Otatu nyanyukilwa etegameno ndyoka tu na

‘Opu na etegameno lyomwenyo gwaaluhe. Ndyoka Kalunga ngoka ihaa fundju, e tu uvanekele, manga uuyuni inaau shitwa.’—TIT. 1:2.

OMAPULO GEENDULULO

Otu shi shi ngiini kutya megulu ohamu kala enyanyu uuna omugwayekwa a si omudhiginini?

Ongiini egwanitho po lyetegameno lyoonzi dhilwe lya pambathana naandyoka lyaagwayekwa?

Opo tu mone egwanitho po lyetegameno lyetu “oondjenda oondjapuki” ‘niilonga yometilokalunga’ mbyoka tu na okuulika oyini?

1. Ongiini etegameno ndyoka Jehova e tu pa hali tu kwathele tu idhidhimike?

JEHOVA ‘oKalunga, ngoka oluthithiya lwetegameno.’ Onkee ano omuyapostoli Paulus okwa gwedha ko a ti kutya Jehova ota vulu ‘oku tu udhitha enyanyu alihe nombili tayi zi meitaalo lyetu, opo tu vule okukoka mokutegamena kwetu koonkondo dhombepo ondjapuki.’ (Rom. 15:13) Ngele otu na etegameno otatu ka vula okwiidhidhimikila oonkalo kehe tadhi vulu dhi holoke po, tu na omitima dhu udha enyanyu nombili. Ngaashi naanaa hali ningitha Aakriste aagwayekwa, etegameno ndyoka otali ka ningitha wo Aakriste yalwe ya kale ye na etegameno ‘lya kwata lya dhiginina oomwenyo dhawo.’ (Heb. 6:18, 19) Otu na okukala twa kakatela ketegameno lyetu uuna tu li moonkalo oondhigu, molwaashoka olyo tali ke tu kwathela kaatu tengauke nenge tu kanithe eitaalo.—Lesha Aahebeli 2:1; 6:11.

2. Aakriste kunena oye na omategameno gopaali geni, nomolwashike “oonzi dhilwe” dhi na ko nasha netegameno ndyoka aagwayekwa ye na?

² Aakriste mboka ye li po pethimbo ndika lyehulilo oye na po etegameno limwe lyomomategameno gaali. Iilyo ‘yoshigunda oshishona’ shAakriste aagwayekwa mboka ya hupa po oye na etegameno lyomwenyo kaagu na ehulilo megulu, moka taya ka ninga aakwaniilwa naasaaseri pamwe naKristus mUukwaniilwa we. (Luk. 12:32; Eh. 5:9, 10) Iilyo ‘yongundu onene’ ‘yoonzi dhilwe’ oyi na etegameno lyoku ka kala nomwenyo sigo aluhe moparadisa kombanda yevi kohi yUukwaniilwa wopaMesiasa. (Eh. 7:9, 10, NW; Joh. 10:16, NW) Mboka ye li oonzi dhilwe oye na okudhimbulukwa kutya opo ya ka hupithwe oye na okukala taya ambidhidha thiluthilu ‘aamwahe’ yaKristus aagwayekwa mboka ye li natango kombanda yevi. (Mat. 25:34-40) Aagwayekwa otaya ka pewa ondjambi yawo, nosha yela kutya noonzi dhilwe otadhi ka gwanithilwa po etegameno lyadho. (Lesha Aahebeli 11:39, 40.) Tango natu konakoneni kombinga yetegemeno ndyoka aagwayekwa ye na.

“ETEGAMENO LYA KOLA” LYAAKRISTE AAGWAYEKWA

3, 4. Ohashi ende ngiini opo Aakriste aagwayekwa ‘ya valululwe evalululo ndyoka hali ya pe etegameno lya kola,’ netegameno ndyoka olini?

