“Itandi mbandama”

“Nonando aatondi yandje ya matukile ndje, natango otandi inekele Kalunga.”—EPS. 27:3.

OOVELISE TADHI LANDULA OTADHI VULU OKU KU KWATHELA NGIINI WU KALE OMULAADHI?

Episalomi 27:1

Episalomi 27:4

Episalomi 27:11

1. Episalomi 27 otali tu kwathele tu uve ko shike?

OMOLWASHIKE iilonga yetu yokuuvitha tayi humu komeho, nonando onkalo yuuyuni otayi ende tayi nayipala? Omolwashike hatu longitha ethimbo lyetu noonkondo dhetu muukalele, nonando uuhupilo muuyuni otawu ende tawu shongola? Oshike hashi tu kwathele tu kale aalaadhi, omanga aantu oyendji ya tila onakuyiwa? Oohapu dha nwethwa mo dhi li meimbilo lyomukwaniilwa David mEpisalomi 27 otadhi gandja omayamukulo.

2. Uutile ohawu ningitha omuntu shike, ihe otu na einekelo lini?

² David okwa tameke Episalomi 27 noohapu tadhi ti: “OMUWA oye uuyelele nomuhupithi gwandje; itandi tila nando olye. OMUWA ota gamene ndje kiiponga ayihe; itandi mbandama.” (Eps. 27:1) Nonando uutile ohawu vulu okuningitha omuntu a kale itaa vulu sha, uumbanda owa nika oshiponga noonkondo. Omuntu ngoka ha tila Jehova, iha mbandapalekwa kiinima mbyoka tayi mu piyaganeke. (1 Pet. 3:14) Ngele otwi inekela mehupitho lyaJehova, otatu ka ‘kala twa gamenwa, niihuna yiiponga itayi tu adha.’ (Omayel. 1:33; 3:25) Ngiini mbela?

“OMUWA OYE UUYELELE NOMUHUPITHI GWANDJE”

3. Omeityo lini Jehova e li uuyelele wetu, ihe otu na okuninga shike?

³ Omupopyofano “OMUWA oye uuyelele” otagu tu kwathele tu mone kutya Jehova ohe tu longo, molwaashoka ina hala tu kale kaatu shi sha notu li momilema dhopambepo. (Eps. 27:1) Uuyelele ohawu tu kwathele tu mone iiponga nenge omandangalati ngoka ge li mondjila, ihe ihawu ga kutha mo. Otu na okukala twa kotoka uuna tu wete iiyimbi mondjila yetu. Jehova ohe tu kwathele tu mone kutya iinima mbyoka tayi ningwa muuyuni otayi ti shike. Ohe tu londodha kaatu gwile miiponga. Okwe tu pa omayele omawanawa taga adhika mOmbiimbeli. Ihe opo ge tu kwathele, otu na oku ga tula miilonga. Uuna tatu shi ningi, otatu ka kala tu na uunongo wu vule waatondi yetu nenge waanongeki yetu.—Eps. 119:98, 99, 130.

4. (a) Omolwashike David a li a popi neinekelo kutya ‘OMUWA oye omuhupithi gwe’? (b) Uunake unene tuu Jehova ta ka hupitha aapiya ye?

⁴ Oohapu dhaDavid ndhoka dhi li mEpisalomi 27:1 otadhi ulike kutya David ina dhimbwa nando nkene Jehova a li e mu hupitha. Pashiholelwa, Jehova okwa li e mu hupitha “koonkoshi nokomamwanka.” Jehova okwe mu kwathele wo a sinde omutongolume Goliat. Konima yethimbo, omukwaniilwa Saul okwa li a kambadhala okwaalela David kekuma negonga. Ihe iikando ayihe Jehova okwa li a hupitha David. (1 Sam. 17:37, 49, 50; 18:11, 12; 19:10) Shoka osha ningitha David a popye neinekelo ta ti: ‘OMUWA oye omuhupithi gwandje.’ Jehova ota ka hupitha wo aapiya ye yokunena, ngaashi owala a li a hupitha omupiya gwe David. Ote ke shi ninga uunake? Oosho ta ka hupitha aapiya ye ya pite ‘muudhigu uunene.’—Eh. 7:14, NW; 2 Pet. 2:9.

