Oho gandja ngiini omayele?

Mbela opu na esiku wa pulilwe komuntu gwontumba wu mu pe omayele? Pashiholelwa, mbela owa pulilwe omapulo ngaka: ‘Nandi ninge ngiini mbela? Mbela ondi na ngaa okuya koshituthi huka? Mbela nandi landule eithano ndino? Mbela nandi endathane nomuntu nguka nelalakano lyokuya naye mondjokana?’

Aantu ye na omainyengotompelo gu uka otashi vulika ye ku pule wu ya kwathele mokuninga omatokolo gontumba ngoka taga ka guma ekwatathano lyawo nookuume, noyaandjawo nenge nokuli naJehova. Mbela oto ka yamukula wi ikolelela kushike? Shito oho gandja omayele ngiini? Nonando shoka ye ku pula otashi monika sha fa shaa na oshilonga nenge sha fa sha kwata miiti, Omayeletumbulo 15:28 otaga ti: “Omwenyo gwomuyuuki ohagu ipyakidhile neyamukulo.” Tala kunkene omakotampango gOmbiimbeli taga landula taga vulu okukwathela omuntu uuna ta gandja omayele.

1 Dhiladhila muule kombinga yonkalo yomuntu. “Ngoka ta yamukula, manga inaa uva sha, otashi mu nikile uugoya notashi mu sitha ohoni.”—OMAYEL. 18:13.

Opo tu gandje omayele omawanawa, otu na okuuva ko tango onkalo yomuntu ngoka a hala omayele nosho wo etaloko lye. Oku shi thaneka: Ngele omuntu gwontumba okwe ku pula wu mu udhikile nkene ta vulu okuya kaandjeni, mbela oto ka pumbwa okutseya shike opo wu mu kwathele? Mbela oto ke mu lombwela ngaa kutya oku na okuya nondjila yini ngoye inoo tseya kutya oku li peni? Aawe, hasho to ka ninga! Sha faathana, opo wu gandje omayele gomondjila owa pumbwa okutseya tango kutya omuntu ngoka a hala omayele “oku li peni,” ano tu tye wu tseye onkalo ye nosho wo etaloko lye. Mbela otashi vulika pu na oonkalo dhontumba dha kwatelwa mo ndhoka tadhi ka guma eyamukulo ndyoka to mu pe? Ngele onkalo katu yi shi nawa, otashi vulika tu gandje omayele ngoka taga ka ningitha omuntu a kale ishewe a ngwangwana shi vulithe nale.—Luk. 6:39.

Tala kutya okwa ninga omapekapeko sigo openi. Otashi vulika wo shi kale pandunge wu pule omuntu ngoka ta kongo omayele omapulo ngaka: “Mbela sho to tala omakotampango gOmbiimbeli geni taga vulu oku ku kwathela moshinima shika?” “Mbela owa tala kutya uuwanawa nuuwinayi wuni to ka mona ngele owa ningi etokolo lyontumba?” “Owa ninga omapekapeko sigo openi?” “Mbela yalwe ngaashi aakuluntugongalo, aavali yoye nenge ngoka ha konakona nangoye Ombiimbeli oye ku pa omayele geni?”

Omayamukulo ge otashi vulika ge ke tu kwathele tu mone kutya omuntu ngoka okwa ninga oonkambadhala dhi thike peni opo a mone eyamukulo. Natango, sho tatu gandja omayele otatu ka kaleka wo momadhiladhilo omayele ngoka ga gandjwa nale kuyalwe. Otashi vulika wo tu ka mone ngele omuntu okwa hala owala omugandjimayele ngoka ta ‘nywitha omakutsi ge’ nomayele ngoka a hala okuuva.—2 Tim. 4:3.

2 Ino endelela okuyamukula.

“Kehe gumwe na kale ha pulakene mbala, ihe ohi ikwata mokupopya.”—JAK. 1:19.

Neinyengotompelo ewanawa, otashi vulika tu yamukule twe endelela. Ihe mbela shoka oshi li ngaa pandunge aluhe, unene tuu ngele otatu kundathana kombinga yoshinima shoka inaatu ninga omapekapeko gomuule? Omayeletumbulo 29:20 (Yelekanitha NW.) otaga ti: ‘Owa mona omuntu te endelele okupopya? Omusama oku na wo etegameno e mu vule.’

