Oto dhimbulukwa?

Owa lesha ngaa nawa iifo yOshungolangelo mbyoka opo ya zi ko? Tala ngele oto vulu okuyamukula omapulo taga landula:

Salomo okwa tula po oshiholelwa oshiwinayi shini?

Kalunga okwa li a yambeke omukwaniilwa Salomo nokwa li e mu longitha momikalo odhindji. Ihe pethimbo lyokupangela kwe, Salomo okwa li e etha okulandula omayele gaKalunga. Okwa li a hokana omwanakadhona gwaFarao. Okwi ikongele wo aakiintu oyendji mboka konima yethimbo ye mu pukitha a longele iikalunga. Otu na okukotokela iikala nomahalo ga puka ngoka hage endele ko taga koko mutse. (Deut. 7:1-4; 17:17; 1 Aak. 11:4-8)—12/15, ep. 10-12.

Omolwashike tu na okukala metsokumwe nomithikampango dhOmbiimbeli?

Mboka hayi ipwililikile omithikampango dhOmbiimbeli ohaya mono iilanduliko yinikitha oluhodhi. (Eps. 19:8, 11) Mboka haya kala metsokumwe nomithikampango dhOmbiimbeli ohaya kala ye na eiyuvo lya yela nosho wo ekwatathano lyopothingo noyaandjawo.—1/1, ep. 8, 9.

Omolwashike Aakriste haya ninginithwa, nopo omuntu a kale a gwana oku na okuninga shike?

Opo Omukriste a kale e na ekwatathano ewanawa naKalunga oku na okuninginithwa. (1 Pet. 3:21) Ohatu mu iyapulile paumwene okupitila megalikano noku mu uvanekela kutya otatu ka longa ehalo lye monkalamwenyo yetu ayihe. Konima yaashoka ohatu shi ulike montaneho okupitila meninginitho.—4/1, ep. 16, 17.

Omolwashike tatu tile kutya yamwe yomAakriste aagwayekwa yashili, oya li taya ka kala kombanda yevi okuza methelemumvo lyotango oku uka komeho?

Jesus okwa popi meyele ‘lyiilya’ nosho wo ‘lyomau’ a ti kutya “ombuto ombwanawa” otayi thaneke “aana [yuukwaniilwa, NW].” (Mat. 13:24-30, 38) Omau otaga ka kala nokukokela mumwe niilya sigo ethimbo lyeteyo. Nonando itatu vulu naanaa okutya oolye ye li mongundu yiilya, otu na uushili kutya aagwayekwa opo taya ka kala okuuka pethimbo lyetu.—1/15, ep. 7.

Olye a li a tumu “onyothi” ndjoka ya li ya kwatele komeho aakonekinyothi?

Satana Ondiaboli oye a li a tumu onyothi ndjoka, molwaashoka oye a li a halelela okanona Jesus ka dhipagwe. Satana oye ha humitha komeho iifundja, uukolokoshi nomadhipagathano. Itashi kumitha sho Jesus e mu popi e li “omufundja nahe yiifundja” nosho wo kutya oye “omudhipagi okuza ketameko.” (Joh. 8:44)—4/1, ep. 29.

Oshike tashi tu kwathele tu sinde efupa?

Iinima tayi landula otayi vulu oku tu kwathela: Natu kambadhale okukala tu hole aamwatate shili; natu kale hatu endathana naamboka haya longele Kalunga; natu kale hatu ningile yalwe uuwanawa ‘nokunyanyukwa pamwe naamboka ya nyanyukwa.’ (Rom. 12:15)—2/15, ep. 16-17.

Olye a li Hannas ngoka a popiwa mOmavaangeli pethimbo Jesus ta makelwa?

Pethimbo Jesus ta makelwa Hannas okwa li ‘omuyambi omukuluntu.’ (Luk. 3:2) Okwa tameke okulonga e li omuyambi omukuluntu okuza lwomomumvo 6 nenge 7 E.N., sigo olwomomumvo 15 E.N., sho a li a kuthwa miilonga. Ihe konima yaashoka okwa tsikile nokupangela muIsraeli.—4/1, ep. 9.

Omakotampango geni wu na okukaleka momadhiladhilo uuna to gandja omayele?

Dhiladhila muule kutya oshike naanaa sha kwatelwa mo. Ino endelela okuyamukula. Longitha Oohapu dhaKalunga momukalo omwaanawa. Mpoka tashi vulika, longitha iileshomwa yopakalunga. Yanda okuningila yalwe omatokolo.—3/15, ep. 7-9.

Jesus okwa li a hala okutya shike sho a ladhipike aapulakeni ye ya thindikile iikako iyali ngoka a hala okuthindikilwa oshikako shimwe? (Mat. 5:41)

Pethimbo ndyoka, Aaroma mboka ya li ya kwata ko oshilongo oya li haya thiminike aantu ya longe iilonga yontumba. Sho Jesus a lombwele aapulakeni ye ya thindikile gumwe iikako iyali, okwa li a hala oku ya lombwela kutya kaye na okukala nonkone uuna ya pulwa ya longe iilonga yontumba kwaamboka ye na oonkondopangelo.—4/1, ep. 9.