Ino Etha Nando Osha Shi Ku Fale Kokule NaJehova

1-3. (a) Omolwashike Josua e li oshiholelwa oshiwanawa shagumwe ngoka a li a ningi ehogololo li li mondjila monkalamwenyo ye? (b) Oshike tu na okukaleka momadhiladhilo uuna tatu ningi omatokolo?

OSHITYA ‘hogolola’ oshi na oonkondo. Omuntu ngoka e na okuninga ehogololo oha kala e na ompito kutya ota kutha po shike noha kala e na emanguluko lyokuhogolola shoka a hala okulandula monkalamwenyo ye. Oku shi thaneka: Kala andola wa fa wu wete omulumentu te ende mondjila, ihe opo ngaa e li po oondjila dha ningi mbali. Oyini ta ka ya nayo? Ngele omulumentu ngoka oku shi uuthikilo we, nena opu na okukala ondjila yimwe ndjoka tayi mu fala popepi nehala mpoka u uka, omanga onkwawo tayi mu fala kokule nehala hoka ta yi.

² MOmbiimbeli omu na iiholelwa oyindji yaantu mboka ya li monkalo ya fa ndjoka. Pashiholelwa, Kain okwa li e na okutokola ngele ota kala a geya nenge ota ka pangela ongeyo ye. (Gen. 4:6, 7) Josua okwa li e na okuhogolola pokati kokulongela Kalunga kashili niikalunga. (Jos. 24:15) Elalakano lyaJosua olya li okukala popepi naJehova, onkee ano, okwa li a hogolola ondjila ndjoka tayi mu fala popepi naYe. Kain ka li e na elalakano lya tya ngaaka. Okwa li a hogolola ondjila ndjoka ye mu fala kokule naJehova.

³ Omathimbo gamwe ohashi vulika tu na okutokola kutya pokati koondjila mbali oyinipo tatu ka landula. Ngele owi iyadha monkalo ya tya ngaaka, kala wu shi uuthikilo woye nenge elalakano lyoye, opo wu simanekithe Jehova mwaashihe shoka to ningi nowu henuke kehe shimwe shoka tashi vulu oku ku fala kokule naye. (Lesha Aahebeli 3:12.) Moshitopolwa shika nosho wo mwaashoka tashi landula ko, otatu ka konakona iinima iheyali yomonkalamwenyo mbyoka tu na okukala twa kotokela opo kaayi tu fale kokule naJehova.

IILONGA NOSHO WO OMAITHANO

4. Omolwashike sha simana tu kale hatu longo?

⁴ Aakriste oye na oshinakugwanithwa shokwiiyambidhidha yo yene nosho wo iilyo yomaukwanegumbo gawo. Ombiimbeli otayi ulike kutya ngele omuntu ina hala okusila oshimpwiyu aanegumbo lye, oye omwiinayi e vulike komupagani. (2 Tes. 3:10; 1 Tim. 5:8) Ano osha yela kutya, iilonga yokwiikongela omboloto oshinima sha simana monkalamwenyo, ihe ngele ino kotoka, iilonga nosho wo omaithano otayi ke ku fala kokule naJehova. Ngiini mbela?

5. Iinima ya simana yini tu na okutala kuyo uuna tatu kongo iilonga?

⁵ Natu tye nduno oto kongo iilonga. Ngele owu li moshilongo moka iilonga ya pumba, otashi vulika wu ka longe iilonga yoludhi kehe mbyoka to mono. Ihe ongiini mbela, ngele iilonga mbyoka kayi li metsokumwe nomakotampango gOmbiimbeli? Ongiini ngele iilonga mbyoka otayi ka kata iilonga yoye yopaKriste nenge tayi ku imbi wu kale pamwe naanegumbo lyoye? Mbela oto ka zimina wu longe iilonga mbyoka, molwaashoka owu wete kutya okukala niilonga itaayi opalele oshi vulithe kuu na sha? Kala wu shi shi kutya okuhogolola ondjila ya puka otashi vulika shi ku fale kokule naJehova. (Heb. 2:1) Kutya nduno oto kongo iilonga nenge owa hala iilonga yilwe, ongiini to vulu okuninga ehogololo lyopandunge?

