Jehova okwa tonatitha omeho gandje

Nakuhokolola: Patrice Oyeka

Esiku limwe komatango lela, onda li nda polimana noonkondo omolwuuposi wandje, sho nee natango onda li ndi na ezaza nonda li tandi pulakene owala kukehe shoka tashi ya koradio. Shika osha ningitha ndje ndi tokole ndi idhipage opo kaandi mone we iihuna. Onda li nda tula uuzigo mokakopi komeya e tandi ka tula poshitaafula popepi nangame. Onda li nda hala ndi iyoge tango e tandi zala nawa manga inaandi nwa uuzigo mboka, ndi gu mane mo ngaa nee. Mbela omolwashike nda li nda hala okwiidhipaga? Noshe ende ngiini ndi kale ndi na omwenyo sigo onena opo ndi mu hokololele shoka sha li sha ningwa po?

ONDA valwa mu-2 Febuluali 1958 momukunda gwaKasaï Oriental, mOrepablika yaKongo. Tate okwa si sho ndi na oomvula omugoyi, e tandi kala tandi putudhwa komumwamememati gwomukuluntu.

Sho nda mana osikola onda mono iilonga moshikunino shomiti hoka haku zi iinima mbyoka hayi ningithwa omakenya. Ongulonene yesiku limwe mo-1989 manga tandi nyola olopota mombelewa yandje, onda mono owala kwa luudha. Petameko onda li ndi shi olusheno lwa gu ko, ihe onda li ndu uvite natango okashina kolusheno taka inyenge, sho ishewe osha li ongulonene. Onda li nda haluka noonkondo sho nda mono kutya nani ongame kaandi wete ko, nokanda li nokuli ndi wete oombapila ndhoka dha li poshitaafula shandje.

Mbalambala onda ithana gumwe gwomaalumentu mboka haya longo kohi yewiliko lyandje a fale ndje kokapangelo komiilonga. Okapangelo oka tumine ndje koshilando ndi ka mone ndohotola ngoka e na ontseyo oyindji. Sho ndohotola a mono kutya oo-retina dhomeho gandje odha mona oshiponga nonkalo yandje oya li ya kwata miiti, okwa tumine ndje koshilandopangelo koKinshasa.

Onkalamwenyo moKinshasa

MoKinshasa onda li nda mono oondohotola odhindji dhomeho, ihe kapu na nando oyimwe ya li ya vulu okukwathela ndje. Konima yomasiku 43 moshipangelo, oondohotola odhe ya pehulithodhiladhilo kutya otandi kala omuposi onkalamwenyo yandje ayihe. Aakwanezimo oya li ya fala ndje koongeleka dhi ili nodhi ili ndi ka aludhwe pashikumithalonga, ihe oonkambadhala adhihe ndhoka inadhi pondola sha.

Osho ngaa nee nda hupula. Omwenyo gwandje ogwa li gwa luudha shili. Omeho onda kanitha, iilonga onda kanitha nomukulukadhi gwandje wo sho a thigi ndje po, e ta faalele iinima ayihe megumbo. Onda li handi kala nda sa ohoni okukala paantu. Onda tameke okukala handi kala ndi ikalela, ndi li owala megumbo. Onda li ndi wete kaandi na oshilonga.

Onda li nda kambadhala okwiidhipaga iikando iyali. Oshikando oshitiyali osho shoka nda hokolola petameko. Onda li nda hupithwa kokanona kaandjetu okashona. Manga tandi iyogo oka kutha po okakopi e ta ka tilehi uuzigo mboka wa li mo. Lagwenene inaka nwa mo. Ihe onda li ndi uvite nayi sho okakopi inaandi ka adha po. Onda li nda lombwele aantu megumbo kutya okakopi onda li tandi ka kongele shike, e tandi ya hokololele shoka nda li nda hala okuninga.

Otandi pandula Kalunga nosho wo aantu yaandjetu sho ya kala haya tonatele ndje. Oonkambadhala dhandje dhokwiidhipaga odha li dha yiwa moshipala.