DHIMBULUKWA OSHIKANDO KEHE JEHOVA E KU KWATHELA

5, 6. (a) Okudhimbulukwa iinima mbyoka Jehova e tu ningila otashi ke tu kwathela ngiini tu kale aalaadhi? (b) Omukalo moka Jehova a kala nokukwathela oshigwana she otagu tu ladhipike ngiini?

⁵ Lesha Episalomi 27:2, 3. Oohapu ndhoka otadhi tu kwathele tu kale aalaadhi. David okwa li a dhimbulukwa iikando ayihe mbyoka a pondola kekwatho lyaJehova. (1 Sam. 17:34-37) Shoka osha li she mu kwathele a kale a nyatipala nokutaalela uupyakadhi kehe. Mbela nangoye oho dhimbulukwa ngaa nkene Jehova e ku kwathela monkalamwenyo yoye? Mbela esiku limwe sho wa li muudhigu, owa li wa galikana e to mono nkene Jehova e ku pe uunongo nenge oonkondo wi idhidhimikile omamakelo? Mbela oto dhimbulukwa nkene Jehova a li a kandula po omandangalati mondjila yoye ngoka ga li tage ku imbi wu ye miilonga ye nenge nkene a li e ku pe ompito okulonga oshilonga she oshinene nosha simana? (1 Kor. 16:9) Oho kala wu uvite ngiini uuna to dhiladhila oompito ndhoka? Mbela owa tompwa wi itaale kutya Jehova ota vulu oku ku kwathela wu sinde nenge wu taaguluke omandangalati nosho wo omaudhigu omanene?—Rom. 5:3-5.

⁶ Otatu ka ninga po shike ngele otu uvu kutya epangelo enankondo otali ningi oompangela li hulithe po ehangano lyOonzapo dhaJehova? Aantu oyendji kunena oya kala taya yelekele oku shi ninga, ihe ihaya pondola. Uuna tatu dhimbulukwa nkene Jehova a li a kwathele oshigwana she shonale, otashi ke tu ladhipika tu idhidhimikile shoka tashi ka ningwa monakuyiwa.—Dan. 3:28.

NATU KALE TU NA OLUPANDU LWELONGELOKALUNGA LYASHILI

7, 8. (a) MEpisalomi 27:4, David okwa li a pula Jehova shike? (b) Otempeli onene yopambepo yaJehova oshike, nongiini tatu vulu oku mu longela mo?

⁷ Osha simana tu kale tu hole elongelokalunga lyashili, molwaashoka otashi ke tu kwathela tu kale aalaadhi. (Lesha Episalomi 27:4.) Pethimbo lyaDavid ‘ongulu yOMUWA’ oya li etsalihangano. David oye a li a longekidha iikwaniipangitho, opo omwanamati Salomo a tungile Jehova otempeli ombwanawa. Jesus okwa yelitha konima yomimvo omathele kutya ethimbo otali ke ya uuna aantu itaaya ka ya we kotempeli ya ka galikane Jehova. (Joh. 4:21-23) Omuyapostoli Paulus okwa popya mAahebeli ontopolwa 8 sigo 10 kutya otempeli onene yopambepo oya yi miilonga sho Jesus a ninginithwa mo 29 E.N., sho i igandja ye mwene e li eyambo a longe ehalo lyaJehova. (Heb. 10:10) Otempeli ndjoka onene yopambepo oya li elongekidho lyaJehova, opo mboka yi itaala mekuliloyambo lyaJesus ya vule okugalikana Kalunga ya manguluka. Ongiini tatu vulu oku mu longela motempeli moka? Omokugalikana kuye ‘noomwenyo dha yela tu na einekelo lya kola.’ Omokuhempulula nomukumo etegameno lyetu. Omokusilathana oshimpwiyu nomokukwathelathana. Omokukumagidhathana uuna tu li pokugongala kwegongalo nosho wo pethimbo lyelongelokalunga lyuukwanegumbo. (Heb. 10:22-25) Iinima mbyoka otayi ke tu tsa omukumo sho tu li momasiku ngaka omadhigu gahugunina.