6, 7. (a) Omuntu sho ta longo otashi vulika a kale ta lalakanene shike? (b) Omalalakano geni tage ku kwathele wu hedhe popepi naJehova, nomolwashike?

⁶ Ngaashi twe shi popi metetekelo, owu na okukaleka uuthikilo woye momadhiladhilo. Ipula to ti: ‘Mbela iilonga nenge eithano ndino onda hala li fale ndje peni?’ Ngele owa tala ko iilonga yi li owala oshinima shokwiiyambidhidha ngoye mwene nosho wo aanegumbo yoye, Jehova ota ka yambeka oonkambadhala dhoye. (Mat. 6:33) Jehova okwi ilongekidha aluhe oku ku kwathela uuna wa kanitha iilonga nenge uuna uuhupilo tawu shongola. (Isa. 59:1) Oku ‘shi nkene e na okuhupitha aantu ye momamakelo ngoka tage ya adha.’—2 Pet. 2:9.

⁷ Ihe ongiini mbela ngele oto lalakanene owala uukengeli? Nokuli nongele owa pondola aniwa, otashi vulika wu ki iyadhe muudhigu wu vule oonkondo dhoye. (Lesha 1 Timoteus 6:9, 10.) Okukala wa lenga uukengeli nosho wo omaithano otayi ku fala owala kokule naJehova.

8, 9. Aavali oye na okukaleka shike momadhiladhilo uuna tashi ya piilonga yawo? Gandja oshiholelwa.

⁸ Ngele owu li omuvali, dhiladhila kunkene oshiholelwa shoye tashi nwetha mo aamwoye. Oshike haya mono to pititha komeho, iilonga yoye nenge ekwatathano lyoye naJehova? Ngele ohaye ku mono to lalakanene oondondo, esimano nosho wo uukengeli, mbela sho to tala itashi vulika ye ke ku landule mondjila ndjoka ya nika oshiponga? Mbela otashi vulika ya ka kale inaaye ku simaneka wu li omuvali? Omugundjuka gumwe Omukriste okwa ti: “Oshinima shimwe tandi dhimbulukwa shi na ko nasha natate osho kutya okwa kala owala a pwila miilonga ye. Petameko, okwa li ngaa ta monika a fa ta longo nuudhiginini, molwaashoka okwa hala tu kale tu na onkalamwenyo ombwanawa. Okwa li a hala tu kale twa silwa nawa oshimpwiyu. Ihe omimvo opo dha zi ko opwe ya elunduluko lyontumba. Okwa kala nokwiidhipagela po niilonga, nokwa kala he eta kegumbo iinima yondilo, pehala lyokweeta iinima mbyoka ya pumbiwa. Oshizemo, egumbo lyetu olya kala lya tseyika kutya egumbo lyaanashimaliwa, pehala lyokukala lya tseyika kutya egumbo ndyoka hali ladhipike yalwe ya lalakanene iinima yopambepo. Onda li nda hala tate a kale te tu ambidhidha pambepo, pehala lyokukala ta kongo owala oshimaliwa.”

⁹ Aavali, inamu ikaleka kokule naJehova mokukala tamu lalakanene unene omaithano. Tulii po oshiholelwa, opo oyana yeni ya mone lela kutya uuyamba uunene mboka tatu vulu okukala tu na owiinima yopambepo, ihe kawu shi wiinima yopamaliko.—Mat. 5:3.

