Ondi uvite kutya otandi vulu okukwathela yalwe

ONAKUZIWA YANDJE:

Onda valelwa moAcul, ondoolopa yi li momasilukutumba muuninginino waGuatemala. Aakwanezimo yandje oya za mAaixil, omuhoko gwoluvalo lwaMaya. Kakele kelaka lyOshispania, onda putuka handi popi wo elaka lyevalelwamo. Pethimbo nda li okanona, moGuatemala omwa kala mu na iita yopashigwana uule womimvo 36. Momukokomoko gwethimbo ndyoka, aantu oyendji Aaixil oya li ya si.

Sho nda li ndi na omimvo ne, omumwamememati ngoka a li e na omimvo heyali, okwa li a dhana nomboma yopeke, ndjoka ya li ya topa ombadhilila. Shoka oshe etitha ndi kanithe omeho gandje, na shiyemateka omumwamememati okwa kanitha omwenyo gwe. Konima yaashoka, onda tameke okuya kosikola yaaposi moGuatemala City, hoka nda li ndi ilongo okulesha oondanda dhoshiposi. Kosikola ndjoka aalongi kaya li ya pitika ndje ndi popye naanona ooyakwetu, naamboka yomongundu yetu oya kala nokuhenuka ndje, oshinima shoka kaanda li ndi shi uvite ko. Aluhe onda li handi kala ndi ikalela nomumvo kehe onda li handi kala nda halelela oomwedhi mbali dhi thike, opo ndi vule okuya kegumbo kumeme, ngoka a li aluhe hu ulukile ndje olukeno nohenda. Shinikitha oluhodhi, okwa hulitha sho ndi na omimvo omulongo. Onda li lela nda dhengwa pevi, sho omuntu ngoka a li e hole ndje noonkondo a thigi ndje po.

Sho ndi na omimvo 11, onda galukile kondoolopa yetu nonda kala muukwanegumbo womumwamememati. Oya kala taya sile ndje oshimpwiyu palutu, ihe kapu na nando ogumwe a kwathele ndje pamaiyuvo. Omathimbo nomathimbo, onda kala nokukugila Kalunga tandi ti: “Omolwashike meme a si? Omolwashike nda ningi omuposi?” Aantu oya li ya lombwele ndje kutya omaudhigu ngaka oge li ehalo lyaKalunga. Onda thiki pehulithodhiladhilo kutya Kalunga ke na ko nasha naantu noke shi omuyuuki. Etompelo sho inaandi idhipaga, olyo kutya kanda li ndi shi kutya nandi shi ende ngiini.

Okukala omuposi osha kala tashi ehameke ndje palutu nopamaiyuvo. Sho nda li okamatyona, iikando niikando onda li nda hepekwa pamilalo. Kanda li nda lopota omiyonena ndhoka, molwaashoka onda li tandi dhiladhila kutya kapu na ngoka e na ko nasha nangame. Aantu kaya li naanaa haya popi nangame nosha li oshidhigu kungame okupopya nayo. Onda li handi kala owala ndi ikalela, nda gwililwa po nokanda li ndi inekela nando omuntu.

NKENE OMBIIMBELI YA LUNDULULA ONKALAMWENYO YANDJE:

Sho nda li ndi na omimvo omulongo nasha, esiku limwe kosikola manga tu li pokafudhopo, Oonzapo dhaJehova mbali (aaihokani) odha li dhe ya kungame. Omulongi gumwe gwoposikola yetu, ngoka a li u uvitile ndje uukwawo wanankali, oye a li e dhi pula dhi talele ndje po. Odha lombwele ndje kombinga yeuvaneko lyOmbiimbeli ndyoka tali ti kutya oonakusa otaya ka yumudhwa nonokutya esiku lyomomasiku aaposi otaya ka tsikuluka. (Jesaja 35:5; Johannes 5:28, 29) Onda li nda panda shoka ya lombwele ndje, ihe osha li oshidhigu kungame okukundathana nayo, oshoka kanda li ndi igilila okupopya naantu. Nonando onda li ndi igilila okwiikalela, oya kala haya talele ndje po neidhidhimiko nokuungaunga nangame nombili, opo ya longe ndje kombinga yOmbiimbeli. Aaihokani mbaka oya li haye ende po oshinano shi vulithe pookilometa 10 okuthika mondoolopa yetu noya li haya taaguluka oondundu.

Omumwamememati okwa li a lombwele ndje kutya oye li aantu haya zala nawa noinaya gandja eitulomo kiinima yopamaliko. Aluhe oya li haya ulike kutya oye na ko nasha nangame noya li haye etele ndje omagano gontumba. Onda li ndu uvite kutya Aakriste owala yashili taya vulu okuninga eiyambo lya tya ngawo.

