Kala Wa Lenga Uukwatya Wajehova Wokukala Omudhiginini Nowokudhimina po
“OMUWA, ongoye omunalukeno noho tu dhimine po; ou na esilohenda kumboka taye ku indile.” — EPS. 86:5.
1, 2. (a) Omolwashike hatu kala twa lenga ookuume mboka aadhiginini nohaya dhimine po? (b) Otatu ka konakona omapulo geni?
KUUME kashili omuntu ngu e li ngiini? Omumwameme Ashley okwa ti: “Kungame, kuume kashili oye ngoka he ku kwathele aluhe, nohe ku dhimine po uuna wa yono.” Atuheni ohatu kala twa lenga ookuume mboka aadhiginini nohaya dhimine po. Ohaye tu kwathele tu kale tu uvite twa gamenwa notu holike. — Omayel. 17:17.
2 Jehova oye Kuume ngoka omudhiginini a shiga ko noha dhimine po kaaku na we ngoka tatu vulu okukala tu na. Ongaashi owala omupisalomi a popi a ti: “OMUWA, ongoye omunalukeno noho tu dhimine po; ou na esilohenda [nenge “ohole yi na uudhiginini”] kumboka taye ku indile.” (Eps. 86:5) Okukala omudhiginini nokukala ho dhimine po otaku ti shike? Ongiini Jehova hu ulike uukwatya mboka uuwanawa? Nongiini tatu vulu okulandula oshiholelwa she? Omayamukulo komapulo ngoka otage ke tu kwathela tu kokeke ohole yetu yokuhola Kuume ketu kopodhingoelela, Jehova. Otage ke tu kwathela wo tu koleke ekwatathano lyetu nayalwe. — 1 Joh. 4:7, 8.
JEHOVA OMUDHIGININI
3. Okukala omudhiginini otaku ti shike?
3 Uudhiginini owo uukwatya wopahole mboka wa kwatela mo eigandjo, uuinekelwa, nokukala aluhe omuvuliki. Omuntu ngoka omudhiginini iha ninguluka. Pehala lyaashono, oha kala e hole omuntu gwontumba (nenge oshinima), noihe e tha omuntu ngoka (nenge oshinima shoka) nonando opu na oonkalo oondhigu. Dhoshili, Jehova oye “Omudhiginini,” kaaku na we. — Eh. 16:5, NW.
4, 5. (a) Jehova ohu ulike ngiini uudhiginini? (b) Ongiini tatu vulu okumona omukumo uuna tatu dhiladhila kiilonga yuudhiginini waKalunga?
4 Jehova ohu ulike ngiini uudhiginini? Ihe ekelehi nando aalongeli ye aadhiginini. Omukwaniilwa David, gumwe gwomaalongeli mbaka, okwa li a gandja uunzapo kombinga yuudhiginini waJehova. (Lesha 2 Samuel 22:26.) Pethimbo David a li momayeleko, Jehova okwa li e mu wilike, e mu gamene, nokwe mu hupitha, naayihe mbyoka okwe yi ningi nuudhiginini. (2 Sam. 22:1) David okwa li e shi kutya Jehova ka li owala omudhiginini mokana. Omolwashike Jehova a li u ungaunga naDavid nuudhiginini? Omolwaashoka David naye okwa li “omudhiginini.” (NW) Jehova oha nyanyukilwa uudhiginini waalongeli ye, noha kala omudhiginini kuyo. — Omayel. 2:6-8.
5 Otatu vulu okumona omukumo uuna tatu dhiladhila kuudhiginini waJehova. Omumwatate omudhiginini Reed okwa ti: “Ohashi kwathele ndje shili uuna nda lesha nkene Jehova a li u ungaunga naDavid pethimbo a li moonkalo oondhigu. Nokuli naasho David a li a yi ontuku, a kala momakololo naasho kee li momakololo, Jehova okwa kala aluhe te mu kwathele. Omahokololo ngoka ohaga tsu ndje omukumo noonkondo! Ohaga dhimbulukitha ndje kutya nonando ondi kale monkalo ya tya ngiini, kutya nduno oyi kale ya kitakana shi thike peni, Jehova ota ka kwathela ndje shampa owala nda kala omudhiginini kuye.” Nopwaahe na omalimbililo, nangoye osho wu na okukala wu uvite ngaaka. — Rom. 8:38, 39.
