Natan okwa li a popile nuulaadhi elongelokalunga lya yogoka
Kashi shi oshipu okutompa omuntu ngoka e na oonkondopangelo a mone kutya okwa ninga epuko nonokutya okwa pumbwa okuninga omalunduluko. Mbela owu na oku shi enda ngiini wu popye nomuntu ngoka momukalo ngoka itaagu mu sitha ohoni, ngele owu shi kutya okwa dhipagitha omulumentu gwontumba?
Omukwaniilwa David gwaIsraeli shonale, okwa li a hondele naBatseba, omukiintu gwaUrija. Batseba okwa li a ningi omusimba. Opo David a holeke eyono ndyoka, okwa li a dhipagitha Urija, omusamane gwaBatseba. Konima yaashoka David okwi ikuthile Batseba a ninge omukiintu gwe. Nonando David okwa kala uule woomwedhi dhontumba itaa longele Jehova nomutima aguhe, okwa tsikile niilonga ye yuukwaniilwa. Ihe Jehova okwa li a mono eyono lyaDavid e ta tumu omupolofeti Natan e ke mu pukulule.
Natan okwa li a pewa oshilonga oshidhigu noonkondo. Ihe molwaashoka okwa li omudhiginini kuJehova nokwa li a simaneka omithikampango dhe, okwa yi a ka kumagidhe David. Natan okwa li e na oku shi enda ngiini, opo i itaalithe David a mone kutya okwa pumbwa okwiiyela ombedhi?
OMULONGI OMUNEKEKA
Lesha Samuel omutiyali 12:1-25. Natu tye ando ongoye wa li Natan to lombwele David to ti: “Momukunda gumwe omwa li mu na aalumentu yaali; gumwe okwa li omuyamba, nomukwawo okwa li ohepele. Omuyamba okwa li e na iimuna oyindji, oonzi noongombe, manga ohepele okwa li e na okanzi kamwe, nkoka e ka landa. Okwe ka palutha niikulya ye mwene, noka kokele maandjawo pamwe noyana, haka nwine moshitenga she mwene nohaka lala mekolo lye. Okanzi oka li ka fa omwana omukadhona. Esiku limwe omuyenda okwe ya kegumbo lyomuyamba. Omuyamba ka li a hala a dhipage po shimwe shomiimuna ye, a telekele omuyenda gwe, ihe okwa kutha po okanzi kohepele e te ka telekele po omuyenda gwe.”—2 Sam. 12:1-4.
Molwaashoka David okwa li omusita gwoonzi, otashi vulika a li ta dhiladhila kutya ehokololo ndyoka olyoshili. Omulumentu gumwe okwa hokolola a ti: “Otashi vulika Natan a li e na ondjigilile yokuya [kuDavid] a ka popile ko aantu mboka ya ningilwa omuyonena, ihe kaye na omukwathi, notashi vulika David a li ta dhiladhila kutya [Natan] osho a li e endela pompito ndjoka.” Ihe nonando ongaaka, Natan okwa li e na okukala omulaadhi nomudhiginini kuKalunga, opo a vule oku ka popya nomukwaniilwa. David okwa geye noonkondo sho u uvu shoka sha ningwa komulumentu omuyamba. Okwa ti: “Otandi gana kuKalunga omunamwenyo kutya omuntu ngoka oku na okusa, sho a longo ngaaka!” Natan okwa lombwele David nopwaahe na oku mu lila okathima koluko a ti: “Omulumentu ngoka ongoye.”—2 Sam. 12:5-7.
Omolwashike Natan a li a hokololele David oshinima shoka? Olundji ngele omuntu oku na ekwatathano nomuntu gwuukashikekookantu wa yooloka ko kuwe, iha mono naanaa kutya shoka ta ningi osha puka. Atuheni ohatu kongo omaipopilo uuna twa ya pombambo. Ihe ehokololo lyaNatan olya li lya kwathele David a mone nziya epuko lye. David okwa li e shi mono kutya omulumentu ngoka ta hokololwa kuNatan okwa li a ninga oshinima oshiwinayi noonkondo. David okwa li a geela noonkondo omulumentu ngoka. Ihe konima yaashono, Natan opo owala a lombwele David kutya okwa ninga naanaa oshinima sha fa shoka. Kungeyi, David okwa mono kutya okwa yona lela e ta taamba ko epukululo. Okwa li e shi zimine kutya okwa ‘dhina’ Jehova sho a hondele naBatseba.—2 Sam. 12:9-14; Eps. 51.
