“Ngame Jehova Kalunga koye, otandi ku kwata moshikaha shoye shokolulyo”

OMUSAMANE gumwe okwa li a lombwele okamwanamati manga inaaya taaguluka opate ndjoka yi na oohauto odhindji a ti: “Kwata moshikaha shandje.” Okanona oka li ku uvite ka gamenwa nokaka li ke na uumbanda molwaashoka he e ka kwata moshikaha neke lye li na oonkondo. Otashi vulika pu na esiku wa dhiladhilile ngeyi: Nda hala owala ando opu na omuntu ta wilike ndje a kwata ndje moshikaha opo ndi pite moothina dhonkalamwenyo. Ngele osho, oto vulu okumona ehekeleko moohapu dhaJesaya.—Lesha Jesaja 41:10, 13.

Jesaja oohapu ndhoka okwa li te dhi lombwele Aaisraeli. Nonando Kalunga oshigwana shoka okwa li e shi tala ko shi li ‘oshigwana she oshihogololwa,’ osha li sha kundukidhwa kaatondi. (Eksodus 19:5) Mbela Aaisraeli oya li ye na okukala ya tila? Jehova okwa li e ya pe etumwalaka ta li shilipaleke okupitila muJesaja. Sho tatu konakona oohapu ndhoka natu kaleke momadhiladhilo kutya otadhi longo wo nokaalongeli yaKalunga kunena.—Aaroma 15:4.

Jehova okwe ya ladhipike a ti: ‘Inamu tila.’ (Ovelise 10) Oohapu ndhika kadha li owala dhomokana. Jehova okwa li e ya yelithile kutya omolwashike kaaya li ye na okukala ya tila a ti: ‘Ondi li pune.’ Iha hedha owala putse uuna twa pumbwa ekwatho. Okwa hala aapiya ye ya kale ye shi shi kutya oku li puyo, nokwiilongekidha oku ya ambidhidha. Shika itashi hekeleke tuu!

Jehova ota shilipaleke aalongeli ye ta ti: ‘Inamu limbililwa.’ (Ovelise 10) Oshityalonga shOshihebeli shoka sha longithwa mpaka otashi vulu wo okulongithwa uuna taku popiwa kombinga yaamboka haya “lengalenga koombinga noombinga ya tale ngele opu na sha shoka tashi vulu oku ya etela oshiponga.” Jehova okwa lombwele aapiya ye a ti: ‘Ongame Kalunga keni’ molwaashoka okwa li a hala oku ya yelithila kutya kaye na okukala ya tila. Oshike ishewe tashi vulu oku ya hekeleka shi vulithe okukala e li Kalunga kawo? Jehova oye “Omukombandambanda” ‘nOmunankondoawike.’ (Episalomi 91:1, yelekanitha NW.) Kaye na okukala ya tila, molwaashoka Jehova Kalunga kawo oku na oonkondo dha shiga ko.

Oshike nduno aalongeli yaJehova taya vulu okukala ya tegelela e ya ningile? Ote tu uvanekele ta ti: “Kala wu na uushili kutya otandi ku kwata nda dhiginina noshikaha shandje shokolulyo shuuyuuki.” (Ovelise 10, NW) Ota popi wo ta ti: “Ngame Jehova Kalunga koye, otandi ku kwata moshikaha shoye shokolulyo.” (Ovelise 13, NW) Oshike hashi ya momadhiladhilo goye ngele owu uvu oohapu ndhoka? Embo limwe olya popi lya ti: “Oovelise ndhika mbali otadhi tu kwathele tu kale twa fa tu wete omuvali nokanona ke. [He] iha gamene owala okamwana, ihe oha kala wo nako, noihe ka etha ka ze po puye.” Dhiladhila owala kwaashika: Jehova iha etha aantu ye ya ye kokule naye nonando oya kale ye wete ye li moonkalo oondhigu dhi thike peni.—Aahebeli 13:5, 6.

Aalongeli yaJehova otaya vulu okumona ehekeleko moohapu ndhoka dha li dha nyolwa kuJesaja. ‘Momathimbo ngaka omadhigu okukaliwa mugo,’ omathimbo gamwe otashi vulika tu kale tu uvite twa gwililwa po kiimpwiyu yonkalamwenyo. (2 Timoteus 3:1, yelekanitha NW.) Ihe katu na okuungaunga nomashongo ngaka otse atuke. Jehova okwi ilongekidha aluhe oku tu kwata moshikaha. Ngaashi aanona haya kala yi inekela aavali yawo, natse otatu vulu okukwata moshikaha she shi na oonkondo, tu na einekelo kutya ota vulu oku tu wilika tu ende mondjila yu uka note ke tu kwathela uuna tu li muudhigu.—Episalomi 63:7, 8.