Sho Uukwaniilwa wa kala nokupangela oomvula 100, mbela oshe ku guma ngiini?

1, 2. Uukwaniilwa waKalunga otawu ka gwanitha po shike, nomolwashike tatu vulu okukala tu na einekelo kutya otawu ya?

ESIKU limwe pokwenye mo 31 E.N., manga Jesus Kristus a li kondundu yi li popepi naKapernaum, okwa li a longo aalanduli ye ya kale haya galikana ngeyi: “Uukwaniilwa woye nawu ye.” (Mat. 6:10, NW) Kunena, oyendji oya limbililwa ngele Uukwaniilwa mboka owu na ngaa esiku nawu ke ye. Ihe tse otu na einekelo kutya omagalikano getu gUukwaniilwa waKalunga wu ye otaga ka yamukulwa.

² Jehova ota ka longitha Uukwaniilwa mboka opo a hanganithe aanegumbo lye yomegulu noyokombanda yevi. Elalakano lyaKalunga ndyoka otali ka gwanithwa. (Jes. 55:10, 11) Nokuli Jehova okwa ninga nale Omukwaniilwa pethimbo lyetu. Iiningwanimwa yituntula mbyoka ya ningwa momukokomoko gwoomvula 100 dha ka pita oye shi ulika. Kalunga ota longo iilonga iinene niikumithi te yi longele aapangelwa ye aadhiginini omamiliyona. (Sak. 14:9; Eh. 15:3) Ihe okuninga kwaJehova Omukwaniilwa, okwa yooloka ko kokuya kUukwaniilwa waKalunga mboka Jesus e tu longa tu galikane. Eyooloko lini li li pokati kiinima mbyoka iyali, nolye tu guma ngiini?

OMUKWANIILWA NGOKA A LANGEKWA PO KUJEHOVA OKWA KATUKA ONKATU

3. (a) Uunake Jesus a li a langekwa po e li Omukwaniilwa, nopeni? (b) Ongiini to vulu okuulika kutya Uukwaniilwa owa dhikwa po shili mo 1914? (Tala enyolo lyopevi.)

³ Lwokuuka pehulilo lyethelemumvo eti-19, uuyelele owa tameke tawu yela kombinga yehunganeko ndyoka lya li lya hunganekwa konima yoomvula 2 500 kuDaniel tali ti: “Pomasiku gaakwaniilwa mbeyaka Kalunga nguka komegulu ota ka dhika uukwaniilwa itaawu ka hula po nando.” (Dan. 2:44, NW) Aakonakonimbiimbeli oya kala nokupopya uule womimvo omilongo kutya omumvo 1914 otagu ka kala omundhindhilikwedhi. Aantu oyendji pethimbo ndyoka oya li ye na omukumo. Omunyoli gumwe okwa ti: “Momumvo 1914 aantu muuyuni oya li ya tegamena iinima oyindji nomauvaneko ogendji.” Ihe sho Iita yoTango yUuyuni ya tameke konima yethimbo momumvo ngoka, ehunganeko lyOmbiimbeli olya li lya gwanithwa. Oondjala, omakakamo gevi nomikithi kombinga noombinga nosho wo egwanitho lyomahunganeko galwe gOmbiimbeli, oyu ulike shili kutya Jesus Kristus okwa tameka okupangela megulu e li Omukwaniilwa gwUukwaniilwa waKalunga mo 1914.a Sho Jehova a langeke po Omwana e li Omukwaniilwa gwopaMesiasa, Jehova okwa li shili a ningi Omukwaniilwa meityo epe.

4. Omukwaniilwa ngoka omupe a langekwa po okwa katuka onkantu yini, nokwa ka ninga shike konima yaashoka?

⁴ Oshilonga shotango shoka Omukwaniilwa omupe ngoka a langekwa po kuKalunga a li e na okulonga osha li okukondjitha Satana, Omutondi omunene gwaHe. Jesus pamwe naayengeli ye oya li yu umbu mo megulu Ondiapoli noompwidhuli dhayo. Shika osha li she eta enyanyu enene megulu, ihe osha li tashi ka kala ethimbo lyiihuna kombanda yevi. (Lesha Ehololo 12:7-9, 12.) Sha landula ko, Omukwaniilwa okwa tameke okuyeleka aapangelwa ye yokombanda yevi, oku ya longa, noku ya unganeka ya longe ehalo lyaKalunga. Natu ka tale nkene okuvulika kwawo komalombwelo gaJesus kwe tu tulila po oshiholelwa oshiwanawa kunena.

