Aavali, tonateleni aana yeni
“Koneka nokukonekelela iipala yoonzi noyiikombo yoye.” — OMAYEL. 27:23.
1, 2. (a) Aasita yoonzi muIsraeli shonale oya li ye na oshinakugwanithwa shini? (b) Omolwashike aavali taya faathanithwa naasita yoonzi?
ONKALAMWENYO yaasita yoonzi muIsraeli shonale oya li ondhigu. Oya li haya dhengwa komutenya nokuutalala, sho taya tonatele nokugamena oonzi dhawo kiilikama nokaafuthi. Aasita oya li haye dhi konakona aluhe, nongele oya mono pu na yimwe tayi ehama nenge ya monithwa oshiponga, ohaye yi panga. Oya li haya sile unene uunzigona oshimpwiyu, oshoka kawu na oonkondo ngaashi ooyina. — Gen. 33:13.
2 Aavali otaya vulu okuyelekwa naasita yoonzi, oshoka oye na okuulika uukwatya mboka hawu ulikwa kaasita yoonzi. Oye na oshinakugwanithwa ‘shokuputudha oyana noku ya kumagidha paukriste.’ (Ef. 6:4) Mbela oshinakugwanithwa shoka oshipu? Aawe! Aanona ohaya kala aluhe taya makelwa kuSatana, ta longitha omadhiladhilo giifundja. Kakele kaashoka, oye na wo uunkundi wawo yene omolwokwaagwanenena. (2 Tim. 2:22; 1 Joh. 2:16) Ongiini to vulu okukwathela aamwoye? Natu kundathaneni iinima itatu mbyoka to vulu okuninga wu tonatele aamwoye: (1) oku ya tseya, (2) oku ya palula (3) oku ya wilika.
TSEYA AAMWOYE
3. Ongiini aavali taya vulu ‘okukoneka iipala’ yoyana?
3 Omusita omwaanawa oha konakona onzi kehe a tale ngele oyi na uukolele. Ombiimbeli otayi ti: “Koneka nokukonekelela iipala yoonzi noyiikombo yoye.” (Omayel. 27:23) Omuvali, owu na okutseya nawa oonzi dhoye, ano aamwoye. Opo wu shi ninge, owu na okutala keihumbato lyawo nokutseya omadhiladhilo nomaiyuvo gawo. Shika oto vulu ngiini oku shi ninga? Kala aluhe ho popi nayo.
4, 5. (a) Iinima yini aavali taya vulu okuninga, opo oyana ya kale ye ya mangulukila? (Tala kethano lyopetameko.) (b) Owe shi ende ngiini, opo aamwoye ya kale ye ku mangulukila?
4 Aavali yamwe oya mona kutya ihashi kala oshipu okupopya noyana, shampa ya thiki mepipi lyoomvula omulongo nasha. Aanona ihaya kala we ya hala okupopya shoka yu uvite. Ngele naamwoye osho ye li, oshike to vulu okuninga po? Pehala lyokuthindila aamwoye moonkundathana oonde nodha kwata miiti, kambadhala okupopya nayo uuna tamu ningi sha shimwe shi ili. (Deut. 6:6, 7) Kala ho kala pamwe nayo nokuninga iinima pamwe nayo, ngaashi okudhana uudhano wontumba nayo, nenge okulonga pamwe nayo iilonga yontumba yomegumbo. Poompito ndhoka, aamwoye otashi vulika ya kale yu uvite ya manguluka okupopya shoka yu uvite.
5 Ihe ongiini ngele omumwoye natango ina hala okupopya? Kambadhala okulongitha omukalo gulwe. Pashiholelwa, pehala lyoku mu pula kutya esiku olye mu endele ngiini, mu lombwela kutya esiku olye ku endele ngiini. Otashi vulika naye a popye nuupu nkene lye mu endele. Nenge ngele owa hala okutseya kutya ota ti ngiini kombinga yoshinima shontumba, pehala lyoku mu pula kutya ye okwe shi tala ko ngiini, ongoye wu popya kombinga yasho. Oto vulu oku mu pula kutya ookuume ke oye shi tala ko ngiini. Ngoye to mu pula kutya ando omayele geni te ya pe.