³ Omuyapostoli Petrus okwa li a nyola oontumwafo mbali e dhi nyolele Aakriste aagwayekwa mboka i ithana “aahogololwa.” (1 Pet. 1:1) Okwa li a popi muule kombinga yetegameno ewanawa ndyoka okangundu okashona ke na. Montumwafo ye yotango Petrus okwa nyola a ti: “Kalunga He yOmuwa gwetu Jesus Kristus na hambelelwe! Oshoka molwesilohenda lye enene okwe tu [valulula, NW], sho a yumudha Jesus Kristus kuusi. Shika oshe tu pe etegameno lya kola, kutya megulu Kalunga okwe tu pungulila eliko enene, ndyoka itaa li wapa okwoola, [okuyonuka] nokuhula po. Molwaashoka mwi inekela Kalunga meitaalo, ote mú gamene noonkondo dhe, sigo tamu mono ehupitho ndyoka lya longekidhwa oku ka hololwa pehulilo lyomathimbo. Onkee ano nyanyukilweni ehupitho ndika.”—1 Pet. 1:3-6.

⁴ Omwaalu omushona gwAakriste mboka ya hogololwa kuJehova ya ka pangele pamwe naKristus mepangelo lyUukwaniilwa womegulu ohaya ‘valululwa’ ya ninge aana yaKalunga ya valwa pambepo. Oya gwayekwa nombepo ondjapuki ya ka ninge aakwaniilwa naasaaseri pamwe naKristus. (Eh. 20:6) Petrus okwa popi kutya ‘okuvalululwa’ huka okwe shi ningi tashi wapa ya mone “etegameno lya kola” ndyoka a popi kutya ‘itali wapa okwoola, okuyonuka nokuhula po’ ndyoka lye ya longekidhilwa “megulu.” Kapu na omalimbililo kutya omolwashike aagwayekwa haya nyanyukilwa etegameno lyawo ndyoka lya kola. Opo ya ka mone egwanithopo lyetegameno ndyoka oye na okukala aadhiginini.

5, 6. Omolwashike Aakriste aagwayekwa ye na okulonga ya mana mo opo ya ka mone ondjambi yawo yomegulu?

⁵ Montumwafo ye ontiyali Petrus okwa li a kumagidha Aakriste ya ‘kambadhale natango ya mana mo, opo okwiithanwa nokuhogololwa kwawo kuKalunga ku kale aluhe kwa mena omidhi muyo.’ (2 Pet. 1:10) Oye na okwiitula mo opo ya kokeke uukwatya wopaKriste ngaashi eitaalo, etilokalunga, ohole yuumwayinathana nosho wo ohole. Petrus okwa nyola a ti: ‘Ngele uukwatya mbuka omu wu na e tawu indjipala, otawu mu tula miilonga mbyoka tayi e ta iiyimati.’—Lesha 2 Petrus 1:5-8.

⁶ Metumwalaka ndyoka a li a pe aakuluntugongalo aagwayekwa yomegongalo lyaFiladelfia ndyoka lya li muAsia Eshona, Kristus omuyumudhwa okwa ti: “Ano sho wa dhiginine oohapu dhandje nowi idhidhimike, nangame wo otandi ke ku hupitha mo momathimbo omadhigu ngoka tage ya muuyuni auhe okumakela aantu ayehe mboka ye li kombanda yevi. Ongame otandi ya mbala. Dhiginina shoka u shi na, opo waa yugwe nando okomuntu ondjambi yoye yesindano.” (Eh. 3:10, 11) Omukriste omugwayekwa ngele okwa kala kee shi we omudhiginini, ita ka mona we “oshishani sheadhimo itaali kana” shoka shu uvanekelwa aahogololwa mboka taya dhiginine sigo omeso.—1 Pet. 5:4; Eh. 2:10.