Longitha ethimbo lya gwana wu shilipaleke kutya shoka to ka yamukula oshi li metsokumwe nuunongo wopakalunga. Ipula to ti: ‘Mbela okudhiladhila nosho wo “ombepo yuuyuni” oya nwetha mo okudhiladhila kwandje?’ (1 Kor. 2:12, 13) Dhimbulukwa kutya otashi vulika einyengotompelo lyoye ewanawa moshinima shika li kale inaali gwana. Sho Petrus u uvu kutya Jesus oku na oshilonga sha kwata miiti, okwa pe Jesus omayele a ti: “Omuwa, [iyetela ohenda, NW], shi valelwe, u ningwe ngaaka!” Oshike tatu ilongo mwaashoka Petrus a li a ningi? Otatu ilongo kutya ngele inatu kotoka, nokuli nando otu na einyengotompelo lyu uka otashi vulika tu kale itaatu “dhiladhila shoka shopaKalunga, ihe ooshoka shopantu.” (Mat. 16:21-23) Inashi simana tuu tu kale hatu dhiladhila manga inaatu popya! Sho ishewe, mbela ontseyo yetu kayi shi onshona noonkondo okuyelekanitha nuunongo waKalunga?—Job 38:1-4; Omayel. 11:2.

3 Tula miilonga Oohapu dhaKalunga neifupipiko.

“Ngame itandi vulu okuninga sha ngame mwene, ihe otandi popi ashike shoka Tate a longa ndje.”—JOH. 8:28.

Mbela oto ka tya, “Ando ongame, ando otandi . . . ”? Nonando epulo olya fa epu, oto ningi nawa ngele to ilongo mo sha meifupipiko lyaJesus nomokukala kwe e shi kutya okwa ngambekwa miinima yontumba. Okwa li e na uunongo nontseyo oyindji e vule omuntu kehe a li ko, ihe okwa ti: “Ngame inandi popya mungame mwene, ihe Tate . . . oye a pe ndje oshipango shoka ndi na oku shi tya noku shi popya.” (Joh. 12:49, 50) Omalongo nomayele gaJesus oga li aluhe ga kankamena kehalo lyaHe.

Pashiholelwa, otatu lesha muLukas 22:49 kutya aalongwa yaJesus oya li ye mu pula omayele kutya mbela naya kondje naamboka ya li ye ya oku mu kwata po? Gumwe gwomaalongwa okwa li a longitha egongamwele. Mehokololo lya faathana ndyoka li li muMateus 26:52-54 otamu popiwa kutya nonando Jesus okwa li e li monkalo ondhigu, okwa kutha ethimbo a tompathane naalongwa ye kombinga yehalo lyaJehova. Molwaashoka okwa li e shi ekotampango ndyoka li li muGenesis 9:6 nosho wo omahunganeko ngoka ge li mEpisalomi 22 nomuJesaja 53, okwa li a gandja omayele gopandunge ngoka nokuli ga li ga hupitha oomwenyo nokunyanyudha Jehova.

4 Longitha iileshomwa yopakalunga.

‘Olye ano omupiya omudhiginini nomunandunge? Oye ngoka, omuwa gwe sho e mu pe, a tonatele aapiya ooyakwawo, e ya pe iikulya pethimbo lyayo.’—MAT. 24:45, yelekanitha NW.

Jesus okwa langeka po ongundu yomupiya yi shi okwiinekelwa ngoka ta gandja iikulya yopambepo ya simanenena. Uuna to gandja omayele ge na ko nasha niinima ya simana, mbela oho kutha ngaa ethimbo wu ninge omapekapeko miileshomwa yopaMbiimbeli?

O-Watch Tower Publications Index no-Watchtower Librarya oye shi ningitha oshipu tu mone uuyelele owundji nowa yela. Itashi ka kala tuu epuko enene ngele otwa kala ihaatu yi longitha! Omu na iikalimo omayuvi niikundathanwa oyindji okukwathela mboka taya kongo omayele. Owu na uunkulungu wu thike peni wokukwathela yalwe ya konakone omithikampango dhOmbiimbeli nokutompathana mOohapu dhaKalunga? Ngaashi owala omandhindhiliko gomoondjila taga vulu okukwathela omuntu a tseye mpoka e li noku mu ulukila ondjila ndjoka ta vulu okuya nayo, iikwa niipangitho yokupekapeka otayi vulu oku mu kwathela a tseye kutya oku li peni noku mu kaleka mondjila ta yi fala komwenyo.

