Uulingilingi mepangelo owa fa uuzigo

Uulingilingi mboka hawu longwa mepangelo otawu fatululwa kutya owo okulongitha nayi oonkondo omolwuuwanawa wopaumwene. Okulongithwa nayi kwoonkondo hoka okwa za nale. Pashiholelwa, mOmbiimbeli omu na ompango yi indika okugandja oombumbo miipotha yopampangu, shoka tashi ulike kutya uulingilingi owa kala wu shiwike nale oomvula 3 500 dha ka pita. (Eksodus 23:8) Uushili owo kutya, uulingilingi owa kwatela mo oshindji kaashi owala okutaamba oombumbo. Aakwanambelewa mboka haya ningi uulingilingi ohaya yaka po iikwaniipangitho, haya longitha nayi iinima mbyoka kaaye na okulongitha, nenge nokuli haya yaka po iimaliwa. Ohashi vulika wo ya longithe nayi oondondo dhawo opo ya ningile pondhipi ookuume kawo naakwanezimo yawo.

Nonando uulingilingi otawu vulu okukala mehangano kehe lyopantu, osha fa shi li ngeyi kutya mepangelo hwangu nee. O-Global Corruption Barometer yomo-2013, ya nyanyangidhwa ko-Transparency International, oya ti kutya aantu muuyuni awuhe oye na etaloko kutya omahangano gatano ngoka ga vuka mokulonga uulingilingi ogo, oongundu dhopapolotika, opolisi, aakwanepangelo, oshigongi shopashigwana (oparlemende) nosho wo moompangu. Tala koolopota dhimwe ndhoka dha yaneka pomutenya uupyakadhi mboka.

• AFRIKA: Mo-2013, aakwanambelewa moSouth Africa ye thike lwopo-22 000 oya li ya tamanekelwa iilonga yuulingilingi.

• SOUTH AMERICA: Mo-2012, moBrazil, aantu 25 oya li ya tulwa miipandeko molwaashoka ya li ya longitha nayi iimaliwa yi ilandele eambidhidho lyopapolotika. Gumwe gomwaamboka ya li ya mangwa po, oongoka a li nale omukuluntu mombelewa yomupresidende, omuntu omutiyali ngoka e na oonkondopangelo moshilongo.

• ASIA: MoSeoul, shaSouth Korea, aantu 502 oya si sho ya li ya mbolokotelwa ketungo mo-1995. Mba ya li taya ningi omakonakono oya mono kutya aakwanambelewa yoshilando oya pewa ombumbo opo ye ethe aatungi ya longithe okaungulita inaa ka kola noya taaguluke oompango dhegameno.

• EUROPA: “Uupyakadhi [uulingilingi moEuropa] owa ya pombanda tashi kumitha” pakupopya kwaCecilia Malmström, omunambelewa gwiinima yomegumbo yaEuropa. Okwa gwedha ko kutya “okuninga oonkambadhala kwopolotika yi vudhe mo thiluthilu uulingilingi okwa fa oko kaaku po.”

Uulingilingi mepangelo owa mena omidhi dha ya muule. Omuprofesoli Susan Rose-Ackerman, kapyoko miinima yi na ko nasha nokukondjitha uulingilingi, okwa nyola kutya opo ku ningwe ehwepopalo moshinima shoka otapu ka pumbiwa “omalunduluko gokwakola momukalo ngoka epangelo hali ningi iipindi.” Nonando onkalo otashi vulika tayi monika itaayi vulu okulunduluka, Ombiimbeli otayi ulike kutya nokuli nomalunduluko omanenene itaga wapa owala okuningwa, ihe otayi ulike wo kutya otaga ka ningwa shili.