OMUUVITHI TA KUNDATHANA NOMUNEGUMBO
Omolwashike Kalunga e etha okumona iihuna ku kale po?
Mpaka otapu landula oonkundathana ndhoka tashi vulika dhi ningwe kugumwe gwomOonzapo dhaJehova naangoka ta adha megumbo. Natu tye nduno Onzapo yedhina Michelle oya yi kegumbo lyomukulukadhi gwedhina Sophia.
KALUNGA OKU UVITILE NGIINI OKUMONA IIHUNA KWETU?
Michelle: Wu uhala po Sophia. Onda nyanyukwa sho nde ku adha mo megumbo.
Sophia: Nangame onda nyanyukwa.
Michelle: Oshikando sha zi ko sho nda li mpano, otwa li twa kundathana kutya Kalunga oha kala u uvitile ngiini okumona iihuna kwetu.a Owa li wa popi kutya shika oshinima shimwe shoka wa kala twi ipula nasho ethimbo ele, unene tuu konima sho meme gwoye a li e ehamekwa moshiponga shohauto. Shitiwa, ngashingeyi meme gwoye oku li po ngiini?
Sophia: Oha ningi ngaa siku nawa siku nayi. Ihe nena oku li nawa.
Michelle: Onda nyanyukwa oku shi uva. Oshi na okukala kaashi shi oshipu shili okukala wu na omukumo monkalo yi li ngaaka.
Sophia: Eeno osho. Ethimbo limwe ohandi kala tandi ipula kutya ota kala ta mono iihuna sigo uunake.
Michelle: Oshi li paunshitwe okwiipula ngaaka. Otashi vulika to dhimbulukwa nawa kutya petalelopo lyandje lyahugunina, onda li nde ku pula epulo kutya omolwashike Kalunga e etha okumona iihuna ku tsikile ngele oku na oonkondo dhoku ku hulitha po.
Sophia: Eeno, ote dhimbulukwa.
Michelle: Manga inaatu tala eyamukulo mOmbiimbeli, natu ninge manga eendululo lyiitsa yontumba mbyoka twa li twa kundathana oshikando sha zi ko.
Sophia: Eewa.
Michelle: Oshinima shimwe, otwa li twi ilongo kutya nokuli nomupiya gumwe omudhiginini gwopethimbo lyOmbiimbeli okwa li i ipula kutya omolwashike Kalunga e etha okumona iihuna ku kale po. Ihe nonando ongawo, Kalunga ine mu ganda sho e mu pula ngaaka, nenge e mu lombwele kutya okwa pumbwa eitaalo lya kola.
Sophia: Ndyoka olya li edhiladhilo epe kungame.
Michelle: Otwa li wo twi ilongo kutya Jehova Kalunga oku tonde oku tu mona tatu mono iihuna. Pashiholelwa, Ombiimbeli otayi ti kutya aantu ye sho ya li taya mono iihuna, “okwe ya nikile uuthigwa.”b Mbela itashi hekeleke okuuva kutya Kalunga oha kala u uvite ngiini uuna tatu mono iihuna?
Sophia: Eeno, otashi hekeleke shili.
Michelle: Pehulilo, otwa li twa thiki pehulithodhiladhilo kutya kokutala koonkondo oonene ndhoka Omushiti e na, otashi ulike shili kutya ota vulu okuya mo olunyala nokuhulitha po okumona iihuna ethimbo kehe.
Sophia: Shoka osho kaandi uvite ko. Omolwashike Kalunga e etha iinima ayihe mbika iiwinayi tayi ningwa ngele oku na oonkondo dhoku yi hulitha po?
OLYE A LI TA POPI OSHILI?
Michelle: Natu ka tale eyamukulo kepulo lyoye mokutala membo lyotango lyOmbiimbeli lyaGenesis. Mbela owu shi sha kombinga yehokololo lyaAdam naEva nolyomuti gwi indikwa?
Sophia: Eeno, ondi ilonga ehokololo ndyoka mosikola yOsoondaha. Kalunga okwe li e ya lombwele kaaya lye komuti gwontumba, ihe nando ongawo oya li ya li ko komuti ngoka.
Michelle: Owu li mondjila. Ngashingeyi, natu ka tale kiiningwanima mbyoka ya li ya fala Adam naEva meyono. Iiningwanima mbyoka oyi li euliko lya yela kepulo kutya omolwashike tatu mono iihuna. Kwathela ndje wu leshe Genesis ontopolwa 3 ovelise 1 sigo 5.
