Omayele Gopandunge Kwaamboka Inaaya Ya Mondjokana Nokaaihokani
“Otandi popi ngeyi, oshoka . . . onde mú halela okulonga shoka oshiwanawa noshi li mondjila, mu wape okwiigandja moshilonga shOmuwa.”—1 KOR. 7:35.
1, 2. Omolwashike omuntu e na okulandula omayele gOmbiimbeli kutya nduno oku li mondjokana nenge ina ya mo?
NGELE tatu ungaunga nomuntu guukashike kookantu wa yooloka ko kuwetu, omathimbo gamwe ohatu kala tu na omaiyuvo gi ili nogi ili ngaashi enyanyu, eyeme nenge omalimbililo. Opo tu ungaunge nonkalo ndjoka nomupondo otwa pumbwa ewiliko lyaKalunga, nopu na omatompelo galwe kutya omolwashike. Omukriste ngoka a tokola kaaye mondjokana otashi vulika a thiminikwe kuyaandjawo nenge kookuume ke e shi ninge. Yalwe otashi vulika ya hala okuya mondjokana, ihe inaya mona omuyalekwa. Yamwe oya pumbwa omayele nkene ye na oku shi enda ya ka kale aasamane nenge aakulukadhi taya gwanitha po iinakugwanithwa yawo. Aakriste ohaya makelwa ngele tashi ya pomilalo dha nyata kutya nduno oye li mondjokana nenge inaya ya mo.
2 Iinima mbyoka ohayi gumu ombili yetu nosho wo ekwatathano lyetu naJehova Kalunga. Paulus okwa gandja omayele kwaamboka ye li mondjokana nosho wo kwaamboka inaaya ya mo, montopolwa 7 yontumwafo ye yotango kAakorinto. Elalakano lye olya li okuladhipika aaleshi ye ya “wape okwiigandja moshilonga shOmuwa.” (1 Kor. 7:35) Omayele ge otaga vulu oku ku kwathela moshinima shika, molwaashoka okwa hala tu longele Jehova pakuudha kutya nduno otu li mondjokana nenge inatu ya mo.
Etokolo lyopaumwene lya kwata miiti
3, 4. (a) Oshike hashi vulu okuholoka po omathimbo gamwe ngele gumwe ta thiminikwa kookuume nokaapambele a ye mondjokana? (b) Ongiini omayele gaPaulus taga kwathele omuntu a kale e na ondjele ngele tashi ya pondjokana?
3 Aantu momaputuko ogendji kunena oya lenga ondjokana, ya fa owala Aajuda mboka ya li ko omimvo 100 dha pita. Ngele omumati nenge omukadhona a kondo omimvo dhontumba inaaya mondjokana, aapambele nookuume ke ohaya kala ye wete ye na oku mu pa omayele gontumba. Ohashi vulika ye mu ladhipike a konge kuume kopandjokana a mana mo. Otashi vulika ye mu ladhipike taya ti kutya ninga po owala gwangandi. Ohashi vulika ya ninge omalongekidho miineya opo aantu mboka yaali ya tsakanene. Omathimbo gamwe aantu mboka taya ningwa ngaaka ohaya kala ya sa ohoni, yu uvite nayi nohashi vulika ya tondathane.
4 Paulus ina thiminika nando ogumwe a ye mondjokana nenge kaaye mo. (1 Kor. 7:7) Ye okwa li a nyanyukwa okulongela Jehova kee na omukulukadhi, ihe okwa li wo a simaneka uuthemba wa yalwe mboka ye li mondjokana. Omukriste kehe kunena oku na wo uuthemba wokutokola kutya ota yi mondjokana nenge hasho. Kapu na ngoka e na okuthiminika mukwawo.
Longitha nawa uuthembahenda wokukala inoo ya mondjokana
5, 6. Omolwashike Paulus a popile muuwanawa okwaaha ya mondjokana?
5 Oohapu dhaPaulus ndhoka a nyolele Aakorinto otadhi tu kwathele tu uve ko kutya omuntu inaaya mondjokana ota vulu okulongela Kalunga nenyanyu. (Lesha 1 Aakorinto 7:8.) Aawiliki yomalongelokalunga gUukwakriste yamwe mboka inaaya hokana ohaya dhiladhila kutya oye li nawa ye vule mboka ya hokana. Ihe Paulus okwa popi uuwanawa mboka hawu nyanyukilwa kaauvithi oyendji yonkundana ombwanawa mboka inaaya ya mondjokana. Uuwanawa mboka owashike?
