Omolwashike Omuuvi gwomagalikano e etha okumona iihuna ku kale po?
AANTU yamwe nando ohaya galikana, otashi vulika hayi ipula ngele Kalunga oko ngaa e li. Omolwashike mbela? Otashi vulika omolwaashoka ye wete muuyuni mu udha okumona iihuna. Mbela owi ipula nale kutya omolwashike Kalunga e etha okumona iihuna ku kale po?
Sho aantu inaaya gwanenena nohaya mono iihuna, mbela Kalunga oye e ya shita ngaaka? Ando osha li osho, ando katu na siku tu simaneke kalunga ngoka a hala aantu ya kale taya mono iihuna. Ihe natu dhiladhile kwaashika: Natu tye ando oto tala ohauto ompe we yi hokwa, manga to ende to yi talatala owa mono kutya nani oye ehamekwa kusha, mbela oto ka dhiladhila kutya naku yi longa osho e yi longa ngawo? Hasho nando. Oto ka thika pehulithodhiladhilo kutya naku yi longa okwe yi longa “nawa” nonokutya oye ehamekwa owala kugumwe nenge koshinima shontumba.
Sha faathana, uuna tatu tala kelandulathano nokomutungilo omwaanawa gweshito noku li yelekanitha nevundakano nuulingilingi mboka wa yona onkalamwenyo yaantu, mbela oshi na oku tu dhiladhilitha ngiini? Ombiimbeli otayi ti kutya Kalunga okwa shiti aantu yotango ya gwanenena, ihe konima yethimbo oyi iyono yo yene. (Deuteronomium 32:4, 5) Onkundana ombwanawa oyo kutya Kalunga oku uvaneka okukutha po eyonuko ndyoka noku shunitha aantu aavuliki megwaneneno. Omolwashike e etha pu pite ethimbo ele ngawo?
Omolwashike Kalunga e etha pu pite ethimbo ele ngawo?
Omolwaashoka opu na omaipulo kutya olye e na okupangela aantu. Jehova ka li nando a hala aantu yi ipangele yo yene. Oye a li e na okukala Omupangeli gwawo. Ombiimbeli otayi ti: “Oondjila dhomuntu ihadhi kala momapangelo ge mwene nenge moonkondo dhomulumentu te ende, u uthe ando oonkatu dhe, e dhi fale kethikilo.” (Jeremia 10:23, OB-1954) Mupya munene, aantu yotango oya tokola okwaavulika kuunamapangelo waKalunga. Iilonga yawo yokuyona ompango oye ya ningi aalunde. (1 Johannes 3:4) Oshilanduliko, oya kala inaaya gwanenena we noyi iyono yo yene nosho wo oluvalo lwawo.
Jehova okwe etha aantu yi ipangele yo yene uule womimvo omayuvi, nondjokonona oyu ulika kutya aantu itaya vulu okwiipangela yo yene. Oyu ulike wo kutya omapangelo gopantu agehe otage etitha okumona iihuna. Kapu na nando olimwe lya hulitha po iita, omuyonena, okwaanuuyuuki nenge omikithi.
Kalunga ota ka kutha po ngiini eyonuko?
Ombiimbeli oyu uvaneka kutya Kalunga masiku ote ke eta uuyuni uupe moka tamu ka kala uuyuuki. (2 Petrus 3:13) Oomboka owala hayu ulukilathana ohole noye hole Kalunga taya ka pitikwa okukala mo.—Deuteronomium 30:15, 16, 19, 20.
Ombiimbeli otayi ti wo kutya ‘mesiku lyepangulo’ ndyoka tali hedha popepi neendelelo, Kalunga ota ka hulitha po okumona iihuna nosho wo mboka haye ku etitha. (2 Petrus 3:7) Konima yaashoka, Jesus Kristus, Omupangeli ngoka a langekwa po kuKalunga, ota ka pangela aantu aavuliki. (Daniel 7:13, 14) Epangelo lyaJesus otali ka tompola shike? Ombiimbeli otayi ti: “Aaifupipiki otaa ka thigulula evi notaa ka mona uulinawa nombili.”—Episalomi 37:11.
Jesus, Omukwaniilwa gwomegulu, ota ka kutha po eyonuko, omikithi, uukulupe neso, iinima mbyoka ye etithwa kaantu sho inaaya vulika kuJehova ngoka e li “oluthithiya lwomwenyo.” (Episalomi 36:9) Jesus ota ka aludha ayehe mboka ya taamba epangelo lye lyopahole. Omauvaneko gOmbiimbeli taga landula otaga ka gwanithwa kohi yepangelo lyaJesus:
◼ “Kape na nando ogumwe muSioni ta ka tya: ‘Otandi ehama.’ Omayonagulo gawo agehe otaga ka dhimwa po.”—Jesaja 33:24.
◼ “[Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hulu po.”—Ehololo 21:4.
Mbela itashi hekeleke okutseya kutya masiku Kalunga ota ka gwanitha euvaneko lye lyokuhulitha po okumona iihuna akuhe? Mokweendela ko kwethimbo, otatu ka kala tu na einekelo kutya Kalunga ohu uvu omagalikano getu, nonando okwe etha okumona iihuna ku kale po.
Kalunga oko e li. Oku ku uvite, nokulila kwoye omolwuuwehame nosho wo oluhodhi oku ku uvite. Okwa halelela okumona to nyanyukilwa onkalamwenyo pethimbo sho to ka kala waa na we omalimbililo nuuwehame washa.