Kwathela aalumentu ya hume komeho pambepo

“Okuza ngashingeyi oto ningi omuyuli gwaantu.”—LUK. 5:10.

1, 2. (a) Aalumentu oya li yi inyenge ngiini keuvitho lyaJesus? (b) Oshike tashi ka kundathanwa moshitopolwa shika?

SHO Jesus naalongwa ye ya li taya uvitha muGalilea, oya yi nowato kehala lyi ikalela ya ka vululukwe po. Ihe ongundu yaantu oye ya landula kolupadhi. Opwa li “aalumentu omayuvi gatano, aakiintu naanona inaa yalulwa.” (Mat. 14:21) Oshikando shilwe, ongundu yaantu oye ya kuJesus e ya aludhe nokupulakena kuye. Oya li “aalumentu omayuvi gane, aakiintu naanona inaa yalulwa.” (Mat. 15:38) Osha yela kutya aalumentu oyendji oya li ye ya kuJesus noya li ya hokwa elongo lye. Okwa li i inekela kutya aalumentu oyendji otaya ka pulakena ketumwalaka lye, nomolwaashoka konima sho aalongwa ye ya li ya kwata oohi odhindji pashikumithalonga okwa lombwele Simon a ti: “Okuza ngashingeyi oto ningi omuyuli gwaantu.” (Luk. 5:10) Aalongwa ye oya li ye na okuumbila iiyulitho yawo mefuta lyopathaneko opo ya ‘yule’ aantu oyendji moka mwa kwatelwa aalumentu oyendji.

² Kunena opu na wo aalumentu mboka ye na ohokwe metumwalaka lyOmbiimbeli ndyoka hatu uvitha. (Mat. 5:3) Ihe nonando ongaaka, aashona yowala haya humu komeho pambepo. Ongiini tatu vulu oku ya kwathela? Nonando Jesus ka li hayi muukalele oku ka konga aalumentu kondandalunde, okwa li a popi iinima mbyoka ye ya pamba pethimbo lye. Ngaashi Jesus, natu ka taleni nkene tatu vulu okukwathela aalumentu yu ungaunge niinima itatu mbyoka haya kala tayi ipula unene nayo: (1) uuhupilo (2) uumbanda wokutila aantu nosho wo (3) okukala yu uvite inaaya gwana.

Uuhupilo

3, 4. (a) Aalumentu oyendji ohayi ipula unene nashike? (b) Omolwashike aalumentu yamwe hayi ipula unene nuuhupilo, pehala lyiinima yopambepo?

³ Omulongimpango gumwe okwa li a lombwele Jesus a ti: “Muhongi, onda hala oku ku landula shaa mpoka to yi.” Ihe sho Jesus e mu lombwele kutya ‘Omuna gwomuntu ke na mpoka ta langeke omutse gwe,’ omulongimpango okwa shuna omutse miipeta. Molwaashoka ka li e shi mpoka ta ka adha iikulya nenge ta ka kala, oshe mu tilitha. Ombiimbeli inayi tu lombwela ngele omulumentu ngoka okwa ka ninga omulanduli gwaJesus.—Mat. 8:19, 20.

⁴ Olundji aalumentu ohaya kala ya lenga omaliko pehala lyokulalakanena iinima yopambepo. Oyendji ohaya kala taya lalakanene elongo lyopombanda nosho wo iilonga hayi futu nawa. Kuyo uuwanawa ohawu zi owala moshimaliwa molwaashoka osho aniwa hashi e ta po sha, pehala lyokukonakona Ombiimbeli nenge okulalakanena ekwatathano ewanawa naKalunga. Otashi vulika aalumentu yamwe ya kale ya hokwa etumwalaka lyetu, ihe “oshimpwiyu shuuyuni mbuka nefundjaleko lyuuyamba” otayi sitha oshimpwininika ohokwe ndjoka ye na. (Mark. 4:18, 19) Natu tale nkene Jesus a li a kwathele aalongwa ye ya mone shoka sha simanenena monkalamwenyo yawo.

