Aakuluntugongalo Aakriste ‘Ohaya Longo Pamwe Natse Omolwenyanyu Lyetu’

1. Oshike sha li sha ningitha Paulus a kale a nyanyukilwa Aakriste muKorinto?

MOMUMVO 55 E.N., omuyapostoli Paulus okwa li muTroas, oshilando shoka sha li shi na etulilosikepa. Sho e li moka okwa li owala ti ipula negongalo lyaKorinto. Petameko lyomumvo ogwo tuu ngono, Paulus okwa li a yemata sho u uvu kutya aamwatate muKorinto oye na oontamanana mokati kawo. Molwaashoka okwa li e hole egongalo ndyoka ngaashi owala omusamane omuvali ha kala e hole oyana, okwa li e li nyolele ontumwafo e li pukulule. (1 Kor. 1:11; 4:15) Okwa li wo a tumu omulongi pamwe naye Titus kulyo, e te mu pula a galukile kuye kuTroas e mu lombwele kutya egongalo olyi inyenge ngiini kontumwafo ndjoka. Paulus okwa kala a tegelela nondjuulukwe Titus muTroas, opo u uve kutya aamwahe muKorinto oye li ngiini. Ihe Titus ine ke ya we, naashoka osha li sha yemateke Paulus noonkondo. Paulus okwa li a ningi po shike? Okwa londo osikepa e ta yi kuMakedonia. Okwa li a nyanyukwa noonkondo sho ya tsakanene naTitus hoka. Titus okwa li e mu lombwele kutya aamwahe muKorinto oya tula miilonga omayele ngoka ge li montumwafo yaPaulus, noya li ye mu yuulukwa. Sho Paulus u uvu onkundana ndjoka ombwanawa, okwa li a “nyanyukwa pombanda.”—2 Kor. 2:12, 13; 7:5-9.

2. (a) Montumwafo ye ndjoka Paulus a nyolele Aakorinto okwa li a popi shike kombinga yeitaalo nenyanyu? (b) Omapulo geni tatu ka kundathana?

² Konima yethimbo efupi, Paulus okwa li a nyolele Aakorinto ontumwafo ontiyali. Okwe ya lombwele a ti: ‘Tse inatu hala okupangela eitaalo lyeni, oshoka omwa kola meitaalo. Ihe otatu longo pamwe nane, oshoka otashi ke mú nyanyudha.’ (2 Kor. 1:24, yelekanitha NW.) Paulus okwa li a hala okutya shike sho a popi oohapu ndhoka? Aakuluntugongalo kunena otayi ilongo mo shike moohapu ndhoka?

EITAALO NOSHO WO ENYANYU LYETU

3. (a) Paulus okwa li a hala okutya shike sho a ti kutya “omwa kola meitaalo”? (b) Ongiini aakuluntugongalo haya landula oshiholelwa shaPaulus kunena?

³ Paulus okwa tumbula iinima iyali ya simana yi na ko nasha nelongelokalunga lyetu, eitaalo nosho wo enyanyu. Okwa nyola tango kombinga yeitaalo a ti: ‘Tse inatu hala okupangela eitaalo lyeni, oshoka omwa kola meitaalo.’ Paulus okwa li e shi koleke moohapu ndhoka kutya aamwatate muKorinto oya li aadhiginini, molwaashoka ye na eitaalo muKalunga, ihe hamolwaPaulus nenge molwomuntu gulwe. Onkee ano, Paulus okwa li a mono kutya inashi pumbiwa a kale a limbililwa eitaalo lyaamwahe, noka li e na ehalo lyoku shi ninga. Okwa li e na einekelo kutya oye li Aakriste aadhiginini mboka ya hala okulonga shoka shu uka. (2 Kor. 2:3) Aakuluntugongalo kunena, oye na okulandula oshiholelwa shaPaulus mokukala yi inekela aamwahe kutya oye na eitaalo notaya longele Kalunga nehalo ewanawa. (2 Tes. 3:4) Pehala lyokutulila po aakwanegongalo oompango oondhigu, aakuluntugongalo ohaya landula omakotampango ngoka ge li mOmbiimbeli nosho wo omalombwelo ngoka ga za kehangano lyaJehova. Shimwe ishewe, aakuluntugongalo kunena ihaya pangele eitaalo lyaamwahe.—1 Pet. 5:2, 3.

4. (a) Paulus okwa li a hala okutya shike sho a nyola kutya “otatu longo pamwe nane, oshoka otashi ke mú nyanyudha”? (b) Aakuluntugongalo kunena ohaya landula ngiini oshiholelwa shaPaulus?

