OMUUVITHI TA KUNDATHANA NOMUNEGUMBO
Uukwaniilwa waKalunga owa li wa tameke okupangela uunake? (Oshitopolwa oshi-2
Mpaka otapu landula oonkundathana ndhoka tashi vulika dhi ningwe kugumwe gwomOonzapo dhaJehova naangoka ta adha megumbo. Natu tye nduno Onzapo yedhina Cameron oya shuna kegumbo lyomulumentu gwedhina Jon.
EENDULULO PAUFUPI LYONDJODHI YANEBUKADNEZZAR
Cameron: Jon, onda nyanyukwa sho nde ku mono ishewe. Ohandi nyanyukilwa aluhe ekonakonombiimbeli ndika hatu ningi oshiwike kehe.a Onkalo oyi li ngiini?
Jon: Onkalo oyi li nawa, tangi.
Cameron: Onda nyanyukwa sho to shi enditha nawa. Oshikando shahugunina nda li mpano, otwa li twa popi kombinga yetompelo kutya omolwashike Oonzapo dhaJehova hadhi ti kutya Uukwaniilwa waKalunga owa li wa tameke okupangela mo-1914.b Ngaashi twa li twa kundathana, otwa li twa mono uuyelele wa simana kombinga yehunganeko ndyoka li li montopolwa 4 yembo lyOmbiimbeli lyaDaniel. Mbela oto dhimbulukwa kutya omwa popiwa shike?
Jon: Omwa popiwa ondjodhi yomukwaniilwa Nebukadnezzar kombinga yomuti omunene.
Cameron: Eeno, osho naanaa. Mondjodhi ye, Nebukadnezzar okwa li a mono omuti omunenenene ngoka gwa li omuleeleeka gwa tsa megulu. Oku uvu omutumwa gwaKalunga a ti kutya omuti nagu kewe po. Ihe okwa ti kutya oshithindi nashi thigwe mo mevi. Omuti ogwa li tagu ka koka ishewe konima ‘yomathimbo gaheyali.’ (NW)c Otwa li wo twa kundathana kutya omolwashike ehunganeko ndyoka li na omagwanitho gopaali. Mbela oto dhimbulukwa egwanitho lyotango?
Jon: Ndi shi oshinima shoka osha li sha ningilwa Nebukadnezzar ye mwene? Okwa li a kanitha oondunge dhe, uule womathimbo gaheyali, nenge tu tye, woomvula heyali.
Cameron: Osho naanaa. Nebukadnezzar okwa li a kanitha oondunge dhe pakathimbo, kungawo epangelo lye olya li lya yiwa moshipala. Ihe megwanitho enene lyehunganeko ndyoka, epangelo lyaKalunga olya li tali ka yiwa moshipala uule womathimbo gaheyali, nenge tu tye, woomvula heyali. Ngaashi twe shi mona, omathimbo gaheyali oga li ga tameke sho Jerusalem sha li sha hanagulwa po mo-607 K.E.N. Okuza pethimbo ndyoka, muJerusalem inamu kala we aakwaniilwa ye lile po Jehova yokulela oshigwana she. Ihe nonando oongawo, konima yomathimbo gaheyali, Kalunga okwa li ta ka langeka po Omupangeli omupe a lele oshigwana she, ano gumwe megulu. Niitya yilwe, ehulilo lyomathimbo gaheyali olya li tali ka ninga etameko lyelelo lyUukwaniilwa waKalunga womegulu. Otwa kundathana kutya omathimbo gaheyali oga li ga tameke uunake. Onkee ano ngele otatu vulu okumona kutya oga kwata ethimbo li thike peni, opo owala tatu vulu okutseya kutya Uukwaniilwa waKalunga owa tameke okupangela uunake. Otu li pamwe ngaa ndi shi?
Jon: Eeno, eendululo ndika olya kwathela ndje ndi dhimbulukwe shoka ndi ilongele.
Cameron: Onawa shili. Natu tameke ano oonkundathana dhetu nokutala kutya omathimbo gaheyali oga li ga kwata ethimbo li thike peni. Ngame opo owala nda mana okulesha kombinga yoshinima shika ndi idhimbulukithe iitsa ya simanenena. Otandi ka kambadhala oku yi yelitha nawa ngaashi tandi vulu.