⁸ Aapiya yaJehova aadhiginini muuyuni auhe ohaya longitha ethimbo lyawo olindji muukalele, yamwe ohayi ilongo omalaka omakwiilongo nohaya tembukile komahala hoka ku na ompumbwe onene yaauvithi yUukwaniilwa. Mokuninga ngaaka, ohayu ulike kutya oye na iikala ya fa yomupisalomi ngoka a li a pula Jehova oshinima shimwe. Ohaya kala ya hala okumona uuwanawa waJehova nokukutha ombinga miilonga ye iiyapuki kutya nduno otashi pula shike.—Lesha Episalomi 27:6.

INEKELA MEKWATHO LYAKALUNGA

9, 10. Episalomi 27:10 olye tu uvanekela shike?

⁹ David okwa li u ulike kutya okwi inekela lela mekwatho lyaJehova sho a ti: “Tate nameme otaa vulu okweetha ndje, ihe OMUWA ota sile ndje oshimpwiyu.” (Eps. 27:10) Oohapu ndhoka dhi li muSamuel gwotango ontopolwa 22 otadhi tu kwathele tu thike pehulithodhiladhilo kutya aavali yaDavid otashi vulika ya li inaaye mu ekelahi. Kunena, opu na aantu oyendji mboka ye ekelwahi kuyaandjawo. Ihe oyendji mboka ye shi ningilwa oya mona ekwatho negameno megongalo lyopaKriste.

¹⁰ Jehova oha ambidhidha aapiya ye ngele yalwe ye ya ekelahi. Ota ka nyengwa ngaa mbela oku ya kwatha ngele taya makelwa kusha? Pashiholelwa, ngele otatu ipula nkene tu na okusila oshimpwiyu omagumbo getu, mbela katu na okukala twa tompwa kutya Jehova ote ke tu kwathela? (Heb. 13:5, 6) Oku shi oonkalo noompumbwe dhaapiya ye ayehe aadhiginini.

11. Ngele otwi inekela muJehova, otashi ka guma yalwe ngiini? Gandja oshiholelwa.

¹¹ MeeVictoria, ngoka ha kala moLiberia okwa li a tameke okukonakona Ombiimbeli. Ihe sho e li pokuningithwa, omulumentu ngoka a li pamwe naye okwe mu thigi po. Okwe mu thigile wo aanona yawo yatatu. MeeVictoria ka li e na egumbo nosho wo iilonga, ihe okwa tsikile nokuninga ehumokomeho pambepo. Konima sho a ninginithwa, okamwanakadhona komimvo 13 oka toola ondjato yu udha iimaliwa. Opo kaaya makelwe, oya tokola kutya itaya ka yalula iimaliwa mbyoka yi li mo. Oya li ya ningi ekwatathano nziya namwene gwondjato ndjoka, ngoka a li omukwiita. Omulumentu ngoka okwe ya lombwele a ti kutya andola aantu ayehe oya li aanashili ya fa Oonzapo dhaJehova, ando uuyuni auhe otawu ka kala nawa nowu na ombili. MeeVictoria okwa li u ulukile omukwiita ngoka mOmbiimbeli kutya Jehova oku uvaneka uuyuni uupe. Omukwiita okwa li e mu kuminwa lela nokwe mu pe iimaliwa oyindji omolwuunashili we. MeeVictoria noyana oyi inekela thiluthilu kutya Jehova ote ke ya kwathela sho taya simanekitha edhina lye mokukala aanashili.

