Okwa li i idhidhimikile okuululwa kegongamwele lyoluhodhi

MARIA okwa tsu oongolo, nuuwehame momwenyo gwe owe mu ningitha a kale itaa vulu okupopya sha. Okwa li a fa u uvite natango omwana ta lili sho a si konima yokuhepekwa uule woowili. Egulu olya li lya luudha moshanga shomutenya. Evi olya li wo lya kakama noonkondo. (Mateus 27:45, 51) Maria otashi vulika a li e shi tala ko kutya Jehova okwa li tu ulukile uuyuni kutya kapu na omuntu gulwe e ehamekwa noonkondo keso lyaJesus Kristus ngaashi Ye.

Sho uuyelele wa zi ko nomilema e tadhi siikile Golgata, nenge Oshala sholukwe, Maria okwa lili omwana. (Johannes 19:17, 25) Otashi vulika a li ta dhimbulukwa iinima oyindji. Oshinima shimwe shoka a dhimbulukwa otashi vulika ooshoka sha li sha ningwa pwa pita oomvula 33 lwaampo. Sho ye naJosef opo owala ya gandja okanona kawo okaholike kotempeli muJerusalem, omulumentu gumwe omukokele gwedhina Simeon okwa li a nwethwa mo a hunganeke oshinima shontumba. Okwa li a hunganeke iinima iinene yi na ko nasha naJesus, ihe okwa gwedha ko wo kutya esiku limwe, Maria ota ka kala u uvite a fa u ululwa kegongamwele lya tsa. (Lukas 2:25-35) Opethimbo owala ndika tali ehameke, a li u uvu ko uushili woohapu ndhoka.

Okwa popiwa kutya uuna omuntu a silwa okamwana, eso ndyoka olyo unene hali ehameke omuntu. Eso omutondi omwiinayi, nohali tu ehameke atuheni momikalo dhi ili nodhi ili. (Aaroma 5:12; 1 Aakorinto 15:26) Mbela otashi vulika ngaa tu idhidhimikile uuwehame mboka? Sho tatu tala konkalamwenyo yaMaria okuza petameko lyuukalele waJesus sigo opethimbo lyeso lye nosho wo palwe, otatu ki ilonga oshindji kombinga yeitaalo ndyoka lya kwathele Maria a vule okwiidhidhimikila egongamwele lyoluhodhi.

“SHAA SHOKA TE MÚ LOMBWELE, SHI NINGENI”

Natu tale kwaashoka sha li sha ningwa muule woomvula ndatu netata: Maria okwa li e shi wete kutya opwa li tapu ke ya elunduluko. Nokuli nomokamukunda okashona, Nasaret, aantu oya li taya popi kombinga yaJohannes omuninginithi nosho wo etumwalaka lye lyeitedhululo ndyoka lya tali gumu omitima. Maria okwa li ta vulu okumona kutya osheeli she osha li sha tala ko onkundana ndjoka yi li endhindhiliko; olya li ethimbo lyokutameka uukalele we. (Mateus 3:1, 13) Okukala kwaJesus keehe po, okwa li taku ku uvitha nayi Maria noyaandjawo. Omolwashike?

Osha fa shi li ngeyi kutya omusamane gwaMaria, Josef, okwa adhika a sa nale. Ngele osho, okusilwa kakwa li oshinima oshipe kuMaria.a Jesus ka li owala hi ithanwa “omuna gwomuhongi gwiipilangi” ihe okwa li wo hi ithanwa ‘omuhongi gwiipilangi.’ Osha yela kutya, Jesus oye a li a kutha po ongeshefa yahe noye a li e na oshinakugwanithwa shokusila oshimpwiyu uukwanegumbo, mboka tashi vulika wa li wa kwatela mo aanona yahamano mboka ya li ya valwa hugunina kuye. (Mateus 13:55, 56; Markus 6:3) Nonando Jesus okwa li ta dheula Jakob, ngoka tashi vulika oye a li e mu landula, a tsikile nongeshefa, okuza po kwosheeli okwa li taku ka kala okudhigu kuukwanegumbo. Maria okwa li nale e na omutengi omudhigu, ihe mbela okwa li a tila elunduluko ndika? Otatu vulu owala okutengeneka. Ihe mpaka otapu landula epulo lya simana: Okwa li te ki inyenga ngiini uuna Jesus gwokuNasaret a ningi Jesus Kristus, Mesiasa ngoka a kala u uvanekwa okuza nalenale? Ehokololo limwe lyOmbiimbeli olya holola oshinima shimwe kombinga yaashoka. — Johannes 2:1-12.

