Hedha popepi naKalunga

Ngele Kalunga okwe ku dhimine po, mbela oha dhimbwa?

PAUFUPI, otatu vulu okutya, eeno. Jehova oku uvanekele mboka a hokwa, a ti: “Otandi dhimi po omayono gawo, nuulunde wawo itandi u dhimbulukwa we.” (Jeremia 31:34) Onkee ano, Jehova ote tu shilipaleke kutya ngele okwa dhimine po omulunde ngoka i itedhulula ita ka dhimbulukwa we omayono ge. Ihe mbela shika otashi ti kutya Omushiti guuyuni awuhe oha nyengwa okudhimbulukwa omayono ngoka a dhima po? Oohapu dhaHesekiel otadhi tu kwathele tu uve ko nkene Kalunga ha dhimine po e ta dhimbwa.—Lesha Hesekiel 18:19-22.

Jehova okwa li a longitha Hesekiel e li omupopikalelipo gwe, a popye kombinga yepangulo ndyoka tali ka adha aantu muJuda naJerusalem mboka ya li kaaye shi we aadhiginini. Oshigwana ashihe osha li she etha po okulongela Jehova noshilongo osha li shu udha uukolokoshi. Jehova okwa li a hunganeke kutya Jerusalem otashi ka hanagulwa po kAababiloni. Ihe naasho a tseyitha epangulo ndyoka, okwa li a gandja etumwalaka lyetegameno. Kehe gumwe pauhandimwe okwa li e na okuninga etokolo nokwa li e na okukalela po iilonga ye.—Ovelise 19, 20.

Ihe ongiini ngele gumwe okwe etha po okulonga uuwinayi e ta longo uuwanawa? Jehova okwa popi a ti: “Omukeenakalunga ngele ote etha uulunde we e ta dhiginine iipango yandje, ngele ota longo shoka shu uka nosho opala, ita ka sa; ota kala e na omwenyo.” (Ovelise 21) Eeno, Jehova okwi ilongekidha ‘okudhimina po’ omulunde ngoka e etha iilonga ye yonale notu ulike shili kutya okwiitedhulula.—Episalomi 86:5.

Ongiini kombinga yuulunde mboka a longa? Jehova ota ti: “Omayono agehe ngoka a yona, itaga ka dhimbulukiwa we.” (Ovelise 22, NW) Ndhindhilika kutya omayono gaangoka i itedhulula “itaga ka dhimbulukiwa we.” Omolwashike shino sha simana?

Oshitya shOshihebeli shoka sha tolokwa mOmbiimbeli “dhimbulukwa” itashi ti owala okudhimbulukwa onakuziwa. Embo limwe lyomauyelele olya popi kombinga yoshitya shika lya ti: “Olundji, ohashi ulike kiilonga tayi longwa nenge to adha sha longithwa pamwe niityalonga.” Onkee ano, “okudhimbulukwa” otashi vulu okutolokwa “okukatuka onkatu.” Ano uuna Jehova ta lombwele omuyoni ngoka i itedhulula kutya omayono ge “itaga ka dhimbulukiwa we,” ota ti kutya ita ka katukila omuntu ngoka onkatu omolwoondjo dhe opo ando e mu geele.a

Oohapu dhaHesekiel 18:21, 22 otadhi tu ulukile momukalo tagu inyengitha omutima kutya Kalunga oha dhimine po thiluthilu. Uuna Jehova e tu dhimina po, ke na esiku e ke tu geele monakuyiwa omolwomayono ngoka. Pehala lyaashono, ohu umbile konima ye omayono gomuntu ngoka i itedhulula. (Jesaja 38:17) Oha dhimi po oondjo adhihe ndhoka twa yona.—Iilonga 3:19.

Tu li aantu inaatu gwanenena, otwa pumbwa esilohenda lyaKalunga, molwaashoka ohatu yono olundji. (Aaroma 3:23) Ihe Jehova okwa hala tu kale tu shi kutya ngele otwi itedhulula tashi zi komutima, ote ke tu dhimina po. Nongele okwe tu dhimine po, oha dhimbwa, ano tu tye, ke na esiku a ka kongolole omayono getu gonale opo ando e tu geele. Shoka itashi hekeleke tuu! Mbela ohenda yaKalunga itayi ku inyengitha wu kale wa hala okuhedha popepyeelela naye?

[Enyolo lyopevi]