otwa tula miilonga oohapu dhaPaulus, otatu ka kala tu na ompito ye eguluka yokusindana ondjambi.

‘Uulunde mboka hawu tu idhingile’

9, 10. (a) Uutumbulilo ‘uulunde hawu tu idhingile’ otawu ulike koshike? (b) Ongiini uulunde tawu vulu oku tu idhingila?

⁹ Kakele owala kwokweetha “shoka sha hala oku tu kata,” Paulus okwa popi wo kutya natu ethe ‘uulunde mboka tau tu idhingile.’ Otawu vulu okukala shike? Oshitya shOshigreka shoka sha tolokwa ‘uulunde mboka hawu tu idhingile,’ mOmbiimbeli osha holoka mo owala lumwe, movelise ndjika. Omulongwantu gwOmbiimbeli Albert Barnes okwa ti: “Ngaashi owala omumatuki ihaa zala oonguwo ndhoka tadhi imbi omagulu ge ga kale ga manguluka okutondoka nawa naandhoka tadhi mu piyaganeke, nOmukriste oku na wo okuninga sha faathana molwaashoka naye oku li wo methigathanopo.” Ongiini Omukriste ta vulu e ethe i idhingilwe kuulunde mboka tawu vulu okunkundipaleka eitaalo lye?

¹⁰ Omukriste iha kanitha eitaalo lye muusiku wumwe. Ohashi endele ko kashona nakashona, nethimbo limwe omuntu iha kala e shi wete nokuli. Paulus okwa londodha lwopetameko lyontumwafo ye shi na ko nasha noshiponga ‘shokufalwafalwa’ nosho wo shokwaaha kokeka okukala tu na “omwenyo omwiinayi gwaa na eitaalo.” (Heb. 2:1; 3:12) Ngele oonguwo odhi idhingile momagulu gomumatuki, nena oshi na uupu i ihate po. Onkee ano, omumatuki oku na okukala a kotoka kutya ngele okwa ka tondoka noonguwo itaadhi opalele otashi vulika i ihate po. Oshike tashi vulu okuningitha omumatuki i ipwililikile oshinima shoka? Otashi vulika shi kale okwaahenakonasha nenge uuntsa nosho wo omapiyaganeko gontumba. Oshike tatu ilongo momayele gaPaulus?

11. Oshike tashi vulu oku tu kanithitha eitaalo lyetu?

¹¹ Otu na okudhimbulukwa kutya iinima mbyoka Omukriste ha ningi otayi vulu oku mu kanithitha eitaalo lye. Omulongwantu gumwe gwOmbiimbeli okwa popi kombinga ‘yuulunde mboka hawu tu idhingile’ a ti: “Uulunde owu na oonkondo dhi vule dhetu kokule, naantu mboka tu li nayo ohaye tu nwetha mo wo nosho wo omahalo getu ga puka.” Edhiladhilo lye olyo kutya ohatu nwethwa mo noonkondo komidhingoloko moka tu li, kuunkundi wetu yene nosho wo kookuume ketu. Iinima mbyoka ohayi vulu okunkundipaleka eitaalo lyetu nenge tu li kanithe nokuli.—Mat. 13:3-9.

12. Omalondodho geni tu na okukaleka momitima dhetu ngele inatu hala okukanitha eitaalo?

¹² Omimvo dha pita, ongundu yomupiya omudhiginini nomunandunge oya kala noku tu dhimbulukitha tu kale twa kotokela shoka hatu tala nohatu pulakene, molwaashoka otashi vulu okunwetha mo omitima dhetu nomadhiladhilo getu. Otwa kala nokulondodhwa kombinga yoshiponga shoka hashi tu idhingile, shoka shi li okulalakanena iimaliwa nomaliko. Otashi vulika tu kale twa pwila momainyanyudho guuyuni ngoka hage eta oshimwenyo aniwa notaga shambula nenge tu kale aapika yiinima mbyoka opo tayi kondo. Oshi li epuko lya kwata miiti ngele otatu dhiladhila kutya omayele ngoka otage tu ngambeke unene nenge tu dhiladhile kutya otaga longo owala kaantu yamwe, ihe hakutse. Uuyuni waSatana ohawu tu kotokele noku tu pukitha niinima mbyoka hayi tu idhingile. Iinima ngaashi okwaahe na ko nasha, okukala twi iyinekela nosho wo omainyanyudho oya yona po eitaalo lyayamwe, notayi vulu oku tu imba tu ka mone ondjambi yomwenyo.—1 Joh. 2:15-17.