⁴ Paulus okwa ti wo: “Otatu longo pamwe nane, oshoka otashi ke mú nyanyudha.” Paulus oye mwene a li ti ipopi moohapu ndhoka nosho wo aayendi pamwe naye. Omolwashike tatu tile ngawo? Montumwafo ye ndjoka a nyolele Aakorinto okwa li a popi mo aayendi pamwe naye yaali, sho a nyola a ti: ‘Jesus oku uvithwa mokati keni kuTimoteus naSilvanus nokungame mwene.’ (2 Kor. 1:19) Uutumbulilo “otatu longo pamwe nane” mboka Paulus a longitha montumwafo ye, otawu ulike kutya okwa li ta popi ookuume ke kopothingo ngaashi Apollos, Akula, Priska, Timoteus, Titus nosho wo yalwe. (Rom. 16:3, 21; 1 Kor. 3:6-9; 2 Kor. 8:23) Sho Paulus a ti: “Otatu longo pamwe nane, oshoka otashi ke mú nyanyudha,” okwa li ta lombwele mboka ye li megongalo lyAakorinto kutya ye nosho wo aalongi pamwe naye oya li ya hala okuninga ngaashi taya vulu ya humithe komeho enyanyu lyiilyo ayihe yegongalo. Aakuluntugongalo kunena oya hala okuninga oshinima sha faathana. Oya hala okuninga ngaashi taya vulu ya kwathele aamwahe ‘ya longele Jehova nenyanyu.’—Eps. 100:2; Fil. 1:25.

5. Otatu ka kundathaneni epulo lini notu na okudhiladhila kushike?

⁵ Ethimbo opo lya zi ko, aamwatate naamwameme mboka haya longo nuudhiginini miitopolwa yi ili noyi ili muuyuni oya li ya pulwa epulo lya faathana tali ti: “Oohapu dhini niilonga yini yomukuluntugongalo ya li ye ku nyanyudha?” Sho tatu tala kwaashoka ya li ya popi, yelekanitha shoka ya ti naashoka ondola ngoye wa yamukula. Shimwe ishewe, atuheni natu dhiladhile kunkene tatu vulu okuhumitha komeho enyanyu megongalo lyetu.a

‘KUNDENI OMUHOLIKE PERSIS’

6, 7. (a) Omomukalo guni aakuluntugongalo taya vulu okuholela Jesus, Paulus nosho wo aapiya yalwe yaKalunga? (b) Omolwashike hashi nyanyudha aamwatate uuna aakuluntugongalo taye ya tumbula komadhina gawo?

⁶ Aamwatate naamwameme oyendji oye shi popya kutya ohaya kala ya nyanyukwa uuna omukuluntugongalo tu ulike kutya oku na ko nasha nayo pauhandimwe. Omukalo gumwe moka aakuluntugongalo taya vulu oku shi ninga omokulandula oshiholelwa shaDavid, Elihu nosho wo shaJesus. (Lesha 2 Samuel 9:6; Job 33:1; Lukas 19:5.) Aapiya yaJehova ayehe mboka oya li yu ulike lela kutya oye na ko nasha nayalwe sho ya li ya tumbula omadhina goohandimwe. Paulus okwa li wo e shi ulike kutya osha simana okudhimbulukwa omadhina gooitaali ooyakwawo noku ga tumbula. Okwa li a hulitha ontumwafo ye yimwe moka a kunda aamwatate naamwameme ye vulithe po 25 mboka a tumbula komadhina. Gumwe gwomuyo omumwameme Persis ngoka Paulus e mu popi a ti: ‘Kundeni omuholike Persis.’—Rom. 16:3-15.

⁷ Aakuluntugongalo yamwe ihaya dhimbulukwa naanaa omadhina gayalwe. Ihe nonando ongaaka, ohaya kala ya fa taya lombwele ooitaali ooyakwawo kutya ‘ngoye owa simana kungame’ sho taya ningi oonkambadhala okukoneka omadhina gawo. (Eks. 33:17) Aamwatate ohaya kala ya nyanyukwa uuna aakuluntugongalo taye ya tumbula komadhina pEkonakono lyOshungolangelo nenge pokugongala kulwe.—Yelekanitha Johannes 10:3.