10. Omugundjuka ngoka ta hogolola eithano lyontumba oku na okukaleka shike momadhiladhilo?

¹⁰ Ngele owu li omugundjuka ngoka a hala okukala e na eithano lyontumba, ongiini to vulu okuhogolola ondjila ndjoka yu uka? Ngaashi twe shi mono metetekelo, owu na okukala wu shi kutya onkalamwenyo yoye oyu uka peni. Mbela edheulo nosho wo iilonga mbyoka wa hala otayi ke ku pa ngaa ethimbo wu pitithe komeho iinima yUukwaniilwa nopwaahe na omapiyaganeko gasha, nenge otayi ke ku fala kokule naJehova? (2 Tim. 4:10) Mbela owa hala okukala nenyanyu lya fa lyaantu yomuuyuni ndyoka hali ya po owala uuna ye na uumbo wombaanga woondoka nenge ye na iiniwe ya gwana? Nenge mbela oto ka kala wu na einekelo lya fa lyaDavid, ngoka a nyola a ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOMUWA, nenge oyana taa hehela iikulya”? (Eps. 37:25) Kala wu shi kutya opu na oondjila mbali, yimwe otayi ku fala kokule naJehova, omanga onkwawo tayi ku fala konkalamwenyo ombwanawa kaaku na we. (Lesha Omayeletumbulo 10:22; Maleaki 3:10.) Oyinipo mbela to ka hogolola?a

OMAINYANYUDHO NOSHO WO OMATHIMBO GOKUTHUWA PO

11. Ombiimbeli otayi ti ngiini ngele tashi ya pomainyanyudho nomathimbo gokuthuwa po, ihe oshike tu na okukaleka momadhiladhilo?

¹¹ Ombiimbeli kayi li ompinge nomainyanyudho nenge nokuthuwa po. Paulus okwa nyolele Timoteus a ti: “Eidheulo lyopalutu oli na ekwatho eshona lyowala.” (1 Tim. 4:8) Ombiimbeli otayi popi kutya opu na ‘ethimbo lyokuyola’ nosho wo ‘ethimbo lyokudhana’ notayi popile wo tu kale hatu vululukwa po. (Omuuv. 3:4; 4:6) Ihe ngele ino kotoka, omainyanyudho nomathimbo gokuthuwa po otayi vulu oku ku fala kokule naJehova. Ngiini mbela? Oludhi lwomainyanyudho ndoka to ka hogolola nosho wo ethimbo ndyoka to ka longitha mugo otashi vulika yi ku etele.

12. Iinima yini wu na okukaleka momadhiladhilo uuna to hogolola omainyanyudho?

¹² Tala tango kutya omainyanyudho geni wu na okuhogolola. Odhoshili kutya opu na omainyanyudho omawanawa nomaludhi gokuthuwa po ngoka tage ku etele uuwanawa. Ihe omainyanyudho ogendji muuyuni kunena otaga humitha komeho iinima mbyoka Kalunga e tonde, ngaashi elongithonkondo, uumpulile nosho wo oluhondelo. Onkee ano, owa pumbwa okukonakona nawa kutya omainyanyudho geni wu na okukutha ombinga mugo. Otage ke ku nwetha mo ngiini? Mbela otaga hwahwameke mungoye ombepo yuupwidhi, yethigathanopo noyuukwashigwana? (Omayel. 3:31) Mbela ohage ku thigi kuu na sha mondjato? Mbela otashi vulika ga pundukithe yalwe? (Rom. 14:21) Omainyanyudho ngoka wa hogolola ohage ku ningitha wu endathane noolye? (Omayel. 13:20) Mbela omainyanyudho ngoka ohage ku ningitha wu ninge iinima ya puka?—Jak. 1:14, 15.

13, 14. Oshike wu na okukaleka momadhiladhilo ngele tashi ya pethimbo ndyoka ho longitha momainyanyudho?

¹³ Owu na wo okutala kutya oho longitha ethimbo li thike peni momainyanyudho. Ipula to ti: ‘Mbela ohandi longitha ethimbo olindji momainyanyudho shoka hashi thigi ndje owala nethimbo eshona lyokuninga iinima yopambepo?’ Ngele oho longitha ethimbo olindji momainyanyudho, oto ke shi mona kutya ethimbo ndyoka ihali ka kala we tali shambudha ngaashi shi na okukala. Ihe mboka haya kutha ombinga momainyanyudho ge li pandjele ohaye ga nyanyukilwa noonkondo. Omolwashike mbela? Eiyuvo lyawo ihali kala tali ya nyenyetele nando, molwaashoka oye shi kutya oya gwanitha po “iinima mbyoka yi na oshilonga” noonkondo.—Lesha Aafilippi 1:10, 11.