5, 6. Oshike sha li sha kwathele Andreas, Petrus, Jakob naJohannes ya kale haya longo owala iilonga yokuuvitha, pehala lyokwiipula nuuhupilo?

⁵ Andreas nomumwayina Simon ngoka hi ithanwa wo Petrus oya li ye na ongeshefa yokuyula oohi. Johannes nomumwayina Jakob nahe Sebedeus, oya li wo ye na ongeshefa oyo tuu ndjoka. Oya li tayi ende nawa nomolwaashoka ya li ya kuta aaniilonga. (Mark. 1:16-20) Andreas naJohannes sho ya lombwelwa kombinga yaJesus kuJohannes Omuninginithi, oya zi po yi itaala kutya Jesus oye Mesiasa. Andreas okwa lombwele mumwayina Petrus onkundana ndjika, Johannes naye otashi vulika a lombwele mumwayina Jakob. (Joh. 1:29, 35-41) Moomwedhi dha landula ko, ayehe yane oya kala ya landula Jesus sho tu uvitha muGalilea, muJudea nomuSamaria. Konima yaashono aalongwa ayehe yane oya shuna koongeshefa dhawo. Oya li shili ye na ohokwe yokulongela Kalunga, ihe shika hasho sha li sha simanenena monkalamwenyo yawo.

⁶ Konima yethimbo, Jesus okwa lombwele Petrus naAndreas ye mu landule ya ninge “aayuli yaantu.” Oya li yi inyenge ngiini? “Mbalambala oye etha iiyulitho yawo noye mu landula.” Jakob naJohannes nayo osho ya ningi. Ombiimbeli otayi ti: “Mbalambala oye etha owato nahe noye mu landula.” (Mat. 4:18-22) Oshike sha li sha kwathele aalumentu mboka ya kale haya longo owala iilonga yokuuvitha? Mbela etokolo lyawo olya li lya nika uusama? Hasho nando! Aalumentu mboka oya kala nokupulakena kuJesus uule woomwedhi dhontumba, oya mono wo iikumithalonga mbyoka a longo, uuladhi we waashoka shu uka nosho wo nkene aantu yi inyengithwa ketumwalaka lye. Onkee ano, eitaalo neinekelo lyawo muJehova olya li lya kolo.

7. Ongiini tatu vulu okukwathela aakonakonimbiimbeli ya kale neinekelo kutya Jehova oha sile oshimpwiyu aapiya ye?

⁷ Ongiini tatu vulu okuholela Jesus mokukwathela aakonakonimbiimbeli yetu ya kale ye na einekelo muJehova? (Omayel. 3:5, 6) Omomukalo gwetu gwoku ya longa. Uuna tatu konakona nayo, otatu vulu oku yu ulukila kutya Kalunga ote ke tu laleka nuuyamba ngele tatu pititha Uukwaniilwa we komeho. (Lesha Maleaki 3:10; Mateus 6:33.) Nonando otatu vulu okulongitha oovelise dhi ili nodhi ili oku yu ulukila nkene Jehova ha sile aantu ye oshimpwiyu, inatu dhimbwa kutya oshiholelwa shetu nasho otashi vulu oku yi inyengitha. Opo aakonakonimbiimbeli yetu ya kale yi inekela thiluthilu muJehova, otatu vulu oku ya hokololela iimoniwa yonkalamwenyo yetu. Otatu vulu wo oku ya hokololela iimoniwa mbyoka hatu lesha miileshomwa yehangano.a

8. (a) Omolwashike sha simana komukonakonimbiimbeli a ‘konakone mwene, a mone nkene Jehova omwaanawa’? (b) Ongiini tatu vulu okukwathela aakonakonimbiimbeli yetu ya mone kutya Jehova omwaanawa?

