Eyumuko lyaJesus otali ti omwenyo

EYUMUKO lyaJesus kali shi owala oshiningwanima shonale kaashi na ko nasha natse nenge kaashi na eityo kutse nena. Omuyapostoli Paulus okwa li a popi esimano lyalyo sho a ti: “Kristus okwa yumudhwa kuusi. Shika otashi koleke kutya [oye omutango gwaamboka, OB-1954] ya kotha muusi ngashingeyi, [mboka taa] ka yumudhwa wo. Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe. Oshoka ngaashi aantu ayehe ye na okusa [omolwuukumwe] wawo naAdam, osho wo aantu ayehe otaa ka yumudhwa omolwuukumwe wawo naKristus.”—1 Aakorinto 15:20-22.

Jesus okwa yumudhwa mo 16 gaNisan, mo 33 E.N., mesiku moka Aajuda ya li haya gandja oshipe shiilikolomwa yawo yotango kuJehova Kalunga muuyapukielela wotempeli muJerusalem. Sho a popi Jesus e li omutango gwaamboka ya kotha muusi, Paulus okwa li ta ti kutya yalwe otaya ka yumudhwa wo.

Oohapu dhaPaulus dha landula ko otadhi yelitha kutya eyumuko lyaJesus olya ninga shike tashi wapa. Paulus okwa ti: “Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe.” Atuhe ohatu si, omolwuulunde nokwaagwanenena hoka twa thigulula kuAdam. Ihe nonando ongaaka, sho a gandja omwenyo gwe gwopantu gwa gwanenena gu li iikulila, Jesus okwe shi ninga tashi wapa, opo aantu ya mangululwe moomango dhuulunde neso okupitila meyumuko. Paulus okwe shi ngongo nawa mAaroma 6:23 a ti: “Eso olyo ondjambi yuulunde, ihe omwenyo gwaaluhe ogwo omagano gesilohenda lyaKalunga muukumwe naJesus Kristus, Omuwa gwetu.”

Jesus okwa li a yelitha ye mwene shoka eso neyumuko lye tali ti kutse. Okwi ipopi ye mwene a ti: “Omuna gwomuntu e na oku ka yeluthwa pombanda, opo kehe ngoka te mu itaale, a kale e na omwenyo gwaaluhe. Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.”—Johannes 3:14-16.

Dhiladhila owala konkalamwenyo yaaluhe kaayi na uuwehame, okumona iihuna nenge oluhodhi! (Ehololo 21:3, 4) Kali shi tuu etegameno linyanyudha! Omulongwantu gumwe okwe shi popi ngeyi: “Nonando omawendo ohashi vulika ge tu dhimbulukithe kutya onkalamwenyo ofupi, eyumuko otali tu shilipaleke kutya eso itali kala sigo aluhe.” Eeno, eyumuko lyaJesus otali ti omwenyo.