¹⁴ Nonando ohashi kala sha fa oshiwanawa okukutha ombinga momainyanyudho ngoka ga fa taga hokitha, oku shi ninga otaku vulu oku ku fala kokule naJehova. Omumwameme gwomimvo 20, gwedhina Kim, okwe shi imonena ye mwene. Okwa ti: “Onda li handi kala kehe mpoka tapu liwa oshimwenyo. Ehuliloshiwike kehe, opwa li hapu kala pwa longekidhwa sha oshinene, okuza ngaa mEtitano, mOlyomakaya nosho wo mOsoondaha. Ngashingeyi opo owala ndi wete kutya opu na iinima ya simana ndi na oku yi ninga. Pashiholelwa, ngashingeyi sho ndi li omukokolindjila, ohandi penduka po 6:00 yongulonene ndi ye muukalele, onkee ano, ihandi vulu we okukala tandi endathana nayalwe sigo opoyimwe nenge pombali yuusiku. Ondi shi kutya iinima mbyoka haaluhe ya puka, ihe otashi vulika yi ku piyaganeke noonkondo. Ngaashi owala oshinima kehe shi na ethimbo lyasho, omainyanyudho nago oge na okukala ge na ongamba.”

15. Ongiini aavali taya vulu okukwathela oyana ya nyanyukilwe omainyanyudho ngoka taga talaleke?

¹⁵ Aavali oye na oshinakugwanithwa shokwiisila oshimpwiyu yoyene nosho wo oyana, naashika osha kwatela mo esiloshimpwiyu lyopalutu, lyopambepo, lyopamadhiladhilo nosho wo omainyanyudho. Ngele owu li omuvali, ku na okutala ko omainyanyudho agehe ga puka. Ihe nonando ongaaka, aavali oye na okukala ya kotokela enwethomo ewinayi ndyoka hali zi momainyanyudho. (1 Kor. 5:6) Ngele tamu kaleke oshinima shika momadhiladhilo, otamu vulu okumona omainyanyudho omawanawa ngoka taga ka talaleka lela aanegumbo yeni.b Ngele omwe shi ningi, otamu ka hogolola ondjila ndjoka tayi mu eta popepyeelela naJehova pamwe noyana yeni.

EKWATATHANO MEGUMBO

16, 17. Aavali oyendji oya li yi iyadha monkalo yini, notu shi shi ngiini kutya Jehova oku uvite ko uuwehame wawo wokoomwenyo?

¹⁶ Ekwatathano pokati kaavali noyana oli na okukala lya kola. Jehova okwa longitha ekwatathano ndyoka opo u ulike kutya ohole ye ndjoka e hole nayo oshigwana she oyi thike peni. (Jes. 49:15) Onkee ano, oshi li paunshitwe okukala wa yemata noonkondo ngele oshilyo shuukwanegumbo she etha po okulongela Jehova. Omumwameme gumwe ngoka omwanakadhona a li a kondwa okwa ti: “Onda li nda dhengwa pevi shili. Onda li tandi ipula kutya ‘omolwashike a thigile po Jehova?’ Onda li ndi wete ndi na ondjo, nonda li tandi ipe uusama.”

¹⁷ Jehova oku uvite ko uuwehame woye wokomwenyo. Okwa li u “uvu nayi” sho aantu yotango mboka a shiti nosho wo sho aantu mboka ya li ko manga Eyelu inaali ya ye mu iteka. (Gen. 6:5, 6) Ngele omuntu ina ningilwa nale oshinima sha fa shoka otashi vulika shi kale oshidhigu kuye okuuva ko kutya ohashi thigi omuntu a dhengwa pevi shi thike peni. Ihe nonando ongaaka, kashi li pandunge wu ethe ondjila ombwiinayi yomuntu gwaandjeni ngoka a kondwa yi ku fale kokule naJehova. Ongiini nduno to vulu okwiidhidhimikila oluhodhi olunene ndoka halu holoka po uuna oshilyo shuukwanegumbo sha thigi po Jehova?

