OMAPULO GOPAMBIIMBELI TAGA YAMUKULWA
Mbela omalongelokalunga agehe ohaga simaneke ngaa Kalunga?
Uuna wa pulakene koonkundana dhuuyuni, otashi vulika wa ndhindhilika kutya iinima iiwinayi omadhimbo gamwe ohayi ningwa medhina lyelongelokalunga. Hamalongelokalunga agehe ga totwa po kuKalunga kashili. (Mateus 7:15) Dhoshili, aantu oyendji oya pukithwa. — Lesha 1 Johannes 5:19.
Ihe nonando ongawo, Kalunga oku shi aantu mboka ye na omitima omiwanawa mboka ye hole shoka oshiwanawa noshoshili. (Johannes 4:23) Kalunga ota hiya aantu mboka yi ilonge oshili okuza mOohapu dhe, Ombiimbeli. — Lesha 1 Timoteus 2:3-5.
Ongiini to vulu okudhimbulula mo elongelokalunga lyashili?
Jehova Kalunga ota hanganitha aantu okuza momalongelokalunga ogendji moku ya longa oshili nomoku ya longa ya kale ye holathane. (Mika 4:2, 3) Kungawo, oto vulu okudhimbulula mo aalongelikalunga yashili momukalo ngoka haya silathana oshimpwiyu. — Lesha Johannes 13:35.
Jehova Kalunga ota hanganitha aantu ayehe okupitila melongelokalunga lyashili. — Episalomi 133:1
Aalongelikalunga yashili oya kankamekela eitaalo lyawo nosho wo omukalo gwawo gwokukalamwenyo kOmbiimbeli. (2 Timoteus 3:16) Ohaya simaneke wo edhina lyaKalunga. (Episalomi 83:18) Ohaya uvitha Uukwaniilwa waKalunga mboka owo owala wu li etegameno lyaantu. (Daniel 2:44) Ohaya holele Jesus mokweetha ‘uuyelele wawo wu yele,’ mokuungaunga nawa naashinda shawo. (Mateus 5:16) Onkee ano, Aakriste yashili otaya vulu okudhimbululwa mo sho haya talele po aantu pomagumbo gawo nelalakano lyoku yu uvithila onkundana ombwanawa yUukwaniilwa waKalunga. — Lesha Mateus 24:14; Iilonga 5:42; 20:20.