Omapulo ga za kaaleshi
Ondi na okuninga po shike ngele ondi na epulo kombinga yoshinima shoka nda lesha mOmbiimbeli nenge nda pumbwa omayele kombinga yuupyakadhi mboka ndi na paumwene?
Omayeletumbulo 2:1-5 otaga ladhipike kehe gumwe gwomutse a ‘konge’ omayele noondunge, ngaashi omuntu ta kongo “eliko lya holekwa.” Shika otashi ti kutya otu na okukambadhala tu konge omayamukulo komapulo gOmbiimbeli opo tu kandule po uupyakadhi wopaumwene. Ongiini tatu vulu oku shi ninga?
Embo Mona Ouwa mOfikola yUukalele woPauteokratika, pepandja 33 sigo 38 otali yelitha “Nkene to vulu okukonga omauyelele” to longitha iilongitho mbyoka “omupiya omudhiginini nomunandunge” e tu pa. (Mat. 24:45, KB) Pepandja 36 otapu yelithwa nkene tu na okulongitha o-Watch Tower Publications Index, moka mu na iitya ya topolwa melandulathano lyoalfabeta niiyuliki yomanyolo. Kungawo, ohashi kala oshipu uuna to kongo oshitya shontumba nenge oovelise dhOmbiimbeli, moka to adha omusholondondo gwiinima moka to ka konga omauyelele. Kala wu na eidhidhimiko uuna to kongo eyamukulo lyokondandalunde nenge uuyelele mboka wa pumbwa. Dhimbulukwa wo kutya oto kongo “eliko lya holekwa” ndyoka hali pula ethimbo noonkambadhala opo wu li mone.
Dhoshili, opu na iikalimo yimwe nomanyolo ngoka inaaga kundathanwa kondandalunde miileshomwa yetu. Nokuli naampoka enyolo lyOmbiimbeli lya kundathanwa otashi vulika li kale itaali yamukula thiluthilu epulo lyoye. Shimwe ishewe, otashi vulika wu kale nomaipulo omolwomahokololo gamwe gOmbiimbeli, molwaashoka Omanyolo inaga gandja uuyelele miinima ayihe. Kungawo, otashi vulika kaatu mone omayamukulo nziya komapulo ngoka hatu kala tu na. Omolwoshinima shoka, otu na okuyanda okukala hatu tengeneke kombinga yiinima mbyoka kaa tu shi omayamukulo gayo, notayi vulu ‘okweeta omaludhi, yo inayi opalela edhiladhilo lyaKalunga, ndyoka tali tseyika mokwiitaala.’ (1 Tim. 1:4; 2 Tim. 2:23; Tit. 3:9) Nokuli noshitayimbelewa nenge oombelewa oonene dhOonzapo dhaJehova muuyuni auhe itadhi vulu okukonakona nokuyamukula omapulo agehe ngoka inaaga kundathanwa miileshomwa yetu. Otatu vulu okukala twa gwanenwa kuuyelele mboka wu li mOmbiimbeli, molwaashoka otawu vulu oku tu kwathela monkalamwenyo yetu, ihe inayi gandja wo omauyelele gamwe opo tu kale tu na eitaalo lya kola muKalunga Omunyoli gwayo.—Tala embo Hedha popepi naJehova, epandja 185-188.
Ongiini ngele owa ninga ngaashi to vulu wu konge oshinima shontumba shoka she ku guma paumwene, ihe natango ino mona eyamukulo ndyoka wa pumbwa? Kala wa manguluka oku ka konga ekwatho komwiitaali omukweni ngoka a pyokoka, tashi vulika nando okugumwe gwomaakuluntugongalo megongalo lyeni. Oye na ontseyo yOmbiimbeli niimoniwa oyindji yokukalamwenyo kwopaKriste. Otaya vulu oku ku pa omayele tago opalele ngoka wa pumbwa kombinga yuupyakadhi woye yopaumwene, nenge shi na ko nasha netokolo ndyoka wa hala okuninga, molwaashoka oye ku shi nawa nosho wo onkalo yoye. Ino dhimbwa okugalikana kuJehova kondandalunde kombinga yoshinima shoka to ipula nasho noku mu pula a ngungumaneke omadhiladhilo goye okupitila mombepo ye ondjapuki, molwaashoka “OMUWA ota gandja owino . . . noondunge.”—Omayel. 2:6; Luk. 11:13.