Aaleshi yoshifo shetu taya pula . . .

Omolwashike Oonzapo dhaJehova hadhi uvitha tadhi ende egumbo negumbo?

▪ MOmbiimbeli omu na elombwelo ndyoka Jesus a li a gandja kaalongwa ye ta li ti: “Indeni ano, ka ningeni aantu ayehe aalongwa yandje, . . . ne mu ya longe.” (Mateus 28:19, 20) Mbela Aakriste ayehe osho ye na okuninga ngaaka? Aalanduli yaJesus yopetameko oya li ye shi kutya osho ye na okuninga. Pashiholelwa, omuyapostoli Petrus okwa li a popi a ti: “[Jesus] okwe tu lombwele tu uvithile aantu noku ya [“pa uunzapo nawanawa”].” (Iilonga 10:42, yelekanitha NW.) Omuyapostoli Paulus okwa li a nyola a ti: “Ondu uvite ethiminiko, ndi shi ninge. Iihuna yowala, ngele itandi uvitha [“onkundana ombwanawa”].”—1 Aakorinto 9:16, yelekanitha NW.

Kakele kaPaulus naPetrus, Aakriste yomethelemumvo lyotango nayo oya li haya landula elombwelo lyaJesus. Oya li ya pititha komeho iilonga yokuuvitha. (Iilonga 5:28-32, 41, 42) Oonzapo dhaJehova kunena ohadhi kambadhala okuninga sha faathana. Nadho ohadhi uvitha kombinga ‘yuukwaniilwa womegulu’ ngaashi Jesus a li e shi ningi.—Mateus 10:7, NW.

Oolye ye na okuuvithilwa etumwalaka yUukwaniilwa? Jesus okwa li a popi kutya etumwalaka ndyoka oli na okuuvithilwa aantu ayehe kehe pamwe. Okwa lombwele aalongwa ye a ti: ‘Otamu ka ninga oonzapo dhokuhokolola ndje miilongo ayihe yokombanda yevi.’ (Iilonga 1:8) Okwa li a hunganeke wo kutya manga onkalelo ndjika inaayi hula po, ‘onkundana ndjika ombwanawa yuukwaniilwa otayi ku uvithilwa uuyuni auhe yi ningile iigwana ayihe onzapo.’ (Mateus 24:14, NW) Onkee ano, Aakriste yomethelemumvo lyotango oya li ya ningi oonkambadhala opo ya gwanithe po elombwelo ndyoka noya li ya popi naantu ayehe, hanaamboka owala ye shi nenge naamboka kaaya li ye li melongelokalunga lyontumba. (Aakolossa 1:23; 1 Timoteus 2:3, 4) Sha faathana, Oonzapo dhaJehova nadho kunena ohadhi kambadhala okupopya nakehe gumwe.a

Omukalo guni gwokutaandeleka etumwalaka lyUukwaniilwa hagu pondola gu vule omikwawo? Jesus ngoka a li e shi nkene e na okuuvithila aantu oyendji ngaashi tashi vulika, okwa li a tumu aalongwa ye ye ku uvithe miilando, momikunda nomomagumbo. (Mateus 10:7, 11, 12) Konima yeso neyumuko lye, aalongwa ye oya li ya tsikile nokuuvitha taya ende “egumbo negumbo.” (Iilonga 5:42, NW) Ngaashi Jesus, nayo oya li hayu uvithile kehe mpoka ya adha aantu nopomahala gaayehe. (Johannes 4:7-26; 18:20; Iilonga 17:17) Kunena, Oonzapo dhaJehova ohadhi longitha omikalo ngaashi ndhoka opo dhi uvithile aantu ayehe.

Jesus okwa li u ulike kutya haantu ayehe taya ka pulakena. (Mateus 10:14; 24:37-39) Mbela shoka oshi na okwiimba Aakriste kaaya uvithe? Natu tale kefaathanitho ndika: Ngele ando owa li gumwe gwomongundu ndjoka tayi kongo aantu konima yekakamo lyevi enene, mbela oto ke etha oku ya konga ngele owa mono kutya aashona yowala taya adhika ye na omwenyo? Hasho nando to ka ninga, ihe oto ka tsikila shampa owala pu na etegameno kutya oto ka vula okuhupitha nando omuntu gumwe. Jesus okwa li a lombwele aalongwa ye ya tsikile nokuuvitha ye na einekelo kutya otaya vulu okumona po yamwe mboka taya pulakene konkundana ombwanawa yUukwaniilwa waKalunga. (Mateus 10:23; 1 Timoteus 4:16) Oonzapo dhaJehova ohadhi kongo aantu mboka tadhi ende egumbo negumbo, nokungawo ohadhi ulike kutya odhi hole Kalunga naantu ooyakwawo mboka tashi vulika ya ka hupithwe ngele oyu uvu etumwalaka lyUukwaniilwa e ta ye li taamba ko.—Mateus 22:37-39; 2 Aatessalonika 1:8.

Oshifo shika to lesha, oshi na etumwalaka lyOmbiimbeli ndyoka lya popiwa metetekelo. Opo wu mone uuyelele wa gwedhwa po, popya nOonzapo dhaJehova ngele dhe ya paandjeni ishewe, nenge wu nyolele kaanyanyangidhi yoshifo shika.

[Enyolo lyopevi]