Eyelekanitho ewanawa ndyoka tashi vulika inoo ninga nando nale
MBELA NGOYE owi itala ko wu li Omukriste? Ngele osho, owu li gumwe gwomaantu ye vulithe poobiliyona mbali kongonga yevi. Konyala omuntu gumwe gwomaantu yatatu ohi iti ye omulanduli gwaKristus. Kunena, oku na omahangano gomalongelokalunga ogendjigendji ngoka tagi iti kutya ogopaKriste, ihe omalongo gawo otaga kondjithathana noye na omataloko ga yoolokathana. Onkee otashi vulika eitaalo lyoye lya yooloka ko lela kulyaamboka hayi iti Aakriste. Mbela shoka wi itaala oshi na ngaa oshilonga? Eeno, oshi na oshilonga. Ngele owa hala okuninga Omukriste, ilonga shoka shi li mOmbiimbeli.
Aalongwa yaJesus Kristus yopetameko oya tseyika ye li “Aakriste.” (Iilonga 11:26) Kapwa li pu na edhina limwe ya pewa ndyoka tali ya ndhindhilikitha mo, molwaashoka oyo ayeke ya li hayi ithanwa Aakriste. Aakriste oya kala ya hangana lela nokulandula omalongo nomalombwelo gOmutotipo gUukriste, Jesus Kristus. Ongiini kombinga yongeleka yeni? Owi itaala ngaa kutya ongeleka yeni ohayi longo shoka Kristus a li a longo nosho wo shoka aalongwa ye yopetameko ya li yi itaala? Mbela ongiini to vulu oku shi tseya? Opu na owala omukalo gumwe gwokulongitha Ombiimbeli yoye onga oshimetitho kamana.
Tala kwaashika: Jesus Kristus okwa li a simaneka lela Ombiimbeli yi li Oohapu dhaKalunga. Kakwa li a taamba ko mboka ya li taya kutha omalongo gOmbiimbeli ongushu nokusimaneka omalongo gopamithigululwakalo. (Markus 7:9-13) Otatu vulu okuthika pehulithodhiladhilo li li mondjila kutya aalanduli yashili yaJesus oya li ya kankamekela omalongo gawo kOmbiimbeli. Onkee ano, Omukriste kehe oku na okwiipula kutya ‘Mbela omalongo gongeleka yetu oge li tuu metsokumwe nOmbiimbeli?’ Opo wu yamukule epulo ndyoka, omolwashike ito yelekanitha omalongo gongeleka yeni naashoka Ombiimbeli tayi longo?
Jesus okwa ti kutya okulongela Kalunga kwetu naku kale kwi ikolelela koshili, noshili ndjoka otayi adhika ashike mOmbiimbeli. (Johannes 4:24; 17:17) Omuyapostoli Paulus okwa ti kutya ehupitho lyetu oli ikolelela kokutseya “oshili.” (1 Timoteus 2:4) Onkee ano, osha simana opo omalongo getu ga kale gi ikolelela kontseyo yashili yOmbiimbeli. Omolwashike mbela? Omolwaashoka ehupitho lyetu oli li moshiponga.
NKENE TU NA OKUYELEKANITHA SHOKA TWI ITAALA NOMBIIMBELI
Lesha omapulo gahamano taga landula nokutala nkene Ombiimbeli ye ga yamukula. Tala komanyolo gOmbiimbeli ngoka ga tothwa mo, nokutedhatedha komayamukulo ngoka. Ipula to ti: ‘Ongiini omalongo gongeleka yandje tandi vulu oku ga yelekanitha naashoka Ombiimbeli tayi longo?’
Omapulo ngaka omafupi otage ke ku kwathela wu ninge eyelekanitho ewanawa ndyoka inoo ninga nando onale. Mbela ino hala okuyelekanitha omalongo galwe gongeleka yeni naashoka Ombiimbeli tayi longo? Oonzapo dhaJehova odha halelela oku ku kwathela wu konakone oshili ya yela yOmbiimbeli. Omolwashike ito pula yimwe yomudho yi konakone nangoye Ombiimbeli oshali? Nenge wu ye kepandja lyetu lyokointaneta, jw.org/ng.