⁸ Opo tu kale tu na eitaalo lya kola katu na owala okulesha nokupulakena nkene yalwe ya lalekwa nuuyamba kuJehova. Omukonakonimbiimbeli oku na wo okumona uuwanawa waJehova monkalamwenyo ye. Omupisalomi okwi imbi a ti: “Konakona mwene, u mone, nkene OMUWA omwaanawa. Aanelago oomboka taa mono egameno puye.” (Eps. 34:8) Ongiini tatu vulu okukwathela aakonakonimbiimbeli ya mone kutya Jehova omwaanawa? Natu tye nduno omukonakonimbiimbeli ngoka ta hupu shokadhila okwa hala wo okweetha po okuhila omakaya, okundombola nokunwa sha pitilila. (Omayel. 23:20, 21; 2 Kor. 7:1; 1 Tim. 6:10) Ngele otwe mu longo okupula ekwatho kuJehova opo e ethe po iinima mbyoka, otashi ke mu kwathela a mone uuwanawa We. Ngele otwe mu ladhipike a kale a lenga iinima yopambepo monkalamwenyo ye ngaashi okukonakona Ombiimbeli oshiwike kehe, okwiilongekidhila okugongala kehe kwopaKriste nokukala puko, otashi ke mu kwathela a kale neitaalo lya kola, unene tuu sho ta mono nkene Jehova ta laleke nuuyamba oonkambadhala dhe.

Uumbanda wokutila aantu

9, 10. (a) Omolwashike Nikodemus naJosef gwokuArimatia inaaye shi holola puuyelele kutya yo aalanduli yaJesus? (b) Omolwashike aalumentu yamwe kunena haya kakadhala okuninga aalanduli yaJesus?

⁹ Omolwomathiminiko goomakula aalumentu yamwe otashi vulika ya kale taya kakadhala okuninga aalanduli yaKristus yashili. Omolwuumbanda wokutila Aajuda ooyakwawo, Nikodemus naJosef ngoka a za koshilando shaArimatia kaya li ye shi holola puuyele kutya yo aalongwa yaJesus. (Joh. 3:1, 2; 19:38) Omolwashike mbela? Aawiliki yelongelokalunga oya li ye tonde Jesus noonkondo, na kehe ngoka e shi holola puuyelele kutya omulongwa gwe okwa li ha kondwa mo mosinagoga.—Joh. 9:22.

¹⁰ Momahala gamwe kunena, ngele omulumentu oku na unene ohokwe miinima yopakalunga, mOmbiimbeli nosho wo melongelokalunga, otashi vulika a shekwe kaaniilonga pamwe naye, kookuume ke nenge kaapambele. Mo mugalwe, otashi vulika sha nika oshiponga nokuli okupopya kutya oto lundulukile kelongelokalunga lilwe. Ngele omulumentu omukwiita, omunapolotika nenge e na ondondo ya simana moshigwana otashi vulika u ulwe omalaka ngele okwa tameke okukala ta popi kombinga yiinima yopakalunga. Pashiholelwa, omulumentu gumwe Omundowishi okwa ti: “Oonzapo ohamu popi oshili kombinga yOmbiimbeli. Ihe ngele onda ningi Onzapo nena, ongula sho taku shi kehe gumwe okwe shi uva nale. Mbela aaniilonga pamwe nangame, aashiinda, aakwanezimo naashiwikile otaya tile ndje ngiini? Itandi ke shi idhidhimikila nando.”

11. Ongiini Jesus a kwathele aalongwa ye ya kondjithe uumbanda wokutila aantu?

¹¹ Nonando aayapostoli yaJesus oya li aalaadhi, ayehe oya li ye na okukondjitha uumbanda wokutila aantu. (Mark. 14:50, 66-72) Jesus okwa li a kwathele ngiini aalongwa ye ya kondjithe omathiminiko goomakula? Okwe ya kwathele yi ilongekidhile omapataneko ngoka ya li taya ka taalela. Okwe ya lombwele a ti: “One aanelago, aantu ngele taye mú tondo, taye mú tidha po, taye mú sheke, nenge taa ti kutya one aawinayi omolwOmuna gwOmuntu.” (Luk. 6:22) Jesus okwa li e ya londodha kutya otaya ka shekwa omolwe. Okwe ya shilipaleke wo kutya Kalunga ote ke ya kwathela noku ya pa oonkondo ngele oye mu inekela. (Luk. 12:4-12) Okwa li wo a lombwele mboka aape ye endathane ya manguluka naalongwa ye nokupanga uukuume nayo.—Mark. 10:29, 30.

