Longa aanona yoye
Uunake tu na okukala twa tonata?
OTASHI vulika wu zimine kutya okukala wa tonata uuna wu li kosikola okwa simana. Aanasikola oyendji ohaya kotha uuna ye li mongulu, ihe opo wu ilonge mo sha owu na okukala aluhe wa tonata. Otashi vulika ho yi wo kokugongala hoka haku konakonwa Ombiimbeli.
Mbela oshike wu na okuninga opo wu kale ho kala wa tonata?—a Oshinima shimwe shoka to vulu okuninga, kala ho kotha kuyele. Otashi vulika wo shi ku kwathele ngele owa kala ho kotha po kashona omutenya. Natu tale kutya otatu i ilongo mo shike mwaashoka sha li sha ningwa po sho omugundjuka gumwe ngoka a li a kotha a gu pekende sho omuyapostoli Paulus a li tu uvitha. Lesha mOmbiimbeli mIilonga ontopolwa 20, ovelise 7 sigo 12, wu tale shoka sha li sha ningwa po.
Paulus okwa li a ka talela po egongalo ndyoka lya li muTroas, oshilando shi na etulilosikepa. Ombiimbeli oya popi kutya Paulus “okwa li e na okuza po esiku lya landula” nombautu. Onkee ano, “okwa tsikile okupopya sigo opokati kuusiku.” Otatu lesha kutya “Omulumentu gumwe omugundjuka, edhina lye Eutikus, okwa li a kuutumba pekende. Ano Paulus sho a popi olule, Eutikus okwa tameke okusa oomposi.” Konima yaashono oshike sha ningwa po?—
Eutikus okwa gu po pekende ‘lyontala ontitatu e ta gwile pevi.’ Paulus nayalwe oya kulukile pevi neendelelo. Oye mu adha a sa. Shika ka sha li tuu she ya yemateke?— Ombiimbeli oya popi kutya Paulus okwa kutha Eutikus e te mu papatele. Nziya Paulus okwi igidha nenyanyu a ti: ‘Ina mu tila, oku na natango omwenyo!’ Kalunga e mu yumudha.
Shoka sha li sha ningilwa Eutikus otashi tu longo shike kombinga yaKalunga?— Otatu ilongo mo kutya Jehova, Tate yetu gwomegulu, ota vulu okuyumudha aasi, mwa kwatelwa aagundjuka. Jehova oku ku uvite ko, ye oku ku hole e vule nokuli naavali yoye. Sho Jesus a li kombanda yevi, okwa li u ulike nkene Jehova u uvitile aanona mokukala nayo noku ya yambeka. Okwa li wo a yumudha aagundjuka, mwa kwatelwa okakadhona koomvula 12.
Okukala wu shi kutya Tate gwoye gwomegulu oku ku hole ohashi ku uvitha ngiini?— Odhoshili kutya ohashi tu ningitha tu kale tu hole Jehova nokukala twa hala okuvulika kwaashoka te tu lombwele. Mbela owu shi kutya ongiini tatu vulu okuulika kutya otu mu hole?— Omukalo gumwe oku mu lombwela kutya otu mu hole. Jesus okwa ti: “Ngame ondi hole Tate.” Ihe Jesus ka li owala a popi kutya okuhole Kalunga. Okwa li e shi ulike okupitila miilonga ye.
Jesus okwa li ha vulika kuKalunga. Okwa popi a ti: ‘Ngame ohandi longo aluhe shoka she mu opalela.’ Ngele otwa hala tu nyanyudhe Jehova nOmwana Jesus, otatu ka ninga oonkambadhala dha mana mo tu kale twa tonata.
Lesha mOmbiimbeli yoye
[Enyolo lyopevi]
a Ngele oto lesha nokanona, owu na okufudha po pokamusinda hoka ke lile po oku ku dhimbulukitha wu pe okanona ompito ka popye omaiyuvo gako.