ONDJOKONONA
Uunkundi wandje ohawu nkondopaleke ndje
Mokutala kolutu lwandje ndwoka halu vihi ookilograma 29 kaalu na omwago lu li mokatemba, kapu na ngoka a li ta ka dhiladhila kutya ondi na oonkondo. Ihe sho olutu lwandje talu kanitha oonkondo, oonkondo dhomeni ohadhi kwathele ndje ndi pule komeho. Nandi mu kuthile ko kunkene oonkondo nuunkundi wandje wa ninga onkalamwenyo yandje yi kale yi na eityo.
Sho ndi na oomvula ne
Mokudhiladhila kethimbo nda li omushona ohaku dhimbulukitha ndje omathimbo omawanawa mokagumbo okashona kuumbugantu waFulaanisa, hoka aavali yandje ya li ya kala. Tate okwa li a ningile ndje ekwilika, nonda li ndi hole okumatuka moshikunino. Mo-1966, Oonzapo dhaJehova odha li dha talele po pegumbo lyetu nodha li dha ningi oonkundathana natate ethimbo ele. Konima owala yoomwedhi heyali, okwa li a tokola toko okuninga Onzapo. Nziya konima yaashono meme okwa li a landula moshinkoti shatate, noya li ya putudhile ndje muukwanegumbo wu na ohole.
Uupyakadhi wandje owa li wa tameke nziya konima sho twa shuna koSpania, hoka kwa za aavali yandje. Onda tameke okukala ndu uvite uuwehame tawu tsana miikaha nomoongolo. Konima yoomvula mbali sho twa kala nokuya koondohotola odhindji, otwe ki itsa ondohotola yimwe yuuvu wopomatsakaneno gomasipa, ndjoka ya popi ya nika oluhodhi, ya ti: “Ethimbo olya pwa po.” Meme okwa tameke okulila. Omautumbulilo ihaandi ga uvu shito ngaashi “juvenile polyarthritis”a nosho wo “autoimmune chronic illness,” (omukithi gwa kwata miiti gwoosele dholutu hadhi ipilukile po) onda kala ndi wu uvite tawu iyendulula mondunda moka mwa li mwa talala nomu na omilema. Nonando kanda li ndi uvite ko naanaa ndi li okakadhona ke na oomvula omulongo, onda li nda dhimbulula kutya onkundana ndjoka ombwinayi.
Ndohotola okwa li a ningi eetopo ndi ye koshipangelo shaanona moka hamu kala mboka ye na uuvu woshinamenena. Sho owala nda thiki, metungo moka muuwinayi omo owala mwa teya ndje omukumo. Uutekuvuliko owa li hawu dhengele. Oosesitela odha kulula ndje e tadhi zaleke ndje ohema yoshipangelo ya hwalukuta. Ondi ipula nda kengeleka tandi ti: ‘Ongiini tandi vulu okwiidhidhimikila onkalamwenyo muka?’
JEHOVA OKWA LI A NINGI GWOSHILI KUNGAME
Molwaashoka aavali yandje oya li ya longo ndje okulongela Jehova, onda li nda tindi okukutha ombinga momikalondjigilile dhOshikatoolika moshipangelo. Osha li oshidhigu koosesitela okuuva ko kutya omolwashike nda li inaandi hala okukutha ombinga. Ondi indile Jehova kaa thige ndje po, nokonima onda ka kala ndi wete kutya ondi li miikaha ye a gamena ndje, ngaashi omusamane omunahole a papatela okamwana.
Aavali yandje oya li ya pitikwa okutalela ndje po ethimbo eshona mOolyomakaya. Oya li haya etele ndje iileshomwa yopaMbiimbeli ndi leshe opo ndi kaleke eitaalo lyandje lya kola. Olundji aanona kaya li haya vulu okukala nomambo gawo yene, ihe oosesitela odha li dhe etha ndje ndi kale nogandje nosho wo nOmbiimbeli yandje, ndjoka nda li handi lesha esiku kehe. Onda li wo handi popi nuukadhona wulwe kombinga yetegameno lyandje lyokukala nomwenyo sigo aluhe mOparadisa kombanda yevi, moka kaapu na nando ogumwe te ke ehama. (Ehololo 21:3, 4) Kakele kokukala nda yemata nokukala ndu uvite owike omathimbo gamwe, onda li nda nyanyukwa sho eitaalo neinekelo lyandje muJehova lya li tali kolo.