Sophia: Eewa. “Eyoka olya li li na omakoto unene li vule iinamwenyo ayihe mbyoka OMUWA Kalunga e yi shiti. Eyoka olya pula omukiintu lya ti: ‘Kalunga okwe mú lombwele shili, mwaa lye komiti adhihe dhomeyana?’ Omukiintu okwa yamukula a ti: ‘Ohatu li iiyimati yomiti adhihe dhomeyana. Iiyimati yomuti ngoka gu li pokati kalyo, Kalunga okwe tu lombwele, twaaye yi lye tse twaa gume omuti; ngele tatu shi ningi, otatu ka sa.’ Eyoka olya yamukula lya ti: ‘Itamu si shili. Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.’”
Michelle: Tangi unene. Natu konakone oovelise ndhika paufupi. Tango, ndhindhilika kutya eyoka olya popi nomukiintu, Eva. Oshitopolwa shilwe shOmbiimbeli otashi ulike kutya ngoka a li a popi naye okupitila meyoka oSatana Ondiapoli ye mwene.c Satana okwa li a pula Eva kombinga yoshipango shaKalunga shi na ko nasha nomuti gwontumba. Mbela owa ndhindhilika kutya Kalunga okwa li a ti kutya oshizemo otashi ka kala shini ngele Adam naEva oya li komuti ngoka?
Sophia: Oya li taya ka sa.
Michelle: Owu li mondjila. Onkee ano, noohapu dhe ndhoka a landulitha ko, Satana okwa li a lundile Kalunga elundilo enene. Ndhindhilika shoka a ti: “Itamu si shili.” Satana okwa li tu ulike kutya Kalunga omufundja!
Sophia: Inandi uva nando onale oshinima shoka.
Michelle: Sho Satana u ulike kutya Kalunga omufundja, okwe eta po oshinima shoka sha li tashi pula okupongololwa po. Owu shi kutya omolwashike?
Sophia: Hmm. Kandi shi wo kaa.
Michelle: Eewa, pamwe nandi shi thaneke momukalo ngu. Nandi tye andola esiku limwe onde ku adha e tandi ku lombwele kutya ondi na oonkondo ndi ku vule. Ongiini to ku ulika kutya shoka tandi popi iifundja?
Sophia: Otashi vulika ndi tale kutya oonkondo dhoye odhi thike peni.
Michelle: Eeno, osho naanaa. Otashi vulika tu kuthe oshinima oshidhigu opo tu tale kutya olye pokati ketu ta vulu oku shi tumba po. Sho shene, otashi vulu okwiimonikila kutya olye e na oonkondo.
Sophia: Oshitsa shoye ondi shi wete.
Michelle: Ihe ongiini nduno ngele pehala lyokutya ondi na oonkondo ndi ku vule, onda popi kutya omunashili ndi ku vule? Shoka oshinima shi ili, hasho mbela?
Sophia: Eeno, ondi inekela osho.
Michelle: Nokuli, uunashili kawu shi oshinima shoka sha fa oonkondo, shoka tashi vulu okuulikwa nokuyelekanithwa noshinima shanathangwa.
Sophia: Owu li mondjila.
Michelle: Dhoshili, omukalo owala gumwe gwokukandula po eshongo ndyoka okweetha pu pite ethimbo lya gwana opo yalwe ye tu mone kutya olye lela omunashili.
Sophia: Oshoshili!
Michelle: Ngashingeyi, tala ishewe kehokololo ndika muGenesis. Mbela Satana okwa li ta kambadhala okukala e na oonkondo dhi vule dhaKalunga?
Sophia: Aa-e.
Michelle: Kalunga okwa li ta vulu okuulika meendelelo kutya okwa puka. Ihe pehala lyaashono, Satana okwa ti kutya ye omunashili e vule Kalunga. Kungawo, okwa li a lombwele Eva kutya, ‘Kalunga ote ku fundju, ihe ngame otandi ku lombwele oshili.’
Sophia: Oshihokithi shili.
Michelle: Ihe molwaashoka Kalunga oku na uunongo, okwa li e shi kutya omukalo gwa dhenga mbanda gwokukandula po eshongo ndyoka, okweetha pu pite ethimbo. Hugunina, osha li tashi ka yela mo nawa kutya olye ta popi oshili nolye ta fundju.
SHIKA OSHI LI OSHINIMA SHA SIMANA
Sophia: Ihe sho Eva a si, mbela shono inashi ulika kutya Kalunga okwa li ta popi oshili?