Jesus okwa yi kuJohannes a ka ninginithwe, nokwa ningi Omugwayekwa, nenge Mesiasa. (Lukas 3:21, 22) Opo nduno okwa tameke okuhogolola aalongwa ye. Nonando iilonga ye oya li ye endelela, okwa li a kongo oompito a nyanyukilwe pamwe noyaandjawo nosho wo nookuume. Okwa li a yi nayina, naalongwa ye, nosho wo naamwayina koshituthi shohango kuKaana, ondoolopa ndjoka ya li ookilometa 13 lwaampono okuza muNasaret ndjoka ya li yi na okukala ya li kondungu yondundu. Pethimbo lyoshituthi, Maria okwa li a mono kutya opu na uupyakadhi. Otashi vulika a li a mono kutya yamwe yomaapambele yaaihokani oya li taya talathana omeho kaaye shi kutya naya kwate peni notaya nongonenathana. Omaviinu oga li ga pwa po! Momuthigululwakalo gwawo, oshinima shoka ngele osha holoka po mokuyakula aayenda osha li hashi sitha ohoni uukwanegumbo, nohashi yono oshituthi sha simana. Maria okwa li u uvite ngaashi yo yu uvite, nokwa li a pula Jesus ekwatho.

Okwa lombwele omwana a ti: “Kaye na omaviinu.” Okwa li a tegelela Jesus a ninge shike? Otatu vulu owala okutengeneka, ihe Maria okwa li e shi shi kutya omwana omulumentu omunene okwa li ta vulu okuninga iinima iinene. Otashi vulika a li e na einekelo kutya ota ka tameka oku shi ninga pethimbo mpoka. Nokuli, okwa fa a li te mu lombwele kutya, “Mumwandje, alikana ninga po sha kombinga yoshinima shika!” Eyamukulo ndyoka a pewa kuJesus oli na okukala lya li lye mu kumitha. Okwa ti: “Ondi na shike nangoye, omukiintu?” (OB-1954) Oohapu dhaJesus ndhoka itadhi ulike okwaahe na esimaneko, nonando odha kala tadhi fatululwa papuko momukalo ngoka. Ihe nonando oongawo, oohapu dhe otadhi ulike kutya okwa li e mu pukulula nombili. Jesus okwa li ta dhimbulukitha yina kutya ke na oku mu pa omalombwelo kombinga yankene e na okugwanitha po uukalele we; oshinima shoka sha li owala shi na okuningwa kuHe, Jehova.

Maria okwa taamba ko epukululo lyomwana, molwaashoka okwa li e na omutima omwaanawa nomwiifupipiki. Okwa yi pwaamboka taya yakula moshituthi nokwa ti: “Shaa shoka te mú lombwele, shi ningeni.” Maria okwa li e shi mono kutya kashi shi we oshilonga she okulombwela omwana, pehala lyaashono, ye nosho wo yalwe oya li ye na okupewa ewiliko kuye. Jesus okwa li u ulike kutya okwa li u uvitile olukeno aaihokani mboka ngaashi owala yina. Okwa li a longo oshikumithalonga she shotango, sho a shitukitha omeya omaviinu. Oshizemo? ‘Aalongwa ye oye mu itaale.’ Maria okwa li wo e mu itaale. Ka li owala e mu tala ko e li omwana, ihe ongaashi Omuwa gwe nOmuhupithi gwe.

