Ombiimbeli ohayi lundulula onkalamwenyo yaantu
OSHIKE sha li shi inyengitha omukadhona omugundjuka a galukile melongelokalunga moka a tekulilwa? Lesha shoka a popi mwene.
“Ngashingeyi onkalamwenyo yandje oyi na elalakano.”—LISA ANDRÉ
OMVULA MOKA A VALWA: 1986
OSHILONGO MOKA A VALELWA: LUXEMBOURG
ONDJOKONONA: OKANONA OKATANGALALI
ONAKUZIWA YANDJE: Ngame mwene onda putukila mokandoolopa okashona kedhina Bertrange ke li popepi noshilando shaLuxembourg. Mokandoolopa moka omwa yela noka mu na omuyonena noke li okayamba. Otwa valwa tu li yatano, ngame ongame onkelo. Aavali yandje Oonzapo dhaJehova, noya li ya longo nuudhiginini opo ya thindile omaukwatya gopaKriste mungame, maamwamememati, nosho wo maamwamemekadhona.
Sho opo owala nda gwanitha oomvula omulongo nasha, onda tameke okukala nda limbililwa omalongo gOonzapo dhaJehova. Petameko, onda li ndi ipwililikile omaipulo ngoka, ihe mokweendela ko kwethimbo eitaalo lyandje olye ende tali nkundipala noonkondo. Aavali yandje oya li ya ningi kehe shono taya vulu opo ya kwathele ndje ndi landule ondjila ndjoka yu uka, ihe kanda li nda taamba ko ekwatho lyawo. Onda li handi kala naagundjuka mboka inaaya simaneka Ombiimbeli, shoka nda li handi shi ningi aavali yandje kaaye shi shi. Onda li nda hala ndi kale ndi na emanguluko nda fa aagundjuka mboka. Otwa li hatu tyapula sha pitilila, hatu yi momilalo nakehe gumwe notwa li hatu longitha nayi iikolitha niingangamithi. Petameko onda li handi kala nda nyanyukwa sho ndi li naantu mboka taya monika ya fa taya tyapula onkalamwenyo pakuudha.
Ihe muushili wowene, kanda li ndi na enyanyu. Onkalamwenyo yandje kaya li yi na elalakano sho nda li handi kala naantu mboka, yo nee yakwetu kaya li ye na ko nasha. Ihe ngame onda li handi ipula unene nokwaanuuyuuki hoka kwi ihanena muuyuni. Mokweendela ko kwethimbo, onda li nda kwatwa kepolimano.
NKENE OMBIIMBELI YA LUNDULULA ONKALAMWENYO YANDJE: Esiku limwe sho nda li ndi na oomvula 17, onda li nda polimana noonkondo. Sho meme a mono kutya inandi nyanyukwa, okwa lombwele ndje ndi konakone Ombiimbeli ishewe. Okwa lombwele ndje ndi konakone shoka tayi longo ndi tokole ngame mwene ngele onda hala okukala metsokumwe nayo. Shoka twa li twa kundathana nameme osha li sha lundulula onkalamwenyo yandje lela. Onda li nda zimine ndi konakone Ombiimbeli naCoroline omumwamemekadhona gwomukuluntu pamwe nomusamane gwe, Akif. Akif ina putudhwa e li Onzapo yaJehova, ihe okwa li a ningi Onzapo sho omukuluntu. Omolwonakuziwa yaAkif, onda li ndi uvite kutya ote vulu okupopya naye nda manguluka. Okupopya nda manguluka okwa li kwa simana lela kungame.
Onda li ndi shi shi nawa kutya onkalamwenyo yandje kaya li yo opalela Onzapo, ihe petameko onda li ndi wete kutya shoka nda li tandi ningi monkalamwenyo yandje oshinima shopaumwene. Sho nda konakona Ombiimbeli, onda li nda mono kutya onkalamwenyo yandje oyu uvitha nayi Jehova. (Episalomi 78:40, 41; Omayeletumbulo 27:11) Onda mono wo kutya oyu uvitha nayi yalwe.
Sho nda konakona Ombiimbeli muule, onda li nda mono kutya opu na omatompelo ogendji ngoka taga vulu okukwathela omuntu i itaale kutya Ombiimbeli oyi li shili Oohapu dhaKalunga. Pashiholelwa, onda li ndi ilongo kombinga yomahunganeko gontumba ngoka ga gwanithwa nale momukalo naanaa moka ga li ge na okugwanithwa. Ontseyo ndjoka oya li ya kwathele ndje ndi ze momalimbililo moka nda li nale.
Konima yomvula yimwe lwaampono sho nda tameke okukonakona Ombiimbeli, otwa yi naavali yandje tu ka talele po omumwamememati ngoka e li omwiiyambi koshitayimbelewa shOonzapo dhaJehova mOndowishi. Osha li shi inyengitha ndje lela sho nda mono nkene omumwamememati a nyanyukwa shili. Enyanyu ndyoka olyo naanaa nda kala te kongo! Onda li wo nda kumithwa shili kOonzapo dhilwe ndhoka dhi iyamba okulonga moka. Inaya fa nando aantu mboka nda li handi kala nayo kaaye na oshili nohaya kongo owala okwiinyanyudha. Konima owala sho twa shuna kegumbo, onda galikana kuJehova, e ta ndi mu uvanekele kutya otandi ke mu longela onkalamwenyo yandje ayihe. Onda li ndi ndu ulike kutya ondi iyapulila Jehova sho nda ninginithwa manga ndi na oomvula 19.
UUWANAWA MBOKA NDA MONA: Ngashingeyi onkalamwenyo yandje oyi na elalakano. Ohandi nyanyukilwa okukwathela yalwe moku ya longa Ombiimbeli ya tseye Jehova nomauvaneko ge ge na ko nasha nonakuyiwa. Aantu yaandjetu nayo oya mona uuwanawa molwaashoka ihaya kale we tayi ipula nangame shi na ko nasha nonkalamwenyo yandje yonale.
Ondi shi shi nawa kutya omapuko geni nda li nda ningi, ihe ohandi kambadhala kaandi gandje eitulomo kugo. Pehala lyaashono ohandi ukitha eitulomo kwaashono kutya Jehova oha dhimi po omayono nosho wo kutya oku na ko nasha nangame. Ohandi tsu kumwe lela noohapu ndhoka dhi li mOmayeletumbulo 10:22 ndhika tadhi ti: “Eyambeko lyOMUWA otali yambapaleke, [noita gwedha ko uudhigu washa kulyo, NW].”
[Oohapu dha simana pepandja 10]
“Otwa li hatu tyapula sha pitilila, hatu yi momilalo nakehe gumwe notwa li hatu longitha nayi iikolitha niingangamithi”
[Oohapu dha simana pepandja 11]
“Ondi shi shi nawa kutya omapuko geni nda li nda ningi, ihe ohandi kambadhala kaandi gandje eitulomo kugo”