Michelle: Sho shene, oshe shi ulika. Ihe opwa li oshindji sha kwatelwa mo meshongo lyaSatana. Tala natango ovelise 5. Mbela owa ndhindhilika kutya Satana okwa li a lombwele ishewe Eva shike?
Sophia: Okwa li a ti kutya ngele okwa li komuti, omeho ge oga li taga ka tonata.
Michelle: Eeno, nokwa ti ishewe kutya okwa li ta ka ‘fa Kalunga mokutseya uuwanawa nuuwinayi.’ Onkee Satana okwa ti kutya Kalunga okwa li ta tindile aantu oshinima oshiwanawa.
Sophia: Hambaa.
Michelle: Naashoka osha li wo eshongo enene.
Sophia: Owa hala okutya shike?
Michelle: Shi ikolelela koohapu dhe, Satana oku ulike kutya Eva nosho wo yalwe, aantu ayehe otaya kala ye li nawa itaaya pangelwa kuKalunga. Moshinima shika natango, Jehova okwa li e shi kutya omukalo gwa dhenga mbanda okukandula po eshongo ndyoka okweetha Satana u ulike ngele shono a li a popi oshoshili tuu. Onkee ano Kalunga okwe etha Satana a pangele uuyuni mbuka ethimbo lyontumba. Shono otashi ulike kutya omolwashike tu wete okumona iihuna okundji mokati ketu, shoka oshi li ngaaka molwaashoka Satana oye omupangeli shili gwuuyuni, ihe keshi Kalunga.d Ihe opu na onkundana ombwanawa.
Sophia: Oyini ndjono?
Michelle: Ombiimbeli otayi longo ooshili ndhika dhi li mbali dha dhenga mbanda kombinga yaKalunga. Yotango, Jehova oha kala e na ko nasha natse uuna tatu mono iihuna. Pashiholelwa, natu dhiladhile koohapu dhomukwaniilwa David ndhoka dhi li mEpisalomi 31:7. David okwa li a tsakaneke omaupyakadhi ogendji monkalamwenyo ye, ihe tala kwaashoka a li a popi megalikano lye. Kwathela ndje wu leshe ovelise ndjoka?
Sophia: Eewa. Otayi ti ngeyi: “Otandi nyanyukwa nokutanta omolwesilohenda lyoye. Ou wete okuhepekwa kwandje nowa tseya uudhigu wandje.”
Michelle: Osha yela kutya nonando David okwa li a hepekwa, osha li she mu hekeleke okutseya kutya Jehova okwa li e wete oonkalo adhihe moka a li. Mbela shoka ohashi ku hekeleke, ano edhiladhilo kutya Jehova oku wete kehe shimwe, kutya nduno uuwehame wetu wopamaiyuvo mboka aantu yamwe tashi vulika itaaye wu uvu ko naanaa?
Sophia: Eeno, ondi shi wete.
Michelle: Oshili ontiyali ya dhenga mbanda oyo kutya Kalunga ite ke etha nando okumona iihuna ku kale po sigo aluhe. Ombiimbeli otayi longo kutya masiku ota ka hulitha po elelo lyaSatana ndyoka lya kolokosha. Nota ka hulitha po iinima ayihe iiwinayi mbyoka ya ningwa, mwa kwatelwa okumona iihuna hoka ngoye nameme gwoye mwa mona. Mbela itandi vulu okugaluka moshiwike tashi ya ndi ye ndi ku ulukile kutya omolwashike tatu vulu okukala nuushili kutya masiku Kalunga ota ka hulitha po okumona iihuna akuhe?e
Sophia: Shono oshi li nawa. ▪
Mbela opu na oshikundathanwa shopaMbiimbeli shoka ho ipula nasho? Mbela oho kala wa hala okuuva oshindji nenge to ipula kombinga yomalongo nenge yiinima yopalongelokalunga mbyoka hayi ningwa kOonzapo dhaJehova? Ngele osho, ino ongaonga okupula gumwe gwomOonzapo dhaJehova. Ota ka kala a nyanyukwa oku shi kundathana nangoye.
a Tala oshitopolwa “Omuuvithi ta kundathana nomunegumbo — Kalunga oku na ko ngaa nasha natse sho tatu mono iihuna?” moshifo shika she 1 Septemba 2013. Otashi adhika wo ko-www.jw.org/ng.
b Tala Jesaja 63:9, OB-1954.
c Tala Ehololo 12:9.
d Tala Johannes 12:31; 1 Johannes 5:19.
e Opo wu mone uuyelele wa gwedhwa po, tala ontopolwa 9 yembo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova. Oli li wo ko-www.jw.org/ng.