Aakuluntugongalo oyendji oya dheula aauvithi ya kale ye shi okulongitha o-Watch Tower Publications Index nenge o-Watchtower Library, momukalo gwa tya ngeyi oya kwathela aamwatate naamwameme okukala ye shi okutompathana taya longitha Omanyolo. Ekwatho lya tya ngeyi oha li longo aauvithi ya kale ye na omukalondjigilile gwokuninga omapekapeko nokwiinekela omasiloshimpwiyu ngoka Jehova ha gandja, pehala lyokumona owala omayamukulo komapulo ngoka ge ya limbilika pethimbo ndyoka. Momukalo gwa tya ngeyi otayi ‘ilongo notayi igilile okuyoolola shoka shu uka nenge sha puka.’—Heb. 5:14.

5 Yanda okuningila yalwe omatokolo.

“Kehe gumwe oku na okuhumbata ye mwene omutenge gwe.”—GAL. 6:5.

Kehe gumwe oku na okuninga etokolo kutya ota ka landula omayele geni. Jehova okwe tu pa tu tokole tse yene ngele otwa hala okuwilikwa komithikampango dhe nenge hasho. (Deut. 30:19, 20) Moonkalo dhimwe ohapu kala pu na omakotampango gopaMbiimbeli ogendji moka omuntu ngoka ta kongo omayele e na okuhogolola kutya ota ka longitha po lini. Shi ikolelela koshikundathanwa nenge koomvula dhomuntu ngoka ta kongo omayele, onawa ngele tatu ipula tatu ti: ‘Mbela ondi na ngaa uuthemba okuyamukula epulo ndino?’ Iinima yimwe onawa ngele omuntu to yi gandja momake gaakuluntugongalo nenge gaavali ye ngele ngoka ta kongo omayele omugundjuka.

[Enyolo lyopevi]

[Oshimpungu/Ethano pepandja 8]

Okuninga omapekapeko pElongelokalunga lyUukwanegumbo

Omolwashike itoo itulile po elalakano lyokuninga omapekapeko opo wu mone omayamukulo komapulo ngoka opo wa pulilwe? Iikundathanwa yini nomakotampango gOmbiimbeli geni to vulu okumona ga kwathele omuntu ngoka ta pula omapulo ngoka? Pashiholelwa, natu tye nduno omumwatate nenge omumwameme okwe ku pula kombinga yokweendelathana nagumwe nelalakano lyokuhokana. Sho to longitha o-Watch Tower Publications Index, nenge o-Watchtower Library, konga tango oshikundathanwa kondandalunde. Pashiholelwa, mo-Watch Tower Publications Index otashi vulika wu konge “Dating” (“Okweendelathana”) nenge “Marriage” (“Ondjokana”). Okuza mpoka tala puupalanyolo uushona wu tale ngele opu na oshikundathanwa sha pamba shoka to kongo. Sho to tala oshipalanyolo shokombanda, tala ngele opu na yimwe mpoka pwa nyolwa “See also” (“Tala wo”), mbyoka tashi vulika yi ku pe iikundathanwa yilwe mbyoka ya pamba lela shoka to kongo.

[Oshimpungu pepandja 9]

Otatu pandula Jehova omolwomasiloshimpwiyu ngoka a gandja okupitila mehangano lye tu vule okupewa notu vule okugandja omayele ga dhenga mbanda. Omuuvithi 12:11 ota ti: “Oohapu dhaanawino odha fa iishongitho nomatumbulo gawo oomboha dha dhengelwa muule; oga gandjwa kOmusita gumwe awike.” Ngaashi naanaa “iishongitho” ano iiti ya honga mbyoka yi li le po okuwilika iinamwenyo mbyoka tayi nana sha, omayele gopahole nogopandunge nago ohaga wilike aanamitima omiwanawa ye ende mondjila yu uka. “Oomboha dha dhengelwa muule” ohadhi ningitha oshinima shi kale sha kola. Sha faathana, omayele omawanawa otaga vulu okweeta iizemo tayi kalelele. Aanandunge ohaya kala ya pwila mo nenge ya nyanyukwa unene ngele taya lesha ‘omatumbulo’ ngoka taga popi kombinga yuunongo ‘wOmusita gwawo gumwe awike’ Jehova.

Uuna to gandja omayele, kala ho holele Omusita. Kashi li tuu uuthembahenda okupulakena kuyalwe noku ya pa omayele uuna tatu vulu! Ngele omayele getu oga kankamena komakotampango gOmbiimbeli otaga ka kala taga ti sha notaga ka kwathela omupulakeni a mone mo uuwanawa tawu kalelele.