12. Ongiini tatu vulu okukwathela aakonakonimbiimbeli ya sinde uumbanda wokutila aantu?

¹² Otu na wo okukwathela aakonakonimbiimbeli ya sinde uumbanda wokutila aantu. Olundji ohashi kala oshipu okukondjitha eshongo ngele owa adhika we li ilongekidhila. (Joh. 15:19) Pashiholelwa, ngele owa kwatha omukonakonimbiimbeli i ilongekidhe omayamukulo omafupi, ge li pandjele noga kankamena kOmbiimbeli ota ka vula okuyamukula omapulo ngoka aaniilonga pamwe naye nosho wo yalwe tashi vulika ya kale ye na. Otu na okupanga uukuume naye, nokusa oshimpwiyu opo a tseyathane nayalwe megongalo, unene tuu mboka tashi vulika ye li monkalo ya fa ye nenge ya li mo. Ihe shoka sha simanenena oku mu longa a kale e na ondjigilile yokugalikana tashi zi komutima. Shika otashi ke mu kwathela a hedhe popepi naJehova noku mu ninge egameno lye.—Lesha Episalomi 94:21-23; Jakob 4:8.

Uuna u uvite inaa gwana

13. Oshike hashi imbi aalumentu yamwe ya kuthe ombinga miinima yopambepo?

¹³ Aalumentu yamwe kaye shi okulesha nawa nenge kaye shi aapopi aanekeka nenge ye na ohoni nohashi ya dhiladhilitha kutya itaya vulu okuninga sha megongalo. Yamwe kaye hole naanaa okupopya mokati kaantu omadhiladhilo gawo nomaiyuvo gawo. Ohashi vulika ya kale ya tila okuyamukula pokugongala molwaashoka oshidhigu kuyo okukonakona nokulesha paumwene nenge okukundathana kombinga yeitaalo lyawo. Omumwatate gumwe okwa ti: ‘Sho nda li omugundjuka, [uuna ndi li momapya] ohandi yi pegumbo lyomuntu e tandi iningitha nda fa te konkola pomweelo nokuza po tandi inyoweke, opo kaandi uvike nenge ndi monike kaanegumbo. Onda li handi kala te mbilingwa molwaashoka nda tila okuuvitha egumbo negumbo.’

14. Omolwashike aalongwa yaJesus ya li ya nyengwa okwaaludha omumati e na oompwidhuli?

¹⁴ Aalongwa yaJesus oya li ya teka omukumo sho ya nyengwa okwaaludha omumati ngoka a li e niwe koompwidhuli. He yomumati okwe ya kuJesus e ta ti: “Omumwandje omumati e na oshintona nuuwehame owindji, oshoka olwindji ota gwile momulilo nomomeya. Onda li nde mu e ta kaalongwa yoye, ihe oya nyengwa oku mu aludha.” Jesus okwa tidha mo oompwidhuli momumati, oye nokwa aluka. Konima aalongwa oye ya kuye noye mu pula ya ti: “Omolwashike twa nyengwa oku yi tidha mo?” Jesus okwe ya yamukula a ti: “Omolweitaalo lyeni enkundi. Otandi mú lombwele: Andola mu na eitaalo li thike pomuma yoshinapi, ando otamu vulu okulombwela ondundu ndjika: ‘Itumba po mpaka, u hedhe nkwiyaka!’ Ando tayi itumbu po; nokaku na shoka tashi mu nyenge.” (Mat. 17:14-20) Otwa pumbwa tu kale neitaalo muJehova opo tu sinde uudhigu mboka wu vule oonkondo dhetu. Oshike hashi ningilwa omuntu ngoka i inekela moonkondo dhe mwene? Ita ka pondola naashika otashi ke mu teya omukumo.