‘OKWA LONGELE OMUWA NUUDHIGININI’

8. Paulus okwa li a landula oshiholelwa shaJehova nosho wo shaJesus momukalo gumwe guni?

⁸ Paulus okwa li wo u ulike kutya oku na ko nasha nayalwe moku ya pandula nomutima aguhe, oshinima shoka nasho hashi humitha komeho enyanyu lyooitaali ooyakwetu. Okwa li a nyola montumwafo ye moka a popya ehalo lye okulonga pamwe naamwahe, shoka sha li tashi ke ya nyanyudha a ti: “Ngame onde mú inekela lela notandi mú itangele.” (2 Kor. 7:4) Oohapu ndhoka dholupandu odhi na okukala dha li dhi inyengitha shili omitima dhaamwatate megongalo lyaKorinto. Paulus okwa li natango a nyolele omagongalo galwe te ga pandula omolwiilonga yago iiwanawa. (Rom. 1:8; Fil. 1:3-5; 1 Tes. 1:8) Konima sho a kundu omumwameme Persis montumwafo ndjoka a nyolele Aaroma, Paulus okwa gwedha ko a ti: ‘Okwa longele Omuwa nuudhiginini.’ (Rom. 16:12) Omumwameme ngoka omudhiginini oku na okukala a li a pandula shili oohapu ndhoka. Paulus okwa li a landula oshiholelwa shaJehova nosho wo shaJesus mokukala ha pandula yalwe.—Lesha Markus 1:9-11; Johannes 1:47; Eh. 2:2, 13, 19.

9. Omolwashike okupandula yalwe nokupandulwa haku gwedhele ko kombepo yenyanyu megongalo?

⁹ Aakuluntugongalo kunena nayo oye shi shi wo kutya osha simana okulombwela aamwahe kutya oye ya pandula. (Omayel. 3:27; 15:23) Uuna omukuluntugongalo ta pandula omumwahe, oha kala a fa te mu lombwele ta ti: ‘Iilonga yoye ondi yi wete. Ondi na ko nasha nangoye.’ Odhoshili kutya aamwatate naamwameme megongalo ohaya kala ya hala okuuva oohapu dhetsomukumo tadhi zi momakana gaakuluntugongalo. Omumwameme gumwe ngoka e na omimvo 50 nasha okwa popila ko oyendji, sho a ti: “Kiilonga ihandi pandulwa naanaa. Aantu kaye na ko nasha nayalwe yo oye na ombepo yethigathanopo. Uuna omukuluntugongalo a pandula ndje omolwiilonga mbyoka nda longa megongalo, ohashi talaleke ndje nohashi tsu ndje omukumo! Ohashi ningitha ndje ndi kale ndi uvite ndi holike kuTate gwomegulu.” Omumwatate gumwe ngoka ta putudha oyana yaali oye awike naye osho a li u uvite ngaaka. Okwa ti kutya esiku limwe omukuluntugongalo okwa li e mu pandula tashi zi komutima. Omumwatate okwa li u uvite ngiini omolwolupandu ndoka? Okwa ti: “Oohapu dhomukuluntugongalo ngoka odha li dha ladhipike ndje shili!” Onkee ano, ngele omukuluntugongalo ta pandula ooitaali ooyakwawo ohashi ya nyanyudha lela noku ya kumika. Ohashi ya pe wo oonkondo dha gwedhwa po ya tsikile nokweenda nondjila ndjoka tayi fala komwenyo nopwaahe na ‘okuvulwa.’—Jes. 40:31.

“LITHENI EGONGALO LYAKALUNGA”

10, 11. (a) Aakuluntugongalo otaya vulu ngiini okulandula oshiholelwa shaNehemia? (b) Oshike tashi ka kwathela omukuluntugongalo a gandje nawa omagano gopambepo uuna ta ningi etalolopo lyuusita?

¹⁰ Aakuluntugongalo otaya vulu okuulika kutya oye na ko nasha naamwahe momukalo gwa simanenena guni, nongiini shoka tashi gwedhele ko kenyanyu lyegongalo? Omokukatuka onkatu ya popye naamboka ya pumbwa etsomukumo. (Lesha Iilonga 20:28.) Uuna aakuluntugongalo taye shi ningi, nena otaya holele aasita yoshigunda mboka ya li ko nale. Pashiholelwa, tala shoka omuwiliki omudhiginini Nehemia a li a ningi sho a mono kutya aamwahe Aajuda yamwe oya nkundipala pambepo. Ehokololo otali ti kutya okwa katuka nziya onkatu e ya tse omukumo. (Neh. 4:14, NW) Onawa ngele aakuluntugongalo taya ningi sha faathana kunena. Oye na okukala haya ‘katuka onkatu’ ya kwathele ooitaali ooyakwawo ya kale ya kola meitaalo. Opo aakuluntugongalo ya gandje etsomukumo ndyoka lyopaumwene, oye na okutalela po aamwatate naamwameme komagumbo gawo uuna oonkalo tadhi shi pitike. Petalelopo lyuusita ndyoka, oye na oku ya pa ‘omagano gopambepo.’ (Rom. 1:11) Oshike tashi ka kwathela aakuluntugongalo ye shi ninge?

