Oshike tashi vulu oku ku kwathela wu hogolole onakuyiwa ombwanawa?

ONGIINI to vulu okukala wu na onkalamwenyo ombwanawa lela? Omukalo gumwe to vulu oku yi mona omokulongitha omagano ngoka wa pewa gokutala kutya etokolo ndyoka to ningi ota li ke ku etela iilanduliko yini tayi kalelele.

Otashi vulika wu kale wu wete oshidhigu okuninga omatokolo ngoka tage ke ku etela uuwanawa tawu kalelele. Omolwashike mbela? Omolwaashoka oyendji yomaantu mboka tu li mokati kawo oya hala owala iinima pethimbo olyo tuu ndyoka. Pashiholelwa, otashi vulika wu mone kutya okutula miilonga omayele gOmbiimbeli otaku vulu oku ku kwathela wu kale wu na ekwatathano ewanawa naanegumbo yaandjeni. (Aaefeso 5:22–6:4) Ihe opo shoka wu shi ninge, owu na okukala ho kala nayo ethimbo lya gwana, ngoye to kambadhala kuu kale ho kala owala wa pwila miilonga yoye nenge momainyanyudho. Ngaashi naanaa wu na okuhogolola miinima yilwe yonkalamwenyo, owu na wo okuhogolola pokati ketokolo ndyoka tali ku etele uuwanawa wopakathimbo naandyoka tali ku etele uuwanawa tawu kalelele. Openi to vulu okwaadha oonkondo ndhoka wa pumbwa opo wu vule okuninga etokolo ndyoka li li mondjila? Katuka shi ikolelela koonkatu ne tadhi landula mpaka.

1 Dhiladhila kiizemo mbyoka to ka mona omolwetokolo lyoye

Uuna to ningi etokolo lyontumba, dhiladhila kutya iizemo yini tashi vulika wu ka mone omolwetokolo lyoye. Ombiimbeli otayi gandja omayele tayi ti: “Omuntu onkotoki ota tala oshiponga e ta ka holama.” (Omayeletumbulo 22:3) Ngele owa tala nawa kiilanduliko, otashi vulika shi ke ku inyengithe wu henuke okuninga etokolo ndyoka tashi vulika li ete iizemo ya nika oshiponga. Oshikwawo, ngele owa tala kutya uuwanawa wuni tawu kalelele to ka mona ngele owa ningi etokolo ewanawa, otashi vulu oku ku ningitha wu kale wu na omukumo gwokuninga etokolo ndyoka li li mondjila.

Ipula to ti: ‘Mbela ngele onda tokola okuninga ngeyi, iizemo yini tandi ka mona konima yomvula nenge nokuli konima yoomvula 10 nenge 20? Etokolo lyandje otali ka guma ngiini uukolele wandje wopamaiyuvo nowopalutu? Etokolo lyandje otali ka guma ngiini yaandjetu nosho wo yalwe mboka ye na ko nasha nangame?’ Sha simanenena, ipula to ti: ‘Etokolo lyandje otali ka nyanyudha ngaa Kalunga? Otali ka guma ngiini uukuume wetu naJehova?’ Molwaashoka Ombiimbeli oya nwethwa mo kuKalunga, otayi vulu oku ku kwathela wu mone kutya oshike tashi mu nyanyudha nosho wo kutya iiponga yini wu na okuhenuka mbyoka tashi vulika wa li inoo nongela.—Omayeletumbulo 14:12; 2 Timoteus 3:16.

2 Tala kutya oshini to li po naashoka to pe po oombwa

Aantu oyendji ohaya holele owala shoka tashi ningwa kuyalwe pehala lyokuninga omatokolo gawo yene. Ihe itashi ti kutya omuntu ota ka mona enyanyu molwaashoka owala ha landula omukalo gwokukalamwenyo ngoka gwa landulwa kaantu oyendji. Owu na okukala ho tokola kungoye mwene kutya oshini to li po naashoka to pe po oombwa. Tala koshiholelwa shaNatalie.a Okwa ti: “Onda li nda hala ndi ka kale ndi li mondjokana tu uvitathane nomusamane gwandje. Ihe onda li ndi wete kutya itashi ka ningwa, omolwomukalo gwokukalamwenyo kwandje. Sho nda li kokolidji, ookuume kandje ayehe oya li aagundjuka ye na omitse shili. Ihe nonando ongawo, oya li owala haya ningi omatokolo ga puka. Oya li owala haya kala taya ningi nena oku na po nguno ongula oku na po ngwii. Nangame osho nda li handi ningi. Nonkalamwenyo ya tya ngeyi oya li hayi ehameke ndje noonkondo pamaiyuvo.”

Natalie okwa li a tameke okukonakona Ombiimbeli nOonzapo dhaJehova. Okwa ti: “Mokati koshigwana shaJehova onda li nda mono aagundjuka ye na enyanyu, nosho wo aaihokani mboka taye shi enditha nawa moondjokana dhawo. Nonando kasha li oshipu, mokweendela ko kwethimbo onda ka lundulula iikala yandje.” Oshizemo? Natalie okwa ti: “Onda kala nale nda hala okuhokanwa komulumentu ngoka ndi hole noonkondo. Osho ngaa nda ka hokanwa komulumentu ngoka i itaala iinima yopalongelokalunga mbyoka nangame oyo ndi itaala. Ondi uvite kutya Kalunga okwa pa ndje onkalamwenyo ombwanawa kaaku na we.”