Konima yoomwedhi hamano oonde, oondohotola odha li dha laleke ndje ndi ye kegumbo. Uuwehame wandje kawa li wa hwepopala, ihe onda li nda nyanyukwa okushuna kaavali yandje. Omatsakaneno gandje ogi itonyo unene, nonda li handi ehama unene. Sho nda thiki poomvula dhomulongo nasha onda li nda nkundipala noonkondo. Ihe onda li nda ninginithwa sho ndi na oomvula 14, nda tokola toko okulongela Tate gwandje gwomegulu ngaashi tandi vulu. Ihe omathimbo gamwe onda li handi kala nda kanitha einekelo muye. Onda galikana nda ti: “Omolwashike? Alikana aludha ndje. Ku wete ndje sho ndi li muuwehame wu thike mpaka?”
Oomvula dhomulongo nasha odha li oondhigu kungame. Onda li ndi na okwiitaala kutya itandi hwepopala. Aluhe onda li handi iyelekanitha nookuume kandje mboka ye na uukolele notaya nyanyukilwa onkalamwenyo. Onda li ndi wete kaandi na omwago, nonda kala owala ndi ihunya. Ihe nonando oongawo, uukwanegumbo wetu nosho wo ookuume kandje oya li ya ambidhidha ndje. Otandi dhimbulukwa nenyanyu Alicia, ngoka omukuluntu kungame, pokati ketu pwa pita oomvula 20, ngoka a ka ninga kuume kandje kashili. Okwa li a kwathele ndje kaandi kale owala ndi wete uuwehame wandje nokukala ndi na ko nasha nayalwe pehala lyokukala owala tandi ipula nomaupyakadhi gandje mwene.
OKUMONA OMIKALO NDHOKA TADHI NINGITHA ONKALAMWENYO YANDJE YI KALE YI NA EITYO
Sho nda li ndi na oomvula 18, onda li nda nayipala noonkondo, nokukala pokugongala kwopaKriste okwa li haku thigi ndje nda loloka. Ihe nando ongawo, onda li handi longitha ethimbo lyandje lyopaumwene pegumbo tandi konakona Ombiimbeli nuukeka. Embo lyaJob nOmapisalomi oga li ga kwathele ndje ndi uve ko kutya mongashingeyi Jehova Kalunga ohe tu sile unene oshimpwiyu pambepo shi vulithe palutu. Okugalikana olwindji okwe etele ndje ‘oonkondo ndhoka kaadha li mungame mwene,’ ‘nombili yaKalunga, ndjoka yi vule uunongo awuhe wopantu.’ — 2 Aakorinto 4:7; Aafilippi 4:6, 7.
Sho nda li ndi na oomvula 22, onda li ndi na okutaamba ko onkalo yokukala mokatemba. Onda li ndi na uumbanda kutya aantu kaya li we taya ka kala ye wete ndje, ihe otaya ka kala owala ye wete okatemba ku na omukiintu te ehama. Ihe okatemba oka li ka ningitha ndje ndi kale ndi na emanguluko ndyoka nda li ndi na nale, naashoka nda li ndi wete shi li omukundu, osha ningi eyambeko. Kuume kandje gumwe gwedhina Isabel okwa li a ningi eetopo ndi itulile po elalakano lyopaumwene lyokulonga oowili 60 miilonga yokuuvitha omwedhi gumwe.
Petameko, onda li tandi dhiladhila kutya eetopo lye inali iyoga. Ihe onda li nda pula Jehova a kwathele ndje, nokekwatho lyoyaandjetu nolyookuume, onda li nde shi pondola. Omwedhi ngoka gwomaipyakidhilo ogwa li gwa piti po nziya, nonda li nda mono kutya onda sinda uumbanda nosho wo ohoni. Onda li nde ku nyanyukilwa noonkondo nomolwaashoka mo-1996 onda li nda tokola ndi ninge omukokolindjila gwondjigilile, handi longo oowili odhindji muukalele omwedhi kehe. Ndyoka olya li etokolo limwe lya dhenga mbanda lyomomatokolo gandje, lya hedhitha ndje popepyeelela naKalunga nokunkondopaleka ndje nokuli palutu. Okuya muukalele okwa li kwa pe ndje ompito ndi popye naantu oyendji kombinga yeitaalo lyandje nondi kwathele yamwe ya ninge ookuume kaKalunga.
