Olukeno nenge ohenda oyo uukwatya wa simana momeho gaKalunga
OMUGUNDJUKA gumwe moJapani okwa li i inyengithwa kohenda yomulumentu gumwe omukokele. Omulumentu nguka gwomutumwa ina adhika a ninga mo omimvo odhindji moshilongo shika shaAsia noka li ha popi nawa elaka lyOshijapani. Nonando ongaaka, okwa li ha ka kundathana Ombiimbeli nomugundjuka nguka oshiwike kehe pegumbo lye. Okwa li ha yamukula omapulo ogendjigendji ngoka omugundjuka a li ha pula, te shi ningi neidhidhimiko noti imemeha nombili.
Olukeno nenge ohenda yomukokele nguka omutumwa, oya li ya ningitha omugundjuka nguka kaa dhimbwe eihumbato lyomutumwa. Omugundjuka okwa li ha dhiladhila ta ti: ‘Ngele Ombiimbeli oyo ya ningitha omulumentu nguka a kale e na ohenda noku na ohole, nangaye ondi na oku yi ilonga.’ Shika oshe mu ningitha a mone kutya osha pumbiwa a konakone oshinima shoka oshipe kuye. Eeno, olundji olukeno nenge ohenda ohayi gumu omutima gwomuntu yi vulithe oohapu.
Uukwatya mboka tawu ulike kutya otu li oshifetha shaKalunga
Oshi li paunshitwe okukala tu na olukeno nenge ohenda naamboka ye tu pamba. Ihe olukeno nenge ohenda oyo uukwatya wopaKalunga. Jesus okwa ti kutya He gwomegulu ke na owala olukeno nenge ohenda naamboka ye mu hole, ihe onaamboka wo “ihaa pandula.” Jesus okwa li a ladhipike aalanduli ye ya holele Kalunga moshinima shika a ti: “Kaleni ano mwa gwana mwa pwa, ngaashi Ho yeni yomegulu a gwana a pwa.”—Lukas 6:35; Mateus 5:48; Eksodus 34:6.
Aantu oya shitwa oshifetha shaKalunga nohaya vulu okuholela nenge okuulika uukwatya wohenda nolukeno. (Genesis 1:27) Eeno, otatu vulu okuholela Kalunga nokwiilonga tu kale tu na olukeno nenge ohenda nokuli nonaantu mboka inaaye tu pamba. Ombiimbeli otayi popi kutya olukeno nohenda oshitopolwa shiiyimati yombepo yaKalunga, ano tu tye, oonkondo dhe tadhi longo. (Aagalati 5:22, NW) Otayi vulu okwiimikwa nokukokekwa ngele omuntu okwi ilongo oshindji kombinga yaKalunga, Omushiti, e ta hedha popepi naye.
Molwaashoka ohenda nenge olukeno kayi shi owala uukwatya mboka omuntu a shitwa nawo, ihe oyi li wo uukwatya wa lengwa kuKalunga, ano oshi li pandunge sho Kalunga te tu lombwele kutya natu ‘kalathane nolukeno.’ (Aaefeso 4:32) Otatu dhimbulukithwa wo taku ti: “Inamu dhimbwa okutaamba aayenda,” nenge okuulukila olukeno nenge ohenda mboka kaatu shi.—Aahebeli 13:2.
Muuyuni mbuka wokunena moka aantu kaaye na nando ohenda nenge olukeno yo ihaya pandula, mbela otashi wapa ngaa tu ulukile yalwe ohenda nenge olukeno, nokuli naamboka kaatu shi? Oshike tashi ke tu kwathela tu ninge ngawo? Omolwashike tu na okukala tu na ko nasha nasho nokuli?
Ohenda nenge olukeno olwa simana momeho gaKalunga
Oshindhindhilikwedhi osho kutya sho omuyapostoli Paulus a popi kombinga yokuulukila ohenda nenge olukeno mboka kaatu shi, okwa gwedha ko ngeyi: “Okwa li ku na mboka ye shi ningi e taa taamba aayengeli inaaye shi tseya.” Dhiladhila owala nkene to ka kala wu uvite ngele owa pewa ompito yokuyakula aayengeli. Ihe Paulus okwa li a popi uutumbulilo “inaaye shi tseya.” Paulus okwa li a hala okutya, ngele otwa kala tu na omukalondjigilile gwokuulukila aantu ohenda nenge olukeno nonando katu ya shi, otatu ka pewa ondjambi inaatu shi tegelela.