¹¹ Omanga inaaya ninga etalelopo lyuusita, omukuluntugongalo okwa pumbwa okulongitha ethimbo lyontumba a dhiladhile kombinga yaamboka ta ka talela po. Omukuluntugongalo ni ipule kutya aantu mbono otayu ungaunga nomashongo geni? Oshike tashi ke ya tunga? Omanyolo geni nenge iiholelwa yini yaamboka ya popiwa mOmbiimbeli tayi vulu oku ya kwathela monkalo moka ye li? Ngele omukuluntugongalo oha dhiladhila komeho yethimbo shoka ta ka tya, otashi ke mu kwathela a popye naantu mboka momukalo ngoka tagu tungu lela, pehala lyokupopya iinima kaayi na oshilonga. Pethimbo lyetalelopo lyuusita, omukuluntugongalo oku na okupa aamwatate naamwameme ompito ya popye omaiyuvo gawo, omanga ye a pulakena neitulomo. (Jak. 1:19) Omumwameme gumwe okwa ti: “Ohashi hekeleke shili ngele omukuluntugongalo ta pulakene nomutima aguhe.”—Luk. 8:18.

12. Oolye ya pumbwa okutsuwa omukumo megongalo, nomolwashike?

¹² Oolye ta ka mona uuwanawa momatalelopo guusita? Paulus okwa li a kumagidha Aakuluntugongalo ooyakwawo ya ‘tonatele oshigunda ashihe.’ Osha yela kutya iilyo ayihe yegongalo oya pumbwa okutsuwa omukumo, mwa kwatelwa aauvithi nosho wo aakokolindjila mboka ya longa nuudhiginini omimvo odhindji muukalele. Omolwashike ya pumbwa ekwatho lyopambepo okuza kaasita yoshigunda? Omolwaashoka omathimbo gamwe ooitaali mboka ye na uupambepo wa kola, nayo wo ohaya gwililwa po nuupu komathiminiko gomuuyuni mbuka wa yonana. Opo tu shi mone nawa kutya omolwashike aapiya yaKalunga aadhiginini nayo haya kala ya pumbwa ekwatho, natu taleni shoka sha li sha ningilwa Omukwaniilwa David monkalamwenyo ye.

‘ABISAI OKWE YA A POPILE DAVID’

13. (a) Opompito yini Ishbi-Benob a li a hala okuponokela David? (b) Abisai okwa li a popile David ngiini?

¹³ Konima yethimbo efupi sho omugundjuka David a gwayekwa a ninge omukwaniilwa, okwa li a kondjitha Goliat, omutongolume gumwe gwomezimo lyAarefaim. Omolwuulaadhi we, David okwa li a dhipaga omutongolume ngoka. (1 Sam. 17:4, 48-51; 1 Ondjal. 20:5, 8) Konima yomimvo dhontumba, David okwa li ishewe a taalele omulefule gulwe miita mbyoka ya li pokati kAafilisiti nAaisraeli. Edhina lye olyo Ishbi-Benob, naye gwomezimo lyAarefaim. (2 Sam. 21:16) Ihe oshikando shoka, omulefule ngoka okonyala a dhipage David. Omolwashike mbela? Omolwaashoka David okwa li a vulwa noonkondo, ihe hamolwaashoka a kanitha omukumo. Ehokololo otali ti: “David okwe etwa mo komvulwe.” Sho Ishbi-Benob a mono kutya David okwa vulwa, okwa li ta “dhiladhila kutya ota dhipaga David.” Ihe manga omulefule ngoka inaa tsa David noshikondjitho she, “Abisai, omuna gwaZeruja, okwe ya a popile David. Okwa ponokele omulefule [Omufilisiti] e te mu dhipaga.” (2 Sam. 21:15-17) Oshikando shika David okwa li a zi koshakapalwa. Nopwaahe na omalimbililo David okwa li a pandula lela Abisai ngoka a kala nokutala shoka tashi mu ningilwa. Abisai okwa li a popile nziya David sho omwenyo gwe gwa li monkugo yi na onkambe. Oshike tatu ilongo mehokololo ndika?