18. Omolwashike aavali kaaye na okwiilya ominwe uuna omwana a thigi po Jehova?

¹⁸ Ino kala to ili ominwe uuna oshilyo shuukwanegumbo sha thigi po Jehova. Oshilyo shuukwanegumbo kehe sha ninginithwa oshi na ‘okuhumbata omutenge gwasho’ shene, nosho shi na okuhogolola sho shene ngele otashi longele Jehova nenge hasho. (Gal. 6:5) Jehova ite ke ku pa ombedhi omolwoondjo dhomuyoni, ihe ote ke yi pa omuyoni ye mwene. (Hes. 18:20) Shimwe ishewe, ku na okupa yalwe ondjo moshinima shika. Owu na okukala wa simaneka elongekidho lyaJehova lyokugandja egeeloputudho. Owu na okukondjitha Ondiaboli, ihe haasita yoshigunda mboka haya katuka oonkatu, opo ya gamene egongalo.—1 Pet. 5:8, 9.

19, 20. (a) Aavali mboka ye na oyana ya kondwa otaya vulu okuninga po shike, opo yi idhidhimike? (b) Aavali mboka oyana ya kondwa otaya vulu okukala ye na etegameno lini?

¹⁹ Oshinima shilwe ishewe, ngele owa kala wa geela Jehova omolwetokolo ndyoka lya ningwa, oto ifala owala kokule naye. Shoka aanegumbo lyoye ya halelela wu ninge, owu kale wu hole noonkondo Jehova komeho giinima ayihe. Ohole yoye yokuhola Jehova oyi na okukala yi vulithe pwaandjoka wu hole nayo oshilyo shuukwanegumbo shoka sha kondwa. Opo wi idhidhimikile onkalo ndjoka, owu na okukala ho ipalutha pambepo. Ino itongola ko nando kaamwaho aadhiginini megongalo. (Omayel. 18:1) Mbumbulila Jehova omutima gwoye okupitila megalikano. (Eps. 62:7, 8) Ino kala to kongo omaipopilo wu kale to endathana noshilyo shaandjeni shoka sha kondwa, tashi vulika moku shi tumina omatumwalaka. (1 Kor. 5:11) Kala wi ipyakidhila thiluthilu niinima yopambepo. (1 Kor. 15:58) Omumwameme ngoka a popi metetekelo okwa ti: “Ondi shi shi nokutya ondi na okukala ndi ipyakidhila niilonga yaJehova, nokwiikaleka ndi na uupambepo wa kola, opo ngele omukadhona gwandje a galukile kuJehova, otandi ka vula oku mu kwathela.”

²⁰ Ombiimbeli otayi ti kutya ohole ‘ohayi tegamene’ ayihe. (1 Kor. 13:4, 7) Inashi puka okukala netegameno kutya siku limwe oshilyo shuukwanegumbo shoka sha kondwa onashi ka galukile kuJehova. Omumvo kehe, oyendji mboka ya yona ohayi itedhulula nokugalukila kehangano lyaJehova. Uuna yi iyela ombedhi Jehova ihe ya tindi. Pehala lyaashono, okwi ilongekidha ‘oku ya dhimina po.’—Eps. 86:5.

NINGA OMAHOGOLOLO GOMONDJILA

21, 22. Owa tokola toko okuninga shike ngele tashi ya pemanguluko lyokuninga omahogololo?

²¹ Jehova okwa pa aantu emanguluko lyokuninga omahogololo monkalamwenyo yawo. (Lesha Deuteronomium 30:19, 20.) Ihe otu na oshinakugwanithwa shokuninga omahogololo ngoka ge li pandunge. Omukriste kehe ni ipule ta ti: ‘Ondi li mondjila yini? Mbela onde etha iilonga nomaithano, omainyanyudho nenge iilyo yuukwanegumbo yi fale ndje kokule naJehova?’

²² Ohole ndjoka Jehova e nine oshigwana she ihayi tengauka nando. Onkee ano, otatu vulu owala okwiifala kokule naJehova tse yene ngele twa landula ondjila ya puka. (Rom. 8:38, 39) Ihe katu na okulandula ondjila ya puka. Kala wa tokola toko kuu pitike sha shi ku fale kokule naJehova. Oshitopolwa tashi landula ko otashi ka kundathana iinima ine mbyoka tayi ke ku kwathela wu kale wu na etokolotoko ndyoka.