Oombiimbeli odhindji ndhoka dhu ulika oovelise dha pambathana odha kwatakanitha oohapu dhaPaulus nehokololo lyaAbraham naLot muGenesis ontopolwa 18 nosho wo 19. Momahokololo agehe otatu lesha mo kombinga yaayengeli mboka ye ya holokele netumwalaka lya simana. Abraham okwa li u uvanekelwa kutya ota ka pewa okanona okamati, naLot okwa li u uvanekelwa kutya ota ka hupithwa mehanagulo lyoshilando shaSodom naGomorra ndyoka lya li pokuningwa.—Genesis 18:1-10; 19:1-3, 15-17.
Ngele owa lesha omanyolo ngoka ge li pombanda, oto ka mona kutya Abraham naLot oyu ulike ohenda nenge olukeno kaaendanandjila mboka kaaye shi. Odhoshili kutya okuyakula aayenda nenge aayendanandjila pethimbo lyOmbiimbeli, kutya nduno ookuume, aashiwikile nenge aakwiilongo, osha li omuthigululwakalo noshinakugwanithwa shomunegumbo kehe. Nokuli osha li oshitegelelwa shomOmpango yaMoses kutya Omuisraeli kehe oku na okusila oshimpwiyu oompumbwe dhaakwiilongo mboka ye li moshilongo shawo. (Deuteronomium 10:17-19) Nonando ongawo, osha yela kutya Abraham naLot oya li ya longo shi vulithe pwaashoka sha li sha pulwa kompango. Oya li ya ningi oonkambadhala dha mana mo yu ulike ohenda nenge olukeno kaantu mboka kaaye shi, noya li ya yambekwa omolwoshinima shoka.
Molwaashoka Abraham okwa li u ulike ohenda nenge olukeno, kasha li owala she mu etele omalaleko nuuyamba sho a pewa okanona okamati, ihe oshe tu etela wo omalaleko nuuyamba. Ngiini mbela? Abraham nosho wo omwana Isak, oya dhana onkandangala ya simanenena megwanitho lyelalakano lyaKalunga. Oye li oongudhi dhezimo moka mwa za Mesiasa, ano tu tye Jesus. Okuvulika kwawo okwa li ku ulike nkene aantu taya vulu okuhupithwa owala omolwohole yaKalunga nomolwohenda ye.—Genesis 22:1-18; Mateus 1:1, 2; Johannes 3:16.
Omahokololo ngaka otage tu ulukile kutya Kalunga okwa lenga ohenda nenge olukeno shi thike peni notashi tu ulukile wo shoka a tegelela aantu mboka a hokwa ya ninge. Moshinima shika Kalunga ine tu pa ehogololo kutya otatu ka ulika ohenda nenge olukeno nenge hasho, pehala lyaashono okwa tegelela tu shi ninge.
Okuulika ohenda nenge olukeno ohaku tu kwathele tu tseye nawa Kalunga
Ombiimbeli otayi popi kutya pethimbo lyetu aantu otaya ka kala ‘ihaa pandula, aakaanuudhiginini nokaaye na ohole yopaunshitwe.’ (2 Timoteus 3:1-3, Yelekanitha NW.) Kapu na omalimbililo kutya aantu ya tya ngawo oho ya tsakaneke esiku kehe. Ihe shika kashi na oku tu ningitha kaatu ulukile yalwe ohenda nenge olukeno. Aakriste otaya lombwelwa ngeyi: “Ngele ku na ngoka te mú ningile uuwinayi, inamu mu shunithila uuwinayi. Kambadhaleni okuninga shoka aantu ayehe taye shi tala kutya oshiwanawa.”—Aaroma 12:17.