13. Ongiini tatu vulu okwiigamena komanwethomo omawinayi?

¹³ Esiku nesiku ohatu tsakaneke aantu mboka taya humitha komeho omalalakano, omithikampango nosho wo okudhiladhila kuuyuni. (Lesha Aaefeso 2:1, 2.) Ihe otse yene tu na okwiigamena opo kaaye tu nwethe mo. “Ombepo” ndjoka Paulus a popi otayi vulu okudhipaga omuntu. Otu na okukala aluhe twa kotoka opo kaayi tu thiminike nenge yi tu sithe oshimpwininika, shoka tashi ke tu ningitha twaaha mane ethigathanopo. Oshike tashi ke tu kwathela tu kale methigathanopo? Okulandula oshiholelwa shomumatuki a gwanenena, Jesus. (Heb. 12:2) Otu na wo oshiholelwa shaPaulus, naye okwa li gumwe gwomaamatuki mboka ya li methigathanopo lyopaKriste nokwa ladhipike ooitaali ooyakwawo ye mu holele.—1 Kor. 11:1; Fil. 3:14.

Ongiini ‘to vulu okumona’ ondjambi?

14. Paulus okwa li a tala ko ngiini ethigathanopo moka a li?

¹⁴ Paulus okwa li a tala ko ngiini okukutha ombinga kwe methigathanopo? Sho a nyolele aakuluntugongalo muEfeso lwahugunina, okwa ti: “Kandi na nando uutende nomwenyo gwandje. Onda hala ashike okutsakanitha oshilonga shoka nde shi pewa kOmuwa Jesus shokuuvitha.” (Iil. 20:24) Okwa li e na ehalo okuyamba po kehe shimwe, mwa kwatelwa omwenyo gwe opo a matuke sigo okethikilo. Paulus okwa li e wete kutya oonkambadhala dhe adhihe niilonga ye yuudhiginini mbyoka a longa mokuuvitha onkundana ombwanawa itayi ka kala yi na ekwatho lyasha ngele ina mana ethigathanopo. Ihe nonando ongaaka, ka li u uvite kutya ondjambi okwe yi mona nale. (Lesha Aafilippi 3:12, 13.) Lwopehulilo lyonkalamwenyo ye opo owala a popya neinekelo a ti: “Methigathano ndika ondi itula mo nda mana mo. Onda matuka oshinano ashihe, onda dhiginina eitaalo.”—2 Tim. 4:7.

15. Paulus okwa gandja eladhipiko lini kaamatuki ooyakwawo mboka ye li methigathanopo?

¹⁵ Paulus okwa li e na ehalo enene okumona Aakriste ooyakwawo taya matuka sigo okethikilo, ihe hakuhulila ondjilakati. Pashiholelwa, okwa li a ladhipike Aakriste muFilippi ya longe nuudhiginini omolwehupitho lyawo. Oya li ya pumbwa ‘okudhiginina oohapu dhomwenyo.’ Okwa tsikile ko a ti: “Nena ngame otandi ka vula okwiitanga omolweni mesiku lyaKristus, oshoka oonkambadhala dhandje niilonga yandje ayihe kaya li ashike eihepeko lyowala.” (Fil. 2:16, yelekanitha KB.) Okwa li wo a ladhipike Aakriste ooyakwawo muKorinto a ti: ‘Matukeni ngaangoka, mu mone ondjambi.’—1 Kor. 9:24.