6. Omomikalo dhini Jehova hu ulike kutya ye omudhiginini naashoka ohashi etele aapiya ye uuwanawa washike?
6 Omomikalo dhilwe dhini Jehova hu ulike kutya ye omudhiginini? Oha landula aluhe omithikampango dhe. Ote tu shilipaleke kutya “sigo uukulupe weni ongame ngu ongashika nda kala.” (Jes. 46:4, OB-1954) Oha ningi aluhe omatokolo gi ikolelela komithikampango dhe ndhoka ihaadhi lunduluka dhaashoka sha puka naashoka shi li mondjila. (Mal. 3:6) Shimwe ishewe, Jehova ohu ulike uudhiginini we mokugwanitha po aluhe shoka u uvaneka. (Jes. 55:11) Nokungawo, uudhiginini we ohawu etele uuwanawa aapiya ye ayehe aadhiginini. Ngiini mbela? Uuna tatu longo nuudhiginini tu vulike komithikampango dhaJehova, otatu vulu okukala neinekelo kutya ote ke tu laleka nuuyamba ngaashi e shi uvaneka. — Jes. 48:17, 18.
HOLELA UUDHIGININI WAJEHOVA
7. Omomukalo gumwe guni tatu vulu okuholela uudhiginini waJehova?
7 Ongiini tatu vulu okuholela uudhiginini waJehova? Omukalo gumwe moka tatu vulu oku shi ninga omokukwathela mboka ye li moonkalo oondhigu. (Omayel. 3:27) Pashiholelwa, mbela owu shi omwiitaali omukweni ngoka a teka omukumo, tashi vulika molwaashoka kee na uukolele, ta patanekwa kuyaandjawo nenge molwuunkundi we? Omolwashike itoo katuka onkatu wu mu “hekeleke . . . noohapu dho opala”? (Sak. 1:13)a Mokuninga ngaaka, oto ulike kutya owu li kuume kashili, ngoka “omudhiginini e vule omumwayina.” — Omayel. 18:24.
8. Ongiini tatu vulu okuholela uudhiginini waJehova mondjokana?
8 Otatu vulu wo okuholela uudhiginini waJehova mokukala aanashili kwaamboka tu hole. Pashiholelwa, ngele otu li mondjokana, otu shi shi kutya otu na okukala aadhiginini kookuume ketu kopandjokana. (Omayel. 5:15-18) Onkee ano, katu na okuninga nando osha shoka tashi vulu oku tu fala moluhondelo. (Mat. 5:28) Natango, otatu ka ulika kutya otu li aadhiginini kooitaali ooyakwetu mokukala kokule nokuhokola nenge nokulundila, okuyanda okutaandelitha omahokololo ga tya ngaaka omawinayi, nenge nokuli okupwilikina kugo. — Omayel. 12:18.
9, 10. (a) Okulye unene twa hala okukala aadhiginini? (b) Omolwashike okuvulika kiipango yaJehova ihaaku kala aluhe okupu?
9 Oshinima oshinene kwaayihe mbyoka, otwa hala okukala aadhiginini kuJehova. Otatu ke shi ninga ngiini? Omokukambadhala tu kale hatu tala ko iinima ngaashi ye, sha hala okutya okukala tu hole shoka e hole nokukala tu tonde shoka e tonde, tse tatu ihumbata metsokumwe naashoka. (Lesha Episalomi 97:10.) Shi thike ngaa mpoka tatu kala metsokumwe nomaiyuvo nosho wo nomadhiladhilo gaJehova, opo ngaa tapu ka kala pu thike ehalo lyetu lyokuvulika kiipango ye. — Eps. 119:104.
