Onkandangala ndjoka Maria a dhana melalakano lyaKalunga

PETHIMBO lyuukalele waJesus, omukiintu gumwe okwa li a thikama mokati kongundu nokwa popi e ta ti kuye: “Omukiintu a li e ku humbata e te ku yamutha, oye omunelago!” Ando Jesus okwa li a hala yina a simanekwe, ando ndjika oya li ompito ombwanawa yoku shi ninga. Pehala lyaashono, okwa ti: “Eeno, ihe aanelago oomboka tayu uvu oohapu dhaKalunga e taye dhi dhiginine.”—Lukas 11:27, 28.

Jesus ina simaneka yina momukalo gwi ikalekelwa, noina lombwela aalanduli ye ye shi ninge. Ongiini shika tashi tsu kumwe nesimaneko ndyoka mboka hayi iti ooitaali haya simaneke Maria? Natu taleni shoka Ombiimbeli tayi popi kombinga yomalongo gamwe ngoka gi itaalwa apuhe kombinga yayina yaJesus.

“Omusilwahenda,” “kala wa yambekwa mokati kaakiintu aakweni”

Omuyengeli Gabriel okwa li a tseyithile Maria onkandangala ndjoka ta ka dhana melalakano lyaKalunga. Pompito ndjoka okwa li e mu popitha a ti: “Ombili nayi kale nangoye! Omuwa na kale pamwe nangoye.” (Lukas 1:28) Ombiimbeli yOshindonga yomo 1954 oya toloka epopitho ndika tayi ti: “U kundwe, omusilwahenda ngoye, Omuwa oku li nangoye.” Nziya konima yaashoka, Elisabet okwa li a popitha Maria a ti: “Kala wa yambekwa mokati kaakiintu aakweni, nosho wo okanona hoka to ka vala, naka yambekwe.” (Lukas 1:42) Mbela oohapu ndhika itadhi ulike nando kutya Maria okwa li e na okusimanekwa momukalo gwi ikalekelwa?

Hasho nando. Nonando oohapu ndhoka odha kwatelwa megalikano ndyoka Aakatoolika haya galikana kuMaria, Ombiimbeli itayi popi kutya oye na galikanwe. Gabriel naElisabet oya li ya tseya kutya Maria oku na uuthembahenda wa dhenga mbanda wokuvala Mesiasa, ihe edhiladhilo lyoku mu galikana kali mo mOmanyolo. Pehala lyaashono, sho Jesus aalongwa ye ye mu pula e ya longe okugalikana, okwa li u ulike kutya He oye e na okugalikanwa. Odhoshili kutya oshiholelwa shaJesus shegalikano lya tseyika nawa osha tameka noohapu tadhi ti: ‘Tate yetu, ngu u li megulu.’—Mateus 6:9.

Ota ka kala gumwe gwomaapangeli

Elongo lilwe lya tseyika apuhe kombinga yaMaria olyo kutya ye oku li ngashingeyi “omukwaniilwakiintu gwomegulu.” Ombiimbeli inayi mu ithana nando nedhinasimaneko lya tya ngaaka. Ihe otayi ulike kutya oku na ehala lyi ikalekelwa melongekidho lyaKalunga lyomegulu. Ehala ndyoka olini?

Jesus oku ulike kutya yamwe yomaalongwa ye aadhiginini otaya ka pangela pamwe naye mUukwaniilwa we. (Lukas 22:28-30) Jesus ota ka gandja oonkondo kwaamboka ya hogololwa ya kale ‘aayambi okulongela Kalunga ketu, oyo notaa ka pangela kombanda yevi.’ (Ehololo 5:10) Osha yela kutya Ombiimbeli otayi tu eta pehulithodhiladhilo kutya Maria oye gumwe gwomwaamboka ya pewa uuthembahenda mbuka wa dhenga mbanda. Omolwashike tatu tile ngawo?

Otashi vulika to dhimbulukwa kutya konima yeso lyaJesus, Maria okwa li a ‘kala nokugalikana’ pamwe naalongwa yaJesus naamwayina. Aantu 120 oya li ya gongala nelalakano olyo tuu ndika, mwa kwatelwa “aakiintu” yontumba. (Iilonga 1:12-15) Ombiimbeli otayi ti: “Esiku lyaPentekoste sho lya thikana, ooitaali ayehe oya adhika ya gongala pehala limwe” sho ya tililwa ombepo ondjapuki yaKalunga ndjoka ye ya vulitha okupopya omalaka omakwiilongo.—Iilonga 2:1-4.

Molwaashoka Maria okwa li gumwe gwomwaamboka ya lalekwa nuuyamba komukalo ngoka, otashi ulike kutya ye naakiintu yalwe mboka ya tililwa ombepo ondjapuki oya li ya hogololwa okukala aapangeli pamwe naJesus mUukwaniilwa womegulu. Onkee ano, otu na etompelo okwiitaala kutya Maria ngashingeyi okwa kuutumba pamwe naJesus meadhimo lyomegulu. (Aaroma 8:14-17) Tala gamwe gomomauthembahenda ngoka ye naapangeli pamwe naJesus yalwe taya ka kala ye na mokugwanitha elalakano lyaKalunga.

Okupewa omalaleko nuuyamba omakumithi

EmboMbiimbeli lyEhololo otali ti kutya aantu 144 000 otaya ka yumudhwa oku ka kala meadhimo lyomegulu taya longo pamwe naJesus ye li aasaaseri, aapanguli naakwaniilwa. (Ehololo 14:1, 4; 20:4, 6) Ye li aasaaseri otaya ka kutha ombinga mokukwathela aantu ayehe aavuliki ya mone omauwanawa gekuliloyambo lyaJesus, opo ya kale ya gwanenena pambepo, pamikalo nopalutu. (Ehololo 21:1-4) Itashi ka kala tuu uuthembahenda kaalongeli yaJehova ayehe aadhiginini okukala po pethimbo ndyoka ewanawa!a

Maria okwa li a dhana onkandangala note yi dhana sigo onena mokugwanithwa kwelalakano lyaJehova. Okwa gwana okuholelwa kutse molweifupipiko lye, eitaalo, evuliko neigandjo lye e li omuvali, nokuli nokwiidhidhimikila kwe omahepeko. Molwokudhana onkandangala mokuvala Mesiasa nomokukala e na ombinga mokugandja omalaleko nuuyamba taga kalele kaantu, okwa gwana lela okusimanekwa.

Ihe nonando ongaaka, oshiilongomwa sha simanenena shoka tatu ilongo kuMaria osho kutya okwa li a longele Jehova pamwe naapiya yaKalunga ayehe aadhiginini, ihe hakalunga kalwe. Maria nosho wo aapangeli yalwe pamwe naKristus megulu oya li yi igidha taya ti: “Ehambelelo, esimano, eadhimo noonkondo kungoka a kuutumba koshipangelapundi [Jehova Kalunga] nokOnzigona [Jesus Kristus], aluhe sigo aluhe!”—Ehololo 5:13; 19:10.

[Enyolo lyopevi]

[Oohapu dha simana pepandja 4]

Maria okwa gwana okuholelwa kutse omolweifupipiko lye, eitaalo nomolwevuliko lye