Omapulo Gopambiimbeli Taga Yamukulwa
Omolwashike hatu galikana Uukwaniilwa waKalunga wu ye?
Mbela owa hala okutseya oshindji kombinga yUukwaniilwa waKalunga naashoka ta wu ka tompola po?
Uukwaniilwa waKalunga owo epangelo lyomegulu. Jesus okwa li a lombwele aalanduli ye ya galikane wu ye, molwaashono otawu ka galulila ombili nuuyuuki kombanda yevi. Kapu na epangelo lyopantu tali vulu okuhulitha po thiluthilu elongithonkondo, okwaanuuyuuki nenge omikithi, ihe Uukwaniilwa waKalunga otawu vulu oku wu hulitha po notawu ke shi ninga. Kalunga okwa hogolola Omwana, Jesus, a ninge Omukwaniilwa gwUukwaniilwa mboka. Jehova okwa hogolola wo ongundu yaalanduli yaJesus ya ka pangele pamwe naJesus mUukwaniilwa. — Lesha Lukas 11:2; 22:28-30.
Masiku, Uukwaniilwa waKalunga otawu ka katukila onkatu ayehe mboka ye li ompinge nokupangela kwaKalunga. Onkee ano, okugalikana Uukwaniilwa waKalunga wu ye oku li eindilo lyepangelo lyaKalunga li pingene po omapangelo agehe gopantu. — Lesha Daniel 7:13, 14; Ehololo 11:15, 18.
Omolwashike Uukwaniilwa waKalunga tawu ka etela aantu uuwanawa?
Jesus oye Omukwaniilwa to opalele molwaashoka omunalukeno. E li Omwana gwaKalunga, oku na wo oonkondo dhokugandja ekwatho kwaayehe mboka taa lilile Kalunga ekwatho. — Lesha Episalomi 72:8, 12-14.
Uukwaniilwa waKalunga otawu ke etela ayehe mboka taya galikana tashi zi komitima wu ye nosho wo mboka haya kaleke oonkalamwenyo dhawo metsokumwe nehalo lyaKalunga. Ito ki ipa nando uusama wa sha sho wi ilonga shoka Ombiimbeli tayi ti kombinga yUukwaniilwa waKalunga. — Lesha Lukas 18:16, 17; Johannes 4:23.