10 Ihe nonando ongawo, itashi ka kala aluhe oshipu okuvulika kiipango yaJehova. Otashi vulika tu na okukondja opo tu kale aadhiginini. Aakriste yamwe mboka inaaya ya mondjokana otashi vulika ya kale ya hala okuya mondjokana, ihe maapiya yaJehova inaya mona mo natango kuume kopandjokana ngoka to opalele. (1 Kor. 7:39) Omumwameme inaa hokanwa otashi vulika a kongelwe ngoka te mu hokana kaaniilonga pamwe naye mboka kaaye shi ooitaali. Omumwameme otashi vulika a kale ta kondjo nezaza. Ihe nando ongawo, oha kambadhala noonkondo a kale omudhiginini kuJehova. Mbela inatu pandula iiholelwa yuudhiginini ya tya ngaaka? Dhoshili, Jehova ota ka yambeka ayehe mboka haya kala aadhiginini kuye nonando oye li moonkalo oondhigu. — Heb. 11:6.
“Oku na kuume omudhiginini e vule omumwayina.” — Omayel. 18:24 (Tala okatendo 7)
‘Dhiminathanii po oondjo.’— Ef. 4:32 (Tala okatendo 16)
JEHOVA OHA DHIMINE PO
11. Okudhimina po okwa kwatela mo shike?
11 Okukala kwaJehova e na ehalo lyoku tu dhimina po oku li kumwe kwomuukwatya we uuwanaweelela. Okudhimina po okwa kwatela mo shike? Okudhimina po okwa kwatela mo okukuthila po gumwe ngoka a yona ihe okwi iyela ombedhi shili. Ihe shoka itashi ti kutya omuntu ngoka ha dhimine po ohi ipwililikile shoka a ningilwa nenge a kale e wete a fa inaa ningilwa sha. Pehala lyaashono, iha kala a kwatela yalwe iikonene. Omanyolo otaga ti kutya Jehova ‘oha dhimine po’ mboka hayi iyele ombedhi shili. — Eps. 86:5.
12. (a) Jehova ohu ulike ngiini kutya okwe tu dhimina po? (b) Osha hala okutya shike ngele taku ti wa kutya omayono gomuntu oga ‘dhimwa po’?
12 Jehova ohu ulike ngiini kutya okwe tu dhimina po? Uuna Jehova te tu dhimine po, ‘oha dhimi po oondjo odhindji’; oha dhimine po thiluthilu nosigo aluhe. (Jes. 55:7) Otu shi shi ngiini kutya Jehova ohe tu dhimine po thiluthilu? Natu tale keshilipaleko ndyoka li li mIilonga 3:19. (Lesha.) Omuyapostoli Petrus okwa li a ladhipike aapulakeni ye yi ‘itedhulule, noya galukile kuKalunga.’ Uuna ngoka a yona i itedhulula, ohi iyele ombedhi shili omolweyono lye. Omuntu ngoka oha kala wo a tokola toko kaa endulule eyono lye. (2 Kor. 7:10, 11) Natango ishewe, omuntu ngoka i itedhulula shili, ohi ‘i igaluluka,’ e te etha po ondjila ye ndjoka ya puka nokukala ta longo shoka tashi nyanyudha Kalunga. Ngele andola mboka ya li ya pulakena kuPetrus oya li yi iyele ombedhi shili, oshizemo osha li tashi ka kala shini? Petrus okwa tile kutya omayono gawo oga li taga vulu ‘okudhimwa po.’ Uutumbulilo ‘okudhima po’ otawu ti ‘okukuthila po.’ Onkee ano, uuna Jehova ta dhimine po, oha kuthile po thiluthilu. — Heb. 10:22; 1 Joh. 1:7.