JEHOVA OKWA KWATA NDJE MOSHIKAHA SIGO ONENA
Pokwenye mo-2001, onda li nda yi moshiponga shohauto oshinene nonda li nda teka omagulu agehe. Sho nda li mombete moshipangelo tandi ehama noonkondo, onda galikana momutima tandi ti: “Jehova, ino thiga ndje po!” Opo nduno, omukiintu ngoka a li pombete ye egama ombete yandje okwa pula ndje a ti: “Ngoye gumwe gwomOonzapo dhaJehova?” Kanda li ndi na oonkondo dhokuyamukula, onkee onda komona owala. Okwa ti: “Ondi mu shi ne! Ohandi lesha olundji iifo yeni.” Oohapu ndhoka odha li dha hekeleke ndje noonkondo. Nokuli naasho ndi li monkalo yandje yi etitha ohenda, onda li nda vulu okugandja uunzapo omolwaJehova. Shoka kashi li tuu esimano enene!
Sho nda ti po hwepo, onda tokola ndi uvithile yalwe shi vulithe po. Meme okwa li u undula okatemba kandje te enditha ndje noosaala sho omagulu gandje ge li mosamende. Esiku kehe, otwa li twa talele po aavu yontumba, twa pula nkene ye li po notwa li twe ya thigile iileshomwa yopaMbiimbeli. Omatalelopo ngoka oga li taga lolodha, ihe Jehova okwa li a pe ndje oonkondo ndhoka nda pumbwa.
Ndi li naavali yandje mo-2003
Konima yoomvula dhontumba, uuwehame wandje owa li wa nayipala, neso lyatate olya li lya gwedhele ko kuupyakadhi wandje. Ihe nando ongawo, ohandi kambadhala ndi kale ndi na etaloko ewanawa. Ngiini mbela? Uuna tashi wapa, ohandi kambadhala ndi kale nookuume nonaakwanezimo, naashoka ohashi kwathele ndje kaandi kale tandi ipula nomaupyakadhi gandje. Nongele ndi li ongame awike, ohandi lesha, handi konakona Ombiimbeli, nenge ndi uvithile yalwe okupitila mongodhi.
Olundji ohandi thithikile, etandi egulula ekende lyopathaneko lyokutala muuyuni uupe mboka Kalunga u uvaneka
Ohandi kambadhala wo okunyanyukilwa iinima yanathangwa, ngaashi okambepo okatalala nenge ezimba lyoongala. Shika ohashi pe ndje omatompelo gokukala ndi na olupandu. Okukala ho yolo ohaku kwathele wo. Esiku limwe manga twa li tatu uvitha, kuume kandje ngoka a li tu undula okatemba kandje okwa thikama po a ninge iindhindhilikwanyolwa. Ombaadhilila onda ngoongola e tandi idhenge mohauto ndjoka ya li ya thikama. Atuhe otwa li twa haluka, ihe sho twa mono kutya inapu ningwa sha sha kwata miiti, otwa tilehi oshindjola.
Opu na iinima oyindji mbyoka itaandi vulu okuninga monkalamwenyo. Oyi li iinima mbyoka nda tegelela yi ka gwanithwe monakuyiwa. Olundji ohandi thithikile, etandi egulula ekende lyopathaneko lyokutala muuyuni uupe mboka Kalunga u uvaneka. (2 Petrus 3:13) Ohandi kala nda fa ndi iwete ndi na uukolele, tandi ende notandi nyanyukilwa onkalamwenyo. Ohandi kaleke momadhiladhilo oohapu dhomukwaniilwa David ndhoka tadhi ti: ‘Inekela Jehova itaala, ino limbililwa.’ (Episalomi 27:14, yelekanitha NW.) Nonando olutu lwandje olwa nkundipala nayi, Jehova okwa nkondopaleka ndje. Uunkundi wandje otawu tsikile nokunkondopaleka ndje.
a Juvenile polyarthritis uuwehame wopomatsakaneno gomasipa wa kwata miiti mboka hawu kwata aanona. Aakwiita yolutu ohaya pilukile po nokuyonagula po ehwata lyoosele dholutu ndhoka dhi li nawa, shoka hashi etitha uuwehame nokuningitha pomatsakaneno gomasipa pu zinde.