Jon: OK.
OMATHIMBO GAHEYALI OGA LI GA HULU SHO OMASIKU GAHUGUNINA GA TAMEKE
Cameron: Megwanitho lyotango lyehunganeko moka mwa kwatelwa Nebukadnezzar, omathimbo gaheyali osha yela kutya oga li taga ulike koomvula heyali dho dhenedhene. Ihe megwanitho enene moka mwa kwatelwa Uukwaniilwa waKalunga, omathimbo gaheyali oge na okukala ge vule po poomvula heyali dho dhenedhene.
Jon: Omolwashike to tile ngawo?
Cameron: Oshinima shimwe, dhimbulukwa kutya omathimbo gaheyali oga tamekele sho Jerusalem sha li sha hanagulwa po mo-607 K.E.N. Ngele otwa tameke okuyalula okuza momvula ndjoka, oomvula heyali dho dhenedhene otadhi ke tu thikitha momumvo 600 K.E.N. Ihe inapu ningwa sha oshindhindhilikwedhi momumvo ngoka shi na ko nasha nelelo lyaKalunga. Pehala lyaashoka, ngaashi twe shi konakonene, oomvula ethele konima sho Jesus a li kombanda yevi, okwa li e shi ulike kutya omathimbo gaheyali kaga li ga hula natango.
Jon: Oh, eeno. Otandi shi dhimbulukwa ngashingeyi.
Cameron: Onkee ano, pehala lyokukala oomvula heyali dho dhenedhene, omathimbo gaheyali oge na okukala ethimbo ele.
Jon: Ethimbo li thike peni?
Cameron: Embo lyOmbiimbeli lyEhololo, ndyoka lya kwatathana nembo lyaDaniel, otali tu kwathele tu mone kondandalunde kutya omathimbo gaheyali oga li ga kwata ethimbo li thike peni lela. Olya tumbula ethimbo lyuule womathimbo gaheyali netata ngoka ge thike pomasiku 1 260.d Kungawo, omathimbo gaheyali, ano ngoka ge thike pomathimbo gatatu netata gi indjipalekwa lwaali, oga li taga ka thika pomasiku 2 520. Otu li ngaa pamwe ndi shi sigo oompano?
Jon: Eeno, otu li pamwe. Ihe kandi wete kutya shika otashi ulike ngiini kutya Uukwaniilwa waKalunga owa tameke okupangela mo-1914.
Cameron: OK, natu tale ngele otatu vulu oku shi kwatakanitha. Omathimbo gamwe momahunganeko gOmbiimbeli, esiku ohali thaneke omvula.e Ngele otwa longitha otwa yalula esiku li thike pomvula, omathimbo gaheyali otaga ka kala ge thike poomvula 2 520. Okuyalula tu uka komeho okuza po-607 K.E.N., oomvula 2 520 otadhi tu thikitha pomumvo 1914.f Osho she ende ngaaka opo tu thike pomumvo 1914 omumvo moka omathimbo gaheyali ga li ga hulu, etameko lyokupangela kwaJesus e li Omukwaniilwa gwUukwaniilwa waKalunga. Shoka ishewe oshindhindhilikwedhi, okuza po-1914, iiningwanima iinene yomuuyuni oya ningwa, ano iiningwanima mbyoka Ombiimbeli ya hunganeka tayi ka ningwa momasiku gahugunina.
Jon: Iiningwanima mbyoka oyini?
Cameron: Tala kwaashoka Jesus a popi, ngaashi sha nyolwa muMateus 24:7. Jesus okwa popi kombinga yethimbo ndyoka a li ta ka tameka okupangela megulu, a ti: “Iigwana otayi ka thikama okukondjithathana, iilongo otayi ka matukilathana. Otaku ke ya oondjala nomakakamo gevi okoombinga noombinga.” Ndhindhilika kutya Jesus okwa li a hunganeke kutya otaku ka kala oondjala nomakakamo gevi pethimbo ndyoka. Mbela muuyuni inamu kala tamu ningwa iinima iiwinayi oyindji yi li ngawo muule woomvula omathele dha ka pita?
Jon: Eeno shili.