13. Oohapu ndhoka tadhi ti ‘uulunde wawo itandi wu dhimbulukwa we’ otadhi tu shilipaleke shike?
13 Otu shi shi ngiini kutya Jehova ohe tu dhimine po sigo aluhe? Natu tale kehunganeko lyaJeremia li na ko nasha nehangano epe ndyoka lya li lya ningwa nAakriste aagwayekwa, ndyoka lya ningwa opo mboka ye na eitaalo mekulilo ya dhiminwe po shili omayono gawo. (Lesha Jeremia 31:34.) Jehova okwa ti: “Otandi dhimi po omayono gawo, nuulunde wawo itandi u dhimbulukwa we.” Jehova ote tu shilipaleke kutya ngele e tu dhimine po, monakuyiwa i te ke tu geela we nandonando omolwomayono ngoka. Iha lafulula omayono getu e tu pangule iikando niikando nenge e tu geele. Pehala lyaashono, Jehova ohe tu dhimine po omayono getu noihe ga dhimbulukwa we. — Rom. 4:7, 8.
14. Ongiini tatu vulu okumona ehekeleko uuna tatu tedhatedha kokukala kwaJehova ha dhimine po? Gandja oshiholelwa.
14 Otatu vulu okumona ehekeleko uuna tatu tedhatedha kokukala kwaJehova ha dhimine po. Natu tale koshiholelwa. Oomvula odhindji dha ka pita, omumwameme ngoka tatu luku Elaine, okwa li a kondwa. Konima yoomvula dhontumba, okwa li a galulilwa megongalo. Elaine okwa ti: “Nonando onda li ndi ilombwele nosho wo yalwe kutya Jehova okwa dhimina ndje po, onda li aluhe handi kala ndu uvite a fa e li kokule nangame nenge yalwe oyo unene ye li popepi naye noku li gwoshili kuyo.” Ihe nonando ongawo, Elaine okwa li a hekelekwa sho a lesha nokutedhatedha komahokololo gOmbiimbeli ngoka tagu ulike nkene Jehova ha dhimine po aantu. Elaine okwa gwedha ko a ti: “Onda li ndu uvite kutya Jehova oku hole ndje noku na olukeno nangame, oshinima shoka kaanda li nde shi dhimbulula petameko.” Okwa li i inyengithwa unene kedhiladhilo ndika kutya, “uuna Jehova te tu dhimine po, inatu pumbwa we okukala tatu dhiladhila kutya otu na natango oontongo dhomayono ngoka monkalamwenyo yetu.”b Elaine okwa ti: “Onda li nda dhimbulula kutya kanda li ndi itaala kutya Jehova ota vulu okudhimina ndje po lelalela, nonda dhiladhila kutya otandi ka kala nomutenge nguka onkalamwenyo yandje ayihe. Ondi shi shi kutya otashi ka kutha ethimbo, ihe onda tameka okukala ndu uvite kutya otandi vulu shili okuhedha popepyeelela naJehova, nondu uvite kutya omutenge ogwa kuthwa ko komapepe gandje.” Ihatu longele tuu Kalunga ngoka omunahole noha dhimine po! — Eps. 103:9.
HOLELA OKUDHIMINA PO KWAJEHOVA
15. Ongiini tatu vulu okuholela okudhimina po kwaJehova?
15 Otatu vulu okuholela okudhimina po kwaJehova mokudhimina po yalwe uuna yi iyela ombedhi shili. (Lesha Lukas 17:3, 4.) Dhimbulukwa kutya uuna Jehova ta dhimine po, oha dhimbwa omayono getu meityo ndino kutya ihe tu geyele we molwa go. Uuna twa dhimine po yalwe, natse otatu vulu okudhimbwa moku ka kala itaatu dhiladhila we nokulafulula monakuyiwa shoka ye tu ninga.
16. (a) Mbela okukala hatu dhimine po yalwe otaku ti kutya ohatu ipwililikile shoka taye tu ningile nenge tu ethe owala ye tu longithe? Shi yelitha. (b) Otu na okuninga shike opo Kalunga e tu dhimine po?
16 Okukala hatu tu dhimine po yalwe itaku ti kutya ohatu ipwililikile shoka taye tu ningile nenge tu ethe owala ye tu longithe. Ihe otashi ti kutya okukala ihaatu kwatele nande ogumwe onkone. Shoka sha simanenena osho kutya opo Kalunga e tu dhimine po, otu na okudhimina po yalwe ngaashi ye. (Mat. 6:14, 15) Kakele kaashono, Jehova ohi inyengithwa kolukeno lwe, a dhimbulukwe kutya tse “ontsi yevi.” (Eps. 103:14) Dhoshili, mbela olukeno kalu na oku tu inyengitha tu dhimine po yalwe tashi zi komutima? — Ef. 4:32; Kol. 3:13.