Onda konakona Ombiimbeli tatu longitha iileshomwa mbyoka ya nyolwa noondanda dhoshiposi. Nonando onda li ndu uvite ko shoka tandi ilongo, pamaiyuvo iinima yimwe oya li iidhigu kungame okutaamba ko. Pashiholelwa, osha li oshidhigu kungame okwiitaala kutya Kalunga oku na ko nasha lela nangame ndi li omuntu, nayalwe oya li haye shi ulukile ndje kutya Kalunga oku uvitile ndje ngiini. Onda li ndi uvite ko kutya omolwashike Jehova e etha uukolokoshi wu kale po okathimbo, ihe osha li sha pula ndje ethimbo ndi mone kutya oku li shili Tate omunahole.a

Mokweendela ko kwethimbo, shoka nda li tandi ilongo mOmanyolo, osha kwathele ndje ndi lundulule etaloko lyandje. Pashiholelwa, ondi ilongo kutya Kalunga oha kenukile lela mboka taya mono iihuna. Shi na ko nasha naapiya ye mboka ya li taya ungaungiwa nayo nayi, Kalunga okwa ti: “Onda mono, nkene aantu yandje taa hepekwa . . . ondu uvu taa kugile emanguluko kaapiki yawo. Onda tseya omahepeko gawo agehe.” (Eksodus 3:7) Sho nda tameke okuuva ko nawa omaukwatya gaJehova omawanawa, oshi inyengitha ndje ndi mu iyapulile. Mo 1998, onda ninginithwa, e tandi ningi Onzapo yaJehova.

Uule womumvo gumwe lwaampono konima sho nda ninginithwa, onda li nde ki ilongela sha kosikola yimwe yaaposi, yi li popepi noshilando Escuintla. Omukuluntugongalo gumwe megongalo lyomoshitopolwa, okwa ka uva kombinga yomashongo ngoka nda li nda taalela shi na ko nasha nokuya kokugongala pethimbo nda li mondoolopa yetu. Oshinima oshi li ngeyi kutya ondjila yokuya kegongalo ndyoka lya li popepi, oya li ye enda koondundu, mpoka aaihokani Oonzapo ya li haye ende sho taye ya okukonakona nangame, nosha li oshidhigu kungame okweenda po ongame awike. Opo ndi kwathelwe, omukuluntugongalo ngoka okwa popi nuukwanegumbo wumwe womoEscuintla, nowa li wa zimine ndi ka kale handi zi maandjawo nokukwathela ndje ndi kale handi yi kokugongala. Oya li lela ya sile ndje oshimpwiyu nokaapu na okatongo.

Ondi na iiholelwa oyindji yankene ndu ulukilwa ohole yashili kaamwatate naamwameme yomegongalo lyetu. Onkee iimoniwa mbyoka oya tompa ndje kutya ndi li Onzapo yaJehova, ondi li mokati kAakriste yashili.—Johannes 13:34, 35.

UUWANAWA MBOKA NDA MONA:

Ihandi kala we ndi uvite kaandi na oshilonga nenge kaandi na etegameno. Ngashingeyi onkalamwenyo yandje oyi na eityo. Ndi li omulongi gwethimbo lyu udha miilonga yokulonga aantu Ombiimbeli, ohandi gandja eitulomo kokulonga yalwe oshili yOmbiimbeli yi na ondilo, pehala lyokugandja eitulomo kuulema wandje. Shimwe ishewe, ondi li omukuluntugongalo nondi na wo uuthembahenda wokugandja iipopiwa yomontaneho. Onda li nokuli ndi na uuthembahenda wokugandja iipopiwa piigongi yoshitopolwa, nopwa li hapu kala aantu oyendji noonkondo.

Mo 2010, onda li nda yi kOsikola yOkudheula mUukalele (ngashingeyi hayi ithanwa Osikola yAauvithi yUukwaniilwa) ndjoka ya li ya ningilwa moEl Salvador. Osikola ndjika oya kwathela ndje ndi gwanithe po iinakugwanithwa yandje megongalo shi vulithe nale. Edheulo ndika olya li lya ningitha ndje ndi kale ndi uvite kutya Jehova Kalunga okwa lenga ndje noku hole ndje, noha vulu okudheula kehe gumwe a kale a gwana okulonga iilonga ye.

Jesus okwa ti: “Okugandja oku na elago ku vule okutaamba.” (Iilonga 20:35) Ngashingeyi otandi vulu okutya onda nyanyukwa, nonando nale kanda li nde shi dhiladhila ngele otashi shiwa. Ngashingeyi ondi uvite kutya otandi vulu okukwathela yalwe.