Kalunga oku na ko ngaa nasha natse sho tatu mono iihuna?

OMOLWASHIKE E ETHELE SHI NINGWE?

Michelle: Onawa tuu! Edhina lyandje ongaye Michelle.

Sophia: Ongaye Sophia.

Michelle: Nena otandi kundathana naantu momudhingoloko gweni mokafo haka. Oke na oshipalanyolo tashi ti Mbela owa hala okutseya oshili? Koye oko haka.

Sophia: Okombinga yOmbiimbeli?

Michelle: Ee. Tala komapulo gahamano ngoka ge li kombanda. Olini lyomomapulo ngano—

Sophia: Nandi ku kwate melaka. Otwi ihepeke owala okupopya nangame.

Michelle: Omolwashike to tile ngawo?

Sophia: Muushili wo wene ngame inaandi itaala naanaa muKalunga.

Michelle: Onda pandula sho to lombwele ndje oshili. Nandi ku pule, mbela owa kala aluhe inoo itaala muKalunga?

Sophia: Onda putuka ngaa handi yi kongeleka. Ashike onda ninga ethimbo ele inaandi enda ko.

Michelle: Eewa. Inandi ya nando oku ku thindila eitaalo lyandje. Ihe ondi na epulo. Mbela opu na oshinima shontumba she ku ningitha wu kale inoo itaala muKalunga?

Sophia: Ee. Oomvula 17 dha piti meme okwa li moshiponga shohauto.

Michelle: Akutu hewa! Okwa monena mo oshiponga?

Sophia: Ee, sigo okunena okwa sa ombanda.

Michelle: Oshi yemateka shili. Oshi na okukala she ku uvitha nayi lela.

Sophia: Nayi nee! Nomolwaasho handi kala tandi ipula kutya ngele Kalunga oko e li, omolwashike nee e ethele shi ningwe? Omolwashike e tu tala owala tatu mono iihuna ngeyi?

MBELA OSHA PUKA OKUPULA KUTYA OMOLWASHIKE?

Michelle: Inashi puka nando okukala wu uvite ngaaka noshi li paunshitwe okwiipula ngaaka. Uuna tatu mono iihuna inashi puka okwiipula kutya omolwashike. Nokuli aalumentu naakiintu aadhiginini yamwe yopethimbo lyOmbiimbeli oya li hayi ipula nasho.

Sophia: Oshili?

Michelle: Ee. Ongiini ngele onde ku ulukile oshiholelwa shimwe okuza mOmbiimbeli?

Sophia: Oshi li nawa.

Michelle: Ndhindhilika shoka omupolofeti omudhiginini Habakuk a pula Kalunga muHabakuk ontopolwa 1 ovelise 2 no 3 a ti: “OMUWA, sigo uunake ndi na oku ku kugila ekwatho ngoye itoo pulakene, ngoye itoo tu hupitha mo momathiminiko? Omolwashike to talitha ndje omalwa?” Mbela omapulo ngoka inaga faathana naangoka hwi ipula nago?

Sophia: Oga faathana.

Michelle: Kalunga ka li a ganda Habakuk sho e mu pula omapulo ngaka noine mu lombwela kutya okwa pumbwa eitaalo lya kola.

Sophia: Oshihokitha shili.

JEHOVA KE HOLE TATU MONO IIHUNA

Michelle: Ombiimbeli otayi ti kutya Kalunga oku wete sho tatu mono iihuna noku na ko nasha natse.

Sophia: Kandi uvite kutya owa hala okutya ngiini.

Michelle: Andiya ndi ku ulukile oshiholelwa muEksodus 3:7. Oto vulu okulesha po.

Sophia: Eewa. Otagu ti: “OMUWA okwa ti: ‘Onda mono, nkene aantu yandje taa hepekwa muEgipiti; ondu uvu taa kugile emanguluko [kaathiminiki] yawo. Onda tseya omahepeko gawo agehe.’”

Michelle: Tangi. Okutala kwaashono sha popiwa menyolo, mbela Kalunga oku wete ngaa sho tatu mono iihuna?

Sophia: Ee, okwa fa ngaa e shi wete.

Michelle: Nokuli ke wete owala shoka tashi ningwa. Oshoka ngele owa tala ishewe pehulilo lyovelise ndjoka, Kalunga ota ti: ‘Onda tseya omahepeko gawo agehe.’ Mbela oohapu ndhoka odha fa dhomuntu kee na ohole nenge kee na ko nasha?

Sophia: Aaye.

Michelle: Kalunga ke wete owala omaupyakadhi getu, ihe oha kala wo e gu uvitile nayi.

Sophia: Hambaa!

Michelle: Tu na shika momadhiladhilo, natu leshe kombinga yoshiningwanima oshikwawo sho oshigwana shaKalunga sha li tashi mono iihuna. Oshi li mAatokolihapu 10:16. Ovelise ndjika otayi hulitha ngeyi: ‘Oye nokwe ehamenwa uudhigu waIsraeli.’ Sho wa tala, Kalunga okwa li ngaa e na mpo u uvite sho oshigwana she tashi mono iihuna?

Sophia: Ovelise oya fa osho tayi ti.

Michelle: Ano Kalunga oku na ko nasha natse noonkondo noke hole tatu mono iihuna. Uuna tu uvite nayi naye oku uvite nayi.

OMOLWASHIKE INAA NINGA PO SHA?

Michelle: Manga inaandi ya, onda hala oku ku lombwela ishewe oshinima shimwe.

Sophia: Eewa.

Michelle: Natu tale shoka Ombiimbeli tayi tu lombwele kombinga yoonkondo dhaKalunga. Ovelise ndjoka nda hala tu leshe oyi li muJeremia 10:12. Oto vulu okulesha po?

Sophia: Ee. Otayi ti: “OMUWA okwa shiti evi koonkondo dhe; nokuunongo we okwa umbu uuyuni nokwa alele omagulu.”

Michelle: Tangi. Natu tale nawa kovelise ndji. Mbela Kalunga okwa li a pumbwa oonkondo odhindji opo a shite ewangandjo enenenene naashihe shi li mo?

Sophia: Osho naanaa.

Michelle: Ngele nani Kalunga oku na oonkondo okushita kehe shimwe she tu dhingoloka, mbela inatu tegelela wo a kale e na oonkondo okupangela kehe shimwe meshito?

Sophia: Osha yela.

Michelle: Dhiladhila ishewe konkalo yameme gwoye. Omolwashike hashi ku uvitha nayi oku mu tala ta mono iihuna?

Sophia: Omolwaashoka ondi mu hole, oye meme!

Michelle: Ando owa li wu na oonkondo dhoku mu aludha, ando oto shi ningi?

Sophia: Ee.

Michelle: Dhiladhila owala kutya shoka otashi ti shike. Ombiimbeli otayi ti kutya Kalunga oku tu wete sho tatu mono iihuna nohe tu uvile uukwawo wanankali noku na oonkondo odhindji. Dhiladhila owala kutya Kalunga oha kala i idhidhimika shi thike peni sho ihaa katuka onkatu nziya a hulithe po okumona iihuna kwetu?

Sophia: Inandi shi dhiladhila nale.

Michelle: Mbela otashi vulika e na omatompelo omawanawa sho inaa katuka natango onkatu a hulithe po omaupyakadhi getu?a

Sophia: Otashi vulika.

Michelle: Pamwe nandi galuke ishewe oshikando shilwe tu kundathane oshinima shika muule, shaashi ondu uvite ongodhi yoye tayi lili.

Sophia: Eewa, otandi ke shi pandula. Tangi.b