Oshike tatu ilongo moshinima shika? Osho kutya tu li aalongi yOmbiimbeli otu na okukwathela aapulakeni yetu ya thike pehulithodhiladhilo li li mondjila. Natan okwa li a simaneka David nokwa li a popi naye momukalo omwaanawa. Natan okwa li e shi kutya David oku hole uuyuuki. Mehokololo lye, omupolofeti okwa li a hokwa uukwatya we mboka uuwanawa. Natse otatu vulu wo okukwathela yalwe yu uve ko nkene Jehova a tala ko oshinima shontumba. Ngiini mbela? Omoku ya kwathela ya mone shoka shu uka, nokaapu na oku ya dhiladhilitha kutya otu na ontseyo yi vule yawo miinima yopambepo. Ngele tashi ya pokutokola kombinga yaashoka shu uka naashoka sha puka, otu na okulongitha Ombiimbeli, pehala lyokupopya omadhiladhilo getu yene.
Omolwuudhiginini we kuJehova, Natan okwa li a vulu okupa omayele omukwaniilwa ngoka a li a simana. (2 Sam. 12:1) Ngele natse aadhiginini, otatu ka kala twa kakatela omakotampango gaJehova guuyuuki.
OYA LI YA HUMITHA KOMEHO ELONGELOKALUNGA LYASHILI
Osha yela kutya Natan naDavid oya li ookuume kopothingo, molwaashoka David okwa li a lukila Natan. (1 Ondjal. 3:1, 5) Oshikando shotango shoka Natan a popiwa mOmbiimbeli, okwa li e li pamwe naDavid. Ayehe oya li ye hole Jehova. David okwa li i inekela etokolo lyaNatan, molwaashoka okwa li a lombwele omupolofeti kutya okwa hala okutungila Jehova otempeli. David okwa ti: “‘Ondi li megumbo lya tungika komisendeli, ihe oshikethahangano shaKalunga otwe shi pungula motenda.’ Natan okwa yamukula a ti: ‘Ninga shoka to dhiladhila, oshoka OMUWA oku ku na.’”—2 Sam. 7:2, 3.
Molwaashoka Natan okwa li omulongeli gwaJehova omudhiginini, okwa li a hokwa lela edhiladhilo lyaDavid lyokutunga ehala lyelongelokalunga lyashili kombanda yevi. Ihe oshikando shoka, Natan otashi vulika a li a popi omadhiladhilo ge mwene, pehala lyokupopya medhina lyaJehova. Kalunga okwa li a lombwele omupolofeti Natan uusiku mboka a lombwele omukwaniilwa David kutya haye ta ka tungila Jehova otempeli. Ihe gumwe gwomoyanamati yaDavid oye te ke yi tunga. Kungawo, Natan okwa popi kutya Kalunga okwa li a ningi ehangano naDavid kutya oshipangelapundi she ‘otashi ka kala po sigo aluhe.’—2 Sam. 7:4-16.
Ano edhiladhilo lyaNatan kutya David oye na tungile Jehova otempeli kalya li metsokumwe nehalo lyaKalunga. Ihe omupolofeti ngoka omwiifupipiki ka li a geya, pehala lyaashono, okwa li a landula elombwelo lyaKalunga. Natan okwe tu tulila po oshiholelwa oshiwanawa tu kale hatu taamba ko omapukululo ngoka hatu pewa kuKalunga. Molwaashoka Natan okwa li a tsikile okulonga e li omupolofeti, otashi ulike kutya Kalunga okwa li natango e mu hokwa. Osha yela kutya Jehova okwa li a nwetha mo omuhunganeki Natan naGad, opo ya wilike David u unganeke aalumentu 4 000 yokwiimba motempeli.—1 Ondjal. 23:1-5; 2 Ondjal. 29:25.