12. Omolwashike tu na okutsikila okulongela Jehova, nonando otu kanithe iilonga nenge kiimaliwa mbyoka twa longela inatu pewa ko sha? Gandja oshiholelwa.

¹² Natu taleni koshiholelwa shaThomas, omuuvithi inaa ninginithwa gwomuSierra Leone. Okwa li a mono iilonga yuulongi moseko. Ihe okwa kala inaa futwa konyala uule womvula ayihe. Mbela Tomas okwa li e na okuninga shike, opo a pewe iimaliwa ye? Okwa li e na oku ka pulwapulwa komutonatelisikola ngoka e li omusita. Omusita okwa li e mu lombwele kutya eitaalo moka e li inali pitikilwa mo mosikola moka. Okwa li a thiminike Thomas a hogolole kutya pokati kiilonga neitaalo lye na kuthe po shimwe. Thomas okwa li a thigi po iilonga mbyoka, nonando kiimaliwa mbyoka a longela ina pewa ko sha. Okwa mono po iilonga yokupangela ooradio noongodhi dhopeke. Oshiholelwa shika nosho wo yilwe ye shi fa, otayi tu ulukile kutya ngele otwi inekela muJehova inatu pumbwa okukala twa tila kombinga yoompumbwe dhetu, molwaashoka oye Omushiti gwiinima ayihe nOmugameni gwetu.

13. Iilonga yokuuvitha Uukwaniilwa otayi humu ngiini komeho, miilongo moka aantu ye li moonkalo oondhigu?

¹³ Aamwatate miilongo oyindji moka mu na oonkalo oondhigu, olundji ohaya kala yi ipyakidhila nokuuvitha Uukwaniilwa. Omolwashike shi li ngawo? Oshitayimbelewa shimwe osha nyola sha ti: “Aantu oyendji mboka haya taamba ko ekonakonombiimbeli ihaya longo nolundji ohaya kala ye na ethimbo lyokukonakona momukokomoko gwesiku. Aamwatate nayo oye na ethimbo olindji lyokuuvitha. Aantu oyendji miitopolwa mbyoka ya dhengwa ya lila koluhepo oye shi wete kutya oye li momasiku gahugunina, molwaashoka oye wete oonkalo oombwinayi ndhoka dhe ya dhingilila.” Omutumwa ngoka a longa omimvo dha konda po 12 moshilongo shimwe moka omuuvithi kehe e na aakonakoni ye li yatatu lwaampono okwa nyola a ti: “Molwaashoka aauvithi oyendji oye na onkalamwenyo yanathangwa, kapu na naanaa shoka hashi ya imbi, nolundji oye na ethimbo olindji okuya muukalele womomapya nolyokuninga omakonakonombiimbeli.”

14. Omomikalo dhini Kalunga ta ka gamena ongundu onene?

¹⁴ Jehova oku uvaneka okukwathela, okugamena nokuhupitha oshigwana she shi li ongundu, palutu nopambepo, notwi inekela kutya ote ke shi ninga. (Eps. 37:28; 91:1-3) Opu na ongundu ndjoka tayi ka hupa “muudhigu uunene.” (Eh. 7:9, 14, NW) Kalunga ota ka gamena ongundu onene, ite ke etha nando oshigwana she shi hanagulwe po pomasiku gahugunina. Ote ke shi pa ekwatho kehe ndyoka sha pumbwa shi idhidhimikile omamakelo noshi kaleke po ekwatathano lyasho naye. Ote ke shi hupitha muudhigu uunene.

“OMUWA, LONGA NDJE OKULANDULA EHALO LYOYE”

15, 16. Uuwanawa wuni hawu zi mokuvulika kuKalunga? Gandja oshiholelwa.