6. Ongiini to vulu okuulukila aamwoye kutya owu na ethimbo nayo noho popiwa nangoye nuupu?
6 Opo aamwoye ya kale ye ku mangulukila, yu ulukila kutya owu na ethimbo nayo noho popiwa nangoye nuupu. Ngele oho monika aluhe wi ipyakidhila, aamwoye itaye ke ku lombwela uupyakadhi wawo. Owu na okuninga po shike wu kale ho popiwa nangoye nuupu? Inashi gwana okulombwela owala omumwoye kutya: “Ino kala wa tila ngele owu na shi wa hala okupopya nangaye.” Aamwoye yoomvula omulongo nasha oya pumbwa okukala yu uvite kutya ito ke ya nyenyetela nenge wu tye uupyakadhi wawo inawu simana. Aavali oyendji oya tula po oshiholelwa oshiwanawa moshinima shika. Kayla omukadhona gwoomvula 19 okwa ti: “Ohandi vulu okupopya natate kombinga yashaa shoka nda hala okupopya naye. Iha kwata ndje melaka nenge a pe ndje uusama; oha kala owala ta pulakene. Noha pe ndje aluhe omayele omawanawa.”
7. (a) Ongiini omuvali ta vulu okukala e na ondjele, ngele tashi ya pokukundathana kombinga yokukongwa komumati? (b) Ongiini aavali tashi vulika ya ningile nayi oyana?
7 Omathimbo gamwe otashi vulika wu na okupopya nomumwoye kombinga yiinima mbyoka kaayi shi iipu okupopiwa, ngaashi okukongwa komumati. Sho tamu popi, kambadhala oku mu longa nkene e na oku shi enda momukalo omuwanawa. Pashiholelwa, ngele owa yi kehala hali landitha iikulya ya pya, ihe pokapulakata pondje opwa nyolwa kutya iikulya mbyoka otayi ke ku ehama ngele owe yi li. Otashi vulika wu ze po pehala mpoka wu ye kulilwe. Ngele aamwoye oho kala owala to ya londodha aluhe, otashi vulika ya lulilwe, e taya kala ihaaya kongo we omayele kungoye. (Lesha Aakolossa 3:21.) Pehala lyaashono, kala wu na ondjele. Omukadhona gwedhina Emily okwa ti: “Uuna aavali yandje taya popi nangame kombinga yaamati, ihaya kala owala taye ya popile muuwinayi. Ohaya popi kutya ohashi kala oshiwanawa okumona omumati te ku hokana nokutseyathana naye. Shika osha kwathela ndje ndi kale nda manguluka okupopya nayo kombinga yoshinima shika. Nokuli onda hala oku ya lombwela uuna tandi endelwa komumati pehala lyoku shi ya holeka.”
8, 9. (a) Omolwashike oshiwanawa okukala ihoo kwata omumwoye melaka? (b) Uuwanawa wuni wa mona sho ho pulakene kaamwoye?
8 Ngaashi Kayla a ti, ngele oho pulakene kaamwoye oto ulike kutya oho popiwa nangoye nuupu. (Lesha Jakob 1:19.) Katia, omukulukadhi ngoka ta putudha okamwana oye awike ota ti: “Nale kanda li handi idhidhimikile okamwandjekadhona. Onda li handi ka kwata aluhe melaka. Onda li handi kala unene nda loloka, nomathimbo gamwe kanda li handi kala nda hala okupiyaganekwa. Sho nda lundulula iikala yandje, nomumwandje okwa lundulula iikala ye. Ngashingeyi oku na elongelokumwe.”
Ya pulakena opo wu ya tseye (Tala okatendo 3-9)
9 Omusamane Ronald okwa li naye e na ekwatathano lya tya ngaaka nokamwanakadhona koomvula omulongo nasha. Okwa ti: “Sho omumwandje a lombwele ndje kutya oku hole omumati gumwe gwokosikola yawo, onda li nda thita po. Ihe sho nda dhiladhila kunkene Jehova ha kala naapiya ye nondjele nohe yi idhidhimikile, onda mono kutya onawa ndi pulakene komumwandje, omanga inaandi mu pa omayele. Ondu uvite nawa sho nda pulakene kuye, oshoka ngashingeyi ondi mu uvite ko nawa. Sho a mana okupopya, osha li oshipu kungame okupopya naye nombili. Onda li nda kumwa sho a taamba ko omayele gandje. Oku ulike kutya okwa halelela okulundulula eihumbato lye.” Ngele oho popi aluhe naamwoye, otashi ke ku kwathela wu tseye omadhiladhilo gawo nomaiyuvo gawo. Shika otashi ke ku kwathela wu ya kwathele sho taya ningi omatokolo.a
PALUTHA AAMWOYE
10, 11. Ongiini to vulu okukwathela aamwoye ya kale moshili?