Aavali kunena otaya vulu okwiilonga oshindji meitaalo lyaMaria. Odhoshili kutya, kapu na gumwe a putudha okanona ka fa Jesus. Ihe uuna okanona kehe, hoka inaaka gwanenena, ka ningi okakuluntu, elunduluko ndyoka ohali kala eshongo. Omuvali otashi vulika a tsikile nokuungaunga nokamwanamati nenge nokamwanakadhona ngaashi okanona okashona, nonando okuungaunga nako ngaaka otashi vulika itaaku opalelele. (1 Aakorinto 13:11) Ongiini omuvali ta vulu okukwathela oyana mboka ya koka? Omukalo gumwe moka ta vulu oku shi ninga omokukala neinekelo lya kola kutya okamwanakadhona nenge okamwanamati okadhiginini otaka ka tsikila okutula omalongo gOmbiimbeli miilonga, na Jehova ota ka tsikila oku ka yambeka. Okupopya kwomuvali taku ulike kutya oku na eitaalo neinekelo mokanona otashi vulika ku kwathele okanona okakuluntu. Nokaapu na omalimbililo, Jesus okwa li a lenga eambidhidho ndyoka a li ta pewa kuMaria pethimbo lyoomvula ndhoka dha ka landula ko moka mwa li mwa ningwa iiningwanima oyindji.

‘AAMWAYINA AALUMENTU OYA LI INAAYE MU ITAALA’

Omavaangeli oge tu lombwela oshishona kombinga yaMaria pethimbo lyoomvula ndatu netata dhuukalele waJesus. Ihe shi kaleka momadhiladhilo kutya otashi vulika a li omuselekadhi noku li ta tekula aanona oye awijke, tashi vulika a li e na natango aanona aashona megumbo. Oshi shi okuuviwa ko ngele ka li ta vulu okulandula Jesus sho te ende tu uvithile aantu momukunda gwaandjawo. (1 Timoteus 5:8) Ihe nonando oongawo, okwa li a tsikile okutedhatedha kiinima yopambepo mbyoka a li i ilongo kombinga yaMesiasa nokukala pokugongala mosinagoga yomoshitopolwa ngaashi yaandjawo ya kala haya ningi aluhe. — Lukas 2:19, 51; 4:16.

Mbela itashi wapa nduno, sho a li a kuutumba miipundi sho Jesus a li ta popi mosinagoga muNasaret? Ka li tuu a nyanyukwa okuuva omwana ta tseyitha kutya ehunganeko ekulu lyopaMesiasa ndyoka lya li lya hunganekwa pwa pita oomvula omathele olya gwanithilwa muye! Oshi na okukala sha li she mu uvitha nayi, okumona kutya Aanasareta ooyakwawo inaya taamba omwana. Oya li nokuli ya kambadhala oku mu dhipaga! — Lukas 4:17-30.

Shoka wo sha li tashi uvitha nayi oosho oyanamati yalwe inaayi itaala Jesus. Otu uvu muJohannes 7:5 kutya aamwayina yaJesus yane kaya li ye na eitaalo lya fa lyayina. Otayi lesha tayi ti: ‘Aamwayina aalumentu oya li inaaye mu itaala.’ Ombiimbeli inayi popya ko sha kaamwayinakadhona yaJesus mboka tashi vulika ya li yaali.b Moshiningwanima kehe, Maria okwa li wo e shi uuwehame wokukala megumbo li na omataloko gopalongelokalunga ga yoolokathana. Okwa li e na okukambadhala okukala e na ondjele mokukala a dhiginina oshili yopakalunga manga ta kambadhala okwaadha omitima dhaanegumbo lye mokwaahe ya pangela nenge mokwaahe ya ngwandjagula.