6 Olundji Omukriste ngoka inaaya mondjokana ota vulu okutaamba ko oshinakugwanithwa shiilonga yaJehova shoka ta pewa e vulithe ngoka e li mondjokana. Paulus okwa li a pewa uuthembahenda wi ikalekelwa wokukala “omuyapostoli kiigwana.” (Rom. 11:13, NW) Opo wu mone ehokololo nkene ye naatumwa ooyakwawo ya longo miitopolwa yontumba nosho wo nkene ya toto omagongalo pomahala ogendji, lesha Iilonga ontopolwa 13 sigo 20. Paulus okwa li i idhidhimikile omaupyakadhi ogendji ngoka oyendji yomutse itaatu ka tsakaneka kunena. (2 Kor. 11:23-27, 32, 33) Ihe okwa li e gi idhidhimikile nokunyanyukilwa oshilonga she shokuninga aantu aalongwa. (1 Tes. 1:2-7, 9; 2:19) Mbela andola okwa li a hokana nenge e na uukwanegumbo, ando okwa gwanitha po ngaa iilonga ye ayihe mbyoka a longa? Otashi vulika ando hasho.
7. Gandja oshiholelwa shimwe nkene Oonzapo ndhoka inaadhi hokanwa dha longitha ompito yadho okuhumitha komeho iilonga yUukwaniilwa.
7 Aakriste oyendji mboka inaaya ya mondjokana otaya longitha ompito ndjoka okuninga oshindji miilonga yUukwaniilwa. Sara naLimbania, aakokolindjila moBolivia oya li ya tembukile komukunda hoka aantu inaayu uvithilwa onkundana ombwanawa uule woomvula. Mbela sho kaaku na olusheno osha li tashi ke ya imba kaaya ye komukunda ngoka? Oya ti: “Momukunda kamu na ooradio nenge oo-TV, kungeyi kapu na shoka hashi piyaganeke aantu kaaya leshe, oshinima shoka shi li sha simana.” Aantu yamwe momukunda oya li yu ulukile aakokolindjila mboka iileshomwa iikulu yOonzapo dhaJehova mbyoka ya li haya lesha natango pethimbo mpoka, ihe ihayi nyanyangidhwa we. Osha li oshidhigu kaamwameme mboka okushuna kukehe gumwe moshitopolwa, molwaashoka pegumbo kehe aantu oya li tayu ulike ohokwe. Omukiintu gumwe omunamimvo okwe ya lombwele a ti: “Ehulilo oli na okukala li li popepi molwaashoka Oonzapo dhaJehova odha thika koshitopolwa shetu.” Aantu yamwe momukunda ngoka oya kala haye ya kokugongala.
8, 9. (a) Paulus okwa li e na shike momadhiladhilo sho a popile muuwanawa okwaaha ya mondjokana? (b) Aakriste mboka inaaya ya mondjokana oye na uuwanawa wuni?
8 Aakriste aaihokani oye na wo iimoniwa iiwanawa sho tayu uvitha miitopolwa mbyoka iidhigu. Ihe iinakugwanithwa yimwe mbyoka hayi pewa aakokolindjila inaaya ya mondjokana, otashi vulika yi kale iidhigu kwaamboka ye li mondjokana nenge ye na aanona. Sho Paulus ta nyola oontumwafo dhe, okwa li e shi kutya opu na natango iilonga oyindji yokuhumitha komeho onkundana ombwanawa momagongalo. Okwa li a hala ayehe ya kale ya nyanyukwa ye mu fa. Omolwoshinima shoka okwa popile muuwanawa okulongela Jehova inoo ya mondjokana.