16. Omolwashike ethikilo nenge ondjambi yi na okukala yolela kutse?

¹⁶ Mboka haya kutha ombinga momathigathanopo giinano iile, petameko ihaya kala ye wete kutya otaya ka hulila peni. Ihe sho taya matuka ohaya kala ye shi kutya oyu uka kethikilo nohaya kala ye shi kutya otali hedha popepi sho taye ende taya matuka. Tse otu na wo okuninga sha faathana methigathanopo moka tu li. Ethikilo nenge ondjambi oyi na okukala yolela kutse. Shika otashi ke tu kwathela tu yi mone.

17. Eitaalo ohali tu kwathele ngiini tu kale nokugandja eitulomo kondjambi?

¹⁷ Paulus okwa nyola a ti: “[Okukala] tu na eitaalo otashi ti okukala tu na einekelo lya kola miinima mbyoka twe yi tegamena naambyoka itaatu vulu oku yi mona ngashingeyi.” (Heb. 11:1) Abraham naSara oya li ye na ehalo okuthiga po onkalamwenyo yuuzeko nokukala “oondjendi naakwiilongo [mevi ndyoka, NW].” Oshike sha li she ya kwathele? Oya li ya ‘mono iinima mbyoka Kalunga e ya uvanekele, noye yi talele kokule.’ Moses okwa li e ekelehi “uutoye wuulunde wokathimbo kowala” nosho wo “omauyamba agehe gomuEgipiti.” Omolwashike a li e na eitaalo noonkondo oku shi ninga? Omolwaashoka “okwa li e wete ondjambi ndjoka te ke yi pewa konakuyiwa.” (Heb. 11:8-13, 24-26) Ngashingeyi otu uvite ko nawa sho Paulus a ti kutya “eitaalo” olyo lya li lya longitha aantu ayehe mbaka. Eitaalo olyo lya li lye ya kwathele yi idhidhimikile omamakelo nosho wo omaudhigu moka ya li, noya li ye wete shoka Kalunga e ya longela nosho wo shoka te ke ya ningila.

18. Opo tu ethe ‘uulunde mboka hawu tu idhingile,’ otu na okukatuka oonkatu dhini?

¹⁸ Ngele ohatu tedhatedha aluhe kombinga yiiholelwa yaalumentu naakiintu mboka ya popiwa mAahebeli ontopolwa 11 noku ya holela, eitaalo lyetu otali ka koka notatu ka etha ‘uulunde mboka hawu tu idhingile.’ (Heb. 12:1) Otatu vulu wo ‘okusilathana oshimpwiyu, okukwathathana mokuholathana nomokulongelathana uuwanawa’ mokugongala pamwe naamwatate mboka nayo taya ningi oonkambadhala dhokukala ye na eitaalo lya kola.—Heb. 10:24.

19. Omolwashike sha simana tu tsikile methigathanopo ngashingeyi?

¹⁹ Otu li pokuthika lela pehulilo lyethigathanopo lyetu. Otwa fa tu wete ethikilo nomeho getu yene. Onkee ano, ‘tu etheni kehe shoka sha hala oku tu kata, nuulunde mboka hawu tu idhingile,’ mokukala tu na eitaalo lya kola nosho wo kekwatho ndyoka Jehova he tu pe. Eeno shili, otatu vulu okumatuka momukalo ngoka tagu ke tu petha ondjambi, ndjoka yi li omalaleko nuuyamba ngoka Tate yetu, Jehova Kalunga e tu uvanekela.

[Enyolo lyopevi]

Oto dhimbulukwa?

• Okweekelahi “kehe shoka sha hala oku tu kata” okwa kwatela mo shike?

• Oshike tashi vulu okuningitha Omukriste a kanithe eitaalo?

• Omolwashike tu na okukala tatu gandja eitulomo kondjambi?

[Ethano pepandja 23]

‘Uulunde mboka hawu tu idhingile’ oshike, nohashi ende ngiini?