OMUKWANIILWA GWOPAMESIASA OKWA YELITHA AAPANGELWA YE AADHIGININI

5. Eyogolo lini lya li lya ningwa pokati ko 1914 nopetameko lyo 1919?

⁵ Konima sho Omukwaniilwa ngoka a langekwa po u umbu mo Satana noompwidhuli dhe megulu, Jehova okwa li a lombwele Jesus a konakone nokuyelitha onkalo yopambepo yaalanduli ye kombanda yevi. Omupolofeti Maleaki okwa popi kutya shika oshi li eyogolo lyopambepo. (Mal. 3:1-3) Ondjokonona otayi holola kutya shika osha li sha ningwa pokati ko 1914 nopetameko lyo 1919.b Opo tu kale oshitopolwa shuukwanegumbo waJehova womeshito alihe, otu na okukala twa yogoka nenge tu tye tu li aayapuki. (1 Pet. 1:15, 16) Otu na okwiikaleka kokule nenyateko kehe lyomalongelokalunga giifundja nenge lyoopolotika dhomuuyuni mbuka.

6. Iikulya yopambepo ohayi gandjwa okupitila mulye, nomolwashike ya simanenena?

⁶ Opo nduno Jesus okwa li a longitha oonkondopangelo dhe dhopaukwaniilwa a langeke po “omupiya omudhiginini nomunandunge.” (NW) Omupiya nguka okwa li ta ka gandja aluhe iikulya yopambepo kwaayehe mboka ye li “oshigunda shimwe” tashi tonatelwa kuJesus. (Mat. 24:45-47; Joh. 10:16) Okuza mo 1919, okangundu okashona kaamwatate aagwayekwa oka kala taka gwanitha po nuudhiginini oshilonga shako shokupalula “aamati ooyakwawo.” Iikulya yopambepo oyindji mbyoka hatu pewa okupitila mokangundu hoka ohayi tu palutha opo tu tsikile okukolekaeitaalo lyetu. Ohayi tu kwathele opo tu kale twa tokola toko tu kale twa yogoka pambepo, pamikalo, pamadhiladhilo nosho wo palutu. Iikulya mbika yopambepo ohayi tu longo wo nohayi tu dheula opo tu ninge oshindji miilonga ya simanenena mbyoka tayi longwa kombanda yevi kunena. Mbela oho longitha ngaa omasiloshimpwiyu agehe ngoka?

OMUKWANIILWA OKWA LI A TAMEKE OKULONGA AAPANGELWA YE NKENE YE NA OKUUVITHA MUUYUNI AWUHE

7. Iilonga ya simana yini Jesus a li a tameke sho a li kombanda yevi, niilonga mbika otayi ka tsikila sigo uunake?

⁷ Sho Jesus a tameke uukalele we kombanda yevi, okwa ti: ‘Onkundana ombwanawa yUukwaniilwa waKalunga ondi na oku yi uvitha wo miilando yilwe, oshoka osho naanaa shika Kalunga a tumu ndje, ndi shi ninge.’ (Luk. 4:43, yelekanitha NW.) Muule woomvula ndatu netata, Jesus okwa kala a pititha komeho iilonga mbika monkalamwenyo ye. Okwa li a lombwele aalongwa ye, a ti: “Mokweenda kweni uvitheni, mu ya lombwele mu tye: ‘[Uukwaniilwa wegulu we ya popepi, NW].’” (Mat. 10:7) Konima sho a yumuka, Jesus okwa li a lombwele aalanduli ye kutya oya li taya ka taandelitha etumwalaka ndika ‘miilongo ayihe yokombanda yevi.’ (Iil. 1:8) Okwa li e yu uvanekele kutya okwa li ta ka kwatela komeho ye mwene iilonga mbika ya simanenena sigo naanaa opethimbo lyetu. — Mat. 28:19, 20.