Oshikando shimwe, ongundu yaakwanezimo, nopwaahe na omalimbililo mwa kwatelwa naamwayinamati yaJesus, oya li ya tokola ya ka “kwate” Jesus. Oya li nokuli taya ti: “Ota yi oonkwengu!” (Markus 3:21, 31) Uushili owo kutya, Maria ka li a dhiladhila kiinima ya tya ngaaka, ihe okwa li a yi pamwe noyanamati, tashi vulika e na etegameno kutya otaye ki ilonga po sha shoka tashi ke ya kwathela ya koke meitaalo. Mbela osha li ngaa sha ningwa? Nonando Jesus okwa li a kala nokulonga iilongankondo nosho wo okulonga ooshili oonkumithi, oyanamati yaMaria yalwe kaya li natango ye mu itaale. Mbela okwa li i ipula u uvite nayi, kutya otashi ka pula shi thike peni opo a adhe omitima dhawo?

Mbela owu li megumbo moka aanegumbo kaaye li melongelokalunga limwe? Eitaalo lyaMaria otali vulu oku ku longa oshinima oshinene. Ka li a si uunye okukwathela aakwanezimo ye mboka kaaye shi ooitaali. Ihe pehala lyaashono, okwa li e etha ya mone kutya eitaalo lye olye mu etela enyanyu nosho wo ombili yopamadhiladhilo. Shimwe ishewe, okwa kala nokwaambidhidha omwana ngoka omudhiginini. Mbela okwa li ha kala a yuulukwa Jesus? Mbela opu na omathimbo gamwe a li ha kala a hala ando e li megumbo naye nosho wo naakwanegumbo ye? Ngele osho, okwa li a vulu okwiipangela. Okwa li e shi tala ko shi li uuthembahenda okukala ta ambidhidha nokutsa Jesus omukumo. Mbela nangoye ito vulu okukwathela aamwoye ya kale ya pititha komeho okulongela Kalunga monkalamwenyo yawo?

‘EGONGAMWELE LYA TSA OTALI KA ULULA OMUTIMA GWOYE’

Mbela Maria okwa li ngaa a yambekwa omolweitaalo lye muJesus? Jehova iha kala inaa yambeka mboka ye na eitaalo, nosha yela kutya Maria naye osho a li a ningilwa. (Aahebeli 11:6) Dhiladhila owala kutya osha li ngiini kuye okuuva omwana sho ta popi nenge sho u uvu shoka tashi popiwa kwaamboka ya li peuvitho lye.

Mbela Maria okwa li a ndhindhilike sha momathaneko gaJesus kombinga yethimbo sho a li okanona sho ta putuka muNasaret? Sho Jesus a popi kombinga yomukiintu ta kombo megumbo lye a mone oshimaliwa sha kana, yokutsa uusila woomboloto, nenge kombinga yokutema olamba noku yi tula koshihukikwanyeka, mbela Maria okwa li ngaa a dhiladhila kombinga yokamatyona hoka ka li haka kala ponto ye sho ta longo iilonga ye yakehe esiku? (Lukas 11:33; 15:8, 9; 17:35) Mbela sho Jesus a li a ti kutya ondjoko ye ombwanawa nomutengi gwe omupu, mbela Maria okwa li ngaa a dhiladhila komathimbo omawanawa gonale sho esiku limwe omutenya a li a tala Josef ta longo Jesus sho omushona nkene e na okuninga ondjoko noku yi honga nuukeka opo oshinamwenyo shi vule oku yi humbata nuupu? (Mateus 11:30) Osha yela kutya Maria okwa li a mbilipalelwa noonkondo mokudhiladhila kuuthembahenda mboka Jehova e mu pa monkalamwenyo ye, ano wokukwathela mokuputudha nokudheula omwanamati ngoka a li ta ka ninga Mesiasa. Otashi vulika a li a mono enyanyu li ikalekelwa mokupulakena kuJesus, omulongi omunenenene gwopantu, ngoka a li i ilongo iiyilongomwa ya simana kiinima mbyoka yi shiwike kwaayehe hayi longithwa nosho wo kwaashoka hashi ningwa.