Omagalikano getu gokudhimina po naga kale haga zi komutima (Tala okatendo 17)
17. Oshike tashi vulu oku tu kwathela ngele otwa ningwa nayi komwiitaali omukwetu?
17 Odhoshili kutya haaluhe oshipu okudhimina po yalwe. Nokuli methelemumvo lyotango, Aakriste aagwayekwa yamwe oya fa ya li ye shi mono oshidhigu okukandula po uupyakadhi mboka wa li pokati kawo. (Fil. 4:2) Ngele otwa ningwa nayi komwiitali omukwetu, oshike tashi ke tu kwathela tu ya dhimine po? Dhiladhila kuJob. Okwa li u uvu nayi noonkondo sho a li a lundilwa kuElifas, Bildad naSofar mboka ya li aniwa ookuume ke. (Job 10:1; 19:2) Pehulilo, Jehova okwa ganda aalundili mboka. Kalunga okwa li e ya lombwele ya ye kuJob ya ka gandje omayambo omolwoondjo dhawo. (Job 42:7-9) Ihe Jehova okwa li wo a pula Job a ninge sha. Okwa li e na okuninga shike? Jehova okwa li e mu pula a galikanene aalundili ye mboka. Job okwa ningi ngaashi Jehova e mu pula a ninge, naJehova okwa li e mu yambeke molwaashoka e ya dhimine po. (Lesha Job 42:10, 12, 16, 17.) Otatu ilongo mo shike mwaashoka? Ngele tatu galikanene tashi zi komutima mboka ye tu ninga nayi otashi ke tu kwathela kaatu kale twe ya kwatela onkone.
TSIKILA OKUKALA WA LENGA UUKWATYA WAJEHOVA PAKUUDHA
18, 19. Ongiini tatu vulu okutsikila okukala twa lenga noonkondo uukwatya uuwanaweelela waJehova?
18 Osha li oshiwanawa lela sho twa kundathana kombinga yuukwatya wa yoolokathana waJehova. Otwa mona kutya oku shi okupopiwa naye nuupu, ke na ontondo, oha gandja, oku na ondjele, omudhiginini noha dhimine po. Dhoshili, otwi ilongo po owala oshishonashona kombinga yuukwatya mboka. Otatu ka vula okunyanyukilwa okwiilonga oshindji kombinga yaJehova sigo aluhe. (Omuuv. 3:11) Otatu tsu kumwe nomuyapostoli Paulus ngoka a nyola a ti: “Ano [uuwindji] wuuyamba waKalunga ou thike peni! Uunongo noondunge dhe odha hulila peni!” inaatu gwedha ko ohole nosho wo uukwatya uhamano mboka twa kundathana. — Rom. 11:33.
19 Atuheni natu tsikileni okukala twa lenga noonkondo uukwatya uuwanaweelela waJehova. Otatu vulu okuninga ngaaka mokwiilonga uukwatya we, okudhiladhila nokwiihumbata metsokumwe nawo. (Ef. 5:1) Sho tatu ningi ngaaka, kapu na omalimbililo kutya otatu ka tsa kumwe noohapu dhomupisalomi ngoka i imbi a ti: “Osho opalela ndje okukala popepi naKalunga.” — Eps. 73:28.
a Opo wu mone omaetopo ngoka taga vulu oku ku kwathela, tala oshitopolwa “Have You Encouraged Anyone Lately?” (Mbela opu na ngaa gumwe opo we mu tsu omukumo?”) shi li mOshungolangelo yOshiingilisa yo 15 Januali 1995 nosho wo “Tsaathaneni omukumo opo mu kale mu na ohole niilonga iiwanawa — ngiini?” mOshungonangelo ye 1 Apilili 1995.