9 Omumwameme gumwe omukukolindjila inaa hokanwa a za kIilongo ya Hangana okwa nyola a ti: “Aantu yamwe ohaya dhiladhila kutya ngele ino ya mondjokana ito kala wa nyanyukwa. Ihe ngame onde shi mona kutya enyanyu tali kalelele ohali zi mokukala wu na uukuume naJehova. Okukala inoo ya mondjokana oku li eiyambo, noku li omagano omakumithi ngele oto ku longitha nawa.” Okwa nyola a ti: “Okukala inoo ya mondjokana otaku vulu oku ku etela enyanyu, ihe kaku li endangalati. Ondi shi shi kutya Jehova ohu ulukile aaihokani nosho wo mboka inaaya ya mondjokana ohole ye.” Omumwameme ngoka ngashingeyi ota longo moshilongo moka mu na ompumbwe onene yaauvithi yUukwaniilwa. Ngele ino ya mondjokana, mbela ito vulu okulongitha emanguluko ndyoka wu tamunune mo iilonga yoye yokulonga yalwe oshili? Ngele oto shi ningi, oto ka mona kutya okukala inoo ya mondjokana oku li omagano dhingi ga za kuJehova.
Mboka ya hala okuya mondjokana
10, 11. Jehova oha kwathele ngiini mboka ya hala okuya mondjokana, ihe inaya mona kuume to opalele?
10 Aapiya yaJehova oyendji aadhiginini ohaya kongo kuume kopandjokana konima sho ya longela Jehova ethimbo lyontumba. Ohaya pula Jehova e ya kwathele ya mone kuume ngoka to opalele, molwaashoka ohaya kala ye shi kutya oya pumbwa ewiliko lye.—Lesha 1 Aakorinto 7:36.
11 Galikana kuJehova e ku kwathele ngele owa hala okuya mondjokana nagumwe ngoka a hala okulongela Jehova nomutima aguhe ngaashi ngoye. (Fil. 4:6, 7) Kashi na nee mbudhi kutya owa pumbwa okutegelela ethimbo li thike peni, ino teka omukumo. Kala wi inekela Kalunga ngoka he tu kwathele, note ke ku ambidhidha wi idhidhimikile onkalo yoye.—Heb. 13:6.
12. Omolwashike Omukriste e na okutala nawa ngele pu na ngoka te mu kongo?
12 Omukriste ngoka a hala okuya mondjokana otashi vulika a kongwe komuntu ngoka e na uupambepo tawu limbilike nenge nokuli kee shi omwiitaali. Ngele shoka oshe ku ningilwa, dhimbulukwa kutya iizemo iiwinayi mbyoka hayi ka holoka po omolwokuhogolola kuume kopandjokana a puka otayi vulu oku ku etela uupyakadhi owundji shi vulithe pwaamboka wa li wu na sho inoo ya mondjokana. Ngele owa yi mondjokana kutya nduno otayi ende nawa nenge hasho, dhimbulukwa kutya ondjokana oshinima tashi kalelele. (1 Kor. 7:27) Ino ya owala mondjokana nakehe gumwe molwaashoka we yi halelela otashi vulika wu ki ipe uusama konima yethimbo.—Lesha 1 Aakorinto 7:39.
Ilongekidhila ondjokana tayi kalelele
13-15. Mboka taye endelathana oye na okukundathana iinima yini mbyoka tayi vulu okweeta uupyakadhi mondjokana?
13 Nonando Paulus okwa li a popile okulongela Jehova omanga omuntu inaaya mondjokana, ka li a dhina mboka ya tokola oku shi ninga. Pehala lyaashono, omayele ge ga nwethwa mo ohaga kwathele aaihokani yu ungaunge niinima mbyoka hayi holoka aluhe mondjokana noku ya kwathela wo opo ondjokana yawo yi kalelele.
14 Yamwe mboka taye endelathana oya pumbwa okulundulula etaloko lyawo li na ko nasha naashoka ya tegelela monakuyiwa. Otashi vulika ayehe yaali ya kale ye wete kutya ohole yawo oyi ikalekelwa nokapu na esiku mondjokana yawo mu ka holoke okwaahauvathana. Ohaya yi mondjokana ye na einekelo kutya ayihe otayi ke enda nawa nokapu na sha shoka tashi vulu okuteya po ekwatathano lyawo ewanawa. Okudhiladhila kwa tya ngaaka kaku li pandunge. Okwiiyuvitha nawa mondjokana ohaku nyanyudha, ihe itaku ka ningitha mboka ta ye endelathana ya kondjithe uudhigu mboka hawu holoka mondjokana kehe.—Lesha 1 Aakorinto 7:28.a
15 Oyendji mboka opo ya hokana ohaya kala ya kumwa, ya yemata ngele ookuume kawo kopandjokana itaaya tsu kumwe nayo miinima ya simana. Ayehe yaali otashi vulika ye ki iyadhe itaaya tsu kumwe nkene ye na okulongitha iimaliwa yawo nosho wo kombinga yomainyanyudho, mpoka taya ka kala, nonokutya olungapi ye na okutalela po aavali yawo. Ye kehe gumwe oku na uukwatya mboka tashi vulika wu ningile nayi mukwawo. Pethimbo sho taye endelathana, otashi vulika kaaya popye kombinga yiinima mbyoka ya simana, ihe konima otayi vulu okweeta uupyakadhi uunene mondjokana. Otashi ka kala nawa opo mboka taye endelathana ya kandule po iinima mbyoka tayi ipula nayo manga inaaya ya mondjokana.