15, 16. Ongiini tatu vulu okukwathela mboka yu uvite inaaya gwana ya kondjithe omaiyuvo ngoka?

¹⁵ Omukalo omwaanawa ngoka tatu vulu okulongitha opo tu kwathele mboka yu uvite inaaya gwana ogwo oku ya tsa omukumo ya kale yi itaala muJehova, ihe hamoonkondo dhawo yene. Petrus okwa nyola a ti: “Ishonopekeni kohi yoshikaha shoonkondo shaKalunga, opo e mú nenepeke pethimbo lye. Mu tsikeni iimpwiyu yeni ayihe.” (1 Pet. 5:6, 7) Onkee ano, natu kwathele aakonakonimbiimbeli yetu ya kale ye na ekwatathano naKalunga. Shika otashi ke ya kwathela ya kale ya lenga iinima yopambepo. Otaya ka kala wo ye hole Oohapu dhaKalunga nokwiimika ‘iiyimati yombepo’ monkalamwenyo yawo. (Gal. 5:22, 23) Otaya ka kala ye hole okugalikana. (Fil. 4:6, 7) Otaya ka kala wo yi inekela muKalunga opo e ya pe oonkondo nuulaadhi mboka ya pumbwa opo ya vule okukondjitha eshongo kehe nenge ya gwanithe po iinakugwanithwa yawo nomupondo.—Lesha 2 Timoteus 1:7, 8.

¹⁶ Aakonakonimbiimbeli yamwe otashi vulika ya pumbwa okukwathelwa yi ilonge okulesha nokuhwepopaleka uunkulungu wawo wokupopya. Yamwe otashi vulika ya kale yu uvite inaaya gwana okulongela Jehova omolweihumbato lyawo ewinayi sho ya li inaaye mu tseya. Aantu yoludhi ndoka otu na oku ya kwathela nohole noneidhidhimiko. Jesus okwa ti: “Aandjolowele itaa pumbwa omwaaludhi, ihe aavu tuu ayeke.”—Mat. 9:12.

‘Yula’ aalumentu oyendji

17, 18. (a) Ongiini tatu vulu okupopya naalumentu oyendji muukalele? (b) Oshike tatu ki ilonga molufo talu landula?

¹⁷ Otwa halelela aalumentu oyendji ya taambeko etumwalaka lyombili ndyoka tali adhika owala mOmbiimbeli. (2 Tim. 3:16, 17) Ongiini nduno tatu vulu okupopya naalumentu oyendji muukalele? Ongele tatu uvitha kongulohi, komatango momahuliloshiwike nenge momasiku gomafudho uuna aalumentu oyendji ye li momagumbo. Otatu vulu okukala hatu pula tu popye nomusamane mwene gwegumbo mpoka tashi vulika. Onkee ano, natu gandjeni uunzapo kaalumentu mboka hatu longo nayo nosho wo aasamane mboka aakulukadhi yawo ye li moshili.

¹⁸ Otu na uushili kutya mboka ye na omitima omiwanawa otaye ki inyenga nawa ketumwalaka lyetu sho tatu uvithile aantu ayehe. Natu kale tu na eidhidhimiko sho tatu kwathele ayehe mboka ye na ohokwe yokwiilonga oshili. Ongiini tatu vulu okukwathela aalumentu mboka ya ninginithwa ya kale ya gwana noya hala okupewa iinakugwanithwa megongalo? Epulo ndika otali ka yamukulwa moshitopolwa tashi landula.

[Enyolo lyopevi]

Oto yamukula ngiini?

• Ongiini tatu vulu okukwathela aalumentu ya lalakanene iinima yopambepo?

• Ongiini tatu vulu okukwathela mboka aape ya kondjithe omathiminiko goomakula?

• Oshike tashi ka kwathela mboka yu uvite inaaya gwana?

[Ethano pepandja 25]

Mbela oho kongo ompito wu uvithile aalumentu onkundana ombwanawa?

[Ethano pepandja 26]

Ongiini to vulu okukwathela omukonakonimbiimbeli i ilongekidhile omashongo?