OMPITO YOKUYA MUUKWANIILWA

7. Judas okwa li a popi kombinga yetegameno lini ewanawa montumwafo ye?

⁷ Lwomomumvo 65 E.N., Judas omumwayina gwaJesus okwa li a nyolelele Aakriste aagwayekwa ooyakwawo mboka a ti ‘aaithanwa.’ (Jud. 1; yelekanitha Aahebeli 3:1.) Okwa li a tokola e ya nyolele nelalakano lyokupopya kombinga yetegameno lyoku ka mona omwenyo ndyoka Aakriste yi ithanwa mUukwaniilwa waKalunga womegulu ‘ye na ayehe.’ (Jud. 3) Nonando okwa li e na iinima ye endelela mbyoka a li e na okuungaunga nayo, pehulilo lyontumwafo ye ndjoka ofupi okwa popi kombinga yetegameno ewanawa ndyoka Aakriste aagwayekwa ye na, a ti: “Kalunga ngoka ta vulu oku mu gamena, mwaapunduke, noku mú kaleka mwaa na oshipo, mu udha enyanyu montaneho yeadhimo lye, oye awike Kalunga nOmuhupithi gwetu molwaJesus Kristus, Omuwa gwetu. Oye e na eadhimo, uunenesimano, oonkondo nepangelo okuza komathimbo gonale nongashingeyi sigo aluhe.”—Jud. 24, 25.

8. Pahokololo lyaJudas 24, oshike tashi ulike kutya megulu ohamu kala enyanyu ngele gumwe gwomaagwayekwa a kala omudhiginini sigo omeso?

⁸ Osha yela kutya Aakriste aagwayekwa aadhiginini oya hala okukala ya gamenwa opo kaaya punduke yo ya ka hanagulwe po. Etegameno lyawo ndyoka lyi ikolelela kOmbiimbeli olyo kutya Jesus Kristus ote ke ya yumudha, e taya holoka koshipala shaKalunga ye na omalutu gopambepo ga gwanenena noya nyanyukwa shili. Ngele gumwe gwomaagwayekwa a si omudhiginini, ohashi kala sha yela kutya ota ‘yumudhilwa olutu lwopambepo’ ‘ihaalu yonuka, lu li meadhimo.’ (1 Kor. 15:42-44, yelekanitha NW.) Ngele ‘megulu ohamu kala enyanyu omolwomulunde gumwe i itedhulula’ dhiladhila owala kenyanyu ndyoka hali kala mo ngele gumwe gwomaamwahe yaKristus a mana onkalamwenyo ye yokombanda yevi e li omudhiginini. (Luk. 15:7) Jehova niishitwa ye yopambepo iidhiginini otaya ka nyanyukwa pamwe nomugwayekwa sho ta pewa ondjambi ye ‘u udha enyanyu.’—Lesha 1 Johannes 3:2.

9. Ongiini aagwayekwa aadhiginini ya “pewa ompito ya mbwalangandja” yokuya mUukwaniilwa, nongiini etegameno ndika hali gumu aagwayekwa mboka ye li natango kombanda yevi?

⁹ Petrus naye okwa popi kombinga yoshinima shoka sho a nyolele Aakriste aagwayekwa a ti kutya ngele oya kala aadhiginini ‘otaya ka pewa ompito ya mbwalangandja yokuya muukwaniilwa waaluhe wOmuwa gwetu nowOmukulili Jesus Kristus.’ (2 Pet. 1:10, 11, yelekanitha NW.) Otaya ka “pewa ompito ya mbwalangandja” yokuya megulu, nuukwatya wawo wopaKriste otawu ki imonikila sho tawu adhima wa yela. Sho taku tiwa kutya ‘ompito oya mbwalangandja’ okwa fa wo taku popiwa omalaleko nuuyamba kaage shi okuyelekwa ngoka taga ka pewa mboka ya matuka ya mana mo methigathano ndika lyoku ka mona omwenyo. Otaya ka kala ye na omitima dhu udha enyanyu nolupandu ngele taya tala nkene ya kakatele uudhiginini onkalamwenyo yawo ayihe. Etegameno ndika ohali pe Aakriste aagwayekwa mboka ye li kombanda yevi natango oonkondo ya ‘kale yi ilongekidhila shoka ye na oku shi ninga.’—1 Pet. 1:13.

“ETEGAMENO” NDYOKA LI NIWE KOONZI DHILWE

10, 11. (a) Oonzi dhilwe odhi na etegameno lini? (b) Ongiini “eholoko lyaana yaKalunga” lya pambathana lela naKristus nonegwanithopo lyetegameno lyokukala nomwenyo kombanda yevi?