8. Omukwaniilwa okwa li a ningitha ngiini aapangelwa ye kombanda yevi ya katuke onkatu?

⁸ Mo 1919, “onkundana ombwanawa” oya li ya kwatela mo eityo epe. (Mat. 24:14, NW) Omukwaniilwa okwa li ta pangele megulu, nokwa li a gongele okangundu okashona kaapangelwa yokombanda yevi ya yogolwa. Oya li ya katuka metsokumwe nelombwelo lyaJesus lya yela, yu uvithe kombanda yevi onkundana ombwanawa yUukwaniilwa waKalunga mboka wa dhikwa po. (Iil. 10:42) Pashiholelwa, muSeptemba 1922, aayambidhidhi yUukwaniilwa tayi ihilile 20 000 oya li ya gongala poshigongi shopaigwana moCedar Point, Ohio, U.S.A. Dhiladhila owala kenyanyu ndyoka ya li ye na sho omumwatate Rutherford a gandja oshipopiwa shoshipalanyolo “Uukwaniilwa,” e ta ti: “Tseyeni kutya Omukwaniilwa ota pangele nale! One aakalelipo ye yoku mu tseyitha. Onkee ano, uvitheni, uvitheni, uvitheni Omukwaniilwa nuukwaniilwa we!” Aakalipo omayuvi gaali oya li ya tokola okukutha ombinga “mEsiku lyIilonga” li ikalekelwa, taya talele po omagumbo sigo okwaangoka ga li kokule nookilometa 72 okuza pehala lyoshigongi. Omulumentu gumwe ngoka a li a gumwa kwaashono sha popiwa, okwa ti: “Kandi na esiku ndi dhimbwe nando etumwalaka ndyoka lyokuuvitha Uukwaniilwa nosho wo uulaadhi waamboka ya li po!” Haye awike a li u uvite ngaaka.

9, 10. (a) Omalongekidho geni ga ningwa opo ku dheulwe aauvithi yUukwaniilwa? (b) Ngoye paumwene owa mona uuwanawa wuni medheulo ndika?

⁹ Mo 1922, aauvithi yUukwaniilwa ye vulithe 17 000 oya li taya uvitha miilongo 58 kongonga yevi. Ihe oya li ya pumbwa okudheulwa. Methelemumvo lyotango, Omukwaniilwa ngoka a langekwa po okwa li a pe aalongwa ye omalombwelo ga yela kombinga yaashoka ye na okuuvitha, nonokutya ongiini nopeni. (Mat. 10:5-7; Luk. 9:1-6; 10:1-11) Mokulandula omukalo ngoka kunena, Jesus oha shilipaleke kutya ayehe mboka haya kutha ombinga miilonga yokuuvitha Uukwaniilwa oya pewa omalombwelo nkene ye na okuuvitha nosho wo iikwa niipangitho mbyoka ya pumbwa yu uvithe nawanawa. (2 Tim. 3:17) Jesus ota dheulile aapangelwa ye uukalele okupitila megongalo lyopaKriste. Omukalo gumwe moka he ya dheula okupitila mOsikola yOkudheula Aauvithi, ndjoka hayi ningwa momagongalo ge vulithe 111 000 muuyuni awuhe. Ngashingeyi aauvithi ye vulithe poomiliyona heyali ohaya tula miilonga omayele ngoka haya mono mosikola ndjoka noye shi nawa nkene ye na okuuvitha nokulonga momukalo ngoka gwo opalela aantu ‘ayehe.’ — Lesha 1 Aakorinto 9:20-23.

¹⁰ Kakele kOsikola yOkudheula Aauvithi, opu na wo oosikola dhilwe dhopaMbiimbeli ndhoka dha longekidhwa, opo ku dheulwe aakuluntugongalo, aakokolindjila, aamwatate inaaya hokana, aaihokani Aakriste, Iilyo yOkomitiye yOshitayimbelewa naakulukadhi yawo, aatonateli aayendi naakulukadhi yawo nosho wo aatumwa.c Aalongwa yamwe mboka ya li ya kala pOsikola yOmbiimbeli yOkudheula Aaihokani Aakriste oya li ya popi nkene ya pandula osikola ndjika, ya ti: “Edheulo ndyoka twa mona li ikalekelwa olya koleka ohole yetu yokuhola Jehova nolye tu kwathela tu kale tu shi nawa okukwathela yalwe.”