3 Tala kutya etokolo lyoye otali ka guma ngiini onakuyiwa yoye yaaluhe

Opo wu kale ihoo idhiladhilile owala iinima yopakathimbo, owa pumbwa wo okukaleka momadhiladhilo kutya owa hala onakuyiwa yoye yi ka kale yi li ngiini, ngoye to tokola kutya oto ka gwanitha po ngiini elalakano lyoye. (Omayeletumbulo 21:5) Ino dhiladhila owala kombinga yonkalamwenyo ofupi yoomvula 70 nenge 80. Pehala lyaashono, kala nale wa fa wu iwete to nyanyukilwa onkalamwenyo yaaluhe ndjoka ya popiwa mOmbiimbeli.

Ombiimbeli otayi yelitha kutya Kalunga okwa pa aantu ompito yoku ka mona omwenyo gwaaluhe okupitila mekuliloyambo lyaKristus Jesus. (Mateus 20:28; Aaroma 6:23) Kalunga okwe tu uvanekela kutya masiku elalakano lye lyopetameko li na ko nasha naantu otali ka gwanithwa kombanda yevi alihe. Mboka ye hole Kalunga otaya ka mona ompito yokukala nomwenyo sigo aluhe kombanda yevi lyo opalekwa. (Episalomi 37:11; Ehololo 21:3-5) Nangoye oto vulu oku ka kala nonakuyiwa ya tya ngaaka ngele owa kala ho ningi omatokolo itoo tala owala konakuyiwa yopopepi.

4 Longa nuudhiginini wu gwanithe po omalalakano goye

Owu na okuninga po shike opo wu ka nyanyukilwe onkalamwenyo ndjoka yu uvanekwa? Tameka nokwiilonga kombinga yaKalunga. (Johannes 17:3) Ontseyo yashili yOmbiimbeli otayi ke ku kwathela wu kale wu na einekelo kutya omauvaneko gaKalunga gonakuyiwa otaga ka gwanithwa. Eitaalo lya tya ngaaka otali vulu oku ku nkondopaleka opo wu ninge omalunduluko kehe ga pumbiwa opo Kalunga a kale e ku hokwa.

Tala koshimoniwa shaMichael. Ota ti: “Onda li nda tameke okulongitha nayi iikolitha niingangamithi sho ndi na oomvula 12. Onda li mongundu yaalongi yiimbuluma nonda li ndi shi nokuli koomvula 30 ite thiki ko. Molwaashoka onda li owala handi kala ndi niwe kongeyo nokukala ndu uvite inaandi gwanenwa osha li sha ningitha ndje ndi kambadhale okwiidhipaga lwiikando oyindji. Onda li nda tegelela onkalamwenyo yi kale ando yi na elalakano, ihe olyo ngaa inaandi mona ndyo.” Manga Michael a li kosekondele, gumwe gwomongundu yawo yaalongi yiimbuluma okwa li a tameke okukonakona Ombiimbeli nOonzapo dhaJehova. Michael naye okwa li a zimine a konakone.

Shoka Michael a li i ilongo mOmbiimbeli osha li she mu kwathele a lundulule omalalakano ge ge na ko nasha nonakuyiwa. “Onda li ndi ilongo kutya monakuyiwa evi otali ka ninga oparadisa nosho wo kutya aantu otaya ka kala ko ye na ombili nokaaye na iimpwiyu yasha. Onda tameke okukala nda hala oku ka kala moparadisa ndjoka. Onda li wo nda hala okupanga uukuume naJehova. Ihe nando ongawo, kanda li nda vulu okukala tandi mu nyanyudha aluhe. Nokuli naasho nda tameke okukonakona Ombiimbeli, onda li nda kolwa iikando yontumba. Noshikando shimwe onda li nda yi miihulo.”

Oshike sha li sha kwathele Michael a kondjithe iinima mbyoka ya li tayi mu shunitha pevi e ta vulu okulundulula okukalamwenyo kwe? Okwa ti: “Ngoka ha konakona nangame Ombiimbeli okwa li a ladhipike ndje ndi kale handi yi lesha kehe esiku nokukala handi endathana naantu mboka nayo ya hala okunyanyudha Kalunga. Onda li nda mono kutya aantu yomongundu yaalongi yiimbuluma moka nda li oya li natango taya nwetha ndje mo. Onda li ndi na okweetha po okweendathana nayo, nonando kungame oya li ya fa aantu yaandjetu.”

Michael okwa li i itulile po omalalakano ngoka haga vulu okugwanithwa muule wethimbo efupi nosho wo iinima mbyoka e na okupititha komeho mbyoka ya li ye mu kwathele a gwanithe po omalalakano ge omanene gokukaleka onkalamwenyo ye metsokumwe nomithikampango dhaKalunga. Nangoye oto vulu okuninga sha faathana. Nyola kutya omalalakano geni taga kalelele wa hala nosho wo oonkatu ndhoka tadhi ke ku kwathela wu ga gwanithe po. Lombwela mboka taye ke ku ambidhidha kutya omalalakano geni wi itulila po, ngoye to ya pula ya kale taye ku lombwele kutya oto shi enditha ngiini.

Ino kwatakwata, ilonga kombinga yaKalunga ngoye to kala to landula ewiliko lye. Katuka onkatu ngashingeyi wu ilonge okukala wu hole Kalunga nosho wo Oohapu dhe, Ombiimbeli. Oohapu dhaKalunga odha popi kombinga yaamboka haya tula miilonga omakotampango gOmbiimbeli dha ti: “Ashihe shoka taye shi longo otashi eta eyambeko.”—Episalomi 1:1-3.

[Enyolo lyopevi]