Cameron: Movelise ndjika, Jesus okwa hunganeke kutya okwa li taku ka kala iita pethimbo lyokukala po kwe e li Omukwaniilwa gwUukwaniilwa waKalunga. Nembo lyEhololo inali hunganeka owala kutya iita mbyoka oya li tayi ka ningwa momudhingoloko gwetu, ihe iita mbyoka ya li tayi ka guma uuyuni awuhe pethimbo lyehulilo.g Mbela oto dhimbulukwa kutya iita yotango yuuyuni oya li ya tameke uunake?
Jon: Oya li ya tameke mo-1914, momumvo naanaa moka to ti kutya Jesus omo a tameke okupangela! Shoka inandi shi dhiladhila nando onale ngaaka.
Cameron: Ngele otwa tula uuyelele mboka awuhe kumwe, ehunganeko kombinga yomathimbo gaheyali nosho wo omahunganeko galwe gOmbiimbeli ge na ko nasha nethimbo lyehulilo, uuyelele owa yela. Oonzapo dhaJehova odha tompwa kutya Jesus okwa li a tameke okupangela e li Omukwaniilwa gwUukwaniilwa waKalunga mo-1914 nosho wo kutya omasiku gahugunina oga tameke momumvo ogwo tuu ngoka.h
Jon: Otandi kambadhala ngaa natango okuuva ko iinima ayihe mbika.
Cameron: Shoka oshi uvitikiwe ko. Ngaashi nda tumbula metetekelo, nangame osha pula ndje ethimbo opo ndi shi uve ko nawa. Ihe ondi wete ngaa kutya oonkundathana dhetu odhe ku kwathela wu mone kutya nonando omumvo 1914 inagu tumbulwa kondandalunde mOmbiimbeli, Oonzapo dhaJehova odha kankamekela eitaalo lyadho kombinga yomumvo ngoka kOmanyolo.
Jon: Eeno, onda kala aluhe nda kumithwa kungoye sho to shi fatulula, kehe tuu shoka wa popi, owa longitha omanyolo. Ino popya nando omadhiladhilo goye mwene. Ihe ondi na omalimbililo ngaa kutya omolwashike shika sha kitakana. Omolwashike Kalunga inee tu lombwela owala mOmbiimbeli kutya omumvo 1914 ogo gwa li tagu ka kala omumvo moka Jesus a li ta ka tameka okupangela megulu?
Cameron: Jon, epulo ndyoka ewanawa noonkondo. Nokuli, opu na iinima oyindji ya popiwa ya futama mOmanyolo. Onkee ano, mbela omolwashike Kalunga a nyolitha Ombiimbeli momukalo moka tagu pula aantu ya ninge oonkambadhala opo ye yi uve ko? Pamwe otatu ya tu shi kundathane oshikando tashi landula.
Jon: Oshi li nawa.
Mbela opu na oshikundathanwa shopaMbiimbeli shoka ho ipula nasho? Mbela oho kala wa hala okuuva oshindji nenge to ipula kombinga yomalongo nenge yiinima yopalongelokalunga mbyoka hayi ningwa kOonzapo dhaJehova? Ngele osho, ino ongaonga okupula gumwe gwomOonzapo dhaJehova. Ota ka kala a nyanyukwa oku shi kundathana nangoye.
a Okupitila mekonakono lyoshali lyopegumbo, Oonzapo dhaJehova ohadhi kundathana naantu pandjigilile kombinga yOmbiimbeli.
b Tala oshitopolwa “Omuuvithi ta kundathana nomunegumbo Uukwaniilwa waKalunga owa li wa tameke okupangela uunake? Oshitopolwa sho-1” mOshungolangelo yaNovomba–Desemba 2014.
c Tala Daniel 4:23-25.
d Tala Ehololo 12:6, 14.
e Tala Numeri 14:34; Hesekiel 4:6.
f Tala oshimpungu “Ondjodhi yaNebukadnezzar kombinga yomuti.”
g Tala Ehololo 6:4.
h Tala ontopolwa 9 membo Omalongo gashili gOmbiimbeli ogeni naanaa? lya nyanyangidhwa kOonzapo dhaJehova. Oli li wo ko-www.jw.org/ng.