11. Omolwashike aauvithi yUukwaniilwa ya vula okwiidhidhimika nonando taya patanekwa?

¹¹ Omutondi Satana oku wete oonkambadhala ndhoka tadhi ningwa okutamununa mo Iilonga mbika yUukwaniilwa yokuuvitha noyokulonga aantu muuyuni awuhe. Oha ponokele etumwalaka lyUukwaniilwa, naamboka taye li taandelitha a kambadhale okuhulitha po iilonga mbyoka, te shi ningi shu ukilila nenge momukalo gwiineya. Ihe oonkambadhala dhomutondi itadhi pondola. Jehova okwa tula po omwana a “pangele aapangeli ayehe yomegulu, aaleli aanankondo naawa.” (Ef. 1:20-22) E li Omukwaniilwa, Jesus oha longitha oonkondopangelo dhe a gamene noku wilike aalongwa ye, opo a shilipaleke kutya ehalo lyaHe otali gwanithwa.d Onkundana ombwanawa otayi uvithwa, naantu omamiliyona mboka ye na omitima omiwanawa otaya longwa oondjila dhaJehova. Kashi shi tuu uuthembahenda kutse sho tu na ombinga miilonga mbika iinene!

OMUKWANIILWA OKWA LI U UNGANEKE AAPANGELWA YE YA LONGE OSHILONGA OSHINENE

12. Yelitha omalunduluko gamwe ngoka ga ningwa mehangano sho Uukwaniilwa wa dhikwa po.

¹² Okuza sho Uukwaniilwa wa dhikwa po mo 1914, Omukwaniilwa okwa kala nokuyelitha omukalo moka aapiya yaKalunga yu unganekwa ya longe ehalo lyaHe. (Lesha Jesaja 60:17.) Mo 1919, omuwiliki gwiilonga okwa li a langekwa po megongalo kehe a kwatele komeho iilonga yokuuvitha. Nomo 1927, opwa li pu unganekwa iilonga yokuuvitha egumbo negumbo Osoondaha kehe. Aayambidhidhi yUukwaniilwa oya li ya tsuwa omukumo ya longe oshilonga shoka oshinene, sho ya taamba ko edhina lyopamanyolo, Oonzapo dhaJehova, mo 1931. (Jes. 43:10-12) Aakwanegongalo oyo ya li haya hogolola aalumentu yoshininakugwanithwa megongalo, ihe mo 1938 okuhogolola hoka okwa li kwa pingenwa po kokulangekwa po shi ikolelela komanyolo. Mo 1972, egongalo olya li hali tonatelwa kolutu lwaakuluntugongalo pehala lyomukuluntugongalo gumwe. Aalumentu ayehe mboka ya pyokoka oya li ya ladhipikwa ya lalakanene okuninga ‘aasita yoshigunda shoka ye shi pewa kuKalunga.’ (1 Pet. 5:2) Mo 1976, Olutuwiliki olwa li lwa unganekwa mookomitiye hamano, opo dhi tonatele iilonga yUukwaniilwa muuyuni awuhe. Omukwaniilwa ngoka a langekwa po kuJehova okwa kala nokuunganeka aapangelwa yUukwaniilwa momukalo ngoka tagu wilikwa kuKalunga.

13. Shoka sha pondolwa kelelo lyUukwaniilwa muule woomvula 100 osha guma ngiini onkalamwenyo yoye?

¹³ Dhiladhila owala shoka Omukwaniilwa gwopaMesiasa a pondola muule woomvula 100 dhotango dhepangelo lye. Okwa yogola oshigwana omolwedhina lyaJehova. Okwa kala ta wilike iilonga yokuuvitha onkundana ombwanawa yUukwaniilwa miilongo 239 nokwa kala ta longo aantu omamiliyona oondjila dhaJehova. Okwa hanganitha aapangelwa aadhiginini ye vulithe poomiliyona heyali, kehe gumwe ti igandja nehalo ewanawa a longe ehalo lyaHe. (Eps. 110:3) Dhoshili, iilonga yaJehova mbyoka ya longwa okupitila mUukwaniilwa wopaMesiasa iinene niikumithi. Otwa tegelela nokuli iiningwanima yituntula noonkondo!

OMALALEKO NUUYAMBA GOMONAKUYIWA NGOKA TAGE KE ETWA KUUKWANIILWA WOPAMESIASA

14. (a) Ohatu pula Kalunga a ninge shike uuna tatu galikana: “Uukwaniilwa woye nawu ye”? (b) Enyolo lyetu lyomumvo 2014 olini, nomolwashike tali opalele?