¹⁵ Opo tu kale aalaadhi, otwa pumbwa okukala hatu longwa aluhe kuKalunga. David okwa galikana a ti: “OMUWA, longa ndje okulandula ehalo lyoye, enditha ndje nondjila yaa na iiponga, oshoka ondi na aatondi oyendji.” (Eps. 27:11) Ngele otwa hala okukala metsokumwe negalikano ndyoka, otu na okupulakena komalombwelo ngoka haga zi kehangano lyaJehova noku ga tula miilonga. Oyendji mboka ya ninga onkalamwenyo yawo yanathangwa oshe ya kwathela pethimbo ndika lyuuhupilo tawu shongola sho inaayi indumbila oongunga dhiinima inaayi pumbiwa. Oya manguluka okutamununa mo uukalele wawo, molwaashoka inayi itsika omitenge ndhoka itaaya vulu dhiinima yopamaliko. Kehe gumwe gwomutse ni ipule ta ti: ‘Ohandi tula ngaa nziya miilonga shoka tandi lesha mOmbiimbeli nomiileshomwa yomupiya omudhiginini nomunandunge, nonando otashi pula ndi ninge omaiyambo?’—Mat. 24:45.

¹⁶ Ngele otwe etha Jehova e tu longe noku tu wilike tu ende mondjila yu uka, itatu ka tila sha. Omukokolindjila gwondjigilile gumwe muAmerika okwa li a ningi eindilo lyiilonga mbyoka tayi vulu oku ya kwathela nomukadhi ya ye miilonga yethimbo lyu udha. Omutonateli gwe miilonga okwa li e mu lombwele kutya iilonga mbyoka ke na siku e yi mone ngele ke na onzapo yo-degree. Andola okwa li ongoye, mbela ando owa kala twi ipe ombedhi sho wu li miilonga yethimbo lyu udha nokuu na elongo lyopombanda? Konima yiiwike iyali, omutonateli gwiilonga ngoka okwa li a kuthwa miilonga. Pehala lye opwa kutilwa omutonateli gulwe ngoka a li a pula omumwatate kutya elalakano lye olyashike. Omumwatate okwe mu lombwele kutya ye nomukadhi oya li aakalele yethimbo lyu udha noya hala ishewe okushuna mo. Manga omumwatate inaa tsikila ko, omuwiliki gwiilonga ngoka okwa ti: “Onda mona kutya ne omwi ili. Sho tate a li moombete te ehamenene, opwa li aantu yaali yeitaalo lyeni mboka ya li haye ya kuye esiku kehe nokulesha Ombiimbeli naye. Ondu uvaneka kutya ngele onda mono ompito yokukwathela gumwe gwomOonzapo dhaJehova, otandi ke shi ninga.” Ongula yesiku lya landula omumwatate okwa li a pewa iilonga mbyoka a li a tindilwa komutonateli ngoka a kuthwa miilonga. Osha yela kutya ngele otatu pititha iinima yUukwaniilwa komeho, Jehova ote ke tu sila oshimpwiyu palutu.—Mat. 6:33.

EITAALO NETEGAMENO OYA SIMANENENA

17. Oshike tashi tu kwathele tu taalele onakuyiwa tu na omukumo?

¹⁷ David okwa popi nkene eitaalo netegameno lya simana sho a ti: “Ondi shi shi kutya otandi ka kala ndi na omwenyo nokumona uuwanawa wOMUWA mokukalamwenyo huka kwongashingeyi.” (Eps. 27:13) Onkalamwenyo yetu andola oya fa peni, ando Kalunga ke tu pele etegameno nokatwa li tu shi iinima mbyoka ya popiwa mEpisalomi 27? Natu tsikileni okugalikana Jehova e tu pe oonkondo noku tu hupithe miiningwanima mbyoka tayi fala sigo opuArmagedon.—Lesha Episalomi 27:14.

[Ethano pepandja 23]

David okwa li a nyatipala sho a dhimbulukwa nkene Jehova e mu hupitha

[Ethano pepandja 25]

Omolwashike twa pumbwa okutamununa mo uukalele wetu, nonando uuhupilo otawu ende tawu shongola?