Osho nda ka mona ishewe enyanyu monkalamwenyo

Esiku limwe mOsoondaha momumvo 1992 manga ndi li pondje te hili omakaya, pegumbo opwe ya Oonzapo dhaJehova mbali tadhi uvitha egumbo negumbo. Sho dha dhimbulula kutya ihandi mono ko, odha leshele ndje Jesaja 35:5: “Omeho gaaposi otaga ka tsikuluka, nomakutsi goombolo otaga ka uva ko.” Onda li shili nda nyanyukwa sho ndu uvu oohapu ndhoka. Mepingathano naashoka nda li handi uvu moongeleka odhindji, Oonzapo kadha li dha ti kutya ohadhi aludha aantu pashikumithalonga. Pehala lyaashono, odha yelithile ndje kutya otandi ka kala owala handi mono ko muuyuni uupe mboka Kalunga a uvaneka, ngele onde mu tseya. (Johannes 17:3) Pethimbo olyo tuu ndyoka, onda tameke okukonakona Ombiimbeli nOonzapo membo Ngoye Oto Vulu Okukala nOmwenyo Sigo Aluhe mOparadisa kombanda yEvi. Onda li nda tameke wo okukala po pokugongala kwopaKriste kehe pOshinyanga shUukwaniilwa e tandi tameke okuninga omalunduluko monkalamwenyo yandje. Onde etha po okuhila omakaya.

Ihe osha li oshidhigu okuninga ehumokomeho lyopambepo molwaashoka ihandi mono ko. Onda yi kendiki lyaaposi ndi ki ilonge okulesha nokunyola oondanda dhoshiposi. Shika osha li sha kwathele ndje ndi vule okudheulilwa okuuvitha mosikola ndjoka hayi ningilwa pOshinyanga shUukwaniilwa. Nziya onda tameke okuuvitha momudhingoloko gwetu. Onda tameke okukala ndi na ishewe enyanyu. Onda tsikile okuninga ehumokomeho e tandi iyapulile Jehova. Onda li nda ninginithwa mo 7 Mei 1994.

Sho ohole yandje yokuhola Jehova nosho wo aantu ye ende tayi koko, onda ka kala nda hala okuninga omuuvithi hu uvitha esiku alihe. Okuza mu 1 Desemba 1995, onda kala ndi li omukokolindjila gwondjigilile, nenge ano ndi tye, omuuvithi hu uvitha esiku alihe. Onda kala wo ndi na uuthembahenda wokulonga ndi li omukuluntugongalo okuza muFebuluali 2004. Omathimbo gamwe ohandi hiywa ndi ka gandje iipopiwa yopaMbiimbeli komagongalo galwe moshitopolwa shetu. Omalaleko nuuyamba agehe ngaka ohaga etele ndje enyanyu nohaga dhimbulukitha ndje kutya uulema itawu vulu oku tu keelela tu longele Jehova Kalunga.

Jehova okwa pa ndje “omeho”

Ngaashi nda li nde shi popi petameko, omukulukadhi gwandje okwa li a thigi ndje po sho nda ningi omuposi. Ihe Jehova okwa pa ndje eyambeko lya gwedhwa po. Meityo lyopathaneko, okwa pa ndje omeho. Anny Mavambu ngoka a zimine ndi ninge omusamane gwe nonando ondi na uulema, okwa ninga omeho gandje. Molwaashoka naye omukokolindjila gwondjigilile, oha yi nangame aluhe miilonga yokuuvitha. Oha leshele ndje wo uuyelele ngele tandi ilongekidha iipopiwa yandje opo ndi yi nyole moondanda dhoshiposi. Oku li eyambeko lyashili kungame. Okwa monitha ndje uushili woohapu ndhoka dhi li mOmayeletumbulo 19:14: “Egumbo neliko olyo uuthiga wootatekulu, ihe omukiintu omunamayele ota zi kOMUWA.”

Jehova okwe tu yambeka wo noluvalo sho e tu pa aanona yaali, omumati nomukadhona. Ondi na ondjuulukwe yoku ka mona iipala yawo mOparadisa. Eyambeko lilwe ndyoka nda mona oosho omumwamememati gwomukuluntu ngoka e tu pa ehala lyokukala naye a ka taamba ko oshili yOmbiimbeli e ta ninginithwa. Atuhe otu li megongalo limwe.

Nonando onda lemana, onda halelela okulongela Jehova shi vulithe nale molwaashoka okwa yambeka ndje noonkondo. (Maleaki 3:10) Kehe esiku ohandi galikana Uukwaniilwa we wu ye wu hulithe po uupyakadhi auhe kombanda yevi. Okuza sho nda tseya Jehova otandi vulu okupopya nuushili tandi ti: “Eyambeko lyOMUWA otali yambapaleke, noiha gwedha ko uuwehame washa.”—Omayeletumbulo 10:22, NW.

[Omathano pepandja 15]

Tandi gandja oshipopiwa shopaMbiimbeli; ndi li naanegumbo lyandje nosho wo nomumwamememati