10 Omusita omwaanawa oku shi shi kutya onzi ohayi vulu okuza mo moonkwawo. Otashi vulika yi mone omwiidhi gu li kokule kashona naampoka tadhi napa e tayi ende tayi hedha kokule noonkwawo kashona nakashona sigo ya topoka ko koonkwawo. Sha faathana, omunona naye otapeya a tameke okufalwafalwa sigo a thigi po oshili. Otashi vulika a nwethwe mo kuyakwawo nenge a kuthe ombinga momainyanyudho omawinayi. (Omayel. 13:20) Ongiini to vulu oku mu kwathela, opo kaa gwile moshiponga shoka?
11 Ngele owa mono uunkundi wontumba maamwoye sho to ya longo, ino kwatakwata oku ya kwathela. Ya kwathela wo ya hwepopaleke uukwatya uuwanawa mboka ye na nale. (2 Pet. 1:5-8) Ompito ombwanawa yoku shi ninga opelongelokalunga lyuukwanegumbo. Uukalele Wetu wUukwaniilwa waKotoba 2008 owa tile ngeyi kombinga yelongelokalunga lyuukwanegumbo: “Omitse dhomaukwanegumbo otadhi ladhipikwa dhi [gwanithe po] oshinakugwanithwa shadho koshipala shaJehova mokukala hadhi ningi ekonakono lyuukwanegumbo ihaali faula notali tungu.” Mbela oho longitha ngaa ethimbo ndika wu paluthe aamwoye pambepo? Kala wu na uushili kutya aamwoye oya pandula ekwatho ndyoka ho ya pe. — Mat. 5:3; Fil. 1:10.
Ya palula nawa (Tala okatendo 10-12)
12. (a) Aagundjuka oya mona mo uuwanawa washike melongelokalunga lyuukwanegumbo? (Tala okampungu “Ohaye li pandula.”) (b) Ngoye owa mona mo uuwanawa washike melongelokalunga lyuukwanegumbo?
12 Pulakena kwaashoka Carissa, omugundjuka gwoomvula omulongo nasha, a ti kombinga yankene elongelokalunga lyuukwanegumbo lya kwathela yaandjawo. Okwa ti: “Ondi hole ngele atuhe twa kuutumba tatu hapula. Shika ohashi koleke ekwatathano lyetu nokatu na siku tu ke shi dhimbwe. Tate ihe etha nando pu pite oshiwike inaatu li ninga. Ohashi tsu ndje omukumo okumona tate e na uulaadhi woku li ninga, naashika ohashi ladhipike ndje wo. Osha ningitha ndje ndi kale nda simaneka tate nosho wo ondondo ndjoka e na.” Omugundjuka gwedhina Brittney okwa ti: “Elongelokalunga lyuukwanegumbo olya koleka ekwatathano lyandje nameme natate. Onda mona kutya oye na ko nasha nangame noya hala okuuva kombinga yuupyakadhi wandje. Oshe tu kwathela tu kale twa kola notwa hangana.” Osha yela kutya elalakano lyaavali okulonga oyana ya kale ye hole Jehova. Elongelokalunga lyuukwanegumbo olyo omukalo omwaanawa gwoku shi ninga.b
WILIKA AAMWOYE
13. Omugundjuka ota vulu ngiini okukwathelwa a longele Jehova?
13 Omusita gwoonzi omwaanawa oha longitha ondhimbo a wilike noku gamene oonzi dhe. Shimwe shomiinakugwanithwa ye ya simana okufala oonzi ‘komaunapelo gomwiidhi omutalala.’ (Hes. 34:13, 14) Omuvali kehe naye oku na oshinakugwanithwa sha fa shoka. Owu na oshinakugwanithwa shokukwathela aamwoye ya longele Jehova. Owa hala aamwoye ya kale yu uvite ngaashi omunyoli gwepisalomi ngoka a tile: “Kalunga kandje, ondi hole okugwanitha ehalo lyoye! Otandi dhiginine elongo lyoye momutima gwandje.” (Eps. 40:8) Aagundjuka mboka yu uvite ngaaka, ohayi igandjele Jehova e taya ninginithwa. Opo ya ninge etokolo ndika lya simana, oye na okukala yu uvite ko nawa oshili noye na okukala ya halelela okulongela Jehova.
14, 15. (a) Omuvali oku na elalakano lyashike? (b) Omolwashike omugundjuka gwoomvula omulongo nasha tashi vulika a kale a limbililwa oshili?