Ihe nonando oongawo, Maria okwa kala omwiifupipiki. Omwana ka li nando e mu tumbaleke, shi vulithe okulongela Kalunga. Pethimbo lyuukalele we, omukiintu gumwe a li mongundu yaantu okwi igidha kutya yina yaJesus oku na okukala shili u uvite elago sho e mu vala. Okwe mu yamukula a ti: “Eeno, ihe aanelago oomboka taa uvu oohapu dhaKalunga e taye dhi dhiginine.” (Lukas 11:27, 28) Naasho yamwe yomongundu yaantu ya lombwele Jesus kutya yina nosho wo aamwayina oya li popepi, okwa ti kutya oomboka owala ye mu itaala oyo ya li shili ooyina naamwayina. Molwaashoka inashi mu geyitha, osha yela kutya Maria okwa li u uvite ko shoka Jesus a li a hala okutya, ano kutya ekwatathano lyopambepo olya simanenena li vule ndyoka lyuupambele. — Markus 3:32-35.

Ihe mbela, iitya yini tayi vulu okuholola uuwehame mboka Maria a li u uvite sho a mono omwana a si eso tali ehameke komuti gwomahepeko? Gumwe ngoka a li a mono edhipago ndyoka tali ningwa, omuyapostoli Johannes, nokonima okwa ka popya uuyelele mbuka wa simana mehokololo lye kutya: Pethimbo lyehepeko ndyoka, Maria okwa li a thikama “popepi [“nomuti gwomahepeko,” NW] gwaJesus.” Kapwa li nando osha sha li shi imbi omuvalakadhi ngoka omudhiginini nomunahole a kale pomwana sigo oosho a si. Jesus okwa li e mu mono, nonando osha li tashi mu ehameke uunene sho ta fudha nosha li oshidhigu okupopya sha, okwa li ngaa a popi sha. Okwa gandja yina komuyapostoli Johannes ngoka a li e hole noonkondo, e mu sile oshimpwiyu. Molwaashoka aamwayina yaJesus kaya li natango ooitaali, Jesus ka li i inekelele Maria nando okugumwe gwomuyo ihe okomulanduli gwe gwashili. Kungawo, Jesus okwa li u ulike nkene sha simana komulumentu omwiitaali a sile oshimpwiyu aanegumbo lye, unene tuu ngele tashi ya koompumbwe dhawo dhopambepo. — Johannes 19:25-27.

Sho Jesus a si, Maria okwa li u uvite uuwehame mboka wa li wa hunganekwa nalenale, okutsuwa kegongamwele lya tsa lyoluhodhi. Ngele ohatu shi mono oshidhigu okudhiladhila kutya oluhodhi lwe olwa li lu thike peni, ongiini nduno kombinga yokudhiladhila kutya enyanyu lye olya li li thike peni konima yomasiku gatatu! Maria okwa li a tseya oshikumithalonga oshinenenene shomiikumithalonga oyindji, shoka shokuyumuka kwaJesus! Nenyanyu lye olya li olindji, molwaashoka konima Jesus okwa li i ihololele omumwayina muyina Jakob, nokaapu na omalimbililo paumwene. (1 Aakorinto 15:7) Okugongala hoka okwa li kwa gumu Jakob nosho wo aamwayina yalwe muyina. Konima otwa li twi ilongo kutya oye ki itaala Jesus e li Kristus. Nziya, oya li ya tameke okukala pokugongala kehe kwopaKriste nayina, yi itula mo ‘mokugalikana.’ (Iilonga 1:14) Yaali yomuyo, Jakob naJudas, konima oya ka nyola omambo gOmbiimbeli.

Oshikando shahugunina Maria a tumbulwa oosho ya li pokugongala noyana taya galikana. Ehokololo kombinga yaMaria itali opalele tuu sho lya hulu ngaaka, nosho wo kutya kashi shi tuu oshiholelwa oshiwanawa shoka e tu thigila! Omolweitaalo lye, okwa li a hupu kegonga lyoluhodhi, nahugunina, okwa ka mona ondjambi onenenene. Ngele otwa holele eitaalo lye, natse otatu ka hupa muudhigu kehe mboka tatu etelwa kuuyuni mbuka wa kolokosha notatu ka nyanyukilwa ondjambi onenenene itaayi vulu okuyelekwa nasha.