¹⁰ Omuyapostoli Paulus okwa nyola kombinga yetegameno “lyaana yaKalunga” mboka ya valwa pambepo, noye li “aathigululi pamwe” naKristus. (NW) Konima yaashono okwa popi kombinga yetegameno ewanawa ndyoka Jehova a pa oonzi dhilwe itaadhi vulu okuyalulwa, a ti: “Kehe shoka shomeshito otashi tegelele nondjuulukwe onene eholoko lyaana yaKalunga. Oshoka kehe shimwe shomeshito osha gandjwa monkalo yaa na ekwatho, hakehalo lyasho shene, ihe oKalunga e shi utha. Ihe nonando ongaaka, okwa kala etegameno, kutya oku na esiku ndyoka, uuna eshito alihe tali ka manguluka muupika [weyonuko], li ye memanguluko nomeadhimo lyaana yaKalunga.”—Rom. 8:14-21.

¹¹ Jehova okwa li a pe aantu ‘etegameno’ sho a li u uvaneke kutya ote ke ya hupitha ‘keyoka,’ ano tu tye kuSatana Ondiaboli okupitila ‘moluvalo’ lu uvanekwa. (Eh. 12:9; Gen. 3:15) Jesus Kristus oye oshitopolwa shotango ‘sholuvalo’ ndoka. (Gal. 3:16) Eso neyumuko lyaJesus olya pe aantu ekankameno lya kola lyokukala ye na etegameno lyokumangululwa muulunde nomeso. “Eholoko lyaana yaKalunga” olya pambathana lela negwanitho po lyetegameno ndika. Aagwayekwa mboka ye na esimano enene oye li oshitopolwa oshitiyali ‘sholuvalo.’ Otaya ka ‘hololwa’ pamwe naKristus sho taya ka hanagula po onkalelo ya kolokosha yuuyuni waSatana. (Eh. 2:26, 27) Shika otashi ka tya ehupitho koonzi dhilwe ndhoka tadhi ka hupa po puudhigu uunene.—Eh. 7:9, 10, 14.

12. Eholoko lyaagwayekwa otali ka etela aantu uuwanawa wa dhenga mbanda wuni?

¹² ‘Eshito’ nenge tu tye aantu, otaya ka mona epepelelo pethimbo lyElelo lyOomvula Eyuvi lyaKristus. Pethimbo ndyoka ‘aana yaKalunga’ otaya ka “hololwa” ishewe sho taya ka longa pamwe naKristus ye etele aantu omauwanawa ngoka ga ningwa taga wapa okupitila mekuliloyambo lyaJesus. ‘Eshito,’ nenge tu tye aantu mboka ye li aapangelwa yUukwaniilwa womegulu, otaya ka tameka okumona epepelelo kiilanduliko yuulunde neso. Kashona nakashona aantu aavuliki otaya ka ‘mangululwa muupika weyonuko.’ Ngele oya kala aadhiginini kuJehova muule woomvula adhihe eyuvi nopethimbo lyokumakelwa kwahugunina hoka taku ka ningwa pehulilo lyoomvula ndhoka, omadhina gawo otaga ka nyolwa ‘membo lyaanamwenyo’ sigo aluhe. Otaya ka ya “memanguluko nomeadhimo lyaana yaKalunga.” (Eh. 20:7, 8, 11, 12) Kali shi tuu etegameno lya dhenga mbanda!

NATU KALEKENI ETEGAMENO LYETU LYA KOLA

13. Etegameno lyetu olya kankamena kushike, nuunake Kristus ta ka holoka?

¹³ Oontumwafo mbali dhaPetrus dha nwethwa mo odhi na oshindji okukwathela aagwayekwa nosho wo oonzi dhilwe dhi kaleke etegameno lyadho lya kola. Okwa ti kutya etegameno lyawo inali kankamena kiilonga yawo, ihe okesilohenda lyaJehova. Okwa nyola: “Kaleni mwa tonata nomwa tegamena uuwanawa mboka tamu ke wu pewa, uuna Jesus Kristus ta holoka.” (1 Pet. 1:13) Kristus ota ka holoka sho te ke ya okupa aalanduli ye aadhiginini ondjambi nosho wo okupangula aakaanakalunga palombwelo lyaJehova.—Lesha 2 Aatessalonika 1:6-10.