16. Omolwashike mboka taye endelathana ye na okutsa kumwe nkene ye na okuungaunga nomaupyakadhi ngoka haga holoka po mondjokana?
16 Opo mboka taye endelathana ye ke shi pondole nokukala ya nyanyukwa, oye na okwiimanga kumwe mokutaalela omikundu ndhoka tadhi ka holoka po. Oye na okutokola kutya otaya ka putudha oyana ngiini nosho wo nkene ye na okusila oshimpwiyu aavali yawo ngele ya kulupa. Oothina ndhoka hadhi eta omaupyakadhi momaukwanegumbo kadhi na oku ya topola. Otaya ka kandula po omaupyakadhi ogendji nokwiidhidhimikila gamwe ngoka inaaya potokonona notaya ka kala wo ya nyanyukwa ngele taya tula miilonga omayele gOmbiimbeli.—1 Kor. 7:10, 11.
17. Aaihokani oye na okukala ya tegelela okwiipyakidhila “niinima yomuuyuni” yini?
17 Paulus okwa popi ishewe kombinga yoshinima shilwe sha simana shi na ko nasha nondjokana mAakorinto yotango 7:32-34. (Lesha.) Aantu mboka ye li mondjokana ohaya kala tayi “ipyakidhile niinima yomuuyuni,” ngaashi iikulya, iizalomwa, mpoka taya kala nosho wo niinima yilwe kaayi shi yopambepo. Omolwashike shi li ngawo? Ngele omumwatate ina hokana, ohashi vulika a longe ethimbo ele muukalele. Ihe omumwatate a hokana, oha kala e wete kutya oku na okulongitha ethimbo lye noonkondo dhe a sile oshimpwiyu omukulukadhi gwe. Osha faathana wo nomukulukadhi ngele okwa hokanwa. Omolwuunongo we, Jehova oku wete kutya shika osha pumbiwa. Oku shi shi kutya opo ondjokana yi kale tayi ende nawa ohashi pula opo omusamane nomukulukadhi ya longithe ethimbo lyontumba noonkondo dhawo ndhoka ya li haya longitha nale miilonga Ye sho ya li inaaya ya mondjokana.
18. Ngele aantu oya yi mondjokana, omalunduluko geni ye na okuninga kombinga yomainyanyudho?
18 Ihe inashi hulila owala mpoka. Ngele aaihokani oye na okulongitha ethimbo noonkondo dhawo ndhoka ya li haya longitha muukalele, mbela kaye na okuninga sha faathana niiniwe yawo mbyoka ya li haya longitha mokwiinyanyudha sho inaaya ya mondjokana? Otashi ka guma ngiini omukulukadhi ngele omusamane oha kala owala a pwila momaudhano pamwe nookuume ke? Omusamane ota ka kala e uvite ngiini ngele omukadhi oha longitha ethimbo olindji miinima mbyoka e hole pamwe nookahewa ke? Kuume kopandjokana ngoka kee niwe naye otashi vulika a kwatwe nziya kezaza, a kanithe enyanyu nokukala u uvite a fa kee holike. Shika otashi vulu okuhenukwa ngele ayehe taya ningi ngaashi taya vulu ya koleke ondjokana yawo.—Ef. 5:31.
Jehova okwa hala tu kale twa yogoka pamikalo
19, 20. (a) Omolwashike mboka ye li mondjokana nayo taya vulu okumakelwa ya ye momilalo dha nyata? (b) Aaihokani otaya vulu okuya moshiponga shini ngele oye etha ya kale ya topoka uule wethimbo ele?
