Eso halyo ehulilo!

Betania oka li okamukunda okashona hoka ka li kokule naJerusalem ookilometa 3. (Johannes 11:18) Okwa li kwa ningwa oshinima shimwe shinikitha oluhodhi iiwike yontumba manga Jesus inaa sa. Lasarus, gumwe gwomookuume kaJesus yopothingo, okwa li a kwatwa kuuvu ombaadhilila e ta si.

Sho Jesus u uvu tango onkundana ndjoka, okwa li a lombwele aalongwa ye kutya Lasarus okwa kotha nosho wo kutya okwa lalakanena oku ke mu pendula. (Johannes 11:11) Ihe aalongwa yaJesus kaya li yu uvu ko eityo lyaashoka a popi, onkee ano Jesus okwa li e ya lombwele a ti: “Lasarus okwa sa.” — Johannes 11:14.

Jesus okwa li a thiki muBetania konima yomasiku gane sho Lasarus a fumvikwa, nokwa li a hala okuhekeleka Marta, omumwayina gwanakusa. Marta okwa ti: “‘Ando owa li po, ando omumwameme ina sa.’” (Johannes 11:17, 21) Jesus okwa yamukula a ti: “‘Ongame eyumuko nomwenyo. Oongoka i itaala ndje, ota kala e na omwenyo, nando ona se.’” — Johannes 11:25.      

Opo u ulike kutya oohapu ndhoka kadha li owala dhomokana, Jesus okwa yi pombila e ti igidha ta ti: “‘Lasarus, za mo!’” (Johannes 11:43) Aatalinomeho oya li ya kumwa sho nakusa a penduka.

Jesus okwa adhikile a ninga nale omayumuko gaali. Oshikando shimwe okwa li a yumudha okakadhona okashona, okamwanakadhona kaJairus. Pethimbo mpoka manga Jesus inee ka yumudha, okwa li wo a popi kutya oka kotha. — Lukas 8:52.

Ndhindhilika kutya sho Jesus a popi kombinga yeso lyaLasarus nolyokamwanakadhona kaJairus, okwa yelekanitha eso noomposi. Eyelekanitho ndyoka otali opalele lela. Omolwashike mbela? Oomposi odho okukala monkalo moka kuu na shoka wu shi notaku opalele okugandja edhiladhilo lyokukala kuu uvite uuwehame washa nenge itoo mono iihuna. (Omuuvithi 9:5; tala oshimpungu shoshitopolwa shika, “Eso olya fa oomposi dhoshitula.”) Aalongwa yaJesus yopetameko oye na okukala ya li yu uvite ko onkalo yolela yoonakusa. O-Encyclopedia of Religion and Ethics oya ti: “Kaalanduli yaJesus eso olya li oomposi, noombila ehala lyokuthuwila . . . kwaamboka ya sila meitaalo.”a

Ohashi tu hekeleke okutseya kutya oonakusa oya kotha moombila noitaya mono iihuna. Onkee ano, eso olya kanitha oonkondo dhalyo noitali pumbwa oku tu tilitha.

MBELA “OMUNTU NGELE OKWA SI, OTA KA KALA ISHEWE E NA OMWENYO?”

Nonando ohatu nyanyukilwa okukotha uusiku, olye gwomutse a hala okukotha sigo aluhe? Etegameno lini tu na kutya oonakusa mboka ya kotha moombila otaya ka galukila momwenyo, ngaashi naanaa Lasarus nokamwanakadhona kaJairus?

Kukulululwa Job okwa li a pula epulo ndyoka sho a li e li pokusa, a ti: “Omuntu ngele okwa si, ota ka kala ishewe e na omwenyo?” — Job 14:14.

Sho a li ta popi nOmunankondoadhihe, Job okwa li a yamukula epulo lye mwene, a ti: “Oto ka ithana ndje notandi ku itaale; oto ka yuulukwa omushitwa gwoye.” (Job 14:15) Job okwa li e na uushili kutya Jehova okwa yuulukwa ethimbo ndyoka ta ka yumudha omupiya Gwe omudhiginini. Mbela shoka osha li owala ondjodhi yowala kuJob? Aawe nando.

Omayumuko ngoka ga li ga ningwa kuJesus oga gandja uunzapo wa yela kutya Kalunga okwa pa Jesus oonkondo dhokupangela eso. Ombiimbeli oya popi nokuli kutya Jesus oku na “iipatululo yeso.” (Ehololo 1:18, OB-1954) Onkee ano, Jesus ota ka patulula omiyelo dhoombila, ngaashi owala a li a gandja elombwelo opo emanya lyopombila yaLasarus li undulwe po.

Ombiimbeli oya popya lwiikando euvaneko ndika lyeyumuko. Omuyengeli okwa li a shilipaleke omupolofeti Daniel a ti: “‘Oto ka sa, ihe oto ka yumukila okutaamba oshipewa shoye pehulilo lyomasiku.’” (Daniel 12:13) Jesus okwa li a lombwele Aasadukayi, aapangeli Aajuda mboka ya li inaayi itaala euvaneko lyeyumuko, a ti: “‘One mwa puka, ne inamu tseya Omanyolo omayapuki nosho wo oonkondo dhaKalunga.’” (Mateus 22:23, 29) Omuyapostoli Paulus okwa ti: “Ondi na wo etegameno limwe pamwe nayo kutya Kalunga ota ka yumudha aantu ayehe kuusi, naawanawa naawinayi.” — Iilonga 24:15.

OONAKUSA OTAYA KA YUMUKA UUNAKE?

Eyumuko lyaawanawa naawinayi otali ka ningwa uunake? Omuyengeli okwa li a lombwele Daniel omulumentu omuyuuki kutya okwa li ta ka yumuka “‘pehulilo lyomasiku.’” Marta naye okwa li i itaala kutya omumwayina Lasarus, okwa li ta “‘ka yumuka mesiku lyahugunina.’” — Johannes 11:24.

Ombiimbeli otayi kwatakanitha ‘esiku lyahugunina’ nelelo lyaKristus lyUukwaniilwa. Paulus okwa nyola a ti: “Oshoka Kristus oku na okupangela, sigo Kalunga a sindi aatondi ayehe e te ya tula kohi yoompadhi dhaKristus. Omutondi gwahugunina e na okusindwa, oye eso.” (1 Aakorinto 15:25, 26) Ndika etompelo lyomungunda kutya omolwashike tu na okukala tatu galikana Uukwaniilwa waKalunga wu ye opo ehalo lyaKalunga li gwanithwe kombanda yevi.b

Ngaashi Job a li e shi shi nawa, Kalunga okwa lalakanena okuyumudha oonakusa. Uuna esiku ndyoka lya thiki, eso otali ka sindwa shili. Nokapu na we nando ogumwe te ki ipula kutya ‘Mbela eso olyo ehulilo?’