NATAN OKWA LI HA POPILE MBOKA YE NA UUTHEMBA WOKUPANGELA
Natan okwa li e shi kutya Salomo oye ta ka ya koshipundi pehala lyahe, David ngoka a kulupa. Sho Adonija a li ta kambadhala okwiininga omukwaniilwa pehala lyahe David ngoka a li te ende ta kulupa, Natan okwa li u ungaunga naye noondunge. Natan okwa li wo omudhiginini nomunamayele. Tango okwa li a ladhipike Batseba a dhimbulukithe David euvaneko ndyoka a ninga kutya omwana gwawo Salomo oye ta landula ko muukwaniilwa. Natan okwa li a yi komukwaniilwa David e ke mu pule ngele oye a pa Adonija uuthemba a landule ko muukwaniilwa. Omukwaniilwa David ngoka a kulupa sho a mono kutya onkalo oya kindja, okwa lombwele Natan naapiya ye yalwe aadhiginini ya gwayeke Salomo a ninge omukwaniilwa. Ompangela yaAdonija oya li ya yiwa moshipala.—1 Aak. 1:5-53.
NATAN OKWA LI OMWIIFUPIPIKI
Natan naGad oyo ya nyola Samuel gwotango, ontopolwa 25 sigo 31 nosho wo embo alihe lyaSamuel omutiyali. Oohapu dha nwethwa mo ndhoka dha nyolwa membo lyotango netiyali lyaSamuel, otadhi ti: “Ondjokonona yomukwaniilwa David okuza ketameko sigo okehulilo oya nyolelwa momambo goondjokonona gaahunganeki mbaka yatatu: Samuel, Natan naGad.” (1 Ondjal. 29:29) Natan ota popiwa wo a nyola “iinima yilwe mondjokonona yaSalomo.” (2 Ondjal. 9:29) Otashi vulika Natan a li a tsikile okulonga muuwa konima yeso lyomukwaniilwa David.
Iinima oyindji mbyoka tu shi kombinga yaNatan otashi vulika oye mwene e yi nyola. Ihe okukala a mwena miinima yimwe, otashi tu lombwele oshindji kombinga ye. Osha yela kutya Natan okwa li omupolofeti omwiifupipiki noka li ta lalakanene okwiiningila edhina lya tumbala. Moohapu ndhoka dha nyolwa membwiitya limwe lyOmbiimbeli, ota popiwa mo “nopwaa na efalomo lyasha nenge ondjokonona ye.” Oohekulululwa nenge ondjokonona ye inayi tseyika.
NATAN OKWA LI OMUDHIGININI KUJEHOVA
Ngele tatu dhiladhila kuuyelele uushona mboka twa pewa mOmanyolo kombinga yaNatan, osha yela kutya okwa li omwiifupipiki nokwa li a popile nuulaadhi elongekidho kehe lyopakalunga. Jehova Kalunga okwa li e mu pe oshilonga oshinene. Onkee ano, natu kale hatu tedhatedha nokuholela omaukwatya ge, ngaashi uudhiginini we nokupandula noonkondo iitegelelwa yopakalunga.
Otashi vulika tse itatu ka pulwa tu ka pukulule aakwaniilwa mboka ya hondela nenge tu ka ye moshipala ompangela yontumba yomeholeko. Ihe Kalunga ota vulu oku tu kwathela tu kale aadhiginini kuye, nokwaambidhidha omithikampango dhe dhuuyuuki. Otatu vulu wo okukala aalaadhi notu na uukeka wokulonga yalwe oshili nokuhumitha komeho elongelokalunga lya yela.
[Ethano pepandja 25]
Natan okwa li a popi momukalo omwaanawa naBatseba, molwaashoka okwa li ha ambidhidha mboka ye na uuthemba wokupangela