Otatu vulu okuninga oonkambadhala dha mana mo tu ulukile yalwe ohenda nenge olukeno nomutima aguhe. Ombiimbeli otayi ti: ‘Kehe ngoka e na ohole, oye okwa tseya Kalunga,’ nomukalo gumwe moka tatu vulu okuulika ohole omokuulukila yalwe ohenda nenge olukeno. (1 Johannes 4:7; 1 Aakorinto 13:4) Ano, ngele ohatu ulukile aantu ooyakwetu ohenda nenge olukeno, otatu ka tseya nawa Kalunga, naashoka otashi ka gwedha ko kenyanyu lyetu. MEuvitho lye lyokOndundu, Jesus okwa ti: “Aanelago aanamutimahenda, oshoka oyo taa ka silwa ohenda. Aanelago oomboka ya yela moomwenyo dhawo, oshoka oyo taa ka mona Kalunga.”—Mateus 5:7, 8.
Natu tale koshiholelwa shaAki, omukiintu omugundjuka gwokoJapani ngoka e na aanona yaali aamati. Konima sho meme gwe a hulitha, okwa li a polimana noonkondo. Omathimbo gamwe okwa li e na oku ka mona ndohotola. Pethimbo opo tuu mpoka, puushiinda she opwa tembukile aanegumbo yontumba. Aanegumbo mbaka oya adhika opo ya silwa he moshiponga, nomukulukadhi okwa thigwa po naanona aashona yatano. Aki okwa li shili e ya etela ohenda nokwa ningi oonkambadhala a pange uukuume nayo. Okwa li ha ningi kehe shoka ta vulu oku ya kwathela, ngaashi oku ya pa iikulya, iikutu mbyoka yaandjawo itaaya gwana mo we nosho tuu, naashika oshe mu kwathele a shunithe ishewe omadhiladhilo ge pehala. Okwa li a mono kutya “okugandja oku na elago ku vule okutaamba,” ngaashi Ombiimbeli tayi ti. (Iilonga 20:35) Eeno, okuulukila yalwe ohenda nenge olukeno otashi vulu oku tu kwathela uuna twa polimana.
“Pungula KOMUWA”
Ino pumbwa okulongitha oshimaliwa oshindji wu ulukile yalwe ohenda nenge olukeno. Sho inashi ikolelela kuunkulungu woye nenge koonkondo dhoye. Oto vulu okuulika ohenda nenge olukeno mokwiimemeha, mokupopya oohapu oombwanawa, mokugandja ekwatho lyontumba, omagano omashona ga dhiladhilwa nawa nenge mokweetha omuntu a ye tango ngele omu li momukweyo. Ngele owu li monkalo moka wa nyengwa kutya tya ngiini nenge ninga ngiini, kambadhala okuulika ohenda nenge olukeno. Omulumentu omugundjuka ngoka a popiwa petameko lyoshitopolwa shika okwa li a gumwa kohenda ndjoka omutumwa a li e mu ulukile shi vulithe koohapu ndhoka a li a popi. Ngashingeyi otu wete kutya omolwashike Kalunga a tegelela mboka haye mu longele ya kale ye ‘hole okuulika ohenda.’—Mika 6:8, NW.
Ohenda nenge olukeno otalu vulu okweeta oshizemo oshiwanawa. Ngele olu ulikwa neinyengotompelo lyomondjila, nuunene tuu ngele omuntu ngoka te lu ulike oku hole Kalunga, otalu ka nyanyudha omitima dhaayehe mboka ya kwatelwa mo. Nonando ohenda nenge olukeno lwoye inalu pandulwa itashi ti kutya owi ihepeka. Kalunga okwe ku hokwa. Ombiimbeli otayi tu shilipaleke kutya ngele ohenda nenge olukeno otalu ulikwa neinyengotompelo lyomondjila, nena omuntu ngoka te shi ningi ota “pungula kOMUWA.” (Omayeletumbulo 19:17) Omolwashike itoo kambadhala okukonga ompito wu ulukile yalwe ohenda nenge olukeno?
[Oohapu dha simana pepandja 20]
Ngele owu li monkalo moka wa nyengwa kutya tya ngiini nenge ninga ngiini, kambadhala okuulika ohenda nenge olukeno
[Ethano pepandja 19]
Molwaashoka Abraham okwa li u ulike ohenda nenge olukeno okwa li a lalekwa nuuyamba
[Ethano pepandja 20]
Omuntu ngoka tu ulukile yalwe ohenda nenge olukeno okwa fa ta “pungula kOMUWA”