14. (a) Ongiini tatu vulu okusinda Oogoliat yopathaneko? (b) Aakuluntugongalo otaya vulu ngiini okukwathela yalwe ya kale ishewe ye na oonkondo nosho wo enyanyu? Gandja oshiholelwa.

¹⁴ Tu li aapiya yaJehova muuyuni awuhe otatu tsikile nuukalele wetu, nonando Satana naakalelipo ye otaya tula omandangalati mondjila yetu. Yamwe yomutse otwa li twa taalela omayeleko omanenenene, ihe otwa vula okukondjitha Oogoliat mboka yopathaneko, molwaashoka otwi inekela thiluthilu muJehova. Ihe omathimbo gamwe, ohatu kala twa vulwa notwa teka omukumo sho tatu tsikile nokukondjitha omathiminiko monkalelo yuuyuni mbuka waSatana. Uuna twa vulwa, ohashi vulika tu teke omukumo nuupu kuupyakadhi mboka hatu vulu okwiidhidhimikila shito. Oyendji oye shi mona kutya uuna tu li moonkalo dha tya ngaaka, ekwatho ndyoka tatu pewa kaakuluntugongalo otali ke tu kwathela tu kale ishewe twa nyanyukwa notu na oonkondo oompe. Omumwameme gumwe omukokolindjila ngoka e li metifa lyomimvo 60 okwa ti: “Opwa li ethimbo ndyoka nda li kaandi uvite nawa, niilonga yomomapya oya li ya lolodha ndje unene. Omukuluntugongalo gumwe okwa li a popi nangame, konima sho a mono kutya onda kanitha oonkondo. Oonkundathana dhetu ndhoka dha li tadhi tsu omukumo odha li dha kankamena kOmbiimbeli. Onda li nda tula miilonga omaetopo ge, nosha li she etele ndje uuwanawa.” Omumwameme okwa gwedha ko a ti: “Kasha li tuu pahole komukuluntugongalo ngoka sho a mono uunkundi wandje nokukwathela ndje!” Eeno shili, ohashi gumu omitima dhetu okutseya kutya otu na aakuluntugongalo mboka haya kala taye tu tonatele, nohaya kala yi ilongekidha ‘oku tu popila,’ ya fa owala Abisai ngoka a li a kwathele David.

‘OTANDI MÚ ULUKILE KUTYA ONDI MÚ HOLE’

15, 16. (a) Omolwashike aamwatate ya li ye hole Paulus tagu pu mo? (b) Omolwashike tu hole aakuluntugongalo mboka ye na ko nasha natse?

¹⁵ Okukala omusita osha kwatela mo okulonga nuudhiginini. Omathimbo gamwe aakuluntugongalo ohaya lala ondangala taya galikana, tayi ipula noshigunda shaKalunga nenge nokukwathela ooitaali ooyakwawo pambepo. (2 Kor. 11:27, 28) Ihe nonando ongaaka, aakuluntugongalo ohaya gwanitha po iilonga yawo pakuudha nonenyanyu, ngaashi owala Paulus a li e shi ningi. Okwa nyolele Aakorinto a ti: “Otandi ka gandja nenyanyu ashihe shoka ndi shi na notandi ki igandja wo omolwoomwenyo dheni.” (2 Kor. 12:15) Paulus okwa li i idhipagele po a kwathele aamwahe, molwaashoka okwa li e ya hole noonkondo. (Lesha 2 Aakorinto 2:4; Fil. 2:17; 1 Tes. 2:8) Itashi kumitha nokuli sho aamwahe ya li ye mu hole tagu pu mo.—Iil. 20:31-38.

¹⁶ Tu li aapiya yaKalunga kunena natse otu hole wo aakuluntugongalo yetu mboka ye na ko nasha natse. Ohatu pandula Jehova momagalikano getu sho e tu pa aalumentu mboka. Ohaya gwedha ko kenyanyu lyetu moku tu ulukila kutya oye na ko nasha natse. Omatalelopo guusita ngoka haya ningi ohage tu kumike. Shimwe ishewe, ohatu kala twa nyanyukwa sho tu shi kutya ethimbo kehe oyi ilongekidha oku tu kwathela uuna twa gwililwa po koonkalo dhuuyuni mbuka. Onkee ano, natu kaleni tu shi lela kutya aakuluntugongalo ‘ohaya longo pamwe natse omolwenyanyu lyetu.’