Ilonga sha mOohapu dhaKalunga

Mbela Ombiimbeli oya hunganeka shoka tashi ka ningwa monakuyiwa?

Oshitopolwa shika oshi na omapulo ngoka tashi vulika wa kala ho ipula noshu ulika mpoka to vulu okumona omayamukulo mOmbiimbeli yoye. Oonzapo dhaJehova otadhi ka kala dha nyanyukwa okukundathana nangoye omayamukulo komapulo ngaka.

1. Mbela omahunganeko gOmbiimbeli oga popya iinima kondandalunde?

Kalunga Omunankondoadhihe, oye awike e shi ashihe shoka tashi ka ningwa monakuyiwa. (Amos 3:7) Pashiholelwa, petameko, okwa li a hunganeke kombinga yokuya kwaMesiasa nenge tu tye Kristus. Mesiasa okwa li ta ka za moluvalo lwomulumentu omudhiginini, Abraham. Oye a li ta ka ninga omuleli ngoka te ke shi ninga tashi wapa opo aantu aavuliki ya ka mone ishewe omalaleko nuuyamba gonkalamwenyo ya gwanenena nokaayi na omikithi. (Genesis 22:18; Jesaja 53:4, 5) Omulumentu nguka u uvanekwa okwa li ta ka za muBetlehem.—Lesha Mika 5:2.

Jesus okwa li u ulike kutya oye Mesiasa shili. Oomvula dhi vulithe 700 manga Mesiasa inaa valwa, Ombiimbeli oya li ya hunganeke kutya ota ka valwa kokakadhona nokwa li ta ka tondika. Okwa li ta ka gandja omwenyo gwe omolwoondjo dhaantu oyendji nokwa li ta ka fumvikwa pamwe naayamba. (Jesaja 7:14; 53:3, 9, 12) Ombiimbeli oya li wo ya popi oomvula omathele gatano komeho yethimbo kutya okwa li te ke ya muJerusalem a londa kokasino nota ka kengelelwa niisiliveli 30. Omahunganeko ngoka agehe oga li ga gwanithwa naanaa ngaashi ga li ga popiwa.—Lesha Sakaria 9:9; 11:12.

2. Mbela Kalunga oha hunganeke omasiku gokondandalunde moka tamu ka ningwa oshinima shontumba?

Oomvula omathele gatano manga Mesiasa inee ya, Ombiimbeli oya li ya hunganeke kombinga yokuya kwe. Oomvula ndhoka dha li dha piti po okuza pehunganeko sigo opokuholoka kwaMesiasa odha li dhi ithanwa iiwikemimvo. “Oshiwike” shimwe osha li oomvula heyali. Iiwike 7 oya li tayi ka gwedhwa kiiwike 62, naayihe kumwe oya ningi iiwikemimvo 69. Iiwikemimvo mbyoka oya li oomvula 483. Oomvula ndhoka odha li dha tameke okuyalulwa uunake? Ombiimbeli oye shi holola kutya, oomvula ndhoka odha li dha tameke okuyalulwa sho omupiya gwaKalunga Nehemia a thiki muJerusalem nokutameka oku shi tungulula. Ondjokonona yAapersia otayi ulike kutya shoka osha li sha ningwa momumvo 455 K.E.N. (Nehemia 2:1-5) Jesus okwa li a ningi Mesiasa sho a ninginithwa konima yoomvula 483, momumvo 29 E.N., pethimbo naanaa ndyoka lya li lya hunganekwa.—Lesha Daniel 9:25.

3. Omahunganeko gOmbiimbeli otaga gwanithwa ngaa shili kunena?

Jesus okwa hunganeka iiningwanima yituntula mbyoka tayi ningwa kunena. Momahunganeko ge okwa popi kombinga yonkundana ombwanawa yUukwaniilwa waKalunga, ndjoka tayi ka gandja epepelelo kaantu yomuuyuni auhe mboka ye hole Kalunga. Uukwaniilwa mboka otawu ka hulitha po uuyuni waantu ya kolokosha mbuka tu li muwo.—Lesha Mateus 24:14, 21, 22.

Omahunganeko gOmbiimbeli oga popya sha yela kombinga yethimbo lyehulilo. Ombiimbeli oya li ya holola kutya aantu otaya ka yonagula evi nonando otu li pethimbo ndyoka taku tiwa olyehumokomeho. Okumona iihuna hoka taku ke etithwa kiita, kondjala, komakakamo gevi nokomikithi ndhoka hadhi kwata aantu oyendji poshikando okwa li taku ka vuka. (Lukas 21:11; Ehololo 11:18) Aantu oya li taya ka kala kaaye na omikalo. Pomathimbo ngaka omadhigu, aalanduli yaJesus oya li taye ku uvithila aantu yomiigwana ayihe onkundana ombwanawa yUukwaniilwa waKalunga.—Lesha Mateus 24:3, 7, 8; 2 Timoteus 3:1-5.

4. Onakuyiwa yini aantu ye na?

Kalunga Omunankondoadhihe ota ka ningila aantu mboka aadhiginini iinima iiwanawa. Jesus Kristus ngoka e li Mesiasa, ota ka pangela ombanda yevi pamwe naantu ye li 144 000. Otaya ka kala aapangeli mepangelo lyUukwaniilwa mboka tawu ka pangela uule woomvula eyuvi. Aasi otaya ka yumudhwa notaya ka mona ompito yokupangulwa yu ulike ngele oya gwana ngaa okupewa omwenyo gwaaluhe shili. Uukwaniilwa mboka otawu ka aludha aantu ayehe mboka taya adhika ye na omwenyo. Omikithi nosho wo eso itayi ka kala po we.—Lesha Ehololo 20:6, 12; 21:4, 5.

[Ethano pepandja 17]

Opo wu mone uuyelele wa gwedhwa po, tala pepandja 23-25 nosho wo pepandja 197-201 lyembo ndika lyu ulikwa mpaka.

[Ethano pepandja 17]

OMALONGO GASHILI GOMBIIMBELI OGENI naanaa?