Omapulo Gopambiimbeli Taga Yamukulwa
Ongiini eso lyaJesus lye tu etela uuwanawa?
Okuza Kalunga sho a shiti aantu, okwa li a lalakanena ya kale nomwenyo sigo aluhe kombanda yevi nopwaahe na uuwehame nenge eso. Ihe omulumentu gwotango, Adam, ka li a vulika kOmushiti nokwa kanitha etegameno lyokukala nomwenyo sigo aluhe. Tu li oluvalo lwaAdam, otwa thigulula eso kuye. (Aaroma 5:8, 12; 6:23) Jehova, Kalunga kashili, okwa li a tumu Omwana, Jesus, kombanda yevi a se noku futile po shoka sha kanithwa kuAdam. — Lesha Johannes 3:16.
Jesus okwa si opo aantu ya wape okumona omwenyo gwaaluhe. Onkalamwenyo yaa na ehulilo kombanda yevi otayi ka kala ngiini?
Eso lyaJesus olye shi ninga tashi wapa opo oondjo dhetu dhi dhimwe po notu vule oku ka mona omwenyo gwaa na ehulilo. Ombiimbeli oye tu pa ethano lyankene onkalamwenyo tayi ka kala kombanda yevi uuna itaatu ka kala tatu hepekwa kuukulupe, komikithi, nosho wo keso. — Lesha Jesaja 25:8; 33:24; Ehololo 21:4, 5.
Ongiini tu na okudhimbulukwa eso lyaJesus?
Ongulohi yimwe manga Jesus inaa sa, okwa li a lombwele aalanduli ye ya dhimbulukwe eso lye nedhano lyanathangwa. Okudhimbulukwa eso lyaJesus momukalo ngoka omumvo kehe otaku ke tu pa ompito tu dhiladhile kohole ndjoka Jesus naJehova ye hole nayo aantu. — Lesha Lukas 22:19, 20; 1 Johannes 4:9, 10.
Omumvo nguka, Edhimbuluko lyeso lyaJesus otali ka kala ko mOmaandaha mo-14 Apilili, ngele etango lya ningine. Oto hiwa wu gongale pamwe nOonzapo dhaJehova moshitopolwa sheni. — Lesha Aaroma 1:11, 12.