¹⁴ Nonando Jehova okwa li a langeke po Omwana, Jesus Kristus, e li Omukwaniilwa gwopaMesiasa mo 1914, halyo eyamukulo li ihwa po lyegalikano lyetu “Uukwaniilwa woye nawu ye.” (Mat. 6:10, NW) Ombiimbeli oya kala ya hunganeka kutya Jesus okwa li ta ka ‘pangela mokati kaatondi ye.’ (Eps. 110:2) Omapangelo gopantu ngoka ge li kohi yepangelo lyaSatana oge li natango ompinge nUukwaniilwa. Uuna tatu galikana Uukwaniilwa waKalunga wu ye, otatu pula Kalunga opo Omukwaniilwa gwopaMesiasa nosho wo aapangeli pamwe naye ya hulithe po omapangelo gopantu nokuhanagula po aapataneki mboka ye li ompinge nUukwaniilwa. Oshiningwanima shika otashi ka kala egwanitho lyehunganeko lyaDaniel 2:44 ndyoka tali ti kutya Uukwaniilwa waKalunga ‘otawu ka nyanyagula notawu ka teyagula omaukwaniilwa agehe noku ga hulitha po.’ (NW) Otawu ka hulitha po aatondi yUukwaniilwa yopapolotika. (Eh. 6:1, 2; 13:1-18; 19:11-21) Ethimbo lyaashika shi ningwe oli li popepi noonkondo. Shika itashi opalele tuu sho enyolo lyetu lyomumvo 2014 lya kuthwa muMateus 6:10: “Uukwaniilwa woye nawu ye,” oshoka momumvo moka omo Uukwaniilwa waKalunga wa dhikwa megulu tawu ka gwanitha oomvula 100!

15, 16. (a) Iiningwanima yini yituntula tayi ka ningwa pethimbo lyElelo lyOomvula Eyuvi? (b) Jesus ota ka ninga shike lwahugunina e li Omukwaniilwa gwopaMesiasa, naashoka otashi ka guma ngiini elalakano lyaJehova li na ko nasha neshito lye alihe?

¹⁵ Konima ngele Omukwaniilwa gwopaMesiasa a hanagula po aatondi yaKalunga, ota ka umbila Satana noompwidhuli dhe molumbogo lwoomuule moka taya ka kala uule woomvula eyuvi limwe. (Eh. 20:1-3) Sho enwethomo lyaSatana noompwidhuli dhe itaali ka kala po, Uukwaniilwa otawu ka tsikila nokweeta omauwanawa okupitila mekuliloyambo lyaJesus notawu ka hulitha po iilanduliko yuulunde waAdam. Omukwaniilwa ota ka yumudha aantu omamiliyona ogendjigendji mboka ya kotha moombila nota ka tula po elandulathano lyoku ya longa kombinga yaJehova. (Eh. 20:12, 13) Evi alihe otali ka ninga oparadisa ngaashi oshikunino shaEden. Aantu ayehe aadhiginini otaya ka kala ya gwanenena pethimbo ndyoka.

¹⁶ Sho taku ka thikwa pehulilo lyElelo lyaKristus lyOomvula Eyuvi, Uukwaniilwa wopaMesiasa otawu ka adhika nale wa gwanitha po omalalakano gawo. Opo nduno Jesus ota ka shunitha Uukwaniilwa kuHe. (Lesha 1 Aakorinto 15:24-28.) Pokati kaJehova noyana yokombanda yevi itapu ka pumbiwa we omupokati. Oyanamati yaKalunga yomegulu noyana yokombanda yevi otaya ka hanganithwa naHe gwomegulu ye li oshitopolwa she shuukwanegumbo weshito alihe.

17. Owa tokola toko okuninga shike shi na ko nasha nUukwaniilwa?

¹⁷ Iiningwanima yituntula mbyoka ya ningwa muule woomvula 100 dhepangelo lyUukwaniilwa otayi tu shilipaleke kutya Jehova ota pangele nosho wo kutya elalakano lye li na ko nasha nevi otali ka gwanithwa. Onkee ano, natu tsikileni okukala aapangelwa ye aadhiginini nokuuvitha kombinga yOmukwaniilwa nUukwaniilwa we. Shika otatu shi ningi tu na einekelo thiluthilu kutya masiku Jehova ota ka yamukula egalikano lyetu kutya: “Uukwaniilwa woye nawu ye”!