14 Ongiini ngele aamwoye oya fa itaaya humu komeho pambepo, tashi vulika nokuli ya limbililwa oshili? Ya longa ya kale ye hole Jehova noya kale ya pandula shoka e ya ningila. (Eh. 4:11) Nuuna yu uvu ko oshinima shika, otaya ka tokola kuyo yene ya longele Jehova.
15 Ihe ngele aamwoye oya limbililwa oshili ya kwathela neidhidhimiko. Ya kwathela ya mone kutya okulongela Jehova oshinima oshiwanawa noshi na uuwanawa tawu kalelele. Kambadhala wo okutseya kutya omolwashike ya limbililwa oshili. Pashiholelwa, mbela omumwoye okwa limbililwa ngaa shili shoka Ombiimbeli tayi ti nenge oha kala owala a tila okuuvithila yakwawo? Mbela omumwoyekadhona iipango yaKalunga shili a limbililwa nenge oku uvite owala tashi mu ningitha a kale kee niwe naye kuyakwawo?
Ya wilika moondjila dhawo (Tala okatendo 13-18)
16, 17. Aavali otaya vulu ngiini okukwathela oyana ya kale ye na ekwatathano lyopothingo naJehova?
16 Ongiini to vulu okukwathela aamwoye ya kale inaaya limbililwa oshili? Aavali oyendji oya kwathela oyana moku ya pula omapulo taga landula: “Mbela oshipu nenge oshidhigu kungoye okukala Omukriste? Sho to tala, okukala Omukriste oshi na uuwanawa washike? Omaiyambo geni wu na okuninga? Mbela eiyambo ndyoka otali vulu ngaa okuyelekwa nuuwanawa mboka hatu mono mo ngashingeyi naamboka tatu ka mona monakuyiwa? Mbela shi ihi shi vule oshikwawo?” Onawa wu pule omapulo ngaka miitya yoye mwene nomomukalo omwaanawa ngoka tagu ulike kutya owu na ko nasha nomumwoye. Ino pula wa fa to gandja uusama. Sho tamu popi, otamu vulu okukundathana Markus 10:29, 30. Aagundjuka yamwe oye hole okunyola shoka taya dhiladhila, taya ningi omisholondondo mbali, gumwe ogu na omaiyambo ngoka ya ninga nomukwawo uuwanawa mboka ya mona sho ye li Aakriste. Shika otashi ke mu kwathela mu mone uupyakadhi mboka ye na noku ya kwathela ye wu kandule po. Ngele oho konakona naantu yamagumbo omambo ngaashi Omalongo gOmbiimbeli nosho wo ‘“Ohole yaKalunga,’ mbela aamwoye oyo inaaye shi pumbwa? Mbela oho konakona ngaa naamwoye?
17 Mokweendela ko kwethimbo, aamwoye otaya ka tokola kuyo yene ngoka ya hala okulongela. Ino dhiladhila kutya otaya ka longela Jehova ngeya, molwashoka ngoye ho longele Jehova. Oye na okukala nekwatathano lyopothingo naJehova. (Omayel. 3:1, 2) Ngele ekwatathano pokati komumwoye naJehova otali shongola, konakona naye omalongo gopetameko. Mu kwathela a dhiladhile komapulo taga landula: “Ondi shi shi ngiini kutya Kalunga oko e li? Ondi shi shi ngiini kutya Jehova Kalunga oku hole ndje? Omolwashike ndi itaala kutya ngele onda vulika koompango dhaKalunga otashi etele ndje uuwanawa?” Ngaashi omusita omwaanawa, kwathela aamwoye neidhidhimiko ya mone kutya okulongela Jehova oshinima oshiwanawa. — Rom. 12:2.
18. Ongiini aavali taya vulu okuholela Jehova, Omusita omunene?
18 Aakriste ayehe yashili oye na okuholela Omusita omunene, Jehova. (Ef. 5:1; 1 Pet. 2:25) Aavali oya pumbwa unene okukoneka iipala yoonzi dhawo, ano oyana. Oya pumbwa wo okuwilika oyana, opo Jehova a yambeke oyana. Onkee ano, aavali tonateleni aana yeni, opo ya kale moshili.
a Omolwuuyelele wa gwedhwa po lesha Oshungolangelo yo 15 Mei 2013, epandja 19-23.
b Opo wu mone uuyelele wa gwedhwa po, lesha oshileshwa “Ekonakono lyuukwanegumbo olya simanenena opo wu ka hupe,” mOshungolangelo ye 1 Kotoba 2009, epandja 29-31.