19 Aapiya yaJehova oye na okukala ya tokola toko ya kale ya yogoka pamikalo. Yamwe ohaya tokola okuya mondjokana opo ya yande omilalo dha nyata. Ihe okuya mondjokana itashi ti kutya omuntu okwa gamenwa thiluthilu kaaye momilalo dha nyata. Pethimbo lyOmbiimbeli, enkolokuma olya li owala hali gamene aantu uuna ye li meni lyoshilando. Ngele omuntu okwa piti mo moshilando e ta adhika kaayugi nosho wo kaadhipagi, otashi vulika a yugwe iinima ye nenge a dhipagwe nokuli. Sha faathana, aaihokani otaya ka gamenwa owala kaaya ye momilalo dha nyata, uuna taya vulika koompango dhOmutoti gwondjokana nosho wo komangambeko ngoka a tula po.
20 Paulus okwa popya omangambeko ngoka mAakorinto yotango 7:2-5. Omulumentu nomukiintu mboka ya hokana oyo owala ye na uuthembahenda wokuya momilalo. Kehe gumwe ngoka e li mondjokana oku na okugwanithila po mukwawo “oompumbwe dhe” dhopamilalo ndhoka aaihokani ayehe ye na uuthemba wokwiigwanithila po. Ihe aaihokani yamwe ohaya kala ya topoka ethimbo ele, tashi vulika kehe gumwe hayi mefudho oye awike nenge a ye niilonga, kungeyi ohashi ya ningitha kaayi igwanithile po ‘oompumbwe dhawo.’ Oshinima shoka osha nika oshiponga noonkondo, molwaashoka gumwe ngele ita vulu ‘okwiidhidhimika’ otashi vulika a ye moluhondelo omolwomathiminiko gaSatana. Jehova oha yambeke omitse dhomaukwanegumbo ndhoka hadhi sile oshimpwiyu omaukwanegumbo gadho nopwaahe na okutula oondjokana dhawo moshiponga.—Eps. 37:25.
Uuwanawa mboka hawu zi mokuvulika komayele gOmbiimbeli
21. (a) Omolwashike shi li oshidhigu okuninga etokolo lyokuya mondjokana nenge lyokukala inoo ya mo? (b) Omolwashike omayele ngoka ge li mAakorinto yotango 7 tage tu kwathele?
21 Etokolo okuya mondjokana nenge okukala inoo ya mo, olimwe lyomomatokolo omadhigu ngoka omuntu e na okuninga. Oshi li ngaaka molwaashoka aantu ayehe inaya gwanenena, naashoka osho unene hashi eta omaupyakadhi ogendji uuna tashi ya pomakwatathano. Nokuli naamboka Jehova a hokwa nohe ya yambeke ohaya yematekwa kutya nduno oye li mondjokana nenge inaya ya mo. Ngele owa tula miilonga omayele ngoka ge li mAakorinto yotango 7, oto vulu okuhwepopaleka omaupyakadhi ngoka. Momeho gaJehova “oto ningi nawa” kutya nduno ino ya mondjokana nenge owa ya mo. (Lesha 1 Aakorinto 7:37, 38.) Oshi li eyambeko enene okukala twa hokiwa kuKalunga. Ngele okwe ku hokwa, oto ka tsikila okukala nomwenyo muuyuni uupe, moka ekwatathano pokati kaalumentu naakiintu tali ke enda nawa, ihe hangaashi shi li apuhe kunena.
[Omanyolo gopevi]
Oto yamukula ngiini?
• Omolwashike kaapu na ngoka e na okuthiminika gumwe a ye mondjokana?
• Ongiini omupiya gwaJehova inaaya mondjokana ta vulu okulongitha ethimbo lye nawa?
• Ongiini mboka taya endelathana taya vulu okwiilongekidhila omashongo ngoka taya ka tsakaneka mondjokana?
• Omolwashike okuya mondjokana itaashi ti kutya omuntu okwa gamenwa kaaye momilalo dha nyata?
[Ethano pepandja 14]
Aakriste inaaya ya mondjokana mboka haya longitha ethimbo lyawo mokutamununa mo uukalele wawo ohaya kala ya nyanyukwa
[Ethano pepandja 16]
Omalunduluko geni yamwe tashi vulika ye na okuninga ngele ya yi mondjokana?