14, 15. (a) Opo tu kale tu na etegameno lya kola, otu na okukaleka shike momadhiladhilo? (b) Petrus okwa gandja omayele geni?

¹⁴ Opo tu kaleke etegameno lyetu lya kola, otu na okukaleka ‘esiku lyaJehova’ momadhiladhilo nokuulika kutya olya simanenena monkalamwenyo yetu. Esiku ndyoka otali ka eta ehanagulo ‘lyomagulu’ ngoka ge li ko ngashingeyi nenge ano omapangelo gopantu, nosho wo ‘evi’ nenge ano okukalamwenyo kwaantu ya kolokosha kombanda yevi ‘niitungithi’ yokukalamwenyo kwawo. Petrus okwa nyola: ‘Ne aantu omu na okwaadhika mwa tya ngiini . . . sho mwa tegelela esiku lyaKalunga? Kambadhaleni, mu li endelelithe, esiku tuu ndyoka, uuna omagulu taga ka pya po e ta ga ka yonuka po, niitungithi tayi ka hemukithwa kuupyu.’—2 Pet. 3:10-12, yelekanitha NW.

¹⁵ ‘Omagulu nevi’ ngoka ge li ko ngashingeyi otayi ka pingenwa po ‘kegulu epe [epangelo lyUukwaniilwa waKristus] nevi epe [okukalamwenyo okupe kwaantu kombanda yevi].’ (2 Pet. 3:13) Opo nduno Petrus okwa gandja omayele ga kankamena kokukala twa ‘tegelela’ nenge kokukala kwetu tu na etegameno lya kola lyokutegelela uuyuni uupe mboka wa uvanekwa, sho a ti: “Onkee ano ne okuume kandje, manga mwa tegelela esiku ndyoka, kambadhaleni okukala aayuuki nomwaa na oshipo koshipala shaKalunga nomu na ombili naye.”—2 Pet. 3:14.

NATU KALENI METSOKUMWE NETEGAMENO LYETU

16, 17. (a) “Oondjenda oondjapuki” ‘niilonga yometilokalunga’ mbyoka tu na okuulika oyini? (b) Etegameno lyetu otali ka gwanithwa po ngiini?

¹⁶ Katu na owala okukala tu na etegameno lya kola, ihe okukalamwenyo kwetu oku na wo okukala metsokumwe nalyo. Otu na okwiipula kutya otu na uupambepo wu li ngiini. Uutumbulilo “oondjenda oondjapuki” otawu ti ‘okukala tu na omikalo mokati kaapagani’ mokukala tu na eihumbato ewanawa. (2 Pet. 3:11; 1 Pet. 2:12) Otu na okukala ‘tu holathane.’ Shika otashi ti kutya otu na okuninga ashihe shoka tatu vulu opo tu kaleke po uukumwe wuumwayinathana womuuyuni auhe nosho wo naamboka ye li momagongalo getu. (Joh. 13:35) “Iilonga yometilokalunga,” iilonga mbyoka hayi ulike kutya otu na ekwatathano ewanawa naJehova. Iilonga mbika oya kwatela mo ongushu yomagalikano getu, nosho wo okulesha Ombiimbeli kehe esiku, ekonakonombiimbeli lyopaumwene lyomuule, elongelokalunga lyuukwanegumbo, nokukutha aluhe ombinga mokuuvitha “onkundana ombwanawa yuukwaniilwa.”—Mat. 24:14, NW.

¹⁷ Atuheni otwa hala okukala twa hokiwa kuJehova opo e ke tu hupithe sho uuyuni mbuka wa kolokosha tawu ka “yonwa po.” Opo nduno otatu ka mona egwanitho lyetegameno ‘lyomwenyo gwaaluhe ndyoka Kalunga ngoka ihaa fundju e tu uvanekele manga uuyuni inaau shitwa.’—Tit. 1:2.

[Ethano pepandja 22]

Aakriste aagwayekwa ‘ohaya valululwa evalululo ndyoka hali ya pe etegameno lya kola’

[Ethano pepandja 24